1, 2. (a) Ki Zeova ti dir pou arive dan nou letan? (b) Ki kestyon nou pou reponn dan sa lartik? (Vwar portre anler.)

ZEOVA ti dir ki dan nou letan, “dis zonm sorti dan tou langaz bann nasyon pou tyonbo, wi zot pou vreman tyonbo for rob en Zwif e dir: ‘Nou anvi al avek zot, akoz nou’n antann ki Bondye i avek zot.’” (Zekarya 8:23) Sa “Zwif” i reprezant bann ki Bondye in swazir par son lespri sen. Zot osi ganny apele “Izrael Bondye.” (Galat 6:16, NW) Sa “dis zonm” i reprezant bann ki annan lespwar pour viv pour touzour lo later. Zot konnen ki Zeova in beni sa group Kretyen swazir e zot santi ki i en loner pour ador Zeova ansanm avek zot.

² Parey profet Zekarya, Zezi ti dir ki pep Bondye ti pou ini. I ti dekrir sa bann ki enpasyan pour viv dan lesyel konman en “pti troupo” e sa bann ki enpasyan pour viv lo later konman “lezot mouton.” Me Zezi ti dir ki zot tou zot ti pou vin en “sel troupo” e zot ti pou swiv li, zot “sel berze.” (Lik 12:32; Zan 10:16, NW) Vi ki i annan de group, serten i kapab mazinen: (1) Eski lezot mouton i  bezwen konn non tou bann ki’n ganny swazir ozordi? (2) Ki pwennvi bann Kretyen swazir i devret annan lo zot menm? (3) Ki mannyer mon devret tret en dimoun dan mon kongregasyon ki konmans manz sa dipen e bwar sa diven pandan Memoryal? (4) Eski mon devret enkyet ler mon vwar lakantite bann ki manz sa dipen e bwar sa diven pandan Memoryal pe kontinyen ogmante? Sa lartik pou reponn sa bann kestyon.

3. Akoz i pa posib pour nou asire lekel ki form parti sa 144,000?

³ Eski lezot mouton i bezwen konn non tou bann Kretyen swazir ki ankor lo later ozordi? Non. Akoz? Parski i pa posib pour personn asire ki sa bann dimoun pou ganny zot rekonpans. [1] (Vwar lezot not.) Menm si Bondye in envit zot pour al dan lesyel, zot pou ganny zot rekonpans si selman zot reste fidel. Satan i konn sa e i servi “bann fo profet” pour esey “fer [zot] egare.” (Matye 24:24) Bann Kretyen swazir pa kapab asire ki zot pou ganny zot rekonpans, ziska ki Zeova i fer kler avek zot ki i’n ziz zot konman fidel. Zeova i donn sa dernyen laprouvasyon oubyen dernyen sele, swa avan zot mor oubyen zis avan “gran ladetres” i konmanse.​—Revelasyon 2:10; 7:3, 14, NW.

4. Si i pa posib pour konn non tou Kretyen swazir ki lo later ozordi, ki mannyer nou kapab “al avek zot”?

⁴ Si i pa posib pour konn non tou bann Kretyen swazir lo later ozordi, ki mannyer lezot mouton i kapab “al avek zot”? Labib i dir ki sa “dis zonm” ti pou “vreman tyonbo for rob en Zwif e dir: ‘Nou anvi al avek zot, akoz nou’n antann ki Bondye i avek zot.’” Sa verse Labib i mansyonn zis en Zwif. Me ler i dir “zot” sa pe refer avek plizyer dimoun. Sa i vedir ki sa Zwif pa zis en dimoun me i pe reprezant sa group Kretyen swazir. Lezot mouton i konn sa e zot servi Zeova ansanm avek sa group. Zot pa bezwen konn non tou dimoun dan sa group e swiv sak sa bann dimoun endividyelman. Zezi ki nou sef e Labib i dir nou ki nou devret swiv zis li.​—Matye 23:10.

