1. Ki Zeova ti fer pa bokou letan apre ki Adan ek Ev ti’n fer pese? (Zenez 3:15)

 PA BOKOU letan apre ki Adan ek Ev ti’n fer pese, Zeova ti donn zot desandans en lespwar atraver en profesi enportan. Sa ki Zeova ti dir in ganny ekrir dan Zenez 3:15.​—Lir.

2. Akoz sa profesi dan Zenez 3:15 i vreman enportan?

² Sa profesi i dan premye liv Labib me dan en fason oubyen en lot, tou lezot liv Labib i relye avek sa profesi. Sa profesi dan Zenez 3:15, i kapab ganny konpare avek sa parti en liv kot tou bann paz i atase ansanm. Sa profesi i konnekte tou sa ki dan lezot liv Labib ansanm e i fer ki Labib i koz konsernan en sel keksoz, setadir ki Bondye ti pou anvoy en Sover pour detri Dyab ek tou bann ki fer move keksoz parey li. * Sa pou en keksoz merveye pour tou bann ki kontan Zeova!

3. Ki nou pou vwar dan sa lartik?

³ Dan sa lartik, nou pou reponn sa bann kestyon swivan konsernan sa profesi ki dan Zenez 3:15. Nou pou vwar: Lekel ki ganny mansyonnen dan sa profesi? Ki mannyer sa profesi pe ganny akonplir? Ki byenfe nou gannyen?

4. Lekel “sa serpan” e ki mannyer nou konn sa?

⁴ Zenez 3:14, 15 i mansyonn plizyer personnaz, setadir en “serpan,” “desandans” sa serpan, en “madanm” ek “desandans” sa madanm. Labib i ed nou pour konnen lekel zot. * Annou vwar lekel “sa serpan.” En vre serpan pa ti pou konpran sa ki Zeova ti dir dan zarden Edenn. Alor i bezwen ki sa serpan ti pe refer avek en kreatir ki entelizan. Me lekel li sa? Revelasyon 12:9 i ed nou konpran lekel sa serpan. I dir ki “sa premye serpan” i li menm li ki ganny apele Dyab e Satan. Me lekel desandans sa serpan?

5. Lekel desandans sa serpan?

⁵ Parfwa ler Labib i servi sa term desandans i refer avek bann ki imit en dimoun sitan byen ki sa dimoun i kapab ganny apele zot papa. Zot reflesir e azir parey sa dimoun. Alor desandans sa serpan i bann lanz ki pa ti fidel avek Zeova ek bann imen ki parey Satan, zot opoz Zeova ek Son pep. Sa i enkli bann lanz ki dan letan Noe ti kit zot servis dan lesyel e bann imen ki fer bann move keksoz parey zot papa Dyab.​—Zen. 6:1, 2; Zan 8:44; 1 Zan 5:19; Zid 6.

6. Kwa ki montre nou ki “sa madanm” dan sa profesi pa Ev?

⁶ Aprezan, annou vwar lekel “sa madanm.” I kler ki sa madanm pa ti Ev. Akoz non? Annou vwar zis en rezon. Sa profesi i dir ki desandans sa madanm ti pou “kraz” latet sa serpan. Parey nou’n vwar, sa serpan i Satan, en move lanz e en imen enparfe pa ti pou kapab kraz li. Alor ki mannyer Satan ti pou ganny detrir?

7. Dapre Revelasyon 12:1, 2, 5, 10, lekel sa madanm ki ganny mansyonnen dan Zenez 3:15?

 ⁷ Sa dernyen liv dan Labib i ed nou konnen lekel sa madanm ki ganny mansyonnen dan Zenez 3:15. (Lir Revelasyon 12:1, 2, 5, 10.) Sa madanm pa parey lezot madanm. Lalin ti anba son lipye e i ti annan en kouronn 12 zetwal lo son latet. I ti donn nesans en zanfan, setadir Rwayonm Bondye. Rwayonm Bondye i dan lesyel alor i bezwen ki sa madanm osi i dan lesyel. Sa madanm i reprezant sa parti lorganizasyon Zeova ki dan lesyel, ki enkli bann lanz.​—Gal. 4:26.

