1, 2. Akoz Pol ti ekri en let pour bann Kretyen Ebre?

LANNEN 61, bann kongregasyon an Izrael ti ase anpe. Menm si sa letan zapot Pol ti dan prizon Ronm, i ti pe ekspekte ganny large byento. Timote, son zanmi ki i ti abitye vwayaz avek, ti’n fek ganny large prizon e zot ti pe mazin al vizit bann frer ek ser Zide. (Ebre 13:23) Me zis senk an pli tar, bann Kretyen Zide, sirtou bann ki ti pe reste Zerizalenm, ti pou bezwen azir vitman. Akoz? Pli boner, Zezi ti’n dir son bann disip ki dek ki zot vwar bann larme antour Zerizalenm, zot ti pou bezwen sove.​—Lik 21:20-24.

² Ventwit an ti’n pase depi ki Zezi ti’n averti son bann disip. Pandan sa letan, bann Kretyen an Izrael ti reste fidel malgre bokou persekisyon ek leprev. (Ebre 10:32-34) Me Pol ti anvi prepar zot pour sa ki ti pou arive a lavenir. Zot ti pe al pas atraver enn bann pli gro tes zot lafwa. (Matye 24:20, 21; Ebre 12:4) Zot ti pou bezwen persevere oubyen andire e annan plis lafwa ki zanmen oparavan pour zot kapab obei parol Zezi pour sove. Zot lavi ti pou depan lo la. (Lir Ebre 10:36-39.) Alor Zeova ti enspir Pol pour ekri en let pour sa bann frer ek ser. Sa let, ki aprezan apel liv Ebre,  ti ganny ekrir pour fortifye zot pour sa ki ti pou arive.

3. Akoz nou devret anvi konpran liv Ebre?

³ Konman pep Bondye ozordi, nou devret anvi konpran liv Ebre. Akoz? Parski nou sityasyon i parey avek bann Kretyen Zide. Nou viv dan bann “letan difisil” e bokou in fidelman andir bann gro leprev oubyen persekisyon. (2 Timote 3:1, 12) Me laplipar nou i viv anpe e pa vreman ganny persekite. Alor, parey bann Kretyen dan letan Pol, nou bezwen vizilan. Akoz? Parski tre byento, nou pou bezwen fer fas avek sa pli gran tes nou lafwa!​—Lir Lik 21:34-36.

4. Ki teks pour lannen 2016 e akoz sa i apropriye?

⁴ Kwa ki pou ed nou prepare pour sa ki pou arive byento? Dan liv Ebre, Pol ti dir bokou keksoz ki pou ede ranforsi nou lafwa. En rapel vreman enportan pour nou i ganny trouve dan Ebre 13:1. I ankouraz nou pour: Kontinyen kontan kanmarad parey bann frer ek ser. Sa verse in ganny swazir pour teks lannen 2016.

5. Ki savedir kontan kanmarad parey bann frer ek ser?

⁵ Ki savedir kontan kanmarad parey bann frer ek ser? Sa mo Grek ki Pol ti servi i literalman vedir “lafeksyon pour en frer.” Kontan kanmarad parey bann frer ek ser, pe refer avek sa santiman for ki nou annan pour nou fanmir ouswa en zanmi pros. (Zan 11:36) Nou pa fer krwar ki nou bann frer ek ser. Me nou vreman frer ek ser. (Matye 23:8) Pol i dir: “Annan en gran lafeksyon pour kanmarad parey bann frer, e setaki montre plis respe pour kanmarad.” (Romen 12:10) Sa bann parol i montre nou ki degre for nou lafeksyon pour nou bann frer ek ser i ete. Ler nou kontan kanmarad parey bann frer ek ser e osi kontan kanmarad parey bann Kretyen i fer, sa i ed pep Bondye pour vin bann bon zanmi e annan linite parmi zot.

