1. Ki kestyon nou kapab ganny demande kot travay oubyen kot lekol?

 KI MANNYER ou santi ler en koleg travay oubyen en kanmarad lekol i demann ou konsernan ou krwayans? Eski ou per? Laplipar nou i santi koumsa. Me en kestyon koumsa i kapab ed nou konpran ki sa dimoun pe mazinen oubyen ki i krwar ladan e sa pou donn nou en loportinite pour partaz sa bon nouvel avek li. Parfwa en dimoun i kapab demann en kestyon parski i pa dakor avek nou oubyen i anvi argimante. Sa pa devret sirprann nou parski serten dimoun in ganny bann fo lenformasyon konsernan nou krwayans. (Akt 28:22) Osi, nou pe viv dan “bann dernyen zour” ki en letan kot en kantite dimoun pa “tonm dakor avek kanmarad” e zot menm “kriyel.”—2 Tim. 3:​1, 3.

2. Akoz nou anvi demontre ladouser?

² Petet ou kapab mazinen: ‘Ki mannyer mon kapab kalm e an menm tan zantiy ler en dimoun i anvi argimant avek mwan konsernan mon krwayans?’ Kwa ki pou ed ou? Ou pou bezwen annan ladouser. En dimoun ki annan ladouser pa ankoler vitman e i annan kontrol lo son lekor ler lezot i esey fer li ankoler oubyen ler i pa asire ki i pou dir. (Prov. 16:32) Byensir i pa toultan fasil pour demontre ladouser. Ki mannyer ou kapab devlop sa kalite? Ki mannyer ou kapab reponn avek ladouser ler en dimoun i anvi argimant avek ou konsernan ou krwayans? Si ou en paran, ki mannyer ou kapab ed ou zanfan pour aprann ki mannyer pour defann son krwayans avek ladouser? Annou vwar larepons sa bann kestyon.

3. Akoz nou kapab dir ki ler nou annan ladouser nou for e ladouser pa en febles? (2 Timote 2:​24, 25)

³ En dimoun ki annan ladouser i en dimoun ki for. Ladouser pa en febles. Ou bezwen annan lafors pour ou kapab reste kalm ler ou pe fer fas avek en sityasyon difisil. Ladouser i  en laspe “fri lespri sen.” (Gal. 5:​22, 23) Sa mo Grek pour “ladouser” i parfwa ganny servi pour dekri en seval ki’n ganny donte. Imazin en seval ki’n ganny donte. Menm si aprezan i kalm, i ankor for. Konman bann imen, ki mannyer nou kapab devlop ladouser e an menm tan nou en dimoun for? Nou pa kapab fer li lo nou menm. Nou bezwen demann Zeova son lespri sen dan lapriyer e demann li pour ed nou devlop sa zoli kalite. I annan en kantite dimoun ki’n reisi devlop ladouser. Par egzanp, en kantite frer ek ser in demontre ladouser ler dimoun in esey argimant avek zot. Sa in ed lezot pour annan en pli bon pwennvi lo Temwen Zeova. (Lir 2 Timote 2:​24, 25.) Ki mannyer ou kapab devlop ladouser e fer li vin enn parmi ou bann pwen for?

4. Ki nou kapab aprann avek legzanp Izaak konsernan annan ladouser?

⁴ Dan Labib, i annan en kantite resi ki montre ki ladouser i en kalite ki vreman presye. Annou vwar legzanp Izaak. Ler i ti reste Gerar, ki en landrwa dan teritwar bann Filisten, son bann vwazen ti konmans zalou li e zot ti bous bann pwi ki serviter son papa ti’n fouye. Olye lager pour sa bann pwi, Izaak ti al reste pli lwen e i ti fouy lezot pwi. (Zen. 26:​12-18) Me bann Filisten ti dir ki sa bann pwi ki Izaak ti’n fek fouye ti osi pour zot. Kantmenm sa, Izaak ti gard lape. (Zen. 26:​19-25) Kwa ki ti ed li pour demontre ladouser menm ler i paret ki lezot ti anvi fer li ankoler? Nou kapab asire ki i ti’n vwar legzanp son paran e i ti’n aprann en kantite avek lafason ki Abraam ti gard lape e osi avek sa “leta lespri trankil e dous” ki Sara ti annan.—1 Pyer 3:​4-6; Zen. 21:​22-34.

