1, 2. Ki bokou dimoun i santi konsernan travay ki zot fer?

BOKOU dimoun i santi ki lenportans en dimoun i depan lo travay ki sa dimoun i fer. Dan serten kiltir, ler ou zwenn en dimoun, i pa drol pour demann li: “Ki travay ou fer?”

² Labib i koz lo travay ki dimoun ti fer. Par egzanp, i koz lo “Matye ki ti en kolekter taks,” “Simon, en travayer lapo” e “Lik, sa dokter ki nou kontan.” (Matye 10:3; Akt 10:6; Kolosyen 4:14) Par ler, Labib i osi fer resorti bann responsabilite ki dimoun ti annan dan servis Zeova. I ti annan Lerwa David, profet Eliya e zapot Pol. Sa bann zonm ti pran bann responsabilite ki Zeova ti donn zot o serye. Pareyman, nou osi nou devret pran nenport ki responsabilite ki nou annan dan servis Zeova o serye.

3. Akoz bann ki pli aze i bezwen form bann ki pli zenn? (Vwar portre o konmansman sa lartik.)

³ Nou kontan servi Zeova e nou responsabilite i annan  en gran valer pour nou. Bokou parmi nou i sitan kontan nou travay pour Zeova ki nou ti a kontan kontinyen fer li pli lontan posib. Me malerezman, ler dimoun i vin pli aze, zot pa kapab fer sa ki zot ti abitye fer ler zot ti pli zenn. (Eklezyast 1:4) Sa sityasyon in kree serten defi pour pep Bondye. Ozordi, sa travay predikasyon i kontinyen ogmante e lorganizasyon Zeova pe servi teknolozi modern pour anons sa bon nouvel avek otan dimoun posib. Me parfwa bann frer ek ser aze i kapab vwar li difisil pour aprann bann nouvo fason fer keksoz. (Lik 5:39) An plis, i normal ki lafors ek lenerzi en dimoun i diminyen anmezir ki i antre dan laz. (Proverb 20:29) Alor, i fer sans ki bann ki pli aze i form bann zenn pour desarz plis responsabilite dan lorganizasyon Zeova.—Lir Psonm 71:18.

4. Akoz serten frer i vwar li difisil pour konfye en pe zot responsabilite avek lezot? (Vwar bwat “ Akoz i kapab difisil pour nou konfye serten responsabilite avek lezot?”)

⁴ Par ler bann ki annan lotorite i vwar li difisil pour konfye serten travay oubyen responsabilite avek bann ki pli zenn. Serten frer i kapab sagren ler zot mazinen ki zot pe al perdi en responsabilite ki zot vreman kontan. Zot kapab tris pour aret sa travay spesyal ki zot kontan fer oubyen zot enkyet ki si zot pa pe diriz travay, sa travay pa pou ganny byen fer. Petet zot kapab santi ki zot napa ase letan pour form lezot. Pareyman, bann zenn i bezwen annan pasyans ler zot pa ganny plis responsabilite.

5. Ki nou pou diskite dan sa lartik?

⁵ Alor, akoz i enportan ki bann ki pli aze i ed bann ki pli zenn pour desarz plis responsabilite? Ki mannyer zot kapab fer sa? (2 Timote 2:2) Akoz bann ki pli zenn i bezwen annan en bon latitid pour ki zot kapab aprann ler zot travay avek bann ki pli aze e ki annan plis leksperyans ki zot? Pour konmanse, annou vwar ki mannyer Lerwa David ti form son garson pour fer en travay enportan.

6. Ki David ti oule fer? Ki Zeova ti dir li?

⁶ Pour plizyer lannen, David ti ganny persekite e sa ti fer ki i pa ti kapab reste dan menm landrwa. Me ler i ti vin lerwa, i ti reste dan en lakaz konfortab. Alor i ti dir Natann: “Mwan mon pe reste dan en lakaz an bwa sed, me Kof Lalyans [Zeova] i dan en latant.” David ti vreman anvi konstri en zoli tanp pour Zeova. Natann ti dir David: “Fer tou sa ki ou leker i dir ou akoz Bondye i ava avek ou.” Me pa sa ki Zeova ti anvi. I ti demann Natann pour al dir David: “Pa ou ki pou konstri en lakaz pour mwan reste.” Menm si Zeova ti promet David ki I ti pou touzour avek li, David ti ganny dir ki enn parmi son bann garson ki ti pou konstri tanp. Ki mannyer David ti reazir?—1 Kronik 17:1-4, 8, 11, 12; 29:1.

