1. Ki mannyer Pyer ti santi apre ki Zezi ti’n fer en mirak pour ed zot tyonbo en kantite pwason?

 PYER ti’n lapes en lannwit antye e i pa ti’n ganny okenn pwason. Me Zezi ti dir li: “Avans kannot dan kre e pas ou lasenn pour atrap pwason.” (Lik 5:4) Pyer pa ti krwar ki i ti pou ganny pwason me i ti fer sa ki Zezi ti’n dir li. Pyer ek bann zonm ki ti pe travay avek li ti ganny en kantite pwason e lasenn ti konmans desire. Ler zot ti realize ki Zezi ti’n fek fer en mirak, zot ti “vreman etonnen.” Pyer ti dir: “Senyer, sorti o bor mwan parski mon en dimoun ki fer pese.” (Lik 5:​6-9) I tre probab ki Pyer ti santi ki i pa diny pour debout o bor Zezi.

2. Akoz i bon pour nou etidye legzanp Pyer?

² Pyer ti annan rezon pour dir sa parol parski i ti “en dimoun ki fer pese.” Labib i dir ki parfwa Pyer ti dir e fer bann keksoz ki pli tar i ti regrete. Eski parfwa ou santi parey Pyer? Eski i annan en move tre dan ou personnalite ki ou vwar li difisil pour travay lo la oubyen eski ou pe travay lo en febles ki ou annan depi lontan? Si wi, ou kapab ganny ankouraze ler ou etidye legzanp Pyer. Ki mannyer sa? Reflesir lo sa: Zeova ti’n kapab fer sir ki bann fot ki Pyer ti fer pa ganny ekrir dan Labib. Me i ti fer ekri pour ki nou kapab aprann avek legzanp Pyer. (2 Tim. 3:​16, 17) Ler nou aprann konsernan Pyer, ki ti en zonm ki ti annan febles ek santiman parey nou, sa i kapab ed nou konpran ki Zeova pa ekspekte ki nou fer keksoz dan en fason ki parfe. Zeova i anvi ki nou persevere setadir ki nou kontinyen servi li menm si nou annan bann febles.

3. Akoz nou bezwen persevere?

³ Akoz i enportan ki nou kontinyen servi Zeova? Normalman  pour nou amelyore dan en keksoz, nou bezwen kontinyen fer sa keksoz. Pour nou kapab konpran sa, annou vwar en legzanp. I kapab pran en mizisyen plizyer lannen avan ki i zwe son lenstriman byen. Me i pou zwe pli byen si i kontinyen practice. Me menm si i vin en bon mizisyen, parfwa i kapab fer en fot. Kantmenm sa, i pa abandonnen. I kontinyen practice pour ki i kapab amelyore. Dan menm fason, menm apre ki nou santi ki nou’n reisi sirmont en febles ki nou ti annan, i kapab ki nou fer sa fot ankor. Me nou bezwen kontinyen fer zefor pour amelyore. Nou tou nou dir oubyen fer bann keksoz ki pli tar nou regrete. Me kantmenm sa, Zeova pou ed nou pour kontinyen amelyore si nou pa abandonnen. (1 Pyer 5:10) Annou vwar lafason ki Pyer ti persevere e ki nou kapab aprann avek son legzanp. Nou pou vwar ki lafason ki Zezi ti demontre konpasyon anver Pyer i kapab motiv nou pour kontinyen servi Zeova.

4. Dapre Lik 5:​5-10, ki Pyer ti dir lo son lekor me ki mannyer Zezi ti asir li?

⁴ Labib pa dir akoz Pyer ti dir ki i “en dimoun ki fer pese” oubyen ki pese ki Pyer ti pe refer avek. (Lir Lik 5:​5-10.) Me i kapab ki i ti’n fer bann fot grav. Zezi ti konnen ki Pyer ti per petet parski Pyer pa ti santi li alaoter. Zezi ti osi konnen ki Pyer ti kapab reste fidel. Alor Zezi ti dir avek Pyer “pa bezwen per.” Sa konfyans ki Zezi ti annan dan Pyer ti annan en bon lefe lo Pyer e sa ti fer li sanz son fason viv. Pli tar, Pyer ek son frer Andre ti kit zot biznes lapes e zot ti vin bann disip Zezi e zot ti pas tou zot letan avek li dan son minister. Apre sa, Zeova ti beni zot dan diferan fason.—Mark 1:​16-18.

