1. Ki mannyer Zeova ti revel son lekor avek Moiz? Akoz sa i enportan?

EN FWA, Bondye ti revel son lekor avek Moiz par proklanm Son non ek serten Son bann kalite. Zeova ti’n kapab met lanfaz lo son pwisans oubyen lasazes, me i ti koz lo son pitye ek konpasyon premye. (Lir Egzod 34:5-7.) Moiz ti anvi konnen si Zeova ti pou donn li son sipor. Alor, Zeova ti met lanfaz lo son bann kalite ki montre ki i vreman oule siport son bann serviter. (Egzod 33:13) Ki mannyer ou santi ler ou konnen ki Zeova i vreman enterese avek nou? Sa lartik pou konsantre lo konpasyon, ki vedir annan pitye pour bann ki pe soufer e annan sa dezir pour ed zot.

2, 3. (a) Akoz i pa drol pour bann imen annan konpasyon? (b) Akoz ou devret enterese avek sa ki Labib i dir lo konpasyon?

² Zeova i annan konpasyon e bann imen in ganny kree dan son resanblans. Alor i normal ki bann imen i enterese avek lezot. Menm bann ki pa konn Zeova, i souvandfwa demontre konpasyon. (Zenez 1:27) Dan Labib  i annan plizyer resi konsernan bann dimoun ki ti demontre konpasyon. Par egzanp, ler Salomon ti anvi konnen lekel ant de madanm ki ti manman en pti baba, i ti donn lord pour koup li an de. Vre manman sa pti baba ti annan konpasyon pour li, alor i ti sipliy lerwa pour donn sa lot madanm sa pti baba. (1 Lerwa 3:23-27, NWT) En lot dimoun ki ti demontre konpasyon i fiy Faraon. Ler i ti vwar Moiz ki ti ankor en pti baba, i ti konnen ki i ti en Ebre e ki i ti sipoze ganny touye. Me “i ti annan konpasyon pour li” e i ti deside pour elve li konman son garson.​—Egzod 2:5, 6, NWT.

³ Akoz nou devret aprann plis lo konpasyon? Parski Zeova i anvi nou imit li. (Efezyen 5:1) Menm si nou’n ganny kree avek sa abilite pour demontre konpasyon, nou annan sa tandans pour egois akoz nou lenperfeksyon. Par ler i pa fasil pour deside si nou pou ed lezot ouswa zis konsantre lo nou prop lekor. Kwa ki pou ed nou annan plis lentere dan lezot? Pour konmanse, annou egzaminen ki mannyer Zeova ek lezot in demontre konpasyon. Apre, nou pou vwar ki mannyer nou kapab imit konpasyon Zeova e akoz i bon pour nou fer sa.

4. (a) Akoz Zeova ti anvoy bann lanz Sodonm? (b) Ki nou kapab aprann avek sa ki fanmir Lot ti pas ladan?

⁴ Dan Labib i annan plizyer legzanp kot Zeova in demontre konpasyon. Par egzanp, mazin sa ki i ti fer pour Lot. Lot ti en zonm drwat ki “son lespri ti fatige en kantite” akoz bann dimoun imoral ki ti reste Sodonm ek Gomor. Sa bann dimoun ti napa respe pour Bondye e Zeova ti deside ki zot ti merit lanmor. (2 Pyer 2:7, 8) Zeova ti anvoy bann lanz pour dir Lot ki sa de lavil ti pou ganny detrir e ki i ti bezwen sove. Labib i dir: “Lot ti ezite. Alor, sa bann [lanz] ti atrap Lot, son fanm ek son de fiy par lebra e anmenn zot an deor lavil, akoz [Zeova] ti pran pitye pour li.” (Zenez 19:16) Zis parey Zeova ti konpran sityasyon Lot, nou kapab asire ki i konpran tou bann difikilte ki nou pas ladan.​—Izai 63:7-9; Zak 5:11; 2 Pyer 2:9.