5. Ki lavertisman bann Kretyen swazir i devret mazin seryezman lo la e akoz?

⁵ Bann Kretyen swazir i devret mazin seryezman lo sa lavertisman ki ganny trouve dan 1 Korentyen 11:27-29. (Lir.) Ki mannyer en Kretyen swazir i kapab manz sa dipen e bwar sa diven “dan en fason endiny” zour Memoryal? Si sa dimoun pa gard en bon relasyon avek Zeova e i enfidel avek li, ler i manz sa dipen e bwar sa diven, i pe montre en mank respe. (Ebre 6:4-6; 10:26-29) Sa lavertisman  serye i fer bann Kretyen swazir rapel ki zot bezwen reste fidel si zot anvi “ganny sa pri, ki Bondye par Kris-Zezi, in apel [zot] pour resevwar lao.”​—Filipyen 3:13-16.

6. Ki pwennvi bann Kretyen swazir i devret annan lo zot menm?

⁶ Pol ti dir bann Kretyen swazir: “Mwan ki prizonnyen akoz mon servi Senyer, mon sipliy zot pour anmenn en lavi ki dapre sa ki Bondye i oule zot viv, ler i ti apel zot.” Ki mannyer zot devret fer sa? Pol ti eksplike: “Zot bezwen montre limilite, ladouser ek pasyans; avek lanmour siport kanmarad, fer tou pour prezerv linite ki Sent-Espri i donnen par lape ki ini zot ansanm avek kanmarad.” (Efezyen 4:1-3) Lespri sen Zeova i ed son bann serviter pour annan limilite, me pa lorgey. (Kolosyen 3:12) Alor bann Kretyen swazir pa krwar ki zot pli meyer ki lezot. Zot konnen ki Zeova pa neseserman donn bann Kretyen swazir plis lespri sen ki i donn son bann lezot serviter. Zot pa santi ki zot kapab pli byen konpran bann laverite dan Labib ki okenn lezot dimoun. Deplis, zot pa pou zanmen dir en dimoun ki li osi in ganny swazir e ki i devret konmans manz sa dipen e bwar sa diven pandan Memoryal. O kontrer, zot annan limilite e zot konnen ki zis Zeova ki kapab envit en dimoun pour al dan lesyel.

7, 8. Ki bann Kretyen swazir pa ekspekte e akoz?

⁷ Menm si bann Kretyen swazir i santi ki i en loner pour ganny envite pour al dan lesyel, zot pa ekspekte lezot pour tret zot dan en fason spesyal. (Efezyen 1:18, 19; lir Filipyen 2:2, 3.) Zot osi konnen ki ler Zeova ti swazir zot, i pa ti fer tou dimoun konnen. Alor en Kretyen swazir pa sirprann si serten pa krwar deswit ki i’n ganny swazir. I realize ki Labib i dir ki si en dimoun i dir ki Bondye in donn li en responsabilite spesyal, pa bezwen krwar li deswit. (Revelasyon 2:2) Vi ki en Kretyen swazir pa ekspekte lezot i donn li tro bokou latansyon, i pa ti pou dir ki i en Kretyen swazir avek en dimoun ki i zwenn pour premye fwa. Anfet, i tre probab ki i pa ti pou dir sa avek personn. Deplis, i pa pou vant son lekor konsernan tou sa bann keksoz merveye ki i pou fer dan lesyel.​—1 Korentyen 1:28, 29; lir 1 Korentyen 4:6-8.

⁸ Bann Kretyen swazir pa santi ki zot devret pas letan avek zis lezot Kretyen swazir, konmsi zot form parti en klib. Zot pa esey rod lezot Kretyen swazir pour ki zot kapab koz konsernan ganny swazir oubyen zwenn dan en group pour etidye Labib. (Galat 1:15-17) Kongregasyon pa ti pou ini si bann Kretyen swazir ti fer sa. I ti pou konmsi zot pe travay kont lespri sen ki ed pep Bondye pour annan lape ek linite.​—Lir Romen 16:17, 18.

