1, 2. (a) Ki sa keksoz pli enportan ki afekte tou limanite? (b) Akoz sa i enportan pour nou?

POUR bokou dimoun ozordi, larzan i en keksoz vreman enportan. I sa keksoz ki zot mazin lo la e ki donn zot traka. Zot pas zot letan pe esey ganny plis larzan oubyen gard sa larzan ki zot deza annan. Pour lezot dimoun, sa ki pli enportan i zot fanmir, zot lasante e bann keksoz ki zot anvi akonpli dan lavi.

² I annan en keksoz ki pli enportan ki tousala. Sa i sa kestyon konsernan drwa Zeova pour dirize. I vreman enportan ki nou pa zanmen aret mazin lo la. Si nou pa fer atansyon, nou kapab vin sitan okipe avek nou lavi toulezour oubyen sitan trakase lo nou bann problenm personnel ki nou oubliye ki kantite sa i enportan. Si nou siport drwa Zeova pour dirize, nou pou pli kapab fer fas avek nou bann problenm dan lavi toulezour e nou pou vin pli pros avek Zeova.

3. Ki Satan i dir lo dominasyon Bondye?

³ Satan in lev sa kestyon konsernan si Zeova i annan drwa dirize. Satan i anvi bann imen krwar ki Zeova i en Dirizan koronpi e ki I pa anvi sa ki pli bon pour nou. Satan in esey dir ki bann dimoun ti pou pli ere si zot diriz zot prop lekor. (Zenez 3:1-5) I’n osi esey dir ki napa okenn imen ki vreman fidel avek Bondye e ki si lavi i vin pli difisil, nenport ki pou rezet Li konman Dirizan. (Zob 2:4, 5) Alor Zeova pe les letan pase pour fer kler ki lavi i malere san Bondye konman en Dirizan.

4. Akoz sa kestyon konsernan drwa Zeova pour dirize i bezwen ganny reponn?

⁴ Byensir, Zeova i konnen ki bann lakizasyon Dyab i bann mansonz. Alor, akoz Zeova in les letan pase pour Satan esey prouve ki son lakizasyon i vre? Larepons i enplik bann lanz dan lesyel e bann imen lo later. (Lir Psonm 83:18.) Adan ek Ev pa ti aksepte ki Zeova i diriz zot e depi sa letan i annan bokou lezot dimoun osi ki’n fer parey. Sa i kapab fer serten mazinen ki Dyab i annan rezon. Tan ki sa kestyon konsernan drwa Zeova pour dirize pa ganny reponn dan lespri bann imen ek lanz, i pa kapab annan vre lape ek linite. Me apre ki drwa Zeova pour dirize i ganny zistifye, tou dimoun pou viv anba son dominasyon pour touzour. I pou annan lape partou dan liniver.—Efezyen 1:9, 10.

5. Ki mannyer nou enplike dan sa kestyon konsernan drwa Zeova pour dirize?

⁵ Drwa Zeova pour dirize pou ganny zistifye e dominasyon Satan ek bann imen pa pou reisi e i pou ganny retire. Dominasyon Bondye atraver son Rwayonm dirize par Kris pou reisi. Bann dimoun fidel pou’n prouve ki bann imen i kapab gard zot lentegrite e fidelman siport dominasyon Bondye. (Izai 45:23, 24) Eski nou anvi parmi sa bann fidel? Byensir! Alor, nou bezwen konpran lenportans sa kestyon konsernan drwa Zeova pour dirize.

6. Ki lenportans zistifikasyon drwa Zeova pour dirize i annan?

⁶ Zistifikasyon drwa Zeova pour dirize i pli enportan ki nou boner personnel. Me sa pa vedir ki ganny nou lavi sove pa enportan pour Zeova oubyen ki i pa enterese avek nou. Ki mannyer nou konn sa?

7, 8. Ki mannyer nou pou benefisye ler drwa Zeova pour dirize i ganny zistifye?

⁷ Zeova i kontan bann imen en kantite. Anfet, nou sitan presye pour li ki i ti donn son Garson pour nou kapab ganny lavi eternel. (Zan 3:16; 1 Zan 4:9) Si Zeova pa ti’n gard son promes konsernan nou lavenir, Satan ek lezot ki opoz li ti pou annan rezon. Satan i  dir ki Zeova i koz manti, i pa donn bann imen bon keksoz e i pa diriz dan en fason ki zis. Bann ki opoz Zeova i monk son bann promes e dir: “Pa i ti promet ki i ti pou la, oli li? Anfet, depi lepok nou zanset, tou keksoz i ankor egzakteman parey o konmansman kreasyon.” (2 Pyer 3:3, 4) Me Zeova pou gard son bann promes. I’n fer sir ki ler son drwa pour dirize i ganny zistifye, bann imen obeisan pou osi ganny sove. (Lir Izai 55:10, 11.) Drwa Zeova pour dirize i baze lo lanmour. Alor nou kapab asire ki i pou touzour kontan e apresye son bann serviter fidel.—Egzod 34:6.

