1. Ki sityasyon difisil ki Zeoas, Ouzya ek Zosya ti fer fas avek?

 KI MANNYER ou ti pou santi si ou ti ganny swazir pour vin lerwa pep Bondye ler ou ankor byen zenn? Ki mannyer ou ti pou servi ou pouvwar ek lotorite? Labib i koz lo plizyer zenn garson ki ti vin lerwa Zida. Par egzanp, Zeoas ti annan 7 an ler i ti vin lerwa, Ouzya ti annan 16 an e Zosya ti annan 8 an. I bezwen ki keksoz ti vreman difisil pour zot. Menm si zot sityasyon ti difisil, zot tou zot ti ganny sa led ki zot ti bezwen pour fer fas avek bann problenm e pour fer bann bon keksoz.

2. Akoz i byen pour nou etidye konsernan Zeoas, Ouzya ek Zosya?

² Menm si nou pa bann lerwa oubyen larenn, nou kapab aprann en kantite avek sa ki ti arive dan lavi Zeoas, Ouzya ek Zosya. Zot ti fer bann bon desizyon me zot ti osi fer bann move desizyon. Atraver zot legzanp, nou pou vwar akoz i enportan pour nou swazir bann bon zanmi, pour kontinyen annan limilite e pour kontinyen rod Zeova.

3. Ki mannyer Lerwa Zeoas ti reazir ler Granpret Zeoada ti donn li konsey?

³ Fer bann desizyon saz parey Zeoas. Ler Lerwa Zeoas ti ankor zenn, i ti fer en desizyon saz. Vi ki son papa ti’n mor, i ti swiv gidans Granpret Zeoada, ki ti en zonm fidel. Sa pret ti ansenny Zeoas konsernan Zeova zis parey en papa ti pou fer avek son garson. Zeoas ti deside pour servi Zeova e pour ed lezot osi pour servi Zeova. Zeoas ti menm fer laranzman pour tanp Zeova ganny repare.—2 Kron. 24:​1, 2, 4, 13, 14.

4. Ki byenfe nou gannyen ler nou kontan e obei bann komannman Zeova? (Proverb 2:​1, 10-12)

⁴ Si ou paran oubyen en lot dimoun pe ansenny ou pour kontan Zeova e pour viv dapre son bann standar, zot pe  donn ou en kado presye. (Lir Proverb 2:​1, 10-12.) Ou paran i kapab form ou dan diferan fason. Annou vwar ki mannyer papa en ser ki apel Katya ti ed li pour fer bann bon desizyon. Toulezour ler son papa ti anmenn li lekol, i ti koz avek li lo teks pour lazournen. Katya i dir: “Sa bann konversasyon ti ed mwan fer bann bon desizyon ler mon ti fer fas avek problenm pandan lazournen.” I kapab ki ou paran i fer bann lareg baze lo Labib me petet ou santi ki sa bann lareg pe anpes ou fer bann keksoz ki ou kontan. Kwa ki kapab ed ou pour obei zot? En ser ki apel Anastasia i dir ki son paran ti pran letan pour eksplik li akoz zot in met serten lareg. I dir: “Sa ti ed mwan konpran ki zot pa ti fer bann lareg pour kontrol mwan me pour protez mwan parski zot ti kontan mwan.”

5. Ki lefe ou aksyon i annan lo ou paran e lo Zeova? (Proverb 22:6; 23:​15, 24, 25)

⁵ Ler ou ekout konsey ki sorti dan Labib ki ou paran i donn ou, sa pou fer ou paran kontan. Pli enportan ankor, ou pou fer Bondye kontan e ou pou annan en pli bon lanmitye avek li. (Lir Proverb 22:6; 23:​15, 24, 25.) Pa sa i bann bon rezon pour ou fer parey Zeoas ti fer ler i ti ankor zenn?