6. Pour bann vre Kretyen, ki savedir kontan kanmarad parey bann frer ek ser?

⁶ Laplipar ditan sa lekspresyon “kontan kanmarad parey bann frer ek ser” i ganny trouve dan bann piblikasyon Kretyen. Pour bann Zwif dan lepase, sa parol “frer ek ser” ti normalman refer avek en manm fanmir e parfwa en dimoun ki pa manm fanmir. Me i pa ti pou zanmen enkli en dimoun ki pa ti Zwif. Par kont, konman vre Kretyen, nou “frer ek ser” i nenport vre Kretyen dan lemonn. (Romen 10:12) Zeova in ansenny nou pour kontan kanmarad konman frer ek ser. (1 Tesalonisyen 4:9) Me akoz i enportan pour kontinyen montre ki nou kontan kanmarad parey bann frer ek ser?

7. (a) Ki sa rezon pli enportan nou montre ki nou kontan kanmarad? (b) Donn en lot rezon akoz i enportan pour ranforsi nou lanmour pour kanmarad.

⁷ Akoz i sitan enportan pour kontinyen montre ki nou kontan kanmarad parey bann frer ek ser? Parski Zeova i demann nou pour fer li e sa i sa rezon pli enportan. I enposib pour dir ki nou kontan Zeova si nou refize kontan nou bann frer ek ser. (1 Zan 4:7, 20, 21) En lot rezon i akoz nou bezwen kanmarad,  sirtou pandan bann letan difisil. Ler Pol ti ekri son let pour bann Kretyen Ebre, i ti konnen ki byento serten ti pou bezwen kit zot lakour ek zot bann keksoz personnel. Zezi ti’n dekrir ki kantite difisil sa letan ti pou ete. (Mark 13:14-18; Lik 21:21-23) Alor, avan ki sa ti arive, sa bann Kretyen ti pou bezwen ranforsi zot lanmour pour kanmarad.​—Romen 12:9.

8. Ki nou bezwen fer la konmela avan ki gran ladetres i konmanse?

⁸ Gran ladetres, sa letan pli difisil dan listwar imen, i pros pour arive. (Mark 13:19; Revelasyon 7:1-3) Nou pou bezwen obei sa konsey: “Ale, mon pep, antre dan ou bann lasanm anndan e ferm laport deryer ou. Kasyet ou pour en pti moman ziska ki mon lakoler in pase.” (Izai 26:20) Sa “bann lasanm anndan” i kapab pe refer avek nou bann kongregasyon kot nou ador Zeova avek nou bann frer ek ser. Me nou bezwen fer plis ki zis zwenn ansanm regilyerman. Pol ti fer bann Kretyen Ebre rapel ki zot devret ankouraz kanmarad pour demontre lanmour e fer bann bon keksoz pour kanmarad. (Ebre 10:24, 25) Nou bezwen pli kontan kanmarad parey bann frer ek ser la konmela akoz i pou ed nou andir nenport ki leprev nou pou fer fas avek a lavenir.

9. (a) Ki loportinite nou annan ozordi pour montre ki nou kontan kanmarad? (b) Donn bann legzanp pour montre ki mannyer pep Zeova in montre ki zot kontan kanmarad.

⁹ Menm ozordi avan gran ladetres i konmanse, nou annan plizyer loportinite pour montre ki nou kontan kanmarad parey bann frer ek ser. Bokou nou bann frer ek ser pe soufer akoz tranblemandter, linondasyon, siklonn, tsounami oubyen lezot dezas natirel. Serten nou bann frer ek ser pe andir bann persekisyon. (Matye 24:6-9) I osi annan ki pe fer fas avek bann problenm ekonomik dan lavi toulezour parski nou pe viv dan sa lemonn koronpi. (Revelasyon 6:5, 6) Par kont, pli nou bann frer ek ser i dan problenm, pli sa i donn nou loportinite pour montre ki kantite nou kontan zot. Menm si napa lanmour dan sa lemonn, nou bezwen kontinyen montre ki nou kontan kanmarad. (Matye 24:12) [1]​—Vwar lezot not.