⁸ Lefet ki drwa Zeova pour dirize i en kestyon enportan ki bezwen ganny reponn, sa pa vedir ki ganny nou lavi sove pa enportan pour li. Zeova i kontan nou en kantite. Nou bezwen gard antet sa ki pli enportan e fidelman siport son dominasyon.

9. Ki Satan ti dir lo Zob? (Vwar portre o konmansman sa lartik.)

⁹ I enportan ki nou annan sa bon pwennvi konsernan drwa Zeova pour dirize. Nou kapab vwar sa ler nou lir liv Zob ki parmi bann premye liv Labib pour ganny ekrir. Dan sa liv nou lir ki Satan ti dir ki si Zob ti soufer en kantite, i ti pou rezet Bondye. Satan ti menm demann Bondye pour fer Zob soufer. Zeova pa ti pou fer sa, me i ti les Satan teste Zob e dir: ‘Tou sa ki i annan i dan ou pouvwar.’ (Lir Zob 1:7-12.) Pa bokou letan apre, Zob ti perdi son bann serviter ek son bann byen. Apre sa, i ti tande ki son dis zanfan ti’n mor. Satan ti fer li paret ki Bondye ki ti’n fer sa bann move keksoz. (Zob 1:13-19) Apre sa, Satan ti fer Zob ganny en maladi degoutan ki ti fer li soufer en kantite. (Zob 2:7) Pour fer keksoz pli pir ankor, madanm Zob ek trwa fo zanmi ti dir Zob bann keksoz blesan e dekourazan.—Zob 2:9; 3:11; 16:2.

10. (a) Ki mannyer Zob ti demontre son lentegrite anver Bondye? (b) Akoz Zob ti bezwen ganny korize?

¹⁰ Eski sa ki Satan ti dir ti vre? Non. Menm si Zob ti soufer akoz en kantite maler, i pa ti zanmen rezet Zeova. (Zob 27:5) Par kont, pour en pe letan, Zob ti oubliy sa ki ti pli enportan e i ti konsantre plis lo son prop lekor. I ti kontinyen dir ki i pa ti’n fer nanryen mal. Zob ti osi santi ki i ti merit konnen akoz i ti pe soufer. (Zob 7:20; 13:24) I tre probab ki nou kapab konpran santiman Zob. Par kont, Zeova ti konnen ki Zob ti annan en move pwennvi e i ti koriz Zob. Ki mannyer i ti fer sa?

11, 12. Ki Zeova ti ed Zob apresye? Ki mannyer Zob ti reazir?

¹¹ Nou kapab lir sa ki Zeova ti dir Zob dan sapit 38 ziska 41 dan liv Zob. Zeova pa ti eksplik Zob akoz i ti pe soufer. O kontrer, Zeova ti anvi ed li konpran ki kantite i ptipti konpare avek Bondye. I ti ed Zob aprann ki ti annan bann keksoz bokou pli enportan ki son prop problenm. (Lir Zob 38: 18-21.) Parol Zeova ti ed Zob aziste son pwennvi.

¹² Eski i ti mal pour Zeova koz avek Zob koumsa apre tou sa ki i ti’n pas ladan? Non. Zob osi pa ti krwar sa. Zob ti konpran e apresye konsey Zeova. I ti menm dir: “Mon rekonnet mon tor e mon repanti dan lapousyer e dan lasann.” (Zob 42:1-6) Avan sa, en zenn onm ki apel Eliou ti’n osi ed Zob aziste son fason panse. (Zob 32:5-10) Apre ki Zob ti’n ekout konsey ki Zeova ti’n donn li avek lanmour e sanz son pwennvi, Zeova ti fer lezot konnen ki i kontan ki Zob ti’n reste fidel.—Zob 42:7, 8.

13. Ki mannyer konsey Zeova ti ed Zob apre son bann leprev?

¹³ Zob ti kontinyen benefisye avek konsey Zeova menm apre ki son bann leprev ti’n fini. Zeova “ti beni Zob ankor plis ki avan.” Avek letan, i “ti ganny set garson ek trwa fiy.” (Zob 42:12-14) Menm si Zob ti kontan sa bann zanfan, nou kapab asire ki i ti mank sa bann ki ti’n mor. I osi tre probab ki i pa ti zanmen oubliy tou sa bann keksoz terib ki li ek son fanmir ti’n pas ladan. Menm si pli tar Zob ti’n kapab konn rezon akoz i ti pas atraver tou sa bann leprev, i kapab ki i ti demann son lekor akoz Bondye ti les li soufer sa kantite. Si Zob ti’n mazin koumsa, i ti pou’n kapab rapel sa ki Zeova ti’n dir li. Sa ti pou’n rekonfort li e ed li pour annan sa bon pwennvi.—Psonm 94:19, not dan NWT.

