1. (a) Ki lespwar Zeova in donn nou? (b) Ki savedir “met [nou] lespwar dan Zeova”? (Vwar “Ki sa i vedir?”)

 ZEOVA in donn tou bann ki kontan li en zoli lespwar. Byento, i pou fer ki dimoun i nepli malad, sagren e mor. (Rev. 21:3, 4) I pou ed “bann ki annan limilite” e ki annan lespwar dan li pour fer later vin en paradi. (Ps. 37:9-11) I pou fer li posib pour sakenn parmi nou annan en pli bon lanmitye avek li, enn ki pli meyer ki sa ki nou annan la konmela. Pa sa i en zoli lespwar! Kwa ki fer nou asire ki bann promes Bondye pou vin vre? Zeova i toultan fer sa ki i dir i pou fer. Alor nou annan bon rezon pour “met [nou] lespwar dan Zeova.” * (Ps. 27:14) Nou montre ki nou annan lespwar dan Zeova par esper Bondye avek pasyans e dan lazwa pour li akonpli son bann promes.​—Iza. 55:10, 11.

2. Ki Zeova in toultan fer?

² Zeova in toultan gard son promes. Annou vwar en legzanp. Dan liv Revelasyon, Zeova ti promet ki dan nou letan, i ti pou anmenn dimoun sorti dan tou nasyon, tribi ek langaz pour servi li ansanm dan linite. Sa group dimoun i ganny apele “gran lafoul.” (Rev. 7:9, 10) Menm si  dan sa group i annan bann zonm, madanm ek zanfan ki sorti dan diferan ras, langaz ek kiltir, zot en sel fanmir ki ini. (Ps. 133:1; Zan 10:16) Bann ki form parti sa gran lafoul i osi anons sa bon nouvel avek devouman. Zot toultan pare pour koz lo zot lespwar konsernan en lemonn meyer avek nenport dimoun ki anvi ekoute. (Mat. 28:19, 20; Rev. 14:6, 7; 22:17) Si ou form parti gran lafoul, san dout sa lespwar ki ou annan i vreman presye pour ou.

3. Ki Satan i anvi fer?

³ Dyab pa anvi ki ou annan lespwar. I anvi ki ou krwar ki Zeova pa kontan ou e ki i pa pou gard son bann promes. Si Satan i reisi fer nou perdi lespwar, nou pou napa kouraz e nou menm kapab aret servi Zeova. Parey nou pou vwar, Dyab ti esey fer Zob perdi lespwar e esey fer li aret servi Zeova.

4. Ki nou pou vwar dan sa lartik? (Zob 1:9-12)

⁴ Dan sa lartik, nou pou vwar bann taktik ki Satan ti servi pour esey fer Zob vin enfidel avek Zeova. (Lir Zob 1:9-12.) Nou pou osi vwar ki nou kapab aprann avek legzanp Zob e akoz nou bezwen gard antet ki Bondye i kontan nou e ki i pou akonpli Son bann promes.

5-6. Ki problenm Zob ti pas ladan enn deryer lot?

⁵ Tou keksoz ti pe al byen pour Zob. I ti annan en bon lanmitye avek Zeova, i ti annan en gran fanmir e zot ti ere. I ti osi en zonm ris. (Zob 1:1-5) Me dan zis en zour, i ti perdi preski tou keksoz. Premyerman, i ti perdi son larises. (Zob 1:13-17) Apre, tou son bann zanfan ti mor. Reflesir lo sa sityasyon. Bann paran i vreman sagren ler enn zot bann zanfan i mor. Alor, mazin ki mannyer Zob ek son madanm ti santi ler zot ti tande ki tou le dis zot zanfan ti’n mor. Zot ti dan sok, sagren e dezespere. Nou kapab konpran akoz Zob ti desir son lenz e tonm ater azenou.​—Zob 1:18-20.