5. Ki legzanp ki montre ki bann paran Kretyen i kapab ansenny zot zanfan lo akoz i enportan pour demontre ladouser?

⁵ Paran ou kapab asire ki ou osi ou kapab ansenny ou zanfan ki ladouser i en kalite ki presye. Annou vwar legzanp Maxence ki annan 17 an. Maxence ti rankontre bann dimoun ki ankoler kot lekol e dan predikasyon. Avek pasyans, son paran ti ed li pour devlop ladouser. Paran Maxence i dir: “Aprezan, Maxence i konpran ki ler en dimoun i esey fer ou ankoler, i fasil pour reazir avek lakoler e dan en fason vyolan. Me en dimoun ki vreman for, i annan kontrol lo son lekor.” Erezman, Maxence in aprann pour demontre ladouser.

6. Ki mannyer lapriyer i kapab ed nou pour demontre plis ladouser?

⁶ Ki nou kapab fer ler lezot i esey fer nou ankoler, par egzanp ler en dimoun i dir bann move keksoz lo Zeova oubyen lo Labib? Nou devret demann Zeova son lespri sen ek son lasazes pour nou kapab reponn avek ladouser. Me ki nou pou fer si pli tar nou realize ki nou pa’n reponn parey nou ti’n devret reponn? Nou kapab koz avek Zeova ankor lo sa sityasyon e reflesir lo ki mannyer nou kapab fer pli byen laprosenn fwa. An retour, Zeova pou donn nou son lespri sen pour ki nou kapab kontrol nou lakoler e demontre ladouser.

7. Ki mannyer ler nou rapel serten verse parker, sa i kapab ed nou dan bann sityasyon difisil? (Proverb 15:​1, 18)

⁷ Dan Labib, i annan bann verse ki kapab ed nou ler nou vwar li difisil pour koz dan en fason zantiy. Lespri sen Bondye i kapab ed nou rapel sa bann verse. (Zan 14:26) Par egzanp, i annan plizyer prensip dan liv Proverb ki kapab ed nou demontre ladouser. (Lir Proverb 15:​1, 18.) Sa liv Labib i osi montre nou akoz i bon pour nou reste kalm dan bann sityasyon difisil.—Prov. 10:19; 17:27; 21:23; 25:15.

8. Akoz nou devret reflesir lo rezon akoz en dimoun in demann nou en kestyon konsernan nou krwayans?

⁸ Ler nou annan bon zizman, sa osi i kapab ed nou pour annan ladouser. (Prov. 19:11) En dimoun ki annan bon zizman i annan kontrol lo son lekor ler lezot i kestyonn li konsernan son krwayans. Annou vwar en legzanp. Ler nou vwar en iceberg nou vwar zis sa pti bout ki par lao delo, me pli gro bout sa iceberg i anba delo. Dan menm fason ler en dimoun i demann nou en kestyon souvandfwa nou pa konnen akoz i pe demann nou sa kestyon. Alor avan nou reponn i ti pou byen ki nou realize ki nou pa vreman konnen kwa ki motiv sa dimoun pour demann sa kestyon.—Prov. 16:23.

9. Ki mannyer Gideonn ti demontre bon zizman ek ladouser ler i ti koz avek bann zonm Efraim?

⁹ Annou vwar ki mannyer Gideonn ti reponn bann zonm Efraim. Bann zonm Efraim ti ankoler e zot ti demann Gideonn akoz ki i pa ti’n apel zot pli boner pour zot vin lager avek bann lennmi Izrael. Akoz zot ti sitan ankoler? Petet zot ti ofanse. Me Gideonn ti annan bon zizman, i ti esey konpran akoz ki zot ti sitan ankoler e i ti reponn zot avek ladouser. Ki ti arive apre? Larepons ki i ti donn zot ti fer zot “aret ankoler.”—Ziz 8:​1-3.