5. Ki benediksyon Pyer ti gannyen lefet ki i pa ti les son bann santiman negatif anpes li swiv Zezi?

⁵ Pyer ti ganny en kantite bon leksperyans konman en disip Zezi. I ti vwar ler Zezi ti geri bann malad, sas bann demon e menm resisit bann dimoun ki ti’n mor. b (Mat. 8:​14-17; Mark 5:​37, 41, 42) Pyer ti osi vwar en vizyon konsernan ler Zezi ti pou vin Lerwa dan Rwayonm Bondye. Pyer pa ti zanmen oubliy sa ki i ti’n vwar. (Mark 9:​1-8; 2 Pyer 1:​16-18) Pyer pa ti pou’n zanmen vwar sa si i pa ti en disip Zezi. Sirman i ti vreman kontan ki i ti’n sirmont bann santiman negatif e ganny tou sa bann benediksyon.

6. Eski Pyer ti sirmont son bann febles deswit? Eksplike.

 ⁶ Malgre tou bann keksoz ki Pyer ti vwar e tande, i ti ankor pe lager avek son bann febles. Annou vwar serten legzanp. Ler Zezi ti eksplik lafason ki i ti pou soufer e mor zis parey Lekritir ti’n predir, Pyer ti dir Zezi ki sa pa ti pou arive. (Mark 8:​31-33) Plizyer fwa, Pyer ek lezot zapot ti argimante konsernan lekel ki pli gran parmi zot. (Mark 9:​33, 34) Sa zour swar avan Zezi ti mor, Pyer ti atak en zonm e koup son zorey. (Zan 18:10) Sa menm zour swar, Pyer ti vin sitan per ki trwa fwa, i ti dir ki i pa konn Zezi, ki ti son zanmi. (Mark 14:​66-72) Apre sa, Pyer ti plere asodlarm.—Mat. 26:75.

7. Ki loportinite Pyer ti gannyen apre ki Zezi ti resisite?

⁷ Zezi pa ti abandonn son zapot, ki ti’n vreman dekouraze. Apre ki Zezi ti’n resisite, i ti donn Pyer sa loportinite pour montre ki i ti ankor kontan li. Zezi ti demann Pyer pour servi konman en berze pour son bann mouton. (Zan 21:​15-17) Pyer ti pare pour fer sa ki Zezi ti’n dir li. Alor, zour Lapannkot, Pyer ti Zerizalenm e i ti parmi sa bann premye dimoun ki ti ganny swazir par lespri sen.

8. Ki fot grav Pyer ti fer ler i ti Antyos?

⁸ Menm apre ki Pyer ti’n vin en Kretyen swazir, i ti bezwen lager avek son bann febles. Par egzanp, lannen 36, Bondye ti anvoy Pyer kot Korney, ki pa ti en Zwif e laba, Bondye ti swazir Korney avek lespri sen. Sa ti montre ki “Bondye pa fer lapreferans” e ki bann dimoun ki pa ti Zwif i kapab form parti kongregasyon Kretyen. (Akt 10:​34, 44, 45) Apre sa, Pyer ti konmans manz avek bann dimoun ki pa ti Zwif. Sa ti en keksoz ki oparavan Pyer pa ti pou’n zanmen fer. (Gal. 2:12) Me i ti annan serten Kretyen Zwif ki ti santi ki bann Zwif ek bann dimoun ki pa ti Zwif, pa devret manz ansanm. Ler serten sa bann Kretyen Zwif ki ti annan sa pwennvi ti vin Antyos, Pyer ti aret manz avek bann dimoun ki pa ti Zwif. I tre probab ki i ti fer sa parski i ti per pour ofans bann Kretyen Zwif. Zapot Pol ti vwar sa ki Pyer ti pe fer e i ti koz severman avek li devan lezot. (Gal. 2:​13, 14) Malgre sa fot ki Pyer ti fer, i ti persevere e kontinyen servi Zeova. Kwa ki ti ed li pour fer sa?

9. Ki mannyer Zan 6:​68, 69 i montre ki Pyer ti fidel?

⁹ Pyer ti fidel setadir ki i pa ti les nanryen fer li aret swiv Zezi. I ti montre ki i fidel en fwa ler Zezi ti dir en keksoz ki bann disip pa ti konpran. (Lir Zan 6:​68, 69.) En kantite disip ti aret swiv Zezi san esper oubyen rod leksplikasyon. Me Pyer pa ti fer parey. I ti fidel avek Zezi e i ti dir ki zis Zezi ki “annan parol lavi eternel.”

