1, 2. Akoz i pou toultan annan bann pov dan sa lemonn?

OZORDI, sa sistenm ekonomik i kriyel e enzis. Par egzanp, i difisil pour bokou zenn trouv en travay. Serten i riske zot lavi pour al dan bann pei ris. Menm dan bann pei ris, i annan bann dimoun pov. Dan lemonn antye, bann dimoun ris pe vin pli ris e bann pov pe vin pli pov. Dapre bann dernyen kalkilasyon, sa enn poursan dimoun pli ris i annan menm kantite larzan ki sa 99 poursan i annan. Serten dimoun i telman annan en kantite larzan, ki sa larzan ti pou ase pour viv plizyer lavi, tandis ki i annan plizyer bilyon lezot ki vreman pov. Zezi ti konn sa parski i ti dir: “Bann pov pou touzour avek zot.” (Mark 14:7) Akoz sa lenzistis?

² Zezi ti konnen ki zis Rwayonm Bondye ki pou kapab sanz sistenm komersyal sa lemonn. Labib i montre ki “bann marsan,” setadir sa sistenm komersyal, ansanm avek sistenm politik e relizye i form parti lemonn Satan. (Revelasyon 18:3) Pep Bondye i kapab separ zot konpletman avek politik ek fo larelizyon. Par kont, laplipar dan pep Bondye pa kapab separ zot konpletman  avek sistenm komersyal sa lemonn Satan.

3. Ki bann kestyon nou pou diskite?

³ Konman Kretyen, nou bezwen egzamin nou latitid anver sistenm komersyal sa lemonn. Pour fer sa, nou kapab demann nou lekor: ‘Ki mannyer mon kapab servi mon bann keksoz materyel pour montre ki mon fidel avek Bondye? Ki mannyer mon kapab vin mwen enplike avek sa lemonn komersyal? Ki bann leksperyans ki montre ki pep Bondye ozordi i annan konfyans total dan li?’

4, 5. (a) Ki ti arive avek sa administrater dan zistwar Zezi? (b) Ki Zezi ti dir son bann disip fer?

⁴ Lir Lik 16:1-9. Zistwar Zezi konsernan sa move administrater i devret fer nou tou pran en moman pour reflesir. Sa administrater ti ganny akize konmkwa i ti’n gaspiy byen son met e son met ti deside pour pous li. * (Vwar not.) Me, sa administrater ti azir avek “lasazes.” Avan i ti kit son travay, i ti fer zanmi avek bann dimoun ki ti pou kapab ed li pli tar. Zezi pa ti rakont sa zistwar pour ankouraz son bann disip pour fer sa ki mal pour zot kapab sirviv. Sanmenm sa ki bann dimoun dan sa lemonn i fer. O kontrer, Zezi ti servi sa zistwar pour ansenny en leson enportan.

⁵ Zezi ti konnen ki parey sa administrater ki en sel kou ti vwar li dan en sityasyon difisil, laplipar son bann disip ti pou vwar li difisil pour ganny ase larzan pour viv dan sa lemonn enzis. Alor i ti dir zot: “Servi larises sa move lemonn pour fer zanmi.” Akoz? Pour ki ler larises sa lemonn i fini, sa bann zanmi, Zeova ek Zezi, “pou kapab resevwar zot dan zot landrwa reste eternel.” Ki nou kapab aprann avek konsey Zezi?

6. Ki mannyer nou konnen ki sa sistenm komersyal ozordi pa ti dan plan Bondye?

⁶ Labib i fer kler ki i pa ti dan plan Bondye ki bann imen i fer en kantite larzan. Par egzanp, dan zarden Edenn Zeova ti donn Adan ek Ev plis ki zot ti bezwen pour nanryen. (Zenez 2:15, 16) Pli tar, ler Bondye ti donn bann Kretyen swazir lespri sen, “ni menm enn parmi zot pa ti konsider okenn keksoz ki i ti annan konman son byen personnel, me zot tou zot ti partaz tou keksoz ki zot ti annan.” (Akt 4:32) Profet Izai ti dir ki i pou annan en letan kot tou imen pou rezoui tou sa ki later i prodwir. (Izai 25:6-9; 65:21, 22) Me ziska ki sa letan i arive, bann disip Zezi pou bezwen azir avek “lasazes.” Zot pou bezwen ganny zot lavi par servi larises sa move lemonn e an menm tan esey fer plezir Bondye.