9. Akoz ou bezwen veye ki mannyer ou tret bann ki manz sa dipen e bwar sa diven pandan Memoryal? (Vwar sa bwat “ Lanmour ‘pa fer nanryen ki fer onte.’”)

⁹ Ki mannyer ou devret tret bann  frer ek ser swazir? Zezi ti dir son bann disip: “Zot tou, zot frer.” I ti kontinyen: “Sa enn ki rod grander pou ganny abese, e sa enn ki abes son lekor pou vin enportan.” (Matye 23:8-12) Alor i ti pou mal pour admir en dimoun tro bokou, menm si i en frer swazir Kris. Ler Labib i koz konsernan bann ansyen, i ankouraz nou pour imit zot lafwa, me i pa dir nou ki nou kapab fer okenn imen nou sef. (Ebre 13:7) I vre ki Labib i dir ki serten i “merit resevwar en doub loner.” Me sa i akoz zot “diriz byen” kongregasyon e “donn lapenn [oubyen “travay dir,” NW] pour prese e ansennyen,” me pa akoz zot Kretyen swazir. (1 Timote 5:17) Nou pou anbaras bann Kretyen swazir si nou tro ponp zot e donn zot tro bokou latansyon. Pli pir ankor, nou kapab fer zot vin orgeye. (Romen 12:3) Personn antre nou pa ti pou anvi fer okenn keksoz ki ti pou kapab fer en frer Kris fer sa gro fot.​—Lik 17:2.

10. Ki mannyer ou kapab montre ki ou respekte bann Kretyen swazir?

¹⁰ Ki mannyer nou kapab montre ki nou respekte bann ki Zeova in swazir? Nou pa ti pou demann zot ki mannyer zot in ganny swazir. Sa i en keksoz ki pa konsern nou. (1 Tesalonisyen 4:11; 2 Tesalonisyen 3:11) Nou pa devret krwar ki zot konzwen, paran oubyen lezot manm fanmir osi in ganny swazir. En dimoun pa erit sa lespwar avek son fanmir. (1 Tesalonisyen 2:12) Nou devret osi evite demann bann kestyon ki kapab bles lezot. Par egzanp, nou pa ti pou demann madanm en frer swazir ki mannyer i santi pour viv lo later pour touzour san son msye. Apre tou, nou kapab annan konfyans total ki dan nouvo lemonn Zeova pou “satisfer dezir tou sa ki vivan.”​—Psonm 145:16.

11. Ki mannyer nou ganny proteze si nou evite “admir bann personnalite”?

¹¹ Si nou pa tret bann Kretyen swazir konmsi zot pli enportan ki lezot, nou osi protez nou lekor. Dan ki sans? Labib i dir nou ki i kapab annan “bann fo frer” dan kongregasyon ki kapab menm dir ki zot in ganny swazir. (Galat 2:4, 5; 1 Zan 2:19) Deplis, i kapab ki serten Kretyen swazir pa reste fidel. (Matye 25:10-12; 2 Pyer 2:20, 21) Me si nou evite “admir bann personnalite,” nou pa pou zanmen swiv lezot, menm bann ki’n ganny swazir, bann ki koni oubyen ki’n servi Zeova pandan en bon letan. Koumsa, si zot vin enfidel oubyen kit kongregasyon, nou pa pou perdi nou lafwa dan Zeova oubyen aret servi li.​—Zid 16, not NW.

12, 13. Akoz nou pa devret trakase ler nou vwar konbyen dimoun ki manz sa dipen e bwar sa diven pandan Memoryal?

¹² Pour plizyer lannen, lakantite dimoun ki ti manz sa dipen e bwar sa diven pandan Memoryal ti kontinyen diminyen. Me tou resaman, sa sif pe ogmante tou le-z-an. Eski sa i devret trakas nou? Non. Annou vwar akoz.