10. Kwa ki pou ed nou pour konnen ki mannyer pour reponn bann dimoun ki kestyonn nou krwayans? (1 Pyer 3:15)

 ¹⁰ Petet en koleg travay oubyen kanmarad lekol in kestyonn ou konsernan akoz nou obei bann standar Labib. Nou pou fer nou mye pour defann nou krwayans e an menm tan montre ki nou respekte lopinyon sa dimoun. (Lir 1 Pyer 3:15) Olye vwar sa kestyon konman en latak, reflesir lo lafason ki son kestyon i kapab ed ou konnen kwa ki enportan pour li. Nenport rezon akoz en dimoun i demann en kestyon, i ti pou byen ki nou reponn li dan en fason ki zantiy. I kapab ki nou larepons i fer li reflesir lo son pwennvi. Menm si i paret brit, nou toultan anvi reponn dan en fason zantiy.—Rom. 12:17.

11-12. (a) Ki nou kapab mazin lo la avan nou reponn en kestyon difisil? (Vwar portre.) (b) Ki mannyer en kestyon ki en dimoun i demande i kapab vin en loportinite pour annan en konversasyon amikal? Donn en legzanp.

¹¹ Meton en koleg travay i demann ou akoz nou pa selebre lanniverser nesans. Avan ler ou reponn, reflesir lo sa: Eski i krwar ki Temwen Zeova pa anmize? Oubyen eski i santi ki si ou pa selebre lanniverser nesans, sa pou gat sa bon lanmitye ki i annan dan travay. Petet premyerman nou kapab felisit nou koleg travay parski i enterese avek byennet lezot. Apre, asir li ki ou osi ou anvi ki i annan en bon latmosfer dan travay. Sa i kapab donn ou sa loportinite pour annan en bon konversasyon kot ou kapab eksplik li dan en fason zantiy sa ki Labib i dir konsernan lanniverser nesans.

¹² Nou kapab fer en keksoz en pe parey ler en dimoun i demann nou kestyon konsernan bann topik ki dimoun i kontan argimant lo la. En kanmarad lekol i kapab dir ki Temwen Zeova i devret sanz zot pwennvi lo omoseksyalite. Eski petet i dir sa parski i pa vreman konpran krwayans Temwen Zeova konsernan omoseksyalite? Oubyen eski i kapab ki i annan en zanmi oubyen fanmir ki en omoseksyel? Eski i krwar ki nou ay bann dimoun ki omoseksyel? I kapab ki nou pou bezwen asir li ki nou demontre lanmour anver tou dimoun e nou rekonnet ki sak dimoun i annan drwa pour fer son prop desizyon. b (1 Pyer 2:17) Petet apre sa nou pou kapab koz avek li lo sa ki Labib i dir e lo ki mannyer ler nou aplik sa ki Labib i dir, nou pou pli ere.

13. Ki mannyer ou kapab ed en dimoun ki krwar ki en dimoun ki krwar dan Bondye i bet?

¹³ Ler nou zwenn en dimoun ki vreman pa dakor avek nou krwayans, nou pa devret deswit krwar ki nou konnen ki i krwar ladan. (Tit 3:2) Par egzanp, ki ou pou fer si ou kanmarad lekol i dir ki i bet pour krwar dan Bondye? Eski ou devret krwar ki i krwar dan evolisyon e ki i konn en kantite lo sa size? Anfet i kapab ki i pe zis repet bann keksoz ki i’n tande. Olye konmans en diskisyon konsernan evolisyon, ou kapab dir en keksoz ki pou fer li reflesir lo la pli tar. Petet ou kapab montre li bann lartik konsernan kreasyon ki lo jw.org. Petet pli tar i pou anvi koz lo en lartik oubyen video ki i’n vwar lo jw.org. Ler nou demontre respe dan sa fason, sa i kapab motiv li pour anvi aprann plis konsernan sa ki Labib i dir.

14. Ki mannyer Niall ti byen servi nou sit Enternet pour ed en kanmarad lekol vwar ki sa ki i krwar lo Temwen Zeova, pa vre?

¹⁴ En zenn ki apel Niall ti servi nou sit Enternet pour montre ki sa ki dimoun i krwar lo Temwen Zeova, pa vre. I dir: “En dimoun dan mon laklas ti souvandfwa dir  ki mon pa krwar dan lasyans parski mon krwar dan sa ki en liv zistwar i dir olye krwar bann levidans.” Vi ki sa garson pa ti les Niall eksplik son krwayans, i ti ankouraz li pour al get sa seksyon “Lasyans ek Labib” ki lo jw.org. Pli tar, Niall ti remarke ki sa garson ti’n lir sa bann lenformasyon e ki i ti pare pour koz lo kreasyon. Petet ou osi ou kapab ganny menm rezilta.

