1, 2. Ki sakenn parmi nou i devret asire? (Vwar portre o konmansman sa lartik.)

PAREY nou ti’n diskite dan sa lartik avan, Dyab i dir ki Zeova pa merit sa drwa pour diriz limanite. I dir ki Zeova pa diriz dan en fason zis e ki bann imen ti pou pli ere si zot ti diriz zot prop lekor. Eski Satan i annan rezon? Meton bann imen ti kapab diriz zot lekor e viv pour touzour. Eski zot ti pou pli ere ki si Bondye ki ti pe diriz zot? Eski ou ou ti pou pli ere si ou ti kapab viv pour touzour e viv konpletman endepandan avek Bondye?

² Personn pa kapab reponn sa bann kestyon pour ou. Sakenn parmi nou i bezwen reflesir seryezman lo sa bann kestyon. Apre, i devret vin evidan ki fason dirize Zeova i pli bon e ki i merit nou sipor total. Ler nou lir Labib, nou pou kapab asire ki sa i vre. Annou vwar sa ki Labib i dir konsernan drwa Zeova pour diriz liniver.

3. Akoz Zeova i annan drwa vin Souvren?

³ Zis Zeova tousel ki Souvren liniver parski i Bondye tou pwisan e Kreater. (1 Kronik 29:11; Akt 4:24) Dan en vizyon lo sa ki ti pe pase dan lesyel, sa 144,000 lerwa ki diriz avek Kris ti dir: “Zeova nou Bondye, ou merit laglwar, loner ek pwisans, parski ou’n kree tou keksoz e akoz ou lavolonte, zot in vin an egzistans e zot in ganny kree.” (Revelasyon 4:11) Zeova in kree tou keksoz, alor i annan drwa diriz tou dimoun ki lo later e tou lanz dan lesyel.

4. Akoz liberte pour swazir pa donn nou drwa rebel kont Bondye?

⁴ Satan pa’n kree nanryen. Alor i napa drwa diriz liniver. Tou le de, Satan ek sa premye koup imen ti montre ki zot ti dezobeisan ler zot ti rebel kont drwa Zeova pour dirize. (Zeremi 10:23, NWT) Eski zot liberte pour swazir ti donn zot drwa pour rezet dominasyon Zeova? Non. Liberte pour swazir i donn en dimoun sa drwa pour fer bann swa ek desizyon me i pa donn zot drwa rebel kont nou Kreater Zeova. I kler ki ler zot ti rebel kont Bondye, zot ti mal servi zot liberte pour swazir. Konman imen, nou bezwen dominasyon ek gidans Zeova.

5. Akoz bann desizyon Bondye i touzour zis?

⁵ Mazin en lot rezon akoz Zeova i annan sa drwa pour dirize. I servi son lotorite dan en fason parfe e zis. I dir nou: “Mwan, [Zeova], mon azir avek fidelite, lazistis e avek drwatir. Sanmenm sa ki fer mwan plezir.” (Zeremi 9:24) Zeova pa bezwen bann lalwa imen pour ed li deside kwa ki byen. O kontrer, i met an plas sa standar pour sa ki byen. Deplis, baze lo son lazistis parfe, Zeova ti donn bann imen bann lalwa. Sa psalmis ti dir: “Lazistis ek ladrwatir i fondasyon ou tronn.” Alor, tou lalwa, prensip ek desizyon ki sorti kot Zeova i bezwen drwat. (Psonm 89:14; 119:128) Satan i dir ki Zeova pa en Dirizan ki zis. Me, li menm li Satan i pa kapab anmenn lazistis dan lemonn.

6. Donn en rezon akoz Zeova i annan drwa dirize.

⁶ En lot rezon akoz Zeova i annan drwa dirize se ki i annan sa konnesans ek lasazes pour pran swen avek liniver. Nou vwar sa atraver lafason ki i ti donn son Garson sa abilite pour geri bann maladi ki bann dokter pa ti kapab geri. (Matye 4:23, 24; Mark 5:25-29) Menm si pour nou sa i bann mirak, me pour Zeova i pa leka. I konpran ki mannyer nou lekor i fonksyonnen e i kapab geri okenn domaz ki arive avek li. I osi kapab resisit bann mor e anpes bann dezas natirel arive.

7. Ki mannyer Zeova i pli saz ki okenn dimoun dan lemonn Satan?

 ⁷ Lemonn dirize par Satan pa kapab anmenn lape, ki swa dan en pei oubyen ant bann pei. Zis Zeova ki annan sa lasazes pour anmenn lape partou lo later. (Izai 2:3, 4; 54:13) Nou santi parey zapot Pol ler i ti dir: “Pa benediksyon, lasazes ek konnesans Bondye i vreman gran! Lekel ki kapab konpletman konpran bann desizyon Bondye e ki sennla ki kapab vreman konpran sa ki i fer?”—Romen 11:33.