10. Ki mannyer Zezi ti montre ki i ti annan konfyans dan Pyer? (Vwar portre.)

¹⁰ Zezi pa ti abandonn Pyer. Sa dernyen lannwit ki Zezi ti pase lo later, Zezi ti konnen ki Pyer ek lezot zapot ti pou abandonn li. Kantmenm sa, Zezi ti dir Pyer ki i asire ki Pyer ti pou retournen e reste fidel. (Lik 22:​31, 32) Zezi ti konnen ki “lespri i anvi fer sa ki byen, me lekor enparfe i feb.” (Mark 14:38) Alor, menm si Pyer ti dir ki i pa ti konn Zezi, Zezi pa ti abandonn son zapot. Apre ki Zezi ti’n resisite, i ti aparet avek Pyer ler Pyer ti li tousel. (Mark 16:7; Lik 24:34; 1 Kor. 15:5) Mazin lo ki kantite sa ti ankouraz Pyer ki ti sagren akoz sa ki i ti’n fer!

11. Ki mannyer Zezi ti asir Pyer ki Zeova ti pou pran swen avek li?

 ¹¹ Zezi ti reasir Pyer ki Zeova ti pou pran swen avek li. Apre ki Zezi ti resisite, i ti fer en mirak par fer Pyer ek lezot zapot atrap ankor en kantite pwason. (Zan 21:​4-6) Sa mirak ti san dout reasir Pyer ki Zeova i kapab fasilman donn li bann keksoz materyel ki i ti bezwen. Petet sa zapot ti rapel ki Zezi ti dir ki Zeova pou pran swen avek bann ki “kontinyen rod Rwayonm . . . premye.” (Mat. 6:33) Tousala ti ed Pyer pour met sa travay predikasyon premye dan son lavi e non pa son biznes lapes. Zour Lapannkot lannen 33, Pyer ti anons sa bon nouvel avek kouraz e sa ti ed plizyer milye dimoun pour aksepte sa bon nouvel. (Akt 2:​14, 37-41) Apre sa, i ti ed bann Samariten ek bann dimoun lezot nasyon pour aprann konsernan Zezi e vin son disip. (Akt 8:​14-17; 10:​44-48) Sirman Zeova ti servi Pyer dan en fason ekstraordiner pour anmenn tou sort kalite dimoun dan kongregasyon.

12. Ki mannyer legzanp Pyer i kapab ed nou si nou pe lager avek en febles pandan bokou letan?

¹² Zeova i kapab ed nou pour persevere setadir pour kontinyen servi li. I kapab ki i pa toultan fasil pour kontinyen servi Zeova sirtou si nou pe lager avek menm febles pandan bokou letan. Parfwa, nou bann febles i kapab paret pli difisil ki bann febles ki Pyer ti fer fas avek. Me Zeova i kapab donn nou sa lafors ki nou bezwen pour nou pa abandonnen. (Ps. 94:​17-19) Par egzanp, en frer ti fer bann aksyon omoseksyel pour plizyer lannen avan i aprann laverite. I ti deside pour sanz son fason viv e apre viv parey Labib i dir nou devret viv. Me kantmenm sa, parfwa i ti lager avek bann move dezir. Kwa ki ti ed li pour persevere? I dir: “Zeova i donn nou lafors.” I osi dir: “Atraver lespri sen Zeova . . . , mon’n aprann ki i posib pour [kontinyen] viv dan sa fason ki Zeova i anvi nou viv . . . Zeova in kapab servi mwan e malgre mon febles, Zeova i kontinyen donn mwan lafors.”

