1, 2. (a) Nonm trwa trezor presye ki sorti kot Zeova. (b) Ki nou pou vwar dan sa lartik?

ZEOVA i sa Personnaz pli ris dan liniver. Tou keksoz i pour li. (1 Kronik 29:11, 12) Kantmenm sa, Zeova i vreman zenere anver tou. Pa nou rekonesan ki i’n partaz en kantite trezor spirityel avek nou! Ki serten sa bann trezor? I annan (1) Rwayonm Bondye, (2) nou predikasyon ek (3) bann laverite presye ki trouve dan son Parol. Me si nou pa fer atansyon, avek letan nou kapab oubliye ki kantite valer sa bann trezor i annan. Nou bezwen kontinyen rapel zot valer e agrandir nou lanmour pour zot parski parey Zezi ti dir, “kot zot trezor i ete, zot leker pou la osi.”—Lik 12:34.

² Annou vwar ki mannyer nou kapab gard nou lanmour ek lapresyasyon for pour Rwayonm, predikasyon ek laverite. Ler nou pe fer sa, medit lo ki mannyer ou kapab personnelman agrandi ou lanmour pour sa bann trezor spirityel.

3. Ki en zonm ti pare pour fer pour li kapab aste en perl? (Vwar portre o konmansman sa lartik.)

³ Lir Matye 13:45, 46. Zezi ti rakont en zistwar konsernan en zonm ki ti pe aste e vann bann perl. En zour, i ti trouv en perl ki ti annan plis valer ki tou lezot perl ki i ti’n deza vwar avan. Sa zonm ti telman anvi sa perl ki i ti vann tou sa ki i ti annan pour li aste sa perl. Eski ou kapab imazinen ki degre sa perl ti presye pour li?

4. Ki nou pare pour fer pour sa Rwayonm?

⁴ Ki nou kapab aprann avek sa zistwar ki Zezi ti rakonte? Laverite lo Rwayonm Bondye i parey sa perl presye. Si nou kontan sa Rwayonm parey sa zonm ti apresye valer sa perl, nou pou pare pour kit tou sa ki nou annan pour vin e reste sitwayen sa Rwayonm. (Lir Mark 10:28-30.) Annou vwar ki mannyer de dimoun ti fer sa.

5. Ki Zase ti pare pour fer pour Rwayonm Bondye?

⁵ Zase ti en kolekter taks. I ti’n vin ris par vol bann dimoun ler i ti anmas larzan taks. (Lik 19:1-9) Me en zour, Zase ti tann Zezi koz lo Rwayonm. I ti sitan kontan sa ki i ti tande ki i ti anvi sanz konpletman. I ti dir: “Gete Senyer! Lanmwatye mon byen mon pe donn bann pov e sa ki mon’n vol avek lezot, mon pe al rann zot kat fwa plis.” Zase ti rann bann dimoun zot larzan e i ti aret voras.

6. Ki sanzman en madanm ti fer e akoz i ti fer li?

⁶ Detrwa lannen pase, en madanm ki ti dan en relasyon omoseksyel ti tann konsernan sa Rwayonm. I ti osi prezidan en lorganizasyon ki lalit pour drwa bann omoseksyel. Me anmezir i ti etidye Labib e aprann konsernan valer Rwayonm Bondye, i ti realize ki i ti pou bezwen fer bann gran sanzman dan son lavi. (1 Korentyen 6:9, 10) Vi ki i ti kontan Zeova, i ti kit sa lorganizasyon e termin son relasyon omoseksyel. I ti batize an 2009 e son lannen apre i ti pran servis pionye. I ti reisi fer sa bann gran sanzman parski son lanmour pour Zeova ti pli for ki nenport sa bann move dezir ki i ti deza annan.—Mark 12:29, 30.