14. Ki nou kapab aprann avek leksperyans Zob?

¹⁴ Ler nou medit lo sa ki ti arive avek Zob, sa i kapab ed nou aziste nou fason panse e rekonfort nou. Liv Zob i form parti sa ki Zeova in fer ekrir “pour ansenny nou pour ki atraver nou landirans ek rekonfor ki Lekritir i  donn nou, nou kapab annan lespwar.” (Romen 15:4) Liv Zob i montre nou ki nou pa devret telman mazin lo nou prop problenm ki nou aret mazinen lo zistifikasyon drwa Zeova pour dirize. Parey Zob, nou montre ki nou siport drwa Zeova pour dirize ler nou reste fidel anver li menm ler i difisil.

15. Ki arive ler nou reste fidel malgre problenm?

¹⁵ Leksperyans Zob i kapab rekonfort nou parski i montre nou ki ler nou pas dan leprev, sa pa vedir ki Zeova i ankoler avek nou. Bann leprev i donn nou en loportinite pour siport drwa Zeova pour dirize. (Proverb 27:11) Ler nou andir fidelman, nou fer Zeova kontan e nou lespwar pour lavenir i vin pli for. (Lir Romen 5:3-5.) Leksperyans Zob i montre nou ki “Zeova i annan en kantite konpasyon ek mizerikord.” (Zak 5:11) Si nou siport drwa Zeova pour dirize, i pou rekonpans nou. Ler nou konn sa, sa i ed nou pour “andir tou keksoz avek pasyans ek lazwa.”—Kolosyen 1:11.

16. Akoz nou bezwen rapel nou lekor ki drwa Zeova pour dirize i vreman enportan?

¹⁶ I vre ki i kapab difisil pour konsantre lo drwa Zeova pour dirize ler nou pe pas atraver bann problenm. Menm en pti problenm i kapab paret en gro zafer si nou mazin tro bokou lo la. Alor nou bezwen kontinyen rapel lenportans pour siport drwa Zeova pour dirize malgre difikilte ki nou rankontre.

17. Ki mannyer reste okipe dan travay Zeova i kapab ed nou konsantre lo sa ki pli enportan?

¹⁷ Ler nou reste okipe dan travay Zeova, sa i kapab ed nou rapel kwa ki vreman enportan. Par egzanp, en ser ki apel Renee ti ganny en latak laservel, i ti osi annan kanser e i ti toultan dan douler. Ler i ti lopital, i ti pres avek  bann dimoun ki ti travay laba, avek lezot pasyan e avek bann viziter. En fwa ler Renee ti reste lopital pour de semenn edmi, i ti pres pour 80 erdtan. Menm si Renee ti konnen ki i pou mor, i pa ti zanmen oubliye kwa ki ti vreman enportan. Vi ki i ti siport drwa Zeova pour dirize sa ti fer li santi li anpe.

18. Ki leksperyans Jennifer i ansenny nou konsernan siport drwa Zeova pour dirize?

¹⁸ Nou osi kapab siport drwa Zeova pour dirize ler nou pe fer fas avek bann pti problenm dan lavi toulezour. En ser ki apel Jennifer ti pas trwa zour dan en erport pe esper avyon pour al se li. Bann avyon ti kontinyen ganny kennsel e Jennifer ti santi li epwize e tousel. I ti’n kapab konmans konsantre zis lo son problenm. Me plito, Jennifer ti priy Zeova e demann li pour ed li anons sa bon nouvel avek lezot ki ti pe espere kot sa erport. I ti pres avek en kantite dimoun e plas en kantite piblikasyon. Jennifer ti dir, “Mon ti santi ki Zeova ti’n beni mwan malgre sa leksperyans difisil e i ti donn mwan ase lafors pour port son non dan en bon fason.”

19. Kwa ki idantifye bann vre adorater?

¹⁹ Zis pep Zeova ki vreman konpran lenportans drwa Zeova pour dirize. Sa konprenezon i fer ki sa pep i ganny idantifye konman bann vre adorater. Alor nou tou nou bezwen fer sir ki nou kontinyen siport drwa Zeova pour dirize.

20. Ki mannyer Zeova i santi konsernan tou sa ki ou fer pour siport son drwa pour dirize?

²⁰ Zeova i vwar e apresye tou sa ki ou fer pour siport son drwa pour dirize anmezir ki ou servi li fidelman e andir bann leprev. (Psonm 18:25) Sa lot lartik pou eksplik plis akoz nou devret siport drwa Zeova pour dirize e ki mannyer nou kapab pli demontre nou sipor.