7. Ki konsey Zezi i donnen dan Lik 16:10-13?

⁷ Lir Lik 16:10-13. Sa administrater dan zistwar Zezi ti fer zanmi pour son  prop benefis. Par kont, Zezi ti anvi ki son bann disip i fer zanmi dan lesyel pour bann rezon ki pa egois. I ti anvi ki nou konpran ki lafason ki nou servi larises sa move lemonn pou montre si nou fidel avek Bondye oubyen non. Ki mannyer nou kapab fer sa?

8, 9. Donn bann legzanp lo konman serten pe montre ki zot fidel avek Bondye dan lafason ki zot servi larises sa move lemonn.

⁸ En fason ki nou montre ki nou fidel avek Bondye, se ler nou servi nou bann keksoz materyel pour siport sa travay predikasyon ki pe ganny fer dan lemonn antye ki Zezi ti predir. (Matye 24:14) En pti fiy Lenn, ti annan en pti bwat larzan e regilyerman i ti met bann kalen ladan. I ti menm aret aste zouzou pour li kapab fer sa. Ler bwat ti plen, i ti donn tou sa larzan ki i ti’n anmase pour siport travay predikasyon. En frer Lenn i annan en plantasyon koko. Konman en donasyon, i ti donn lofis tradiksyon langaz Malayalam en kantite koko. Vi ki sa lofis i bezwen aste koko, i ti santi ki son donasyon ti annan plis valer ki si i ti’n donn larzan. Sa i “lasazes.” Bann frer ek ser Lagres i fer parey, zot regilyerman donn delwil zoliv, fromaz ek lezot keksoz pour manze avek fanmir Betel.

⁹ En lot frer ki annan en propriyete Sri Lanka, in fer son propriyete disponib pour bann renyon ek lasanble e konman en landrwa reste pour bann serviter a plen tan. Sa frer in fer en sakrifis, me sa i en gran led pour bann proklanmater ki napa bokou larzan dan sa pei. Dan en pei kot travay predikasyon i enterdi, bann frer ek ser i servi zot lakaz konman Lasal Rwayonm. Sa i permet bann pionye ek lezot ki napa bokou larzan ganny en landrwa pour fer renyon pour nanryen.

10. Ki serten byenfe nou gannyen ler nou zenere?

¹⁰ Sa bann legzanp i montre ki pep Bondye i “fidel dan sa ki mwen enportan.” (Lik 16:10) Zot servi zot keksoz materyel pour benefisye lezot. Ki mannyer sa bann zanmi Zeova i santi konsernan sa bann sakrifis ki zot in fer? Zot vreman ere parski zot konnen ki ler zot zenere, zot ganny “vre” larises dan lesyel. (Lik 16:11) En ser ki regilyerman donn larzan pour siport sa travay Rwayonm i dir ki en keksoz drol in arive avek li diran bann lannen. I eksplike: “Mon’n vwar ki ler mon pli zenere avek mon bann keksoz materyel, mon vin pli zenere anver lezot. Mon pli zenere pour pardonnen, pour demontre pasyans anver  lezot e pour aksepte dezapwentman ek konsey.” Bokou dimoun in aprann ki zenerozite in benefisye zot personnelman.​—Psonm 112:5; Proverb 22:9.

11. (a) Ki mannyer nou zenerozite i montre “lasazes”? (b) Ki pe arive parmi pep Bondye ozordi? (Vwar portre o konmansman sa lartik.)

