1. Ki Lerwa Salomon ti dir dan Eklezyast 7:20?

 LERWA Salomon ti dir: “Napa en dimoun drwat lo later ki toultan fer sa ki byen e ki pa zanmen fer pese.” (Ekle. 7:20) Sa i vre parski nou tou nou fer pese. (1 Zan 1:8) Alor nou tou nou bezwen ki Bondye ek lezot dimoun i pardonn nou.

2. Ki mannyer ou santi ler ou zanmi i pardonn ou?

² San dout ou mazin en fwa kot ou ti ofans enn ou zanmi pros. Ou ti anvi aranz keksoz e revin son zanmi, alor ou ti demann li pardon. Ki mannyer ou ti santi ler ou zanmi ti pardonn ou volonterman? Sa ti fer ou santi ou soulaze e ou ti zwaye.

3. Ki nou pou vwar dan sa lartik?

³ Nou anvi ki Zeova i vin nou pli bon Zanmi me i pou arive ki nou dir oubyen fer keksoz ki ofans li. Me akoz nou kapab asire ki Zeova i pare pour pardonn nou? Ki diferans i annan ant ler Zeova i pardonn en dimoun e ler nou nou pardonnen? Lekel ki Zeova i pardonnen? Dan sa lartik, nou pou reponn sa bann kestyon.

4. Akoz nou kapab asire ki Zeova i pare pour pardonnen?

⁴ Parol Bondye i asir nou ki Zeova i pare pour pardonnen. En fwa, Zeova ti anvoy en lanz kot Moiz lo Montanny Sinai. Zeova ti anvoy sa lanz pour eksplik Moiz  ki mannyer li menm Zeova i ete. Sa lanz ti dir: “Zeova, Zeova, en Bondye ki annan pitye ek konpasyon, i pa ankoler vitman e i annan en kantite lanmour fidel ek laverite, i demontre lanmour fidel anver plizyer milye dimoun, i pardonn fot, lofans ek pese.” (Egz. 34:6, 7) Zeova i en Bondye ki bon, i pran pitye e i toultan pare pour pardonn bann ki repantir.​—Nee. 9:17; Ps. 86:15.

5. Dapre Psonm 103:13, 14, ki Zeova i fer lefet ki i konn nou sitan byen?

⁵ Zeova i nou Kreater e i konn tou keksoz lo nou. Zis mazin sa! I konn tou pti detay lo tou dimoun lo later. (Ps. 139:15-17) I konn tou defo ki nou’n erite avek nou paran. I menm konn tou sa ki nou’n pas ladan ki’n fer nou vin sa dimoun ki nou ete. Lefet ki Zeova i konn nou sitan byen, ki sa i motiv li pour fer? Sa ki Zeova i konnen lo nou i motiv li pour pran pitye pour nou.​—Ps. 78:39; lir Psonm 103:13, 14.

6. Ki mannyer Zeova in montre ki i vreman anvi pardonn nou?

⁶ Zeova in montre ki i vreman anvi pardonn nou. I konnen ki akoz sa ki Adan ti fer, nou tou nou fer pese e nou mor. (Rom. 5:12) I napa nanryen ki nou kapab fer pour anpes nou lekor ek lezot dimoun fer pese e mor. (Ps. 49:7-9) Par kont, nou Bondye ki kontan nou in demontre konpasyon e i’n fer laranzman pour nou ganny libere. Ki i’n fer? Zan 3:16 i dir ki Zeova ti anvoy son sel Garson pour mor pour nou. (Mat. 20:28; Rom. 5:19) Zezi ti pran nou plas e i ti mor pour liber bann ki demontre lafwa dan li. (Ebr. 2:9) I ti vreman fermal pour Zeova vwar son Garson ki i kontan ganny imilye e soufer avan i mor. Alor, nou kapab asire ki Zeova pa ti pou les son Garson mor si i pa ti anvi pardonn nou.

7. Ki serten dimoun dan Labib ki Zeova ti pardonn volonterman?

⁷ Dan Labib i annan legzanp bann dimoun ki Zeova ti pardonn volonterman. (Efe. 4:32) Eski ou mazin en dimoun? Petet ou pe mazin Lerwa Manase. I ti en move dimoun e i ti fer bann move keksoz ki ti ofans Zeova. I ti ador bann fo  bondye e i ti ankouraz lezot pour fer parey. I ti ofer son bann zanfan konman sakrifis pour bann fo bondye. I ti menm met stati en fo bondye dan tanp Zeova. Labib i dir konsernan Manase: “I ti fer en kantite keksoz mal devan Zeova e i ti ofans li.” (2 Kron. 33:2-7) Kantmenm sa, ler Manase ti repantir senserman, Zeova ti pardonn li volonterman. Zeova ti menm fer li revin lerwa. (2 Kron. 33:12, 13) Petet ou osi mazin Lerwa David. I ti fer bann pese grav, parey adilter ek mert. Kantmenm sa, ler David ti rekonnet ki i ti’n fer pese e i ti repantir, Zeova ti pardonn li. (2 Sam. 12:9, 10, 13, 14) Nou kapab asire ki Zeova i vreman anvi pardonnen. Parey nou pou vwar, ler Zeova i pardonnen i diferan avek ler imen i pardonnen.