7. Ki mannyer nou kapab gard nou lanmour pour Rwayonm Bondye for?

⁷ Pour nou reisi vin bann sitwayen Rwayonm Bondye, laplipar parmi nou ti bezwen sanz nou lavi konpletman. (Romen 12:2) Me nou lalit pa fini la. Nou pa devret les nanryen, tel parey lanmour pour bann keksoz materyel oubyen nenport dezir seksyel imoral, afeblir nou lanmour pour sa Rwayonm. (Proverb 4:23; Matye 5:27-29) Pour ed nou gard nou lanmour pour Rwayonm Bondye for, Zeova in donn nou en lot trezor ki annan valer.

8. (a) Akoz zapot Pol ti dekrir nou predikasyon konman en trezor dan resipyan later? (b) Ki mannyer Pol ti montre ki i ti kontan predikasyon?

⁸ Zezi ti donn nou sa responsabilite pour prese e ansenny sa bon nouvel konsernan Rwayonm Bondye. (Matye 28:19, 20) Zapot Pol ti dekrir son minister konman en trezor ki ganny anmennen dan bann resipyan later. (2 Korentyen 4:7; 1 Timote 1:12) Vi ki nou enparfe, nou parey sa bann resipyan later. Me sa mesaz ki nou prese i parey en trezor presye parski i kapab fer nou ek bann ki ekout nou ganny lavi eternel. Sa i rezon ki Pol ti dir: “Mon fer tou keksoz akoz sa bon nouvel pour ki mon kapab anons li avek lezot.” (1 Korentyen 9:23) Pol ti travay dir pour ansenny lezot konsernan Rwayonm Bondye. (Lir Romen 1:14, 15; 2 Timote 4:2.) Lanmour pour bon nouvel ti ed li pour kontinyen prese menm si i ti fer fas avek bokou lopozisyon. (1 Tesalonisyen 2:2) Ki mannyer nou kapab imit lanmour ki Pol ti annan pour predikasyon?

9. Ki serten fason nou kapab montre ki nou kontan nou predikasyon?

⁹ En fason ki Pol ti demontre ki i ti kontan predikasyon se par servi tou loportinite pour koz avek lezot. Parey Pol ek bann Kretyen dan premye syek, nou osi nou partaz sa bon nouvel avek dimoun kaz an kaz, dan bann landrwa piblik e nenport landrwa kot nou kapab trouv zot. (Akt 5:42; 20:20) Nou rod diferan fason pour pres avek plis dimoun posib. Si i posib, petet nou kapab servi konman en pionye asistan ouswa en pionye ordiner. Petet nou kapab aprann en nouvo langaz, al servi dan en lot rezyon dan nou pei ouswa menm dan en lot pei.—Akt 16:9, 10.

10. Ki bann byenfe Irene ti gannyen vi ki i ti travay dir pour partaz sa bon nouvel?

¹⁰ Irene, en ser selibater ki reste Leta-z-ini, ti anvi partaz sa bon nouvel avek bann dimoun ki koz langaz Larisi. Alor, an 1993 i ti zwenn en group ki koz langaz Larisi dan lavil New York. Sa letan ti annan zis apepre 20 proklanmater dan sa group. Apre 20 an, Irene ti dir, “Ziska la mon pa ankor konn koz byen langaz Larisi.” Kantmenm sa, Zeova in ed li ek lezot proklanmater pour pres avek dimoun dan sa langaz. Sa i fer ki ozordi i annan sis kongregasyon ki koz langaz Larisi dan lavil New York. Irene ti etidye Labib avek en kantite dimoun e 15 parmi zot in batize. Serten parmi zot i servi konman Betelit, pionye ek ansyen. Irene i dir, “Ler mon mazin lo lezot lobzektif ki mon ti’n kapab pourswiv, mon pa kapab imazin enn ki ti pou’n donn  mwan plis lazwa ki sa.” Predikasyon i vreman en trezor pour Irene!