8. Ki mannyer ou santi konsernan fason dirize Zeova?

⁸ Parey nou’n vwar, Labib i montre klerman ki Zeova i annan drwa dirize. I osi montre akoz ki i sa pli bon Dirizan. En rezon se ki i diriz avek lanmour. Nou santi nou pros avek li ler nou mazin lo ki mannyer i “ranpli avek pitye ek konpasyon, pasyan, gran dan son fidelite ek lwayote.” (Egzod 34:6) Bondye i tret nou avek dinyite ek respe. I pran swen avek nou pli byen ki nou kapab pran swen avek nou lekor. Dyab i dir ki Zeova i priv Son bann serviter bann bon keksoz, me sa pa vre. Bondye ti menm donn son Garson byenneme pour nou kapab ganny sa lespwar pour viv pour touzour.—Lir Psonm 84:11; Romen 8:32.

9. Ki mannyer nou konnen ki Bondye i enterese avek nou endividyelman?

⁹ Zeova i kontan son pep konman en group. Me i osi vreman enterese avek sak dimoun endividyelman. Mazin sa ki ti arive dan lepase. Pour apepre trwa san-z-an, Zeova ti servi bann ziz pour gid son nasyon e donn zot laviktwar lo zot bann lennmi. Pourtan, pandan tou sa letan Zeova ti pe port latansyon lo bann endividi. Enn parmi zot ti en madanm ki apel Rit. I pa ti en Izraelit e i ti’n abandonn en kantite keksoz pour li vin en adorater Zeova. Zeova ti rekonpans li avek en msye ek en garson. An plis ki sa, garson Rit ti form parti sa laliny desandans ki ti anmenn ver Mesi. Zeova ti osi fer ki zistwar Rit i ganny ekrir dan Labib, dan en liv ki port son non. Ki mannyer ou krwar Rit pou santi ler i resisite e aprann tou sa bann keksoz?—Rit 4:13; Matye 1:5, 16.

10. Akoz nou kapab dir ki Zeova i en bon Dirizan?

¹⁰ Zeova i en bon Dirizan. Bann ki obei li i santi zot lib e zwaye. (2 Korentyen 3:17) David ti dir sa lo Zeova: “Laglwar ek mazeste i devan li; Pwisans ek lazwa i la kot i ete.” (1 Kronik 16:7, 27) Psalmis Etann ti ekri: “I byennere sa pep ki konn sant zot lazwa, ki viv dan lalimyer ou prezans, [Zeova]. Tou le zour, zot dan lazwa akoz ou non; zot redrese akoz ou zis.”—Psonm 89:15, 16.

11. Ki mannyer nou kapab pli konvenki ki fason dirize Zeova i pli bon?

 ¹¹ Pli nou medit lo labonte Zeova, pli nou konvenki ki son dominasyon i pli bon. Nou santi parey sa psalmis ki ti dir sa lo Bondye: “En sel zour dan lakour ou tanp i pli agreab ki mil zour pase dan nenport ki landrwa.” (Psonm 84:10) Zeova i konn egzakteman kwa ki pou fer nou ere parski i konn tre byen ki fason in kree nou. I zenere e i donn nou bokou plis ki nou bezwen. Tou sa ki Zeova i demann nou pour fer i pour nou prop byennet. Menm si nou bezwen fer bann sakrifis, nou pou toultan ere si nou obei Zeova.—Lir Izai 48:17.

12. Ki sa rezon prensipal nou siport drwa Zeova pour dirize?

¹² Dan Labib nou aprann ki apre Renny Mil an Zezi Kri, serten pou rebel kont drwa Zeova pour dirize. (Revelasyon 20:7, 8) Kwa ki pou fer zot fer sa? Sa letan, Dyab pou esey fer bann dimoun azir dan en fason egois. I’n toultan fer sa. I kapab ki Dyab pou esey konvenk bann dimoun ki zot kapab viv pour touzour san ki zot bezwen obei Zeova. Sa pa pou zanmen vin vre. Par kont, nou devret demann nou lekor, ‘Eski mon ti pou krwar dan en mansonz koumsa?’ Si nou vreman kontan Zeova e nou konvenki ki i bon e ki i annan sa drwa pour diriz liniver, dan sa ka en mansonz koumsa pou en keksoz degoutan pour nou. Nou pou anvi viv zis anba dominasyon Zeova sa Bondye ki diriz avek lanmour.

13. Ki mannyer nou siport drwa Bondye pour dirize ler nou imit li?

¹³ Parey nou’n vwar, Zeova i annan sa drwa pour dirize e son fason dirize i pli bon. Alor, son drwa pour dirize i merit ganny tou nou sipor. Nou fer sa ler nou fidel avek Zeova e imit li. Ler nou imit Zeova dan nou fason azir, nou montre ki nou kontan e siport son fason dirize.—Lir Efezyen 5:1, 2.