⁶ Apre sa, Satan ti donn Zob en maladi ki vreman fermal e anbarasan. (Zob 2:6-8; 7:5) Avan sa, dimoun ti annan bokou respe pour Zob. Zot ti vin rod konsey kot li. (Zob 31:18) Me aprezan zot pa ti vin kot li. Son bann frer, son bann zanmi pros e menm son bann servant ti rezet li.​—Zob 19:13, 14, 16.

7. (a) Dapre Zob, akoz i ti pe soufer me ki Zob pa ti fer? (b) Ki problenm bann Kretyen i kapab fer fas avek ki parey avek sa ki nou vwar dan portre ki al avek paragraf 7?

⁷ Satan ti anvi ki Zob i krwar ki i ti pe soufer akoz Zeova i ankoler avek li. Par egzanp, Satan ti servi en gro divan pour detrir sa lakaz kot tou bann zanfan Zob ti pe pran en repa ansanm. (Zob 1:18, 19) I ti osi fer dife desann sorti dan lesyel e detrir bann zannimo Zob ansanm avek bann servant ki ti pe okip sa bann zannimo. (Zob 1:16) Vi ki sa divan ek dife ti sorti dan lesyel, Zob ti krwar ki Zeova ki ti pe fer sa. Sa ti fer Zob krwar ki i ti’n fer Zeova ankoler. Me kantmenm sa, Zob pa ti modi son Papa ki dan lesyel. Zob ti rekonnet ki pandan tou sa bann lannen ki’n pase, Zeova ti’n donn li en kantite bon keksoz. Alor, i ti mazinen ki si i ti pare pour aksepte sa ki bon, i ti devret osi pare pour aksepte sa ki move. I ti dir: “Ki non Zeova i kontinyen ganny loue.”  (Zob 1:20, 21; 2:10) Ziska aprezan Zob ti’n reste fidel avek Zeova menm si i ti’n perdi son larises, son bann zanfan e i ti malad. Me Satan pa ti ankor fini avek Zob.

8. Ki en lot taktik Satan ti servi?

⁸ Satan ti servi en lot taktik. I ti servi trwa swadizan zanmi Zob pour fer Zob krwar ki i pa vo nanryen. Sa bann zonm ti dir ki Zob ti pe soufer akoz i ti’n fer en kantite keksoz mal. (Zob 22:5-9) Zot ti osi esey fer li krwar ki menm si i ti fer en kantite bon keksoz, Bondye pa ti apresye sa ki i ti pe fer. (Zob 4:18; 22:2, 3; 25:4) Zot ti pe esey fer Zob krwar ki Bondye pa kontan li, ki Bondye pa pou pran swen avek li e ki i pa ti vo lapenn pour servi Bondye. Zot bann parol ti’n kapab fer Zob perdi lespwar.

9. Kwa ki ti ed Zob reste for e annan kouraz?

⁹ Mazin sa ki ti pe arive. Zob pe asize ater dan lasann e i dan bokou douler. (Zob 2:8) Son trwa zanmi i kontinyen dir li ki i pa en bon dimoun e ki tou sa ki i’n fer pa vo nanryen. Zob i ankor vreman sagren akoz lanmor son bann zanfan e son bann problenm i lour parey en fardo. Premye kou, Zob pa dir nanryen. (Zob 2:13–3:1) Petet sa i fer sa trwa zonm krwar ki Zob pou abandonn Zeova. Me zot in mal kalkile. Apre en pe letan, Zob i dir: “Ziska mon lanmor, mon pou reste fidel!” (Zob 27:5) I kapab ki Zob ti lev son latet e get son bann swadizan zanmi drwat dan zot lizye ler i ti dir sa. Kwa ki ti ed Zob reste for e annan kouraz menm si i ti pe soufer? Menm si i ti dekouraze, Zob pa ti zanmen perdi lespwar ki Bondye ti pou ed li. I ti konnen ki menm si i ti mor, Zeova ti pou resisit li.​—Zob 14:13-15.