5. Ki mannyer Parol Bondye i ansenny nou pour demontre konpasyon?

⁵ Zeova i’n osi ansenny son pep pour demontre konpasyon. Mazin lo en lalwa ki i ti donn pep Izrael. Si en dimoun ti pret larzan, sa enn ki ti’n pret li larzan ti kapab pran lenz sa dimoun konman en garanti ki i ti pou rann li son larzan. (Lir Egzod 22:26, 27.) Me sa enn ki’n pret larzan ti bezwen rann sa lenz avan soley kouse pour ki sa dimoun i a kapab sof li pandan lannwit. Petet en dimoun ki ti napa konpasyon pa ti pou anvi rann  sa lenz, me Zeova ti ansenny son pep pour demontre konpasyon. Ki sa prensip ki sa lalwa i baze lo la i ansenny nou? Pa zanmen inyor en Kretyen ki bezwen led. Ler nou kapab ed en frer oubyen en ser ki pe soufer, nou fer li akoz nou anvi.​—Kolosyen 3:12; Zak 2:15 16; lir 1 Zan 3:17.

6. Ki nou kapab aprann avek konpasyon Zeova pour bann Izraelit ki ti fer pese?

⁶ Zeova ti annan konpasyon pour son pep menm ler zot ti fer pese kont li. Nou lir: “[Zeova], Bondye zot zanset, ti konstaman anvoy son bann mesaze kot zot, akoz i ti pran pitye pour zot e pour son tanp kot i reste.” (2 Kronik 36:15) Pareyman, nou devret annan konpasyon pour bann ki pa ankor konn Zeova me ki ankor kapab repantir e vin son zanmi. Zeova pa anvi ki personn i ganny detrir pandan sa zizman ki pe vini. (2 Pyer 3:9) Alor, vi ki i ankor annan letan, nou anvi anons mesaz lavertisman Bondye avek tou dimoun ki nou kapab e ed otan dimoun posib pour benefisye avek son konpasyon.

7, 8. Akoz en fanmir ti krwar ki Zeova ti’n demontre konpasyon anver zot?

⁷ Ozordi, plizyer serviter Zeova in eksperyans son konpasyon. Par egzanp, pandan bann lannen 1990 an Bozni, diferan group etnik ti pe lager e touy kanmarad. En fanmir ki ti annan en pti garson 12 an ki nou pou apel li Milan ti pe reste dan sa pei. Milan, son frer, son paran ek lezot Temwen ti pe vwayaz dan bis sorti Bozni pour al Laserbi. Zot ti pe al en lasanble trwa zour kot paran Milan ti pou batize. Ler zot ti ariv lo frontyer, bann solda ti remarke ki fanmir Milan ti sorti dan en lot group etnik, alor zot ti fer sa fanmir debarke. Apre, zot ti les lezot frer ek ser ki ti dan bis kontinyen zot vwayaz. Bann solda ti gard sa fanmir pour de zour. Finalman sa zofisye ansarz ti demann sa zofisye ki pli o ki li, ki i pou fer avek sa fanmir. Sa fanmir ti lanmenm la o bor e zot ti tann sa zofisye ki pli o dir: “Zis anmenn zot deor e fiziye zot!”

⁸ Anmezir ki bann solda ti pe koze, de dimoun ti vin kot sa fanmir. Zot ti dir dousman ki zot ti bann Temwen e ki bann frer dan bis ti’n dir zot tou sa ki ti’n arive. Sa de Temwen ti dir Milan ek son frer anbark dan zot loto pour travers frontyer parski bann solda pa pe tyek dokiman bann zanfan. Milan ti sitan per ki i pa ti konnen si i pou riye oubyen plere. Apre sa, bann frer ti dir zot paran pas par deryer sa stasyon e zwenn zot lo lot kote lafrontyer. Son paran ti dir sa de frer, “Eski zot krwar ki sa bann solda pou zis les nou ale koumsanmenm?” Me anmezir ki zot ti ale, i paret ki bann solda pa ti ni menm vwar zot. Milan ek son frer ti zwenn zot paran lo lot kote lafrontyer e zot ti al zot lasanble. Zot ti konvenki ki Zeova ti’n reponn zot lapriyer! Nou konnen atraver Labib ki i pa toultan ki Zeova i direkteman protez son bann serviter dan sa fason. (Akt 7:58-60) Me dan sa sityasyon, Milan  ti dir: “Pour mwan i konmsi bann lanz ti fer sa bann solda pa vwar kler e Zeova ti sov nou.”​—Psonm 97:10.

