1. Zis avan son lanmor, ki Zeova ti fer Pyer fer?

 ZAPOT Pyer ti konnen ki i ti pros pour mor. I ti reste fidel pour plizyer dizenn lannen. Pandan sa letan, i ti mars avek Zezi, i ti konmans anons sa bon nouvel dan bann nouvo teritwar e i ti servi lo konsey direkter. Me travay Pyer pa ti fini la. Ver lannen 62 a 64, i ti ganny enspire pour ekri de let, sa i premye e dezyenm let ki Pyer ti ekri ki dan Labib. I ti anvi ki sa de let i ankouraz bann Kretyen apre son lanmor.—2 Pyer 1:​12-15.

2. Akoz bann let ki Pyer ti ekri ti ganny ekrir dan sa moman apropriye?

² Pyer ti ekri sa de let ler bann Kretyen sa letan ti “sagrinen akoz bann diferan leprev.” (1 Pyer 1:6) Bann move dimoun ti pe konmans ansenny bann fo lansennyman e anmenn bann move kondwit dan kongregasyon. (2 Pyer 2:​1, 2, 14) Bann Kretyen ki ti reste Zerizalenm ti pou fer fas avek “lafen tou keksoz,” andotmo bann larme Romen ti pou detri Zerizalenm e osi sistenm Zwif sa letan. (1 Pyer 4:7) Bann let ki Pyer ti ekri ti pou vreman ed bann Kretyen pour andir bann leprev e met zot pare pour fer fas avek bann leprev ki ti pou arive a lavenir. b

3. Akoz nou devret etidye bann let ki Pyer ti ekri?

³ Menm si Pyer ti ekri sa bann let pour bann Kretyen dan premye syek, Zeova ti fer sir ki sa de let i form parti Labib. Alor nou osi nou kapab benefisye avek sa de let. (Rom. 15:4) Nou pe viv dan en lemonn ki promot bann move kondwit e nou fer fas avek bann leprev ki  kapab fer li difisil pour servi Zeova. Deplis, nou pou byento fer fas avek en gran ladetres ki pou pli grav ki sa ki ti arive avek bann Zwif. Alor nou pou ganny bann bon rapel dan sa de let ki Pyer ti ekri. Sa pou ed nou pour kontinyen esper zour Zeova, pour pa per sa ki lezot i panse e pour kontan kanmarad plis ankor. Sa bann rapel pou osi ed bann ansyen pour pran byen swen avek bann frer ek ser dan kongregasyon.

4. Parey 2 Pyer 3:​3, 4 i dir, kwa ki ti pou kapab afebli nou lafwa?

⁴ Bann dimoun otour nou pa krwar dan bann profesi Labib. I kapab ki nou bann opozan i monk nou parski nou pe esper lafen sa lemonn depi bokou lannen. Serten ki kritik nou i dir ki lafen pa pou zanmen arive. (Lir 2 Pyer 3:​3, 4.) Ler nou tann dimoun dan predikasyon, kot travay oubyen nou bann manm fanmir dir sa, sa i kapab afebli nou lafwa. Me sa ki Pyer ti dir i kapab ed nou.

5. Kwa ki pou kapab ed nou pour annan en bon pwennvi lo lafen sa move lemonn? (2 Pyer 3:​8, 9)

⁵ I kapab paret ki Zeova i dousman pour met en lafen avek sa move lemonn. Me parol Pyer i kapab ed nou pour annan en bon pwennvi akoz i rapel nou ki lafason ki Zeova i konsider letan i vreman diferan avek lafason ki bann imen i konsider letan. (Lir 2 Pyer 3:​8, 9.) Pour Zeova, mil an i parey en zour. Zeova i pasyan e i pa oule ki personn i ganny detrir. Par kont, ler son zour zizman pou arive, sa move lemonn pou bezwen fini. Pa i vreman en gran privilez pour byen servi nou letan pour anons sa bon nouvel avek dimoun dan tou nasyon!