15. Ki mannyer bann paran i kapab ed zot zanfan pour reponn avek ladouser ler zot kanmarad lekol i kestyonn zot konsernan zot krwayans?

¹⁵ Paran i kapab ansenny zot zanfan ki mannyer pour reponn avek ladouser ler dimoun i kestyonn zot konsernan zot krwayans. (Zak 3:13) Pandan ladorasyon fanmir, serten paran i fer zot zanfan practice ki mannyer pour reponn. Zot swazir bann topik ki dimoun i kontan koz lo la kot lekol, zot diskit lo la e montre ki mannyer pour reponn e apre zot ansenny zot zanfan ki mannyer pour koz avek ladouser.—Vwar sa bwat “ Led pour ou fanmir.”

16-17. Ki mannyer ler bann zenn i practice, sa i kapab ed zot?

¹⁶ Ler bann zenn i practice, sa i kapab ed zot pour konvenk zot lekor e pour pli byen kapab eksplik lezot konsernan zot krwayans. Dan sa seri lartik “Young People Ask” ki lo jw.org, i annan bann worksheets pour bann adolesan. Sa bann worksheets in ganny fer pour ed bann zenn pour vin pli konvenki ki sa ki zot krwar ladan i vre e pour ed zot prepar bann larepons dan zot prop mo. Ler en fanmir i etidye sa seri lartik ansanm, sa pou ed tou dimoun dan lafanmir pour aprann ki mannyer pour defann zot lafwa avek ladouser.

¹⁷ En zenn ki apel Matthew i eksplike ki mannyer ler i ti practice, sa ti ed li. Pandan letid lafanmir, Matthew ek son paran ti  souvan fer resers lo bann topik ki dimoun i kapab koz lo la dan laklas. I dir: “Nou esey mazin bann kestyon ki dimoun i kapab demande e nou practice ki mannyer pour reponn zot dapre bann resers ki nou’n fer. Ler mon annan bann rezon kler konsernan akoz mon krwar sa ki mon krwar, mon santi mwan konfidan e mon vwar li pli fasil pour demontre ladouser ler mon pe reponn lezot.”

18. Dapre Kolosyen 4:​6, ki i enportan pour nou fer?

¹⁸ Menm ler nou eksplik keksoz dan en fason kler e konvenkan, pa tou dimoun ki pou anvi aksepte sa ki nou dir. Me ler nou swazir byen nou mo e nou koz avek ladouser, sa i kapab ede. (Lir Kolosyen 4:6.) Ler nou koz avek en dimoun lo nou krwayans, sa i kapab ganny konpare avek ler nou pe anvoy en boul avek en dimoun. Nou kapab anvoy sa boul dousman oubyen anvoy for. Ler nou anvoy boul dousman, i tre probab ki sa lot dimoun pou kapab gobe e kontinyen zwe. Dan menm fason, si nou swazir byen nou mo e nou koz avek ladouser, sa i kapab fer en dimoun pli pare pour ekoute e kontinyen koz avek nou. Me si en dimoun i zis anvi argimante oubyen boufonn nou, i pa neseser pour nou kontinyen koz avek li. (Prov. 26:4) Me i tre probab ki laplipar dimoun pa koumsa e i kapab ki en kantite dimoun pou ekout nou.

19. Kwa ki devret motiv nou pour demontre ladouser ler nou pe defann nou krwayans?

¹⁹ I kler ki nou ganny en kantite byenfe ler nou aprann pour demontre ladouser. Priy Zeova pour donn ou sa lafors ki ou bezwen pour kontinyen demontre ladouser ler ou bezwen reponn bann kestyon konsernan bann topik ki dimoun i kontan argimant lo la oubyen bann keksoz ki dimoun i dir lo nou ki pa vre. Gard antet ki ler ou demontre ladouser, sa i kapab anpes en konversasyon vin en dispit ler sakenn i annan diferan lopinyon. Ler ou reponn avek ladouser e dan en fason respektab, sa i kapab motiv serten dimoun ki pe ekout ou pour sanz lafason ki zot konsider Temwen Zeova ek bann laverite ki dan Labib. Ou bezwen “touzour pare pour defann” ou krwayans e “fer li avek ladouser ek bokou respe.” (1 Pyer 3:15) Les ladouser fer ou vin for!