8. Lefet ki Zeova i sa pli bon Ziz, ki mannyer sa i fer li kapab pardonn nou?

⁸ Zeova i “sa Ziz lo later antye.” (Zen. 18:25) En bon ziz i bezwen konpran lalwa byen e Zeova i konpran lalwa pli byen ki okenn lezot dimoun. Sa i akoz Zeova i nou Ziz e sa Enn ki’n donn nou lalwa. (Iza. 33:22) Personn pa konnen kwa ki byen e kwa ki mal parey Zeova. Kwa ankor ki en bon ziz i bezwen fer? I bezwen pran kont tou bann lenformasyon egzakt avan i pas zizman dan en ka. Alor, Zeova i sa pli bon Ziz parski i toultan konn tou lenformasyon.

9. Ki lenformasyon Zeova i annan ler i pe deside si i pou pardonnen oubyen non?

⁹ Zeova pa parey bann ziz imen. I toultan konpran tou lenformasyon konsernan en ka. (Zen. 18:20, 21; Ps. 90:8) I pa ziz dapre zis sa ki imen i vwar e tande. Me i konpran tou keksoz. I konpran ki mannyer bann kalite ek tre ki en dimoun in gannyen avek son paran i kapab annan en lenfliyans lo aksyon sa dimoun. I osi konpran ki lafason ki en dimoun in grandi, landrwa kot i reste e son lasante mantal e emosyonnel i kapab annan en lenfliyans lo sa dimoun. Zeova i osi konnen ki i annan dan nou leker. I konn motivasyon, lentansyon ek dezir sak dimoun. Napa nanryen ki kapab ganny kasyet devan Zeova. (Ebr. 4:13) Alor ler Zeova i pardonn en dimoun, i pardonn li akoz i konn tou lenformasyon.

10. Akoz nou kapab dir ki bann zizman Zeova i toultan zis? (Deterononm 32:4)

¹⁰ Bann zizman Zeova i toultan zis. Zeova pa zanmen fer lapreferans. I pa zanmen pardonn en dimoun akoz son laparans, larises, abilite ouswa akoz i enportan. (1 Sam. 16:7; Zak 2:1-4) Personn pa kapab fors Zeova pour fer en keksoz oubyen donn Zeova gous. (2 Kron. 19:7) Zeova pa zanmen les lakoler oubyen santiman enfliyans son bann desizyon. (Egz. 34:7) San dout, Zeova i sa pli bon Ziz parski i konn tou keksoz lo nou e i konpran nou sityasyon.​—Lir Deterononm 32:4.

11. Ki mannyer lafason ki Zeova i pardonnen i diferan avek lafason ki imen i pardonnen?

¹¹ Bann ekriven Lekritir Ebre ti vwar ki lafason ki Zeova i pardonnen i diferan avek lafason ki imen i pardonnen. Dan serten ka, zot ti servi en mo Ebre ki dapre en referans “i ganny servi pour montre lafason ki Zeova i pardonn en dimoun ki’n fer pese. Sa mo pa zanmen ganny servi pour montre lafason ki en dimoun i pardonn en lot dimoun.” Zis  Zeova ki annan sa abilite pour pardonn konpletman en dimoun ki’n repantir. Ki arive ler Zeova i pardonn nou?

12-13. (a) Ki mannyer en dimoun i santi ler Zeova i pardonn li? (b) Ki kantite letan bann byenfe ki nou gannyen ler Zeova i pardonn nou i dire?

¹² Ler nou aksepte ki Zeova in pardonn nou, sa i en “soulazman” pour nou. Nou pou osi annan lape lespri ek en konsyans kler. Nou santi koumsa zis ler “Zeova li menm” i pardonn nou. (Akt 3:19) Ler Zeova i pardonn nou, Zeova i fer li posib pour nou revin son zanmi. I pou konmsi nou pa’n zanmen fer pese.

¹³ Apre ki Zeova in pardonn nou, i pa pou zanmen akiz nou oubyen pini nou pour sa pese. (Iza. 43:25; Zer. 31:34) Zis “parey kot soley i leve i lwen avek kot soley i kouse,” Zeova i met nou pese lwen avek nou. * (Ps. 103:12) Ler nou medit lo lafason ki Zeova i pardonnen, sa pou fer nou rekonesan e annan respe pour li. (Ps. 130:4) Me lekel ki Zeova pou pardonnen?

14. Ziska aprezan, ki nou’n aprann konsernan ler Zeova pe deside si i pou pardonn en dimoun oubyen non?

¹⁴ Parey nou’n vwar, ler Zeova pe deside si i pou pardonn en dimoun, sa pa depan lo si pese sa dimoun i grav oubyen non. O kontrer, ler Zeova pe deside si i pou pardonnen, i servi sa ki i konnen konman nou Kreater, konman sa Enn ki’n donn nou lalwa e konman nou Ziz. Me ki bann keksoz ki Zeova i pran kont avan i deside si i pou pardonnen oubyen non?