¹¹ Nou osi montre “lasazes” ler nou servi nou bann keksoz materyel pour ed lezot dan predikasyon. Koumsa, menm si nou pa kapab fer servis a plen tan oubyen al servi kot i annan en pli gran bezwen, nou pou ankor pe benefisye lezot. (Proverb 19:17) Par egzanp, dan bann pei pov i annan bokou ki pe vin dan laverite, alor nou bann donasyon i ed nou bann frer ek ser dan sa bann pei pour ganny bann piblikasyon ki zot bezwen pour predikasyon. Dan bann pei tel parey Kongo, Madagaskar ek Rwannda, Labib i vreman ser. Par ler, en Labib i kapab kout lavaler lapey en semenn oubyen en mwan. Pour plizyer lannen, nou bann frer ek ser ti bezwen swazir si zot ti pou aste manze pour zot fanmir ouswa aste en Labib. Aprezan, vi ki i annan bann donasyon ki lezot i fer e “keksoz i balanse,” lorganizasyon Zeova i tradwir e distribye Labib san fer peye avek sak manm fanmir e osi avek bann etidyan Labib. (Lir 2 Korentyen 8:13-15.) Alor, tou le de, sa bann ki donnen ek bann ki resevwar i kapab vin zanmi Zeova.

12. Ki mannyer Abraam ti montre ki i ti annan konfyans dan Bondye?

¹² Nou osi kapab vin zanmi Zeova ler nou vin mwen enplike avek sa lemonn komersyal e rod “vre” larises. Sanmenm ki Abraam, en zonm fidel, ti fer. I ti obei Zeova e kit Our, en lavil ris, pour al viv anba latant parski i ti anvi vin zanmi Zeova. (Ebre 11:8-10) I ti toultan annan konfyans dan Bondye e non pa dan bann keksoz materyel. (Zenez 14:22, 23) Zezi ti ankouraz lezot pour imit sa kalite lafwa. En fwa i ti dir avek en zenn onm ris: “Si ou oule vin parfe, ale, vann sa ki ou annan, donn sa larzan bann pov e ou pou ganny trezor dan lesyel e apre vin mon disip.” (Matye 19:21) Lafwa sa zenn onm pa ti parey sa ki pour Abraam. Par kont, i ti annan lezot dimoun ki ti annan konfyans dan Bondye.

13. (a) Ki konsey Pol ti donn Timote? (b) Ki mannyer nou kapab aplik konsey Pol ozordi?

¹³ Timote ti en zonm ki ti annan lafwa. Apre ki Pol ti’n apel Timote “en bon solda Kris,” Pol ti dir li: “Napa en solda ki pou anbaras li avek okenn biznes dan lavi sivil, akoz i anvi ganny laprouvasyon sa enn ki’n angaz li konman en solda.” (2 Timote 2:3, 4) Bann disip Zezi, enkli sa en milyon serviter a plen tan, i fer zot mye pour aplik konsey Pol. Zot reziste tantasyon bann  piblisite ki sa lemonn voras i fer. Zot rapel sa prensip Labib: “Sa enn ki demann prete i vin lesklav sa enn ki prete.” (Proverb 22:7) Satan i anvi nou depans tou nou letan ek lenerzi pour travay dan son lemonn komersyal. Serten i pran bann gro lón pour aste lakaz, loto, pour pey ledikasyon e menm fer depans pour maryaz. Si nou pa fer atansyon, nou kapab andete pour plizyer lannen. Nou montre ki nou annan lasazes ler nou viv en lavi senp, evite andet nou lekor e depans mwens larzan. Si nou fer sa, nou pou lib pour servi Bondye plito ki vin lesklav sa sistenm komersyal.​—1 Timote 6:10.

14. Ki nou devret determinen pour fer? Donn bann legzanp.

¹⁴ Pour kapab viv en lavi senp, nou bezwen met Rwayonm Bondye premye. En koup ti annan en gro biznes ki ti pe byen fer profi. Par kont, zot ti anvi repran servis a plen tan. Alor, zot ti vann zot biznes, bato e lezot keksoz materyel. Apre, zot ti al travay dan konstriksyon biro prensipal Warwick, New York konman bann volonter. Sa ti vreman spesyal pour zot parski zot ti kapab travay avek zot fiy ek zann dan Betel e osi pour plizyer semenn zot ti kapab travay avek paran sa msye ki ti osi pe travay lo sa proze Warwick. En ser pionye Colorado, Leta-z-ini, ti ganny en travay a mitan dan en labank. Son bann anplwayer ti sitan kontan son travay ki zot ti demann li pour travay a plen tan e ofer li trwa fwa plis larzan ki i ti pe gannyen. Me, vi ki sa travay ti pou anpes li konsantre lo son minister, i pa ti aksepte. Sa i zis serten legzanp sakrifis ki bann serviter Zeova in fer. Ler nou determinen pour met lentere Rwayonm premye, sa i montre ki nou lanmitye avek Bondye ek vre larises i annan plis valer pour nou ki bann keksoz materyel.