6. Apre ki Zeoada ti’n mor, lekel ki ti donn Zeoas konsey e ki ti arive apre? (2 Kronik 24:​17, 18)

⁶ Aprann avek bann move desizyon ki Zeoas ti fer. Apre ki Zeoada ti’n mor, Zeoas ti swazir bann move zanmi. (Lir 2 Kronik 24:​17, 18.) I ti deside pour ekout konsey bann prens Zida ki pa ti kontan Zeova. Ou pou dakor ki Zeoas ti’n devret reste lwen avek zot parski zot ti fer bann move keksoz. (Prov. 1:10) O kontrer, i ti ekout zot bann move konsey. Ler Zekarya, ki kouzen Zeoas ti esey donn li konsey, Zeoas ti fer touy li. (2 Kron. 24:​20, 21; Mat. 23:35) Sa ti vreman mal e i ti en desizyon bet! O konmansman, Zeoas ti en lerwa ki ti fidel me apre i ti vin en aposta ek en mertriye. Finalman, son bann serviter ti touy li. (2 Kron. 24:​22-25) Si Zeoas ti kontinyen ekout Zeova ek bann ki ti kontan Zeova, son lavi ti pou’n diferan. Ki ou aprann avek sa legzanp?

7. Lekel ki ou devret swazir konman zanmi? (Vwar portre.)

⁷ Move desizyon ki Zeoas ti fer i montre nou ki nou bezwen swazir bann zanmi ki kontan Zeova e ki anvi fer li zwaye. Sa bann zanmi pou ed nou fer bann bon keksoz. Nou pa devret vin zanmi avek  zis bann dimoun ki menm laz avek nou. Nou kapab vin zanmi avek bann ki pli vye ki nou oubyen ki pli zenn ki nou. Rapel ki Zeoas ti bokou pli zenn ki son zanmi Zeoada. Ou kapab demann ou lekor: ‘Eski mon bann zanmi i ed mwan pour annan plis lafwa dan Zeova? Eski zot ankouraz mwan pour viv dapre bann standar Bondye? Eski zot koz lo Zeova ek bann laverite presye ki Zeova in donn nou? Eski zot menm zot viv dapre bann standar Bondye? Eski zot dir mwan sa ki mon anvi tande oubyen zot annan kouraz pour donn mwan konsey ler mon vreman bezwen?’ (Prov. 27:​5, 6, 17) Si ou bann zanmi pa kontan Zeova, ou pa bezwen zot konman ou zanmi. Me si ou bann zanmi i kontan Zeova, kontinyen reste zanmi avek zot parski zot pou toultan ed ou.—Prov. 13:20.

8. Si ou servi rezo sosyal, ki ou devret reflesir lo la?

⁸ Rezo sosyal i en bon fason pour gard kontak avek nou fanmir ek zanmi. Me en kantite dimoun i servi rezo sosyal pour enpresyonn lezot. Zot poste portre ek video bann keksoz ki zot in aste oubyen bann keksoz ki zot in fer. Si ou servi rezo sosyal, demann ou lekor: ‘Eski mon servi rezo sosyal pour enpresyonn lezot? Eski mon lobzektif i pour ankouraz lezot oubyen i pour fer lezot felisit mwan? Eski mon les lopinyon bann dimoun ki servi rezo sosyal enfliyans mon fason panse, mon fason koze ek mon aksyon dan en move fason?’ Frer Nathan Knorr, ki ti en manm Konsey Direkter ti donn sa konsey: “Pa esey fer plezir dimoun. Si ou esey fer plezir dimoun, ou pa pou fer plezir personn. Fer plezir Zeova e ou pou fer plezir tou bann ki kontan Zeova.”

9. Ki Zeova ti ed Ouzya pour fer? (2 Kronik 26:​1-5)

⁹ Fer bann bon desizyon parey Ouzya. Ler Lerwa Ouzya ti ankor zenn, i ti annan limilite. I ti aprann “pour annan en gran respe pour sa vre Bondye.” I ti viv pour 68 an e Zeova ti beni li pour laplipar son lavi. (Lir 2 Kronik 26:​1-5.) Ouzya ti ranport laviktwar lo en kantite lennmi e i ti fer sir ki Zerizalenm ti ganny byen proteze. (2 Kron. 26:​6-15) Nou kapab asire ki Ouzya ti apresye tou sa ki Bondye ti’n ed li pour fer.—Ekle. 3:​12, 13.

10. Ki ti arive avek Ouzya?

¹⁰ Aprann avek bann move desizyon ki Ouzya ti fer. Lerwa Ouzya ti annan labitid dir lezot ki pour fer. Petet sa ti fer li santi ki i kapab fer tou sa ki i anvi. En zour Ouzya ti deside pour antre dan tanp Zeova e esey bril lansan lo lotel. Sa ti en keksoz ki bann lerwa ti napa drwa pour fer. (2 Kron. 26:​16-18) Granpret Azarya ti esey anpes li me Ouzya ti vreman ankoler. Malerezman Ouzya pa ti reste fidel avek Zeova e Zeova ti donn li lalep. (2 Kron. 26:​19-21) Si Ouzya ti kontinyen annan limilite, son lavi ti pou’n diferan.