7. Ki mannyer David ti reazir ler Zeova ti dir ki se Salomon ki pou konstri tanp?

⁷ David ti vreman anvi konstri en tanp pour Zeova, alor petet i ti vreman dezapwente. Me i ti totalman siport  sa proze ki Salomon, son garson, ti pou ansarz. David ti ede pour organiz bann travayer e i ti donn fer, kwiv, larzan, lor ek dibwa pour konstri tanp. I pa ti fatig li avek lekel ki ti pou ganny felisite pour konstri sa tanp, sa tanp ki pli tar ti pou ganny apele tanp Salomon. O kontrer, i ti ankouraz Salomon e dir li: “Alor, mon garson, [Zeova] ava avek ou, pour ki ou reisir e ou ava konstri en tanp pour [Zeova], ou Bondye, parey in dir lo ou size.”—1 Kronik 22:11, 14-16.

8. Akoz David ti’n kapab panse ki Salomon pa ti kalifye pour konstri tanp? Me ki David ti fer?

⁸ Lir 1 Kronik 22:5. Petet, David ti santi ki Salomon pa ti ankor pare pour diriz en proze sitan enportan koumsa. Sa tanp ti bezwen enn ki ti pou “renonmen pour son labote ekstraordiner” e Salomon ti “zenn e san leksperyans.” Me David ti konnen ki Zeova ti pou ed Salomon pour fer sa travay spesyal. Alor, David ti fer tou sa ki i ti kapab pour ede fer en bon preparasyon pour sa proze enorm.

9. Akoz bann frer ki pli aze pa devret dekouraze ler zot donn lezot serten responsabilite? Donn en legzanp.

⁹ Bann frer pli aze pa devret dekouraze ler zot bezwen donn serten responsabilite bann frer ki pli zenn. Nou tou nou realize ki se travay Zeova ki pli enportan. Alor bann zenn onm i bezwen ganny formen pour desarz plis responsabilite pour ki sa travay i ganny fer. Zis mazin sa. Ler ou ti ankor en manrmay, i tre probab ki ou ti gete ki mannyer ou papa ti dray son loto. Ler ou ti vin en pe pli gran, i ti eksplik ou ki i pe fer. Avek letan, ou osi ou ti  ganny ou laysenns e ou ti konmans dray loto. Menm ler ou ti’n ganny ou laysenns, ou papa ti ankor donn ou konsey lo konman pour dray. Par ler zot ti dray sakenn son tour. Me ler ou papa ti vin pli vye, ou ki ti dray preski toultan. Eski ou papa ti ankoler? Non, probableman, i ti byen kontan ki ou ti pe anmenn li partou. Pareyman, bann frer pli aze i kontan ler zot vwar bann frer ki zot in formen pran responsabilite dan lorganizasyon Zeova.

10. Ki Moiz ti dir konsernan ganny loner ek lotorite?

¹⁰ Nou bezwen fer atansyon ki nou pa zalou responsabilite lezot. Nou kapab tir en leson lo reaksyon Moiz ler serten Izraelit ti konmans profetize. (Lir Nonm 11:24-29.) Zozye ti anvi anpes zot, me Moiz ti dir: “Eski ou zalou dan mon plas? Mon ti ava kontan ki [Zeova] i met son Lespri lo pep Izrael antye, konmsa tou dimoun ti ava profetize.” Moiz ti konnen ki se Zeova ki ti pe diriz travay. Alor, olye rod loner pour li menm, Moiz ti anvi ki tou serviter Zeova i ganny bann responsabilite. Me nou, eski nou kontan ler lezot i ganny bann responsabilite dan servis Zeova?

11. Ki en frer ti dir konsernan donn responsabilite avek lezot?

¹¹ I annan en kantite frer ki’n travay dir dan servis Zeova pour plizyer dizenn lannen e ki’n form bann zenn onm pour aksepte plis responsabilite. Par egzanp, annou vwar legzanp en frer ki apel Peter. Pandan son 74 an dan servis a plen tan, i’n travay pour 35 an kot en biro brans Lerop. Pour en bon pe letan, i ti sirveyan Departman pour Servis. Apre, sa responsabilite ti ganny donnen avek Paul, en frer pli zenn ki Peter ti’n formen. Eski Peter ti mekontan akoz sa sanzman? Non. I ti dir: “Mon vreman kontan ki i annan bann frer ki’n ganny formen pour ganny bann pli gran responsabilite e ki pe byen fer dan sa travay.”

12. Ki nou kapab aprann avek legzanp Reabam?

¹² Ler Reabam, garson Salomon ti vin lerwa, i ti demann konsey avek bann aze lo ki mannyer pour desarz son nouvo responsabilite. Me apre i ti rezet zot konsey! I ti plito swiv konsey  bann zenn onm ki i ti’n grandi avek. Sa ti anmenn bokou problenm. (2 Kronik 10:6-11, 19) Ki nou kapab aprann? I saz pour demann konsey avek bann ki pli aze e ki annan plis leksperyans ki nou. Bann ki pli zenn pa devret santi zot anba presyon pour fer keksoz egzakteman parey zot ti ganny fer dan lepase. Me zot devret annan respe pour konsey bann aze e pa vitman krwar ki zot fason fer keksoz pa pou marse.