15. Ki larises ki donn nou plis satisfaksyon?

¹⁵ Ler nou annan larises materyel, sa pa neseserman vedir ki nou annan laprouvasyon Bondye. Zeova i beni bann ki “fer en kantite dibyen pour lezot.” (Lir 1 Timote 6:17-19.) Par egzanp, en ser ki apel Lucia ti tande ki i ti annan en bezwen pour bann proklanmater Albani. * (Vwar not.) Alor, an 1993 i ti kit Itali e al laba. I ti napa en travay, me i ti annan konfyans ki Zeova ti pou donn li sa ki i bezwen. I ti aprann langaz Albane e ed plis ki 60 dimoun pour dedye zot lavi. Petet pa nou tou ki pou ganny bann rezilta koumsa, me nenport kwa ki nou fer pour ed lezot aprann konn Zeova e vin son zanmi, pou parey en trezor pour nou pour touzour.​—Matye 6:20.

16. (a) Ki pou arive avek sa sistenm komersyal ki egziste ozordi? (b) Ki lefe sa i devret annan lo nou pwennvi konsernan bann keksoz materyel?

¹⁶ Zezi ti fer kler ki sa sistenm komersyal ki egziste ozordi pou fini. I ti dir: ‘Ler sa larises materyel i fini’ e non pa ‘si i fini.’ (Lik 16:9) Dan sa  bann dernyen zour, serten labank in faid e serten pei in pas atraver bann problenm ekonomik. Me byento, keksoz pou vin pli pir. Bann sistenm politik, relizye e komersyal ki form parti lemonn Satan pou fini. Profet Ezekyel ek Zefanya ti predir ki lor ek larzan, ki’n toultan enportan dan sistenm komersyal, pou perdi tou zot valer. (Ezekyel 7:19; Zefanya 1:18) Ki mannyer nou ti pou santi si nou ti ariv ver lafen nou lavi dan sa lemonn e realize ki nou’n plito rod bann keksoz materyel sa move lemonn olye vre larises? Petet nou ti pou santi parey en zonm ki’n travay tou son lavi pour fer en ta larzan me ki apre i aprann ki tou sa larzan i fo. (Proverb 18:11) Bann keksoz materyel sa lemonn pou fini. Alor, pa perdi sa loportinite pour servi ou bann keksoz materyel pour fer zanmi dan lesyel. Sa ki nou fer pour Zeova ek son Rwayonm pou fer nou vreman ere.

17, 18. Ki bann rekonpans bann zanmi Bondye pe espere?

¹⁷ Ler Rwayonm Bondye i vini, personn pa pou bezwen depans larzan pour lwe lakaz ouswa pran en lón. Manze pou annabondans e pour nanryen e nou pa pou bezwen pey dokter oubyen aste latizann. Bann zanmi Zeova pou rezoui bann pli bon keksoz ki i annan lo later. Lor, larzan ek bann pyer presye pou ganny servi pour zot labote e non pa pour fer en dimoun ris. I pou annan bann bon kalite dibwa, ros ek metal pour nanryen ki nou pou kapab servi pour fer bann zoli lakaz. Nou bann zanmi pou ed nou pa akoz nou pey zot, me akoz zot anvi fer li. Nou pou partaz tou sa ki lo later.

¹⁸ Sa i zis serten rekonpans presye ki pe esper bann ki fer zanmi dan lesyel. Bann serviter Zeova lo later pou kriye avek lazwa ler zot tann Zezi dir: “Zot ki mon Papa in beni, vini e zot a ganny donnen sa Rwayonm ki’n ganny prepare pour zot depi o konmansman lemonn.”​—Matye 25:34.