11. Kwa ki kapab ed nou pour kontinyen annan limilite? (Vwar portre.)

¹¹ Ler Ouzya ti vin for, i ti oubliye ki Zeova ki ti’n donn li son lafors e ki ti’n ed li prospere. Ki nou kapab aprann? Nou devret rapel ki tou bann benediksyon ek privilez ki nou annan i sorti kot Zeova. Olye fer vantar konsernan bann keksoz ki nou’n fer, nou devret donn loner Zeova pour bann keksoz ki nou kapab fer. b  (1 Kor. 4:7) Nou bezwen annan limilite e rekonnet ki nou enparfe e ki nou bezwen disiplin. En frer ki annan apepre 60 an, i dir: “Mon’n aprann pour pa ofanse oubyen dekouraze ler lezot i remark bann fot ki mon fer. Parfwa mon fer bann fot bet e ler mon ganny disiplinen pour sa, mon esey amelyore e kontinyen donn Zeova mon meyer.” Ler nou obei Zeova e nou kontinyen annan limilite, nou pou ere.—Prov. 22:4.

12. Ki mannyer Zosya ti kontinyen rod Zeova ler i ti ankor zenn? (2 Kronik 34:​1-3)

¹² Fer bann bon desizyon parey Zosya ti fer. Zosya ti en adolesan ler i ti konmans rod Zeova. I ti anvi aprann konsernan Zeova e fer Son lavolonte. Me lavi pa ti fasil pour sa zenn lerwa. Sa letan laplipar dimoun ti pe ador bann fo bondye. Alor Zosya ti bezwen annan kouraz pour li kapab anpes zot fer sa e Zosya ti demontre kouraz. Avan menm ki Zosya ti annan 20 an, i ti’n konmans tir bann keksoz ki annan pour fer avek fo ladorasyon parmi pep Bondye.—Lir 2 Kronik 34:​1-3.

13. Ler ou dedye ou lavi avek Zeova, ki lefe sa i annan lo ou?

¹³ Menm si ou ankor byen zenn, ou kapab deside pour swiv legzanp Zosya par fer zefor pour aprann plis konsernan Zeova e lo Son bann zoli kalite. Sa pou fer ou anvi dedye ou lavi avek li. Ler ou dedye ou lavi avek Zeova, ki lefe sa pou annan lo ou? En frer ki apel Luke, ki ti batize ler i ti annan 14 an, i dir: “Depi sa moman, mon ti deside ki mon pou met Zeova premye dan mon lavi e mon pou esey fer li zwaye.” (Mark 12:30) Ou pou ganny bann benediksyon si ou osi ou anvi fer parey Luke!

14. Ki mannyer serten zenn pe swiv legzanp Lerwa Zosya? Donn legzanp.

¹⁴ Ki serten difikilte ki en zenn serviter Zeova i kapab fer fas avek? En frer ki apel Johan, ki ti batize ler i ti annan 12 an, i dir ki son bann kanmarad lekol ti met presyon lo li pour servi sigaret elektronik. Pour Johan ganny lafors pour reziste sa presyon, i ti bezwen gard antet ki si i servi sigaret  elektronik, sa ti pou kapab annan en move lefe lo son lasante e gat son lanmitye avek Zeova. En ser ki apel Rachel, ki’n batize ler i ti annan 14 an, i eksplike kwa ki ti ed li fer fas avek bann difikilte ki i rankontre kot lekol. I dir: “Mon esey rod bann keksoz ki fer mwan mazin Labib ek Zeova. Par egzanp, en leson history i kapab fer mwan mazin en resi dan Labib oubyen en profesi. Parfwa ler mon pe koz avek en dimoun kot lekol, mon mazin en verse ki mon kapab partaz avek li.” Petet bann difikilte ki ou fer fas avek i diferan avek sa ki Lerwa Zosya ti fer fas avek me ou osi ou kapab vin saz e reste fidel avek Zeova parey li. Ler ou reisi fer fas avek bann problenm ki ou rankontre ler ou ankor zenn, sa pou ed ou fer fas avek lezot problenm ki ou pou rankontre dan lavenir.

