1. Ki lavolonte Zeova ozordi?

 ZEOVA i anvi ki sa bon nouvel Rwayonm i ganny anonse partou lo later. (Mark 13:10; 1 Tim. 2:3, 4) Sa i travay Zeova e i sitan enportan ki Zeova in swazir son Garson ki i kontan pour diriz sa travay. Vi ki Zezi pe diriz sa travay, nou kapab asire ki sa travay predikasyon pou ganny konplete parey Zeova i anvi avan lafen i arive.​—Mat. 24:14.

2. Ki nou pou vwar dan sa lartik?

² Dan sa lartik, nou pou vwar ki mannyer Zezi pe servi son “lesklav fidel e pridan” pour donn nou manze spirityel e pour organiz son bann disip pour zot kapab anons sa bon nouvel lo en pli gran lanpler ki zanmen oparavan. (Mat. 24:45) Nou pou osi vwar ki sakenn parmi nou i kapab fer pour siport Zezi ek sa lesklav fidel.

3. Ki lotorite Zezi ti gannyen?

³ Zezi ki pe diriz sa travay predikasyon. Akoz nou dir sa? Zis avan Zezi ti al dan lesyel, i ti zwenn serten son bann disip fidel lo en montanny Galile. I ti dir zot: “Mon’n ganny tou lotorite dan lesyel e lo later.” Apre i ti dir: “Alor, al kot bann dimoun dan tou nasyon e fer zot vin mon disip.” (Mat. 28:18, 19) Sa i montre ki parmi bann keksoz ki Zezi ti’n ganny donnen, i’n osi ganny lotorite pour diriz sa travay predikasyon.

4. Akoz nou kapab asire ki Zezi i ankor pe diriz sa travay predikasyon?

⁴ Zezi ti dir ki sa travay pour anons sa bon nouvel e fer disip, ti pou ganny fer avek dimoun sorti dan “tou nasyon.” I ti osi dir ki i ti pou avek son bann disip “tou le zour ziska lafen sa lemonn.” (Mat. 28:20) Sa bann parol i montre ki Zezi ti pou kontinyen diriz sa travay predikasyon ziska dan nou letan.

5. Ki mannyer nou pe ede akonpli sa profesi dan Psonm 110:3?

 ⁵ Zezi pa ti enkyet ki i ti pou napa ase dimoun pour anons sa bon nouvel ver lafen sa lemonn. I ti konnen ki sa ki en psalmis ti dir ti pou vin vre. Sa psalmis ti dir: “Ou pep pou ofer zot lekor volonterman zour ki ou larme i ganny rasanble.” (Ps. 110:3) Si ou pe partisip dan sa travay predikasyon, ou pe siport Zezi ek sa lesklav fidel e ou pe ede akonpli sa profesi. Menm si sa travay pe kontinyen ganny fer, i annan bann difikilte.

6. Ki en difikilte bann proklanmater i fer fas avek?

⁶ Enn bann difikilte ki bann proklanmater i fer fas avek, i ler dimoun i opoz sa travay predikasyon. Bann aposta, sef relizye ek politisyen in dir en kantite mansonz lo nou travay. I kapab ki nou fanmir, koleg travay ek zanmi i krwar sa bann lenformasyon e zot met presyon lo nou pour nou aret servi Zeova e aret partisip dan sa travay predikasyon. Dan serten pei, nou bann lennmi i menas nou bann frer ek ser, atak zot, aret zot e menm met zot dan prizon. Nou pa sirprann ki dimoun i tret nou dan sa fason parski Zezi ti dir: “Tou nasyon pou ay zot akoz zot port mon non.” (Mat. 24:9) Vi ki dimoun i ay nou, sa i montre ki nou annan laprouvasyon Zeova. (Mat. 5:11, 12) Dimoun i opoz nou parski zot ganny kontrole par Satan. Me Zezi i bokou pli pwisan ki Satan. Avek led Zezi, sa bon nouvel pe ganny anonse avek dimoun sorti dan tou nasyon. Annou vwar en levidans.

7. Ki mannyer ou konnen ki Revelasyon 14:6, 7 pe ganny akonplir?

⁷ En lot difikilte ki bann proklanmater i fer fas avek, i lefet ki dimoun i koz diferan langaz. Parmi bann keksoz ki Zezi ti revel avek zapot Zan, Zezi ti predir ki dan nou letan, sa bon nouvel ti pou ganny anonse dan diferan langaz. (Lir Revelasyon 14:6, 7.) Ki mannyer sa? Nou pe donn otan dimoun posib loportinite pour aksepte sa mesaz Rwayonm. Ozordi dimoun partou dan lemonn i kapab lir bann piblikasyon baze lo Labib lo nou sit Enternet jw.org parski i annan bann lenformasyon dan plis ki 1,000 langaz. Konsey Direkter ti donn laprouvasyon pour tradwir sa liv Viv ere pour touzour! dan plis ki 700 langaz. Sa liv i sa zouti prensipal ki nou servi pour fer disip. I osi annan bann video pour bann sourd e piblikasyon an Bray pour bann ki aveg. Tousala pe akonpli bann profesi Labib. Bann dimoun sorti dan “langaz tou nasyon” pe aprann konn sa “langaz pir” ki sorti dan Labib. (Zek. 8:23; Zef. 3:9) Tousala pe ganny fer anba gidans Zezi Kri.