10. Ki nou pou koz lo la aprezan?

¹⁰ Malgre nou annan problenm, ki mannyer nou kapab fer sir ki nou kontinyen montre ki nou kontan kanmarad parey bann frer ek ser? Ki mannyer nou kapab demontre ki nou annan sa kalite lafeksyon pour nou bann frer ek ser? Apre ki zapot Pol ti’n dir, “kontinyen kontan kanmarad parey bann frer ek  ser,” i ti donn plizyer fason ki bann Kretyen i kapab fer sa. Aprezan annou vwar sis parmi sa bann fason ki Pol ti donnen.

11, 12. Ki savedir demontre lospitalite? (Vwar portre lo paz 3.)

¹¹ ‘Pa oubliye demontre lospitalite.’ (Lir Ebre 13:2. [2]) (Vwar not.) Ki sa mo “lospitalite” i vedir? Sa mo ki Pol ti servi i vedir “zantiy anver bann etranze.” Petet sa lekspresyon i fer nou rapel Abraam ek Lot. Sa de zonm ti zantiy anver bann viziter ki zot pa ti konnen. Pli tar, Abraam ek Lot ti aprann ki sa de etranze ti bann lanz. (Zenez 18:2-5; 19:1-3) Sa bann legzanp ti ankouraz bann Kretyen Ebre pour montre ki zot kontan kanmarad par demontre lospitalite.

¹² Ki mannyer nou kapab demontre lospitalite anver lezot? Nou kapab envit nou bann frer ek ser kot nou pour pran en repa oubyen ankouraz kanmarad. Petet nou pa konn nou sirveyan rezyonal ek son madanm byen byen, me nou kapab envit zot ler zot vizit nou kongregasyon. (3 Zan 5-8) Nou pa bezwen kwi en ta manze oubyen depans en ta larzan. Rezon ki nou envit nou bann frer ek ser se pour ankouraz zot, me pa pour enpresyonn zot avek sa ki nou annan. Deplis, nou pa devret envit zis bann ki kapab fer en keksoz pour nou an retour. (Lik 10:42; 14:12-14) Sa ki pli enportan, se ki nou pa tro bizi ki nou oubliye demontre lospitalite.

13, 14. Ki mannyer nou kapab “mazin bann ki dan prizon”?

¹³ “Mazin bann ki dan prizon.” (Lir Ebre 13:3.) Ler Pol ti ekri sa, i ti pe refer avek bann ki ti dan prizon akoz zot lafwa. Pol ti felisit kongregasyon akoz zot ti’n demontre “konpasyon pour bann prizonnyen.” (Ebre 10:34) Serten frer ti ed Pol pandan sa kat an ki i ti dan prizon, me lezot ti reste lwen avek prizon. Ki mannyer sa bann ki ti reste lwen ti kapab ed Pol? Zot ti kapab kontinyen priy bokou pour li.​—Filipyen 1:12-14; Ebre 13:18, 19.

¹⁴ Ozordi, bokou Temwen i dan prizon pour zot lafwa. Bann frer ek ser ki reste pros avek prizon i kapab donn zot bann keksoz ki zot bezwen. Me bokou nou i reste lwen avek prizon. Ki mannyer nou kapab ed zot e montre ki nou pa’n oubliy zot? Lefet ki nou kontan kanmarad, sa pou pous nou pour priy bokou pour zot. Par egzanp, nou kapab priy pour bann frer ek ser e menm bann zanfan ki dan prizon Leritre, enkli nou bann frer Paulos Eyassu, Isaac Mogos ek Negede Teklemariam, ki ankor dan prizon apre 20 an.

15. Ki mannyer nou kapab onor nou maryaz?

¹⁵ “Ki maryaz i ganny onore par tou dimoun.” (Lir Ebre 13:4.) Nou osi montre ki nou kontan kanmarad parey  bann frer ek ser ler nou reste pir moralman. (1 Timote 5:1, 2) Par egzanp, si nou ti komet limoralite seksyel avek en frer oubyen en ser, nou ti pou fer ditor sa dimoun ek son fanmir. Sa ti pou osi fer li difisil pour bann frer ek ser annan konfyans avek kanmarad. (1 Tesalonisyen 4:3-8) Mazin osi ki mannyer en madanm ti pou santi si i ti dekouver ki son msye i get pornografi! Eski i ti pou santi ki son msye i kontan li e respekte laranzman maryaz?​—Matye 5:28.