15. Kwa ki ti ed Zosya pour servi Zeova fidelman? (2 Kronik 34:​14, 18-21)

¹⁵ Ler Lerwa Zosya ti vin en adilt, i ti konmans fer bann renovasyon lo tanp. Pandan ki sa travay ti pe ganny fer, zot ti vwar “liv Lalwa Zeova ki ti ganny donnen avek Moiz.” Ler lerwa ti tann sa ki ti ganny dir dan lalwa, deswit i ti fer bann sanzman pour li kapab obei sa ki ti’n ganny dir. (Lir 2 Kronik 34:​14, 18-21.) Eski ou ti pou kontan lir Labib regilyerman? Petet ou deza pe fer zefor pour lir li toulezour. Eski ou kontan sa ki ou pe lir? Eski ou not bann verse ki kapab ed ou? Luke, ki’n ganny mansyonnen pli boner, i ekri bann pwen enteresan ki i’n trouve dan en kaye. Petet si ou fer en keksoz en pe parey, sa i kapab ed ou pou rapel bann verse Labib oubyen bann leson ki ou’n aprann. Pli ou konn sa ki annan dan Labib e ou kontan sa ki i dir, pli ou pou anvi servi Zeova. Zis parey Parol Bondye ti ed Zosya pour fer sa ki byen, i pou osi ed ou.

16. Akoz Zosya ti fer en fot grav e ki nou aprann?

¹⁶ Aprann avek bann move desizyon ki  Zosya ti fer. Ler Zosya ti annan apepre 39 an, i ti fer en fot ki ti kout li son lavi. Dan plas rod gidans Zeova, i ti annan konfyans dan son lekor. (2 Kron. 35:​20-25) I annan en leson ki nou kapab aprann. Nenport ki laz nou annan oubyen nenport ki kantite letan ki nou pe etidye Labib, nou bezwen kontinyen rod Zeova. Sa i vedir ki nou bezwen priy Zeova regilyerman pour rod son gidans, etidye son Parol e ekout konsey bann Kretyen matir. Sa pou fer ki nou pou evite fer bann fot grav e nou pou pli ere.—Zak 1:25.

17. Ki leson enportan nou’n aprann avek bann resi konsernan sa trwa lerwa Zida?

¹⁷ I annan en kantite keksoz eksitan ki ou kapab fer ler ou ankor zenn. Bann resi konsernan Zeoas, Ouzya ek Zosya i montre ki bann zenn i kapab fer bann desizyon ki saz e viv en lavi ki fer plezir Zeova. I vre ki sa bann zenn ti fer bann fot ki ti anmenn bann move rezilta me si nou fer sa bann bon keksoz ki zot ti fer e nou evite fer bann fot ki zot ti fer, nou kapab viv en lavi ki ere.

18. Ki legzanp dan Labib ki montre ki ou kapab annan en lavi ki ere? (Vwar portre.)

¹⁸ Dan Labib, i annan bann resi konsernan lezot zenn ki ti vin pros avek Zeova, ki ti annan son laprouvasyon e ki ti annan en lavi ki ere. David ti enn parmi sa bann zenn. Ler i ti ankor zenn, i ti swazir pour vin zanmi Bondye e pli tar, i ti vin en lerwa ki ti fidel avek Bondye. Menm si parfwa i ti fer fot, Bondye ti vwar li konman en zonm fidel. (1 Rwa. 3:6; 9:​4, 5; 14:8) Ler ou etidye konsernan legzanp David, sa i kapab ankouraz ou pour servi Zeova fidelman. Oubyen ou kapab osi etidye legzanp Mark ek Timote. Ou pou vwar ki zot ti servi Zeova depi ler zot ti ankor byen zenn e zot ti kontinyen servi Zeova fidelman. Zot desizyon pour servi Zeova ti fer Zeova kontan e zot osi zot ti zwaye.

19. Ki kalite lavi ou kapab annan?

¹⁹ Lafason ki ou viv ou lavi la konmela pou annan en lefe lo ki mannyer ou lavi pou ete dan lavenir. Si ou annan konfyans dan Zeova e pa lo ou prop rezonnman, Zeova pou ed ou pour fer bann desizyon ki saz. (Prov. 20:24) Ou kapab ere. Rapel ki Zeova i apresye sa ki ou fer pour li. Sa pli bon fason ki ou kapab viv ou lavi i pour servi Zeova, nou Papa ki kontan nou.