8. Lekel desandans prensipal sa madanm e kan ki i ti vin sa desandans? (Zenez 22:15-18)

⁸ Parol Bondye i ed nou konnen lekel desandans prensipal sa madanm. Sa desandans ti pou en desandans Abraam. (Lir Zenez 22:15-18.) Zis parey sa profesi ti’n dir, Zezi ti en desandans sa zonm fidel. (Lik 3:23, 34) Me sa desandans ti pou bezwen pli pwisan ki en imen parski i ti pou kraz Satan e detri li konpletman. Alor ler Zezi ti apepre 30 an, i ti ganny swazir par lespri sen e i ti vin desandans prensipal sa madanm. (Gal. 3:16) Apre ki Zezi ti mor e resisite, Bondye ti “kouronn li avek laglwar ek loner” e donn li “tou lotorite dan lesyel e lo later.” Sa ti enkli, sa lotorite “pour li elimin lemal ki Dyab in fer.”​—Ebr. 2:7; Mat. 28:18; 1 Zan 3:8.

9-10. (a) Lekel ankor ki form parti desandans sa madanm e kan ki zot ti vin sa desandans? (b) Ki nou pou vwar aprezan?

⁹ Me i annan lezot ki ti pou form parti sa desandans ansanm avek Zezi. Nou kapab konnen lekel zot par sa ki zapot Pol ti dir bann Kretyen Zwif ek bann ki pa ti Zwif. Pol ti dir: “Si zot pour Kris, zot vreman desandans Abraam e zot pou kapab ganny sa leritaz ki ti ganny promet avek Abraam.” (Gal. 3:28, 29) Ler Zeova i servi lespri sen pour swazir en Kretyen, sa dimoun i form parti desandans sa madanm. Alor sa desandans i Zezi e sa 144,000 Kretyen swazir ki pou dirize ansanm avek li. (Rev. 14:1) Zot tou zot esey imit zot Papa, Zeova setadir zot esey mazin e azir parey li.

¹⁰ Ziska aprezan nou’n vwar lekel sa bann personnaz ki ganny mansyonnen dan Zenez 3:15. Aprezan nou pou vwar ki Zeova in fer pour akonpli sa profesi e ki byenfe nou gannyen.

11. Dan ki sans desandans sa madanm ti ganny morde dan “son talon”?

¹¹ Dapre sa profesi ki dan Zenez 3:15, sa serpan ti pou mord “talon” desandans sa madanm. Sa ti ganny akonplir ler Satan ti fer bann Zwif ek bann Romen touy Garson Bondye. (Lik 23:13, 20-24) Ler en dimoun i ganny en blesir dan son talon, sa i kapab fer li difisil pour sa dimoun marse pour detrwa zour. Pareyman, ler Zezi ti ganny touye e ganny met dan latonm, i pa ti kapab fer nanryen pour apepre trwa zour.​—Mat. 16:21.

12. Ki mannyer latet sa serpan pou ganny kraze e kan sa pou arive?

¹² Sa profesi ki dan Zenez 3:15 i montre ki Zezi pa ti pou reste dan  latonm. Akoz non? Parski dapre sa profesi, sa desandans ti pou kraz latet sa serpan. Sa ti vedir ki blesir ki sa desandans ti’n gannyen dan son talon ti pou geri. Sanmenm sa ki ti arive. Trwazyenm zour apre ki Zezi ti’n mor, i ti resisite e ganny lavi imortel dan lesyel. Dan sa letan ki Bondye in swazir, Zezi pou kraz Satan e detri li konpletman. (Ebr. 2:14) Kris ek bann ki pou dirize ansanm avek li pou detri tou bann lennmi Bondye, setadir desandans sa serpan.​—Rev. 17:14; 20:4, 10. *

13. Ki byenfe nou pe gannyen avek lakonplisman sa profesi?

¹³ Si ou en serviter Bondye, ou deza pe ganny bann byenfe akoz sa sakrifis. Zezi ti vin lo later konman en imen e i reflekte bann kalite son Papa dan en fason parfe. (Zan 14:9) Alor atraver legzanp Zezi, nou ti aprann konn e kontan Zeova. Nou’n osi ganny bann byenfe avek bann lansennyman Zezi e avek lafason ki i diriz kongregasyon Kretyen ozordi. Zezi i montre nou ki mannyer pour viv dan en fason ki fer plezir Zeova. Osi, nou tou nou kapab ganny bann byenfe avek lanmor Zezi, setadir ler i ti ganny morde dan son talon. Ki mannyer sa? Apre ki Zezi ti mor e ganny resisite, Zeova ti aksepte valer sakrifis parfe son Garson ki “pirifye nou avek tou pese.”​—1 Zan 1:7.