13. Ki mannyer bann ki pli zenn i kapab travay ansanm avek bann ki pli aze?

¹³ Par ler bann ki pli zenn i kapab ganny sa responsabilite pour siperviz travay bann frer ki pli aze e eksperyanse ki zot. I ti pou saz ki zot aprann avek sa bann frer ki pli aze. Dan sa legzanp ki nou’n koz lo la pli boner, apre ki Paul ti ranplas Peter konman sirveyan en departman dan Betel, i ti dir, “Mon ti fer letan pour demann Peter konsey e mon ti ankouraz lezot pour fer parey.”

14. Ki nou aprann avek lafason ki Timote ek zapot Pol ti travay ansanm?

¹⁴ Timote ti bokou pli zenn ki Pol, kantmenm sa zot ti’n travay ansanm pour plizyer lannen. (Lir Filipyen 2:20-22.) Pol ti dir bann Korentyen: “Mon pe anvoy Timote kot zot, parski i mon garson ki mon kontan e ki fidel dan Senyer. I pou rapel zot mon bann metod an rapor avek Kris Zezi, zis parey mon pe ansennyen partou dan bann kongregasyon.” (1 Korentyen 4:17) Pa sa i montre nou klerman ki Pol ek Timote ti travay byen ansanm e siport kanmarad! Pol ti pran letan pour ansenny Timote son “metod an rapor avek Kris Zezi” e Timote ti aprann byen. Pol ti kontan Timote e i ti konnen ki i ti pou pran byen swen avek bann frer ek ser Korent. Bann ansyen i kapab imit zapot Pol anmezir ki zot form lezot frer pour desarz bann responsabilite dan kongregasyon.

15. Ki mannyer Romen 12:3-5 i ed nou fer fas avek bann sanzman?

¹⁵ Nou pe viv dan en lepok vreman eksitan. Parti lorganizasyon Zeova ki lo later pe grandi dan plizyer fason. Sa i vedir ki keksoz pou kontinyen sanze. Serten sa bann sanzman i tous nou personnelman e i pa touzour fasil pour adapte avek sa bann sanzman. Me kwa ki pou ed nou? Nou bezwen annan limilite e konsantre lo sa ki byen pour sa travay Rwayonm, olye lo sa ki nou nou oule. Ler nou fer sa, nou tou nou reste ini. Pol ti ekri bann Kretyen Ronm: “Mon dir zot tou ki la pour pa annan en tro gran lopinyon lo zot prop lekor, me pour annan en lopinyon rezonnab lo zot prop lekor.” Apre i ti eksplike ki zis parey sak parti nou lekor i annan diferan fonksyon, sak  manm kongregasyon i annan diferan rol.—Romen 12:3-5.

16. Ki sak Kretyen i kapab fer pour gard lape ek linite dan lorganizasyon Zeova?

¹⁶ Tou dimoun dan pep Zeova i anvi siport sa Rwayonm e fer tou sa ki zot ganny demande pour fer. Bann frer pli aze i kapab form bann pli zenn. Bann zenn frer i kapab pran plis responsabilite dan en fason rezonnab e avek respe. Bann frer marye i kontan ler zot madanm i siport zot ler sirkonstans i sanze. Sa bann madanm i kapab imit Prisil ki ti fidelman servi avek son msye Akila.—Akt 18:2.

17. Ki travay Zezi ti form son bann disip pour fer?

¹⁷ Zezi ti donn pli bon legzanp an sa ki konsern volonterman form lezot. Zezi ti konn tre byen ki lezot ti pou bezwen kontiny sa travay. I ti realize ki son bann disip ti enparfe. Me i ti annan konfyans ki zot ti pou anons sa bon nouvel dan en pli gran lanpler ki li. (Zan 14:12) I ti form zot byen e zot ti reisi pres dan tou pei ki zot ti kapab ale.—Kolosyen 1:23.

18. Ki travay nou pou annan dan lavenir? Ki travay nou annan la konmela?

¹⁸ Apre lanmor Zezi, Zeova ti resisit li e donn li ankor plis travay pour fer. I ti osi donn li lotorite “par lao tou gouvernman, lotorite, pouvwar, dominasyon.” (Efezyen 1:19-21) Menm si nou mor fidelman avan Armagedon, nou pou viv ankor e nou pou annan bokou travay satisfezan pour fer dan sa nouvo lemonn. La konmela, nou tou nou annan en travay ekstraordiner pour fer e sa i anons sa bon nouvel e fer bann dimoun vin bann disip Zezi. Alor ki swa nou zenn oubyen aze, ki sakenn i “annan bokou keksoz pour fer dan travay Senyer.”—1 Korentyen 15:58.