14. Ki mannyer bann ansyen ek sef fanmir i imit Zeova?

¹⁴ Nou aprann dan Labib ki Zeova i toultan servi son pwisans avek lanmour. Bann sef fanmir ek bann ansyen ki kontan drwa Zeova pour dirize pou imit li e pa vin tro sever ouswa esey kontrol tou keksoz. Zapot Pol ti fer en kantite zefor pour imit Bondye ek son Garson. (1 Korentyen 11:1) I pa ti anbaras lezot oubyen fors zot pour fer sa ki byen. O kontrer, i ti zantiman motiv zot pour fer sa ki byen. (Romen 12:1; Efezyen 4:1; Filemon 8-10) Pol ti pe imit Zeova ler i ti fer sa. Ler nou tret lezot avek lanmour, nou siport drwa Zeova pour dirize.

15. Ki mannyer nou siport dominasyon Zeova ler nou respekte bann ki annan lotorite?

¹⁵ Nou osi siport dominasyon Zeova ler nou annan respe e ler nou korpere avek bann ki i’n donn lotorite. Menm si nou pa totalman konpran oubyen dakor avek en desizyon ki zot fer, nou kontinyen siport zot. Dimoun dan lemonn pa fer sa, me nou, nou fer sa ler  nou aksepte Zeova konman nou Dirizan. (Efezyen 5:22, 23; 6:1-3; Ebre 13:17) Deplis, nou ere parski Bondye i oule sa ki pli bon pour nou.

16. Ki mannyer bann desizyon ki nou fer i montre ki nou siport drwa Bondye pour dirize?

¹⁶ Nou osi kapab siport drwa Zeova pour dirize par bann desizyon ki nou fer. Zeova pa’n met en lareg spesifik pour sak sityasyon dan lavi. Plito, i dir nou son fason panse. Sa i ed nou konpran sa ki nou devret fer. Par egzanp, Zeova pa donn bann Kretyen en lalis bann kalite lenz ki zot devret mete oubyen pa mete. O kontrer, i eksplike ki nou devret modes e respektab konman son bann Temwen. (1 Timote 2:9, 10) I anvi ki nou reflesir lo ki mannyer nou bann desizyon i afekte lezot. (1 Korentyen 10:31-33) Ler nou fer bann desizyon baze lo fason panse Zeova, nou montre ki nou kontan e siport son fason dirize.

17, 18. Ki mannyer bann koup marye i kapab montre ki zot siport drwa Zeova pour dirize?

¹⁷ Annou vwar en fason ki bann Kretyen ki’n marye i kapab siport drwa Bondye pour dirize. Petet lavi maryaz en koup i pa sa ki zot ti pe ekspekte. I menm posib ki zot pe ganny bann gro problenm. Si sa i leka, zot kapab benefisye ler zot mazin lo fason ki  Zeova ti tret nasyon Izrael dan lepase. Zeova ti dekrir son lekor konman en msye pour son pep. (Izai 54:5; 62:4) Plizyer fwa sa nasyon ti dezapwent Zeova. Sa relasyon ti parey en maryaz ki annan gro problenm. Me Zeova pa ti vitman abandonn nasyon Izrael. O kontrer, i ti pardonn zot ankor e ankor e gard promes ki i ti’n fer avek zot.—Psonm 106:43-45.

¹⁸ Bann Kretyen marye ki kontan Zeova i esey imit li. Menm si i annan problenm dan zot maryaz zot pa esey termin sa maryaz san en rezon ki baze lo Labib. Zot konnen ki Zeova i pran bann ve maryaz o serye e ki i anvi en msye ek son madanm i “atase” avek kanmarad. Imoralite seksyel i sa sel rezon ki Labib i donnen pour en dimoun kapab divorse e apre kapab remarye. (Matye 19:5, 6, 9) Ler bann Kretyen i fer tou sa ki zot kapab pour fer zot maryaz reisi, zot siport drwa Zeova pour dirize.

19. Ki nou devret fer ler nou fer bann fot?

¹⁹ Nou tou nou enparfe e par ler nou fer bann keksoz ki dezapwent Zeova. I konn sa e i pour sa rezon ki i’n donn Kris konman en ranson. Alor, ler nou fer en fot, nou devret demann Zeova pour pardonn nou. (1 Zan 2:1, 2) Olye zis santi nou mal akoz nou fot, nou kapab aprann en leson avek sa ki nou’n fer. Nou anvi reste pros avek Zeova parski i pou pardonn nou, ed nou santi pli byen e ed nou pour kontinyen servi li.—Psonm 103:3.

20. Akoz nou devret siport drwa Zeova pour dirize la konmela?

²⁰ Dan nouvo lemonn, Zeova pou diriz tou dimoun e tou dimoun pou aprann konn Zeova ek son bann fason fer ki drwat. (Izai 11:9) Me menm la konmela nou kapab aprann en kantite lo son fason panse e lo ki mannyer i anvi nou fer keksoz. Byento, personn pa pou kestyonn drwa Zeova pour dirize. Alor annou fer tou sa ki nou kapab pour siport drwa Zeova pour dirize par obei li, servi li fidelman e esey nou mye pour imit li dan tou sa ki nou fer.