16. Ki mannyer ler nou kontant nou avek sa ki nou annan, sa i ed nou montre ki nou kontan kanmarad?

¹⁶ “Kontant zot avek sa ki zot annan.” (Lir Ebre 13:5.) Konfyans dan Zeova pou ed nou pour kontant nou oubyen satisfe avek sa ki nou annan. Ki mannyer sa i ed nou pour montre ki nou kontan kanmarad parey bann frer ek ser? Ler nou kontant nou, nou pou rapel ki nou bann frer ek ser Kretyen i bokou pli enportan ki larzan oubyen okenn lezot keksoz. (1 Timote 6:6-8) Nou pa pou konplent lo zot avek lezot oubyen konplent lo nou lavi. Deplis, nou pa pou zalou sa ki lezot i annan oubyen vin egois. Plito, ler nou kontant nou, nou pou zenere.​—1 Timote 6:17-19.

17. Ki mannyer ler nou annan “kouraz” sa i ed nou pour montre ki nou kontan kanmarad?

¹⁷ Annan “kouraz.” (Lir Ebre 13:6.) Ler nou annan konfyans dan Zeova, sa i donn nou kouraz pour andir bann leprev difisil. Sa kouraz i ed nou pou annan en latitid pozitif. Ler nou pozitif, nou pou kapab ankouraz e rekonfort nou bann frer ek ser pour montre ki nou kontan kanmarad. (1 Tesalonisyen 5:14, NW, 15)  Menm pandan gran ladetres, nou kapab annan kouraz akoz nou konnen ki nou delivrans i pros.​—Lik 21:25-28.

18. Ki mannyer nou kapab ranforsi nou lanmour pour bann ansyen?

¹⁸ “Mazin zot bann dirizan.” (Lir Ebre 13:7, 17.) Bann ansyen dan nou kongregasyon i servi zot prop letan pour travay dir pour nou. Ler nou mazin tou sa ki zot fer, pa sa i ogmant nou lanmour ek lapresyasyon pour zot! Nou pa ti pou zanmen anvi ki zot perdi zot lazwa oubyen fristre akoz en keksoz ki nou’n fer. O kontrer, nou anvi obei zot volonterman. Dan sa fason nou “montre ki [nou] estim sa bann frer e kontan zot bokou akoz travay ki zot pe fer.”​—1 Tesalonisyen 5:13.

19, 20. Ki mannyer nou kapab kontinyen montre ki nou kontan kanmarad parey bann frer ek ser plis ankor?

¹⁹ Dimoun i konn pep Zeova konman bann ki kontan kanmarad parey bann frer ek ser. Sa ti osi leka dan letan Pol. Me Pol ti ankouraz bann frer ek ser pour demontre lanmour dan en pli gran fason. I ti dir: “Nou demann zot frer pour fer plis ankor.” (1 Tesalonisyen 4:9, 10) I kler alor, ki nou toultan kapab amelyore!

²⁰ Alor ler nou get nou teks pour lannen lo miray dan Lasal Rwayonm, annou medit lo sa bann kestyon: Eski mon kapab demontre plis lospitalite? Ki mannyer mon kapab ed mon bann frer ek ser ki dan prizon? Eski mon onor laranzman Bondye konsernan maryaz? Kwa ki pou ed mwan pour vreman kontant mwan avek sa ki mon annan? Ki mannyer mon kapab annan plis konfyans dan Zeova? Ki mannyer mon kapab pli obeisan anver bann ki pe dirize? Si nou fer zefor pour amelyore dan sa sis domenn, sa teks pour lannen pa pou zis en dekorasyon lo miray, i pou fer nou rapel pour obei parol Pol: Kontinyen kontan kanmarad parey bann frer ek ser.​—Ebre 13:1.