11. Ki bann rezilta nou gannyen ler nou kontinyen prese malgre persekisyon?

¹¹ Si predikasyon i en trezor pour nou, nou pou fer parey zapot Pol e kontinyen prese menm ler nou ganny persekite. (Akt 14:19-22) Par egzanp, ant bann lannen 1930 ek 1944, nou bann frer ek ser Leta-z-ini ti ganny persekite severman, me zot ti kontinyen prese. Ler bann lotorite ti esey anpes zot, nou bann frer ti al ankour e ganny plizyer zot bann ka ankour. An 1943, Frer Knorr ti mansyonn enn parmi bann ka ki nou’n gannyen dan Lakour Siprenm Leta-z-ini. I ti dir ki i ti pou napa okenn ka pour anmenn devan sa Lakour si bann frer ek ser pa ti’n kontinyen prese. I ti osi dir ki akoz bann frer ek ser partou dan lemonn ti kontinyen prese, zot ti montre ki persekisyon pa marse. Bann frer ek ser dan lezot pei in osi ganny bann ka parey. Gras a nou lanmour pour predikasyon, nou pa pou permet ki persekisyon i fer nou aret prese.

12. Ki ou determinen pour fer?

¹² Ler nou kontan predikasyon, nou pa pou mazin zis lo lakantite erdtan ki nou mete lo nou rapor. Nou pou fer tou sa ki nou kapab pour donn en “temwannyaz afon lo sa bon nouvel.” (Akt 20:24; 2 Timote 4:5) Me kwa ki nou pou ansenny lezot? Annou vwar en lot trezor sorti kot Bondye.

13, 14. Ki sa “stor” ki Zezi ti pe koz lo la dan Matye 13:52 e ki mannyer nou ranpli li?

¹³ En lot trezor ki Zeova in donn nou i tou laverite ki nou’n aprann. Zeova i sours laverite. (2 Samyel 7:28; Psonm 31:5) Parey en Papa ki zenere, Zeova i  oule partaz sa bann laverite avek nou. Ziska la, nou’n aprann plizyer sa bann keksoz par lir son Parol ek nou bann piblikasyon e par asiste nou bann lasanble ek bann renyon. Anmezir nou akimil laverite, nou pou annan sa ki Zezi ti apel en “stor” laverite kot i annan “bann nouvo keksoz ek bann vye keksoz.” (Lir Matye 13:52.) Zeova pou ed nou ranpli nou “stor” si nou rod laverite parey nou rod en trezor ki’n kasyet. (Lir Proverb 2:4-7.) Ki mannyer nou fer sa?

¹⁴ Nou bezwen etidye Labib ek nou bann piblikasyon regilyerman e fer resers o profon. Sa pou ed nou dekouver bann “nouvo” laverite, bann ki nou pa ti konnen avan. (Zozye 1:8, 9; Psonm 1:2, 3) Sa premye nimero Latour Veyer an Angle, ki ti ganny pibliye an Zilyet 1879, ti konpar sa laverite avek en fler ki’n kasyet parmi en kantite move zerb. Pour arive trouv sa kalite fler, en dimoun i bezwen byen rod li. Ler i trouv sa fler i pa devret satisfe pour annan zis sa enn. I devret kontinyen fer resers pour trouv bokou plis fler. Dan menm fason, nou pa devret satisfe ler nou trouv zis en laverite. Nou devret enpasyan pour kontinyen rod bokou plis laverite.

15. Akoz nou kapab apel serten laverite “vye” e lekel parmi zot ki annan plis valer pour ou?

¹⁵ Ler nou ti konmans etidye Labib, nou ti aprann serten keksoz merveye. Nou kapab apel zot bann “vye” laverite parski nou ti aprann zot premye. Ki serten sa bann laverite? O konmansman, nou ti aprann ki Zeova i nou Kreater e ki i annan en plan pour bann imen. Nou ti osi aprann ki Bondye ti anvoy son Garson lo later pour mor konman en ranson pour ki nou kapab ganny libere avek pese ek lanmor. Nou ti osi aprann ki Rwayonm Bondye pou retir tou soufrans e ki nou kapab viv dan lape e dan lazwa lo later pour touzour.—Zan 3:16; Revelasyon 4:11; 21:3, 4.