9. Ki mannyer Zezi ti santi anver bann lafoul ki ti swiv li? (Vwar portre o konmansman sa lartik.)

⁹ Zezi ti en bon legzanp lo demontre konpasyon. I ti pran pitye pour bann dimoun ler i ti vwar ki “zot ti pe ganny maltrete e rezete parey mouton ki napa berze.” Alor, ki i ti fer? “I ti konmans ansenny zot en kantite keksoz.” (Matye 9:36; lir Mark 6:34.) Par kont, bann Farizyen ti napa okenn konpasyon e zot pa ti anvi ed bann dimoun. (Matye 12:9-14; 23:4; Zan 7:49) Parey Zezi, eski ou vreman anvi ed bann dimoun e ansenny zot lo Zeova?

10, 11. Eski i toultan apropriye pour demontre konpasyon? Eksplike.

¹⁰ Sa pa vedir ki i toultan apropriye pour demontre konpasyon. Par egzanp, Lerwa Sail ti’n kapab panse ki i ti pe demontre konpasyon ler i pa ti touy Agag ki ti lerwa bann Amalekit e en lennmi pep Bondye. Deplis, Sail pa ti touy tou zannimo bann Amalekit. Me Zeova ti’n dir Sail touy tou bann Amalekit ek tou zot zannimo. Akoz dezobeisans Sail, Zeova ti rezet li konman lerwa. (1 Samyel 15:3, 9, 15) Zeova i sa Ziz ki drwat. I kapab vwar dan leker bann dimoun e i konnen kan ki i pa apropriye pour demontre konpasyon. (Lamantasyon 2:17; Ezekyel 5:11) Byento i pou anmenn zizman lo tou bann ki refize obei li. (2 Tesalonisyen 1:6-10) Sa pa pou en letan pour Zeova demontre konpasyon anver bann move dimoun. O kontrer, par detri sa bann move dimoun, i pou demontre konpasyon anver bann ki drwat e i pou sov zot.

¹¹ Byensir, pa nou ki zize lekel ki devret viv ouswa mor. O kontrer, nou bezwen fer tou sa ki nou kapab pour ed bann dimoun la konmela. Dan ki serten fason pratik nou kapab demontre konpasyon anver lezot? La detrwa sizesyon.

12. Ki mannyer ou kapab demontre konpasyon dan lafason ki ou tret lezot?

¹² Ed lezot dan lavi toulezour. Zeova i ekspekte ki tou Kretyen i demontre konpasyon anver zot prosen e zot frer ek ser. (Zan 13:34, 35; 1 Pyer 3:8) En definisyon pour konpasyon i “soufer ansanm.” En dimoun ki demontre konpasyon i esey ed bann ki pe soufer. Alor, nou devret rod bann fason pour ed lezot, petet par fer bann pti louvraz oubyen par rann zot en servis.​—Matye 7:12.