8. Ki nou travay predikasyon in akonpli ziska aprezan?

⁸ Ozordi, i annan plis ki 8 milyon dimoun dan 240 pei ki form parti lorganizasyon Zeova e sak lannen plizyer milye dimoun i batize e vin en Temwen Zeova. Me sa ki pli enportan, i ki sa bann nouvo disip in devlop bann zoli kalite, setadir “sa nouvo personnalite.” (Kol. 3:8-10) En kantite in aret viv en lavi imoral. Zot in aret vyolan, patriyotik e zot nepli annan prezidis. Sa profesi dan Izai 2:4 pe ganny akonplir. Sa bann disip pe “nepli aprann lager.” Anmezir nou fer bokou zefor pour devlop sa nouvo personnalite, nou ed dimoun pour vin ver lorganizasyon Bondye e nou montre ki  nou pe swiv Zezi Kri ki nou sef. (Zan 13:35; 1 Pyer 2:12) Tou sa bann keksoz pe arive parski Zezi i donn nou led ki nou bezwen.

9. Dapre Matye 24:45-47, ki Zezi ti dir pou arive dan bann dernyen zour?

⁹ Lir Matye 24:45-47. Zezi ti predir ki dan bann dernyen zour i ti pou apwent en “lesklav fidel e pridan” pour donn son bann disip manze spirityel. Alor nou ekspekte ki dan nou letan zot pe travay dir e sanmenm ki’n arive. Zezi in servi en pti group Kretyen swazir pour donn pep Bondye ek bann ki enterese manze spirityel “dan sa moman apropriye.” Sa bann zonm pa domin lo lafwa lezot. (2 Kor. 1:24) O kontrer zot rekonnet ki Zezi Kri ki “dirizan e komandan” pour son pep.​—Iza. 55:4.

10. Ki piblikasyon ki’n ed ou vin en serviter Zeova? (Vwar portre.)

¹⁰ Depi 1919, sa lesklav fidel in prepar plizyer piblikasyon ki’n ed bann ki enterese pour aprann konn laverite dan Parol Bondye pour premye fwa. An 1921, sa lesklav ti prepar en liv The Harp of God pour ed bann ki enterese pour aprann konn lansennyman de baz ki dan Labib. Avek letan, i ti annan lezot piblikasyon ki ti ganny prepare. Ki piblikasyon ki’n ed ou pour aprann konn e kontan nou Papa ki dan lesyel? Eski i ti “Let God Be True,” The Truth That Leads to Eternal Life, You Can Live Forever in Paradise on Earth, Konnesans Ki Anmenn ver Lavi Eternel, Ki Labib i vreman dir?, Ki Labib i dir? oubyen Viv ere pour touzour! ki nou nouvo piblikasyon? Tou sa bann piblikasyon ti ganny prepare pour ed nou fer disip e i ti sanmenm  sa ki nou ti bezwen ler i ti ganny pibliye.

11. Akoz i enportan ki nou tou nou ganny sa manze spirityel?

¹¹ Nou tou nou bezwen manze spirityel. Zapot Pol ti ekri: “Manze solid i pour bann dimoun matir.” Pol ti dir ki ler nou aplik sa ki nou aprann dan Labib sa pou ed nou konn “fer diferans ant sa ki byen ek sa ki mal.” (Ebr. 5:14) I kapab difisil pour obei bann standar Zeova parski en kantite dimoun ozordi pe viv en lavi imoral. Me Zezi i fer sir ki nou ganny sa manze spirityel ki nou bezwen pour fer nou lafwa reste for. Sa manze spirityel i sorti dan Parol Bondye. Anba gidans Zezi, sa lesklav fidel i prepar e distribye sa manze.