14. Ki mannyer nou konnen ki sa ki Zeova ti dir dan zarden Edenn pa ti pou ganny akonplir deswit? Eksplike.

¹⁴ Sa ki Zeova ti dir dan zarden Edenn i montre ki i ti pou pran letan pour sa profesi ganny akonplir. I ti pou pran letan pour sa madanm ganny sa desandans, pour Dyab annan son prop desandans e pour sa de group vin lennmi avek kanmarad. Nou ganny bann byenfe ler nou konpran sa profesi parski i averti nou ki sa lemonn ki ganny kontrole par Satan pou ay bann serviter Zeova. Zezi ti dir son bann disip en keksoz en pe parey. (Mark 13:13; Zan 17:14) Dan sa 100 an ki’n pase, nou’n vwar lakonplisman sa bout dan sa profesi. Ki mannyer sa?

15. Akoz lemonn i ay pep Bondye plis ki oparavan e akoz nou napa rezon pour per Satan?

¹⁵ Pa bokou letan apre ki Zezi ti’n vin Lerwa dan Rwayonm Bondye an 1914, Satan ti ganny pouse dan lesyel. Aprezan, Satan i lo later e pli tar, i pou ganny detrir. (Rev. 12:9, 12) Me antretan Satan i vreman bizi. I ankoler e i pe tir son lakoler lo pep Bondye. (Rev. 12:13, 17) I pour sa rezon ki bann dimoun dan lemonn i ay pep Bondye plis ki oparavan. Me nou napa rezon pour per Satan ek bann dimoun ki parey li. O kontrer nou santi parey zapot Pol, ki ti dir: “Si Bondye i pour nou, lekel ki pou kapab kont nou?” (Rom. 8:31) Parey nou’n vwar, laplipar sa profesi ki dan Zenez 3:15 in deza ganny akonplir. Alor nou kapab annan konfyans dan Zeova.

16-18. Ki byenfe Curtis, Ursula ek Jessica in gannyen ler zot in konpran Zenez 3:15?

¹⁶ Sa promes dan Zenez 3:15 i kapab ed nou fer fas avek bann problenm. En  misyonner ki apel Curtis ki reste Guam i dir: “Mon’n fer fas avek bann problenm ki’n fer li difisil pour mwan reste fidel avek Zeova. Me ler mon’n medit lo sa profesi dan Zenez 3:15, sa in ed mwan pour kontinyen annan konfyans dan mon Papa ki dan lesyel.” Curtis i vreman anvi vwar sa zour kot Zeova pou fer ki nou nepli annan problenm.

¹⁷ En ser ki reste Bavaria ki apel Ursula i dir ki ler i’n konpran Zenez 3:15 sa in konvenk li ki Labib i ganny enspire par Bondye. I ti enpresyonnen ler i ti vwar ki mannyer tou lezot profesi dan Labib i relye avek sa profesi. I osi dir: “Ler mon ti aprann ki Zeova ti azir deswit pour donn nou lespwar, sa ti fer mwan kontan li plis.”

¹⁸ Jessica ki sorti Micronesia i dir: “Mon ankor rapel ki mannyer mon ti santi ler mon ti realize ki mon ti’n trouv laverite. Sa profesi dan Zenez 3:15 ti pe ganny akonplir e sa ti ed mwan rapel ki bann move keksoz ki nou pe fer fas avek ozordi pa ti dan plan Bondye pour nou. Sa profesi in osi fer mwan pli asire ki ler mon servi Zeova, mon kapab annan en bon lavi la konmela e en pli bon lavi dan lavenir.”

19. Akoz nou kapab asire ki dernyen parti sa profesi pou ganny akonplir?

¹⁹ Parey nou’n vwar, Zenez 3:15 i ankor pe ganny akonplir. Nou’n konnen lekel desandans sa madanm e lekel desandans sa serpan. Zezi i desandans prensipal sa madanm. Sa blesir dan son talon in fini geri e aprezan i en Lerwa ki imortel e pwisan. Zeova i pros pour fini swazir bann ki pou dirize ansanm avek son Garson dan lesyel. Vi ki premye parti sa profesi in fini ganny akonplir, nou kapab asire ki sa dernyen parti pou osi vin vre. Latet sa serpan pou ganny kraze! Ler sa pou arive, bann serviter Bondye pou vreman kontan. Ziska ki sa i arive, pa abandonnen! Nou kapab annan konfyans dan nou Bondye. Atraver desandans sa madanm, i pou anmenn en kantite benediksyon pour “tou nasyon lo later.”​—Zen. 22:18.