6. Ki mannyer nou kapab “toultan gard antet zour Zeova”? (2 Pyer 3:​11, 12)

⁶ Pyer i demann nou pour “toultan gard antet zour Zeova.” (Lir 2 Pyer 3:​11, 12.) Ki mannyer nou kapab fer sa? Nou pou bezwen medite, si posib toulezour, lo bann benediksyon ki nou pou gannyen dan sa nouvo lemonn. Esey imazin ou ler ou pou respir sa bon ler, manz bann bon manze, akeyir bann dimoun ki ou kontan ki pou ganny resisite e ler ou pou ansenny dimoun ki ti viv lontan lo ki mannyer bann profesi Labib in ganny akonplir. Ler ou medit lo la, sa pou ed ou pour kontinyen espere e pour asire ki lafen i pros pour arive. “Lefet ki [nou] konn sa davans,” nou “pa [pou] ganny antrennen” avek bann fo ansenyan.—2 Pyer 3:17.

7. Ki mannyer sa ki lezot i panse i kapab annan en lefe lo nou?

⁷ Ler nou kontinyen esper zour Zeova, nou ganny pouse pour anons sa bon nouvel avek lezot. Toudmenm, parfwa nou kapab ezite pour koz lo nou lafwa. Akoz? Par ler nou kapab per sa ki lezot i panse. Sanmenm ki ti arive avek Pyer. Sa zour swar ki Zezi ti pe ganny zize, Pyer ti per pour dir ki i ti enn parmi bann disip Zezi e plizyer fwa i ti dir ki i pa konn li. (Mat. 26:​69-75) Toudmenm, Pyer li menm ti kapab dir avek lardyes: “Pa bezwen enkyet ni per sa ki fer lezot dimoun per.” (1 Pyer 3:14) Sa ki Pyer ti dir i montre ki nou kapab aret per sa ki lezot i panse.

8. Kwa ki kapab ed nou pour pa per sa ki lezot i panse? (1 Pyer 3:15)

 ⁸ Kwa ki kapab ed nou pour pa per sa ki lezot i panse? Pyer i dir: “Dan zot leker, aksepte Kris konman Senyer e konman sa enn ki sen.” (Lir 1 Pyer 3:15.) Nou kapab toultan rapel ki Zezi i nou Lerwa e ki i annan bokou pouvwar. Si nou strese oubyen nou per ler nou ganny en loportinite pour anons sa bon nouvel, mazin nou Lerwa. Imazin li pe dirize dan lesyel avek sa kantite lanz. Pa oubliye ki i’n “ganny tou lotorite dan lesyel e lo later” e ki i pou “avek [nou] tou le zour ziska lafen sa lemonn.” (Mat. 28:​18-20) Pyer i konsey nou pour nou “touzour pare” pour defann nou lafwa. Eski ou ti pou kontan donn en temwannyaz kot travay, lekol oubyen dan lezot landrwa? Reflesir davans lo kan ou ti kapab fer sa e prepar sa ki ou kapab dir. Priy pour ganny sa kouraz akoz ou konnen ki Zeova pou ed ou sirmont ou lafreyer.—Akt 4:29.

9. Ki mannyer Pyer pa ti demontre lanmour dan en sityasyon? (Vwar portre.)

⁹ Pyer ti aprann ki mannyer pour kontan lezot. I ti la ler Zezi ti dir: “Mon pe donn zot en nouvo komannman,  kontan kanmarad. Parey mwan mon’n kontan zot, zot osi kontan kanmarad.” (Zan 13:34) Malgre sa, pli tar Pyer pa ti manz avek bann frer ki pa ti Zwif akoz i ti per sa ki lezot Kretyen Zwif ti pou panse. Zapot Pol ti dir ki Pyer ti azir dan en “fason ipokrit.” (Gal. 2:​11-14) Pyer ti aksepte konsey Pol e i ti aprann en leson. Dan tou le de son let, i ti dir ki nou devret pa selman dir ki nou kontan lezot me montre ki nou kontan zot.