15. Dapre Lik 12:47, 48, ki en keksoz ki Zeova i pran kont ler i pe deside si i pou pardonn en dimoun?

¹⁵ Enn bann keksoz ki Zeova i pran kont ler i pe deside si i pou pardonn en dimoun, i si sa dimoun ki’n fer sa pese ti konnen ki sa ki i pe fer i mal. Zezi ti montre nou sa dan Lik 12:47, 48. (Lir.) Ler en dimoun i plàn pour fer en keksoz ki i konnen i mal e ki i konnen Bondye pa kontan me kantmenm sa i fer li, sa dimoun i fer en pese grav. I  kapab ki Zeova i deside pour pa pardonn li. (Mark 3:29; Zan 9:41) Me nou bezwen admet ki parfwa nou konnen ki sa ki nou’n fer i mal. Dan sa ka, eski nou pou ganny pardonnen? Wi! Parski i annan en lot keksoz ki Zeova i pran kont ler i pe deside si i pou pardonn nou.

16. Ki savedir repantir e akoz nou bezwen repantir si nou anvi ki Zeova i pardonn nou?

¹⁶ En lot keksoz ki Zeova i pran kont ler i pe deside si i pou pardonn en dimoun, i si sa dimoun in repantir senserman. Ki savedir repantir? Repantir i vedir “sanz nou fason panse, latitid oubyen nou bann dezir.” I enkli ki en dimoun i regrete e sagren pour bann move keksoz ki i’n fer oubyen i regrete e sagren pour bann bon keksoz ki i pa’n fer. Sa dimoun i osi sagren parski i pa’n reste pros avek Zeova e sa in fer li fer pese. Rapel ki Lerwa Manase ek Lerwa David ti fer bann pese grav. Me kantmenm sa, Zeova ti pardonn zot parski zot ti repantir senserman. (1 Rwa. 14:8) Alor i kler ki avan ki Zeova i pardonn nou, i bezwen vwar ki nou’n repantir. Me nou bezwen fer plis ki zis regrete pour sa ki nou’n fer. Nou bezwen pran aksyon. * Aprezan, annou vwar en lot keksoz ki Zeova i pran kont.

17. Ki savedir sanz nou lavi e akoz i enportan pour sanz nou lavi si nou pa anvi fer bann pese ki nou’n fer dan lepase? (Izai 55:7)

¹⁷ En lot keksoz ki Zeova i pran kont, i si en dimoun in sanz son lavi. Ler en dimoun i sanz son lavi, i bezwen aret fer bann move keksoz e i viv dan en fason ki fer Zeova plezir. (Lir Izai 55:7.) Sa dimoun i bezwen sanz son fason panse e les li ganny gide par fason panse Zeova. (Rom. 12:2; Efe. 4:23) I bezwen anvi aret mazin e fer bann move keksoz. (Kol. 3:7-10) Byensir, i nou lafwa dan sakrifis Zezi Kri ki fer li posib pour Zeova pardonn nou e pirifye nou avek nou bann pese. Me Zeova pou pardonn nou si i  vwar ki nou pe fer zefor pour sanz nou lavi.​—1 Zan 1:7.

18. Ki nou’n vwar lo lafason ki Zeova i pardonn nou?

¹⁸ Annou vwar bann pwen enportan ki nou’n diskite ziska aprezan. Zeova i sa Enn ki pli kapab pardonn nou. Akoz nou kapab dir sa? Premyerman, i toultan pare pour pardonnen. Dezyenmman, i konn tou keksoz lo nou. I konn nou bann kalite ek tre e zis li ki kapab konnen si nou’n vreman repantir. Trwazyenmman, ler Zeova i pardonn nou, pour li i konmsi nou pa’n zanmen fer sa pese. Sa i permet nou pour annan en konsyans kler e nou annan laprouvasyon Zeova.

19. Menm si nou enparfe e nou pou kontinyen fer pese, akoz nou kapab zwaye?

¹⁹ Tan ki nou enparfe, nou pou kontinyen fer pese. Par kont, sa bann parol dan Insight on the Scriptures, Volume 2, paz 771 i kapab rekonfort nou. Sa liv i dir: “Vi ki Zeova i pran pitye pour son bann serviter, i pran kont ki zot enparfe. Alor zot pa bezwen toultan sagren akoz zot enparfe e zot fer pese. (Ps. 103:8-14; 130:3) Si zot fer zot mye pour viv dapre bann prensip Zeova, zot kapab zwaye. (Fili. 4:4-6; 1 Zan 3:19-22).” Pa sa i vreman ankourazan!

20. Ki nou pou vwar dan sa lot lartik?

²⁰ Nou rekonesan ki Zeova i pare pour pardonn nou ler nou regrete pour bann pese ki nou’n fer. Me ki mannyer nou kapab swiv legzanp Zeova e pardonn lezot? Ki mannyer lafason ki nou pardonnen i parey avek lafason ki Zeova i pardonnen? Ki mannyer lafason ki nou pardonnen i diferan avek lafason ki Zeova i pardonnen? Akoz i enportan pour nou konpran ki nou fason pardonnen i diferan avek fason ki Zeova i pardonnen? Dan sa lot lartik, nou pou reponn sa bann kestyon.