13. Dapre Akt 4:​13, 29, 31, ki mannyer nou kapab swiv legzanp Pyer? (Vwar portre.)

¹³ Parey nou’n vwar, plizyer fwa, Pyer ti fer bann fot grav akoz lafreyer zonm. Me ler Pyer ti priye pour ganny lafors, sa ti fer li azir avek kouraz. (Lir Akt  4:​13, 29, 31.) Nou osi nou kapab sirmont nou lafreyer. Annou vwar sa ki ti arive avek en zenn frer ki apel Horst e ki ti reste Lalmanny pandan Dezyenm Lager Mondyal. Plizyer fwa, kot lekol Horst ti dir “Heil Hitler!” menm si i ti konnen ki i ti mal pour fer sa. I ti fer sa parski i ti per son bann ansenyan ek kanmarad lekol. Me son paran pa ti ankoler avek li. O kontrer zot ti priy ansanm avek li e demann Zeova pour donn li kouraz. Avek led son paran e lefet ki i ti depan lo Zeova, avek letan, Horst ti ganny lafors pour reste ferm. Pli tar, i ti dir: “Zeova pa’n zanmen abandonn mwan.” c

14. Ki mannyer bann ansyen i kapab ankouraz bann frer ek ser ki santi zot dekouraze?

¹⁴ Zeova ek Zezi pa pou abandonn nou. Apre ki Pyer ti dir ki i pa konn Zezi, Pyer ti bezwen fer en desizyon enportan. Eski i ti pou arete oubyen kontinyen konman en disip Zezi? Zezi ti’n sipliy Zeova pour ed Pyer pour ki son lafwa pa afebli konpletman. Zezi ti dir Pyer konsernan sa lapriyer e i ti annan konfyans ki pli tar Pyer ti pou kapab ankouraz son bann frer. (Lik 22:​31, 32) Sirman sak fwa ki Pyer ti mazin sa ki Zezi ti dir, sa ti ankouraz li. Ler nou bezwen fer en desizyon enportan, Zeova i kapab servi bann berze ki kontan nou pour ankouraz nou pour nou kapab kontinyen reste fidel avek li. (Efe. 4:​8, 11) En frer ki apel Paul, ki en ansyen pour plizyer lannen, i esey ankouraz lezot dan sa fason. I demann bann frer ek ser ki santi zot dekouraze pour reflesir lo lafason ki Zeova ti atir zot ver laverite. Apre, i asir zot ki Zeova pa pou abandonn zot akoz sa lanmour fidel ki Zeova i annan. Paul i  dir: “Mon’n vwar en kantite frer ek ser ki ti dekouraze me ki’n persevere avek led Zeova.”

15. Ki mannyer legzanp Pyer ek leksperyans Horst i montre ki sa parol dan Matye 6:33 i vre?

¹⁵ Zis parey Zeova ti donn Pyer ek lezot zapot bann keksoz materyel ki zot ti bezwen, Zeova pou osi donn nou sa ki nou bezwen ler nou met sa travay predikasyon premye dan nou lavi. (Mat. 6:33) Apre Dezyenm Lager Mondyal, Horst, ki’n ganny mansyonnen pli boner, ti konmans mazin pour fer pionye. Me i ti vreman pov e i pa ti asire si i ti pou ganny ase larzan pour ganny bann keksoz ki i ti bezwen e kontinyen fer pionye. Ki Horst ti pou fer? I ti anvi vwar si Zeova ti pou donn li sa ki i bezwen alor i ti pas en semenn antye dan predikasyon pandan semenn spesyal. A lafen lasemenn, Horst ti sirprann ler sirveyan rezyonal ti donn li en lanvlop larzan me i pa ti dir Horst lekel ki ti’n donn li sa larzan. Dan sa lanvlop, i ti annan ase larzan pour soutenir li dan son servis pionye pour detrwa mwan. Sa kado ti fer Horst asire ki Zeova ti pou pran swen avek li. Horst ti kontinyen met Rwayonm Bondye premye tou dilon son lavi.—Mal. 3:10.

16. Akoz i bon pour nou aprann plis konsernan Pyer e konsernan sa ki i ti ekri dan son bann let?

¹⁶ Sirman Pyer ti vreman kontan ki Zezi pa ti’n sorti o bor li ler i ti dir Zezi “sorti o bor mwan.” Kris ti kontinyen form Pyer pour vin en zapot fidel e en bon legzanp pour bann Kretyen. Nou kapab aprann en kantite leson avek sa formasyon ki Zezi ti donn Pyer. Pyer i fer nou konn serten sa bann leson ek lezot keksoz dan de let ki i ti anvoy pour bann kongregasyon dan premye syek. Sa de let i aprezan form parti Labib. Dan sa lartik ki swiv, nou pou vwar enn de rapel sorti dan sa bann let e ki mannyer nou kapab aplik zot ozordi.