¹³ “Zeova i konn bann ki pour li.”  (2 Timote 2:19, NW) Kontrerman avek Zeova, bann frer ki konte konbyen dimoun ki manz sa dipen e bwar sa diven pandan Memoryal pa vreman konnen lekel ki’n ganny swazir. Alor sa sif i enkli bann ki krwar ki zot in ganny swazir, me ki an realite zot pa’n ganny swazir. Par egzanp, serten ki ti abitye manz sa dipen e bwar sa diven ti arete pli tar. Lezot i kapab annan bann problenm mantal oubyen emosyonnel e zot krwar ki zot pou renny avek Kris dan lesyel. I kler alor, ki nou pa konn egzakteman ki kantite Kretyen swazir ki ankor lo later.

14. Ki Labib i dir konsernan lakantite Kretyen swazir ki pou lo later ler gran ladetres i konmanse?

¹⁴ I pou annan bann Kretyen swazir dan bokou landrwa lo later ler Zezi i vini pour anmenn zot dan lesyel. Labib i dir ki Zezi “pou anvoy son bann lanz e avek gran kou-d-tronpet pou rasanble bann ki’n ganny swazir dan kat kwen later, depi en bout later ziska lot.” (Matye 24:31) Labib i osi montre ki pandan bann dernyen zour i pou annan en ptigin Kretyen swazir ki pou ankor lo later. (Revelasyon 12:17) Me i pa dir ki kantite pou reste ler gran ladetres i konmanse.

15, 16. Ki nou bezwen konpran konsernan sa 144,000 Kretyen ki Zeova in swazir?

¹⁵ Zeova ki deside kan ki i pou swazir bann Kretyen swazir. (Romen 8:28-30) Zeova ti konmans swazir zot apre ki Zezi ti resisite. I paret ki tou  bann vre Kretyen dan premye syek ti ganny swazir. Me pour plizyer santenn lannen apre sa, laplipar bann ki ti dir zot Kretyen pa ti vreman swiv Kris. Kantmenm sa, pandan sa bann lannen, Zeova ti swazir sa ptigin ki ti bann vre Kretyen. Zot ti parey bann dible ki Zezi ti dir ti pou pous parmi bann move zerb. (Matye 13:24-30) Pandan sa bann dernyen zour, Zeova in kontinyen swazir dimoun ki pou form parti sa 144,000. [2] (Vwar lezot not.) Alor nou napa okenn dout ki Bondye pe fer en bon keksoz si i deside swazir serten zis avan lafen. (Izai 45:9; Danyel 4:35; lir Romen 9:11, 16.) [3] (Vwar lezot not.) Nou bezwen fer atansyon ki nou pa reazir parey bann travayer ki ti konplent konsernan lafason ki zot met ti tret bann ki ti ganny anploye dernyen.​—Lir Matye 20:8-15.

¹⁶ Pa tou bann ki annan lespwar pour viv dan lesyel ki form parti sa “lesklav fidel e pridan.” (Matye 24:45-47, NW) Zis parey dan premye syek, Zeova ek Zezi pe servi en ptigin dimoun ozordi pour nouri oubyen ansenny en kantite. Zis detrwa Kretyen swazir dan premye syek ki ti ganny servi pour ekri Lekritir Grek Kretyen. Ozordi, zis detrwa Kretyen swazir ki annan sa responsabilite pour donn pep Bondye “manze kan i ler.”

17. Ki ou’n aprann dan sa lartik?

¹⁷ Ki nou’n aprann dan sa lartik? Zeova in deside pour donn laplipar son bann serviter lavi eternel lo later e donn sa bann ki pou diriz avek Zezi lavi dan lesyel. Zeova i rekonpans tou son bann serviter, ki swa zot form parti sa “Zwif” oubyen sa “dis zonm” e i ekspekte ki zot obei menm lalwa e reste fidel. Nou tou nou bezwen annan limilite. Nou tou nou devret servi li ansanm e dan linite. E nou tou nou bezwen travay pour gard lape dan kongregasyon. Anmezir ki nou apros avek lafen, annou kontinyen servi Zeova e swiv Kris konman en sel troupo.