12. Ki mannyer nou onor non Bondye parey Zezi?

¹² Parey Zezi, nou’n donn non Bondye sa loner ki i merite. (Zan 17:6, 26) Par egzanp, an 1931 nou ti adopte sa non Temwen Zeova ki sorti dan Labib. Sa ti montre ki kantite non Bondye ti enportan pour nou e nou ti anvi ganny rekonnet par non nou Papa ki dan lesyel. (Iza. 43:10-12) Depi Oktob 1931, non Bondye in ganny mete lo kouvertir tou Latour Veyer. An plis, New World Translation of the Holy Scriptures in remet non Bondye kot i sipoze ete dan son Parol. Sa i konpletman diferan avek bann larelizyon ki swadizan Kretyen ki’n tir non Bondye dan en kantite zot bann tradiksyon Labib.

13. Kwa ki konvenk ou ki Zezi pe servi “sa lesklav fidel e pridan” ozordi? (Zan 6:68)

¹³ Zezi in servi “sa lesklav fidel e pridan” pour etabli en lorganizasyon  lo later ki pou promot ladorasyon pir. Ki mannyer ou santi konsernan sa lorganizasyon? Petet ou mazin sa parol ki zapot Pyer ti dir avek Zezi. I ti dir: “Kot lekel nou pou ale? Ou annan parol lavi eternel.” (Zan 6:68) Kote sakenn parmi nou ti pou ete ozordi si nou pa ti’n aprann konsernan lorganizasyon Zeova? Zezi i servi sa lorganizasyon pour fer sir ki nou annan tou sa ki nou bezwen pour reste fidel avek Bondye. Zezi i osi form nou pour nou vin pli efikas dan predikasyon. An plis, i ed nou pour devlop “sa nouvo personnalite” pour nou kapab fer plezir Zeova.​—Efe. 4:24.

14. Ki byenfe ou’n gannyen pandan sa pandemi COVID-19 lefet ki ou form parti lorganizasyon Zeova?

¹⁴ Zezi i donn nou bann lenstriksyon ki saz pandan bann moman difisil. Nou ti vwar ki sa bann lenstriksyon i anmenn byenfe pour nou ler pandemi COVID-19 ti konmanse. Sa letan bokou dimoun dan lemonn pa ti konnen ki pour fer. Me Zezi ti fer sir ki nou ganny bann lenstriksyon kler ki pou ed nou reste sen e sof. Nou ti ganny ankouraze pour met mask dan bann landrwa piblik e pour kit zistans avek kanmarad. Lorganizasyon Zeova ti rapel bann ansyen pour kontakte bann frer ek ser dan kongregasyon regilyerman e pour rode ki zot bezwen pour zot kapab reste sen e sof, an bonn sante e pros avek Zeova. (Iza. 32:1, 2) Nou osi ganny plis lenstriksyon ek lankourazman atraver bann updates sorti kot Konsey Direkter.

15. Ki lenstriksyon nou ti gannyen pandan sa pandemi lo ki mannyer pour fer renyon ek predikasyon e ki’n arive?

 ¹⁵ Pandan sa pandemi COVID-19, nou’n osi ganny lenstriksyon kler lo ki mannyer pour fer bann renyon e pour partisip dan predikasyon. Pa bokou letan apre ki sa pandemi ti konmanse, nou ti konmans asiste renyon ek lasanble atraver Enternet. Nou ti osi konmans fer predikasyon atraver telefonn e par anvoy bann let. Zeova in beni nou bann zefor. Bann Biro Brans Temwen Zeova dan plizyer pei in remarke ki lakantite proklanmater dan zot teritwar in ogmante. Anfet, pandan sa letan pandemi en kantite proklanmater in annan bann leksperyans ki ankourazan.​—Vwar sa bwat “ Zeova i beni nou travay predikasyon.”

16. Ki nou kapab asire?

¹⁶ I kapab ki serten frer ek ser ti santi ki bann lenstriksyon ki lorganizasyon Zeova ti donnen ti tro strik. Me plizyer fwa nou’n vwar ki sa bann lenstriksyon ti vreman saz. (Mat. 11:19) Nou kapab vwar ki Zezi i kontan nou dan lafason ki i diriz lorganizasyon Zeova. Ler nou reflesir lo lafason ki Zezi pe diriz son pep, sa i fer nou asire ki nenport kwa ki kapab arive dan lavenir, Zeova ek son Garson pou avek nou.​—Lir Ebre 13:5, 6.

17. Ki mannyer ou santi lefet ki Zezi i ou sef?

¹⁷ Nou vreman kontan ki Zezi i nou sef. Nou form parti en lorganizasyon ki ini menm si nou sorti dan diferan kiltir, pei e nou koz diferan langaz. Nou ganny manze spirityel ki sorti dan Parol Bondye e nou ganny sa formasyon ki nou bezwen pour partisip dan sa travay predikasyon. Sakenn parmi nou pe ganny sa led ki nou bezwen pour devlop sa nouvo personnalite e nou pe aprann pour kontan kanmarad. Nou annan rezon pour fyer ki Zezi i nou sef!