10. Ki sa resi konsernan Zob i montre nou?

¹⁰ Sa resi konsernan Zob i montre nou ki Satan pa kapab fors nou pour aret servi Zeova e ki Zeova i konnen ki nou pe pas ladan. Sa ki ti arive avek Zob, i osi kapab ed nou pli byen konpran bann kestyon ki Satan in leve. Annou vwar serten leson ki nou kapab aprann avek leksperyans Zob.

11. Ki pou arive si nou kontinyen annan konfyans dan Zeova? (Zak 4:7)

¹¹ Leksperyans Zob i montre ki si nou kontinyen annan konfyans dan Zeova, nou kapab fer fas avek nenport problenm e nou kapab opoz Satan. Ki pou arive si nou fer sa? Labib i promet nou ki Dyab pou sov lwen avek nou.​—Lir Zak 4:7.

12. Ki mannyer lafwa ki Zob ti annan dan rezireksyon ti ed li andire?

¹² Nou bezwen annan en lafwa for dan rezireksyon. Parey nou’n vwar dan sa lartik avan, Satan i konnen ki dimoun i per lanmor, alor i servi sa lafreyer pour fer nou vin enfidel avek Zeova. I ti dir ki Zob ti pou fer nenport keksoz, menm aret servi Zeova, pour sov son lavi. Me sa pa ti vre. Menm ler Zob ti krwar ki i pou mor, Zob ti reste fidel avek Zeova. I ti kapab andire parski i ti asire ki Zeova ti pou demontre son labonte anver li e ki avek letan, Zeova ti pou aranz tou keksoz. Zob ti asire ki menm si Zeova pa ti aranz keksoz ler i ankor vivan, Zeova ti pou resisit li dan lavenir. Zob ti annan lafwa dan rezireksyon. Si nou osi nou annan sa menm lespwar, nou pou reste fidel avek Zeova menm si dimoun i menase pour touy nou.

13. Akoz nou bezwen konpran bann taktik ki Satan ti servi avek Zob?

¹³ Nou bezwen konpran bann taktik ki Satan ti servi avek Zob parski Satan i servi bann taktik en pe parey avek nou ozordi. Remark sa ki Satan ti dir: “Tou sa ki en dimoun i annan i pou donnen pour sov son lavi.” (Zob 2:4, 5) Satan ti pe dir ki nou pa vreman kontan Zeova e ki nou pou aret servi Zeova si sa pou sov nou lavi. Satan i osi dir ki Bondye pa kontan nou e ki Bondye pa vwar tou sa ki nou pe fer pour li. Vi ki nou konnen ki Satan pe esey fer, nou pa les nou ganny anbete avek son bann taktik.

14. Ki bann problenm i kapab ed nou konnen lo nou lekor? Donn en legzanp.

¹⁴ Nou bann problenm i kapab ed nou pour konn nou lekor pli byen. Bann problenm ki Zob ti pas ladan ti ed li konn serten son bann febles pour ki i kapab fer sanzman. Par egzanp, i ti aprann ki i ti bezwen devlop plis limilite. (Zob 42:3) Nou osi nou kapab aprann en kantite lo nou lekor ler nou pas dan en problenm. En frer ki apel Nikolay, * ti ganny met dan prizon menm si i ti byen malad. I dir: “Prizon i parey en X-ray parski i ti ed mwan konn bann kalite ki mon bezwen travay lo la.” Enn fwa ki nou’n konn nou bann febles, nou kapab fer zefor pour fer bann sanzman.