10. Ki mannyer nou kapab “senserman kontan kanmarad parey bann frer ek ser”? Eksplike. (1 Pyer 1:22)

¹⁰ Pyer ti dir ki nou devret “senserman kontan kanmarad parey bann frer ek ser.” (Lir 1 Pyer 1:22.) Nou kontan lezot dan sa fason akoz nou “obei laverite.” Enn sa bann lansennyman i ki “Bondye pa fer lapreferans.” (Akt 10:​34, 35) Nou pa kapab obei bann komannman Zezi konsernan lanmour si nou kontan zis serten dan kongregasyon me pa tou dimoun. I vre ki parfwa, nou kapab santi nou pli pros avek serten parey i ti osi leka avek Zezi. (Zan 13:23; 20:2) Me Pyer i rapel nou ki nou devret fer zefor pour kontan kanmarad parey bann frer ek ser, andotmo parey en fanmir.—1 Pyer 2:17.

11. Ki sa vedir kontan “kanmarad en kantite avek tou [nou] leker”?

¹¹ Pyer i demann nou pour “kontan kanmarad en kantite avek tou [nou] leker.” Dan sa konteks, kontan “en kantite” i vedir ki nou agrandi sa lanmour ki nou ti pou normalman annan. Par egzanp, ki nou pou fer si en frer oubyen en ser in ofans oubyen bles nou? Petet nou ti pou anvi rann mal pour mal dan plas demontre lanmour. Pyer ti aprann avek Zezi ki ler nou rann mal pour mal, sa pa fer plezir Bondye. (Zan 18:​10, 11) Pyer ti ekri: “Pa rann mal pour mal, lensilt pour lensilt, me plito, fer dibyen pour zot.” (1 Pyer 3:9) Si nou kontan kanmarad en kantite, sa pou fer nou demontre labonte ek konpasyon anver bann ki’n ofans nou.

12. (a) Si nou kontan lezot en kantite, ki sa pou pous nou pour fer? (b) Parey nou’n vwar dan sa video Preserve the Precious Gift of Unity, ki ou anvi fer zefor pour fer?

¹² Dan son premye let, Pyer ti servi sa lekspresyon “kontan kanmarad en kantite.” Sa kalite lanmour i pa kouver enn de fot, me i “kouver en kantite pese.” (1 Pyer 4:8) Petet Pyer ti rapel sa leson ki i ti’n aprann avek Zezi plizyer lannen oparavan lo lenportans pardonnen. Petet Pyer ti krwar ki i en bon dimoun akoz i ti pare pour pardonn “set fwa,” me Zezi ti dir li e nou osi, ki nou devret pare pour pardonnen ziska “77 fwa,” setadir ki nou devret toultan pare pour pardonn lezot. (Mat. 18:​21, 22) Si ou vwar li difisil pour aplik sa konsey, pran kouraz! Nou tou nou enparfe e parfwa nou kapab vwar li difisil pour pardonn lezot. Me sa ki enportan, i fer sa ki neseser pour pardonn lezot e fer lape. c

13. Akoz i kapab difisil pour bann ansyen pran swen avek bann frer ek ser?

¹³ Pyer pa ti kapab oubliye sa ki Zezi ti ansenny li apre son rezireksyon ler i ti dir li: “Pran swen avek mon bann pti  mouton.” (Zan 21:16) Si ou en ansyen, ou konnen ki sa parol i aplik pour ou osi. I pa toultan fasil pour en ansyen trouv letan pour desarz sa responsabilite enportan. Bann ansyen i bezwen premyerman pran swen avek zot fanmir dan domenn materyel, emosyonnel e spirityel. Zot osi bezwen montre legzanp dan predikasyon e osi prepar bann diskour pour renyon ek lasanble. Serten i osi ede dan bann Komite Lyezon Lopital oubyen dan departman Local Design/Construction. Bann ansyen i vreman okipe!