16. Ki nou bezwen fer ler i annan bann nouvo azisteman dan nou konprenezon lo bann laverite ki dan Labib?

¹⁶ Par ler, nou konprenezon lo en profesi Labib ouswa lo en verse i kapab ganny aziste. Ler sa i arive, i enportan pour pran letan pour etidye sa azisteman e medit lo la. (Akt 17:11; 1 Timote 4:15) Nou pa zis bezwen konpran bann diferans ki i annan ant sa vye ek sa nouvo konprenezon, me nou bezwen port nou latansyon lo bann detay sa nouvo konprenezon. Si nou etidye byen, sa pou garanti ki sa nouvo laverite i vin en parti nou koleksyon laverite ki dan Labib. Akoz i bon pour nou fer sa bann zefor?

17, 18. Ki mannyer lespri sen i kapab ed nou?

¹⁷ Zezi ti ansennyen ki lespri sen Bondye i kapab ed nou pour rapel bann keksoz ki nou’n aprann dan lepase. (Zan 14:25, 26) Ki mannyer sa i kapab ed nou ler nou pres sa bon nouvel? Annou vwar legzanp Peter. I ti’n fek konmans servi dan Betel Grannbretanny, an 1970 a laz 19 an. Ler Peter ti pe pres kaz an kaz i ti zwenn en zonm dan son karant an ki ti annan en labarb. I ti demann sa zonm si i ti a  kontan konpran Labib. Sa zonm ti en dirizan dan larelizyon Zwif e i ti soke ki en zenn onm ti krwar ki i ti pou kapab ansenny li Labib. Pour li teste Peter, i ti demann li, “Alor, mon garson, dan ki langaz ki liv Danyel ti ganny ekrir?” Peter ti dir, “En parti sa liv in ganny ekrir an Arameen.” Peter ti kontinyen, “Sa dirizan dan larelizyon Zwif ti sirprann ki mon ti konn larepons, me mon ti pli sirprann ki li! Ki mannyer mon ti konn larepons? Ler mon ti ariv dan lakour e tyek bann magazin Latour Veyer ek Awake! sa mwan ki’n pase, mon ti trouv en lartik ki eksplike ki liv Danyel ti ganny ekrir an Arameen.” (Danyel 2:4) Wi, lespri sen i kapab ed nou pour rapel lenformasyon ki nou’n lir e ki nou’n met dan nou stor.—Lik 12:11, 12; 21:13-15.

¹⁸ Si nou kontan e apresye bann laverite ki nou aprann avek Zeova, nou pou anvi azout zot dan nou stor. Pli nou fer sa, nou pou santi nou pli pare pour ansenny lezot.

19. Akoz nou devret protez nou bann trezor spirityel?

¹⁹ Dan sa lartik, nou’n aprann ki mannyer i enportan pour apresye valer nou bann trezor spirityel. Me nou devret fer byen atansyon ki nou pa permet Satan ek sa lemonn afeblir nou lanmour pour sa bann trezor. Si nou pa fer atansyon i annan bann keksoz ki pou kapab distrer nou tel parey, en promes pour en travay ki pey byen, reve pour ganny en lavi deliks ouswa annan sa dezir pour demonstre avek nou bann keksoz materyel. Zapot Zan i rapel nou ki sa lemonn ek tou sa ki i pe ofer pou disparet byento. (1 Zan 2:15-17) Sa i rezon akoz nou devret kontinyen demontre nou lapresyasyon pour nou bann trezor spirityel e protez zot.

20. Ki ou determinen pour fer pour protez ou bann trezor spirityel?

²⁰ Alor toultan pare pour abandonn nenport kwa ki kapab afebli ou lanmour pour Rwayonm Bondye. Reste determinen pour pres avek devouman e pa zanmen perdi ou lanmour pour predikasyon. Kontinyen rod bann laverite ki dan Labib. Anmezir ou fer sa, ou pou akimil “trezor dan lesyel ki pa pou zanmen gate, kot voler pa kapab arive e kot napa lever. Parski kot zot trezor i ete, zot leker pou la osi.”—Lik 12:33, 34.