15. Lekel ki nou bezwen ekoute e akoz?

¹⁵ Nou bezwen ekout Zeova me pa nou bann lennmi. Zob ti ekout byen ler Zeova ti koz avek li. Bondye ti demann Zob bann kestyon pour fer li reflesir. I ti konmsi Zeova ti pe demann li: ‘Eski ou’n vwar tou sa ki mon’n kree? Mon konn  tou sa ki ou pe pas ladan. Eski ou krwar ki mon pa kapab pran swen avek ou?’ Zob ti demontre limilite ek lapresyasyon pour lafason ki Zeova in demontre labonte anver li. I ti dir: “Mon ti’n tann koze lo ou, me la mon lizye pe vwar ou.” (Zob 42:5) I tre probab ki ler Zob ti dir sa bann parol, i ti ankor pe asize ater dan lasann. I ti annan son ta boubou lo li e son bann zanfan ti’n mor. Me kantmenm sa, Zeova ti asir Zob ki i kontan li e ki i annan Son laprouvasyon.​—Zob 42:7, 8.

16. Dapre Izai 49:15, 16, ki nou devret gard antet ler nou fer fas avek problenm?

¹⁶ Ozordi dimoun i kapab ensilte e tret nou dan zar konmsi nou pa vo nanryen. Zot kapab esey gat nou repitasyon oubyen repitasyon lorganizasyon Zeova. Zot kapab osi “dir tou sort move keksoz lo” nou. (Mat. 5:11) Sa ki ti arive avek Zob i montre nou ki Zeova i annan konfyans ki nou pou reste fidel avek li ler nou fer fas avek problenm. Zeova i kontan nou e i pa pou zanmen abandonn bann ki annan lespwar dan li. (Lir Izai 49:15, 16.) Pa ekout okenn mansonz ki bann lennmi Bondye i dir. En frer ki apel James, ki sorti Latirki e ki son fanmir in fer fas avek bann gro problenm, i dir: “Nou ti realize ki ler nou ekout bann mansonz konsernan pep Bondye, sa pou fer nou dekouraze. Alor, nou reste konsantre lo tou sa ki Rwayonm Bondye pou fer e nou kontinyen travay dir dan servis Zeova. Sa ti fer nou reste zwaye.” Parey Zob, nou ekout Zeova! Menm si nou  bann lennmi i dir bann mansonz, nou pa perdi lespwar.

17. Ki ou aprann avek legzanp bann serviter fidel ki ganny mansyonnen dan Ebre sapit 11?

¹⁷ Zob i zis enn parmi bann serviter Zeova ki’n demontre kouraz e ki’n reste for ler i’n pas dan problenm. Dan let ki zapot Pol ti anvoy pour bann Ebre, i ti mansyonn lezot serviter e i ti dir ki zot en “gran lafoul temwen.” (Ebr. 12:1) Zot tou zot in pas dan bann gro problenm me kantmenm sa, zot in reste fidel avek Zeova tou dilon zot lavi. (Ebr. 11:36-40) Eski i ti vo lapenn pour zot andire e travay dir? Menm si zot pa ti vwar tou bann promes Bondye vin vre, zot ti kontinyen annan lespwar dan Zeova. Zot ti asire ki zot ti annan laprouvasyon Zeova. Alor sa ti fer zot annan konfyans ki zot ti pou vwar bann promes Zeova vin vre. (Ebr. 11:4, 5) Zot legzanp pou fer nou pli determinen pour kontinyen annan lespwar dan Zeova.

18. Ki ou determinen pour fer? (Ebre 11:6)

¹⁸ Ozordi nou pe viv dan en lemonn ki pe vin deplizanpli pli move. (2 Tim. 3:13) Satan i ankor pe teste pep Bondye. Nenport problenm ki nou pou gannyen dan lavenir, annou determinen pour travay dir pour Zeova e annan konfyans ki “nou’n met nou lespwar dan en Bondye vivan.” (1 Tim. 4:10) Gard antet ki sa rekonpans ki Bondye ti donn Zob i montre ki “Zeova i annan en kantite konpasyon ek mizerikord.” (Zak 5:11) Annou reste fidel avek Zeova e annan konfyans ki i pou rekonpans “bann ki pe vreman rod li.”​—Lir Ebre 11:6.