14. Kwa ki kapab motiv bann ansyen pour pran swen avek kongregasyon? (1 Pyer 5:​1-4)

¹⁴ Pyer ti demann lezot ansyen pour “pran swen avek troupo Bondye.” (Lir 1 Pyer 5:​1-4.) Si ou en ansyen, nou konnen ki ou kontan ou bann frer ek ser e ki ou anvi pran swen avek zot. Toudmenm, i kapab arive ki ou santi ou fatige oubyen tro okipe pour desarz sa responsabilite. Ki ou kapab fer? Dir Zeova ki mannyer ou santi. Pyer ti ekri: “Si en dimoun i servi lezot, i devret depan lo lafors ki Bondye i donnen.” (1 Pyer 4:11) Ou bann frer ek ser i kapab fer fas avek bann problenm ki pa pou kapab ganny sirmonte dan sa lemonn. Me pa oubliye ki Zezi Kri ki “sef berze” i kapab ed zot plis ki nou nou kapab. I kapab fer sa la konmela e osi dan sa nouvo lemonn. Bondye i zis demann bann ansyen pour kontan zot bann frer ek ser, pour pran swen avek zot e pour “vin en legzanp pour troupo.”

15. Ki mannyer en ansyen i pran swen avek bann frer ek ser? (Vwar portre.)

¹⁵ William, en frer ki en ansyen depi bokou lannen, i konpran lenportans pour pran swen avek bann frer ek ser. Ler pandemi COVID-19 ti konmanse, li ek lezot ansyen ti fer li en priyorite pour koz avek sak dimoun dan zot group tou le semenn. I dir: “Bokou parmi bann frer ek ser ti tousel kot lakour e zot ti kapab vitman annan bann santiman negatif.” Ler en dimoun i pas dan problenm, William i ekout byen pour  konpran son problenm e sa ki i bezwen. Apre, i fer bann resers pour trouv bann video oubyen lezot lartik pour ed sa frer oubyen sa ser. I dir: “Nou bezwen pran swen avek bann frer ek ser plis ki zanmen oparavan. Nou fer bokou zefor pour ed dimoun konn Zeova e nou osi bezwen fer bokou zefor pour pran swen avek kongregasyon pour ed bann mouton Zeova reste dan laverite.”

16. Ki mannyer nou kapab aplik bann leson ki nou’n aprann dan bann let ki Pyer ti ekri?

¹⁶ Nou’n koz lo zis detrwa leson ki nou kapab aprann dan sa de let ki Pyer ti ganny enspire pour ekri. Petet ou’n vwar en keksoz ki ou kapab amelyore. Par egzanp, eski ou anvi medit pli souvan lo bann benediksyon ki sa nouvo lemonn pou anmennen? Eski ou ti pou kontan donn temwannyaz kot travay, lekol oubyen dan lezot sityasyon? Eski ou vwar bann fason ki ou kapab demontre plis lanmour anver ou bann frer ek ser? Si ou en ansyen, eski ou determinen pour pran swen avek kongregasyon Zeova volonterman e avek devouman? Petet ou pou vwar ki ou annan serten febles me pa bezwen dekouraze. “Senyer i bon” e i kapab ed ou amelyore. (1 Pyer 2:3) Pyer i asir nou: “Bondye . . . pou fini zot formasyon li menm. I pou fer zot ferm, i pou fer zot for e i pou met zot lo en fondasyon solid.”—1 Pyer 5:10.

17. Ki byenfe nou pou gannyen si nou persevere e nou les Zeova form nou?

¹⁷ Parfwa, Pyer ti santi ki i pa ti alaoter pour servi o bor Zezi. (Lik 5:8) Me avek led ek lanmour Zeova ek Zezi, i ti kontinyen swiv Zezi fidelman. Alor Pyer ti ganny aprouve pour “antre dan Rwayonm eternel nou Senyer ek Sover Zezi Kri.” (2 Pyer 1:11) Pa sa i en zoli rekonpans! Si ou persevere parey Pyer e ou les Zeova form ou, ou osi ou pou kapab ganny lavi eternel. Ou pou “ganny [ou] delivrans e [ou] lafwa pou’n atenn son bi.”—1 Pyer 1:9.