13. Ki pep Bondye i fer apre en dezas natirel?

¹³ Partisip dan travay sekour. Ler nou vwar dimoun pe soufer apre en dezas, nou anvi demontre konpasyon  anver zot. Pep Zeova i byen koni konman bann dimoun ki kontan pour ede dan sa bann sityasyon. (1 Pyer 2:17) Par egzanp, en ser Zaponnen ti reste dan en landrwa ki ti ganny andomaze par en tranblemandter ek tsounami an 2011. I ti dir ki i ti “vreman ganny ankouraze e rekonforte” ler i ti vwar bann volonter sorti dan diferan landrwa Zapon ek lezot pei vin repar bann lakaz ek Lasal Rwayonm. I ti kontinyen: “Sa leksperyans ti ed mwan konpran ki Zeova i enterese avek nou e ki bann Temwen i enterese avek kanmarad. Dan lemonn i annan en kantite frer ek ser ki pe priy pour nou.”

14. Ki mannyer ou kapab ed bann malad ek aze?

¹⁴ Ed bann malad ek aze. Ler nou vwar dimoun pe soufer akoz maladi ek lavyeyes, nou annan konpasyon pour zot. Nou enpasyan pour vwar sa bann problenm disparet, alor nou priye ki Rwayonm Bondye i vini. Antretan, nou fer tou sa ki nou kapab pour ed bann malad ek aze. En ekriven ti ekri ki en zour, son manman ki ti annan maladi Alzheimer, ti fer son bezwen dan son lenz. Anmezir i ti pe netway son lekor, laklos laport ti sonnen. De Temwen ki ti abitye vizit li ki ti kot laport. Sa de ser ti demande si zot kapab ed li. Sa madanm ti dir:  “I anbarasan, me wi.” Sa de ser ti ed sa madanm pour netway li. Apre zot ti fer en tas dite pour li e zot ti reste pour koz avek li. Son garson ti byen rekonesan e i ti dir ki bann Temwen i “pratik sa ki zot ansennyen.” Eski ou konpasyon pour bann malad ek aze i pous ou pour fer tou sa ki ou kapab pour ed zot?​—Filipyen 2:3, 4.

15. Ki mannyer nou travay predikasyon i ed lezot?

¹⁵ Ed lezot pour konn Zeova. Sa pli bon fason pour ed bann dimoun i ansenny zot lo Bondye ek son Rwayonm. En lot fason se ed zot pour vwar ki ler zot obei standar Zeova, zot pou ganny bokou byenfe. (Izai 48:17, 18) Predikasyon i en fason merveye pour onor Zeova e demontre konpasyon anver lezot. Eski ou kapab fer plis dan predikasyon?​—1 Timote 2:3, 4.

16. Ki mannyer nou benefisye ler nou demontre konpasyon?

¹⁶ Bann eksper dan lasante mantal i dir ki nou lasante ek nou relasyon avek lezot i kapab amelyore ler nou demontre konpasyon. Ler ou ed bann ki pe soufer ou pou pli ere, annan plis lespwar, pa santi ou sitan tousel e pli pozitif. Ler ou demontre konpasyon, sa i benefisye ou. (Efezyen 4:31, 32) Ler lanmour i pous nou pour ed lezot, nou annan en bon konsyans akoz nou konnen ki nou pe fer sa ki Zeova i anvi nou fer. Ler nou annan konpasyon, sa pou ed nou pour vin bann pli bon paran, konzwen ek zanmi. Deplis, bann dimoun ki demontre konpasyon anver lezot i souvandfwa ganny led ler zot bezwen.​—Lir Matye 5:7; Lik 6:38.

17. Akoz ou anvi demontre konpasyon?

¹⁷ Menm si nou benefisye ler nou demontre konpasyon, sa rezon pli enportan pour demontre konpasyon i ki nou anvi imit Zeova e glorifye li. Zeova i Sours lanmour ek konpasyon. (Proverb 14:31) I’n kit en legzanp parfe pour nou. Alor, annou fer tou sa ki nou kapab pour imit Bondye par demontre konpasyon. Si nou fer sa, nou pou vin pli pros avek nou bann frer ek ser e nou pou annan en pli bon relasyon avek bann dimoun otour nou.​—Galat 6:10; 1 Zan 4:16.