ESKI OU EN DIMOUN ERE? Si wi, kwa ki fer ou ere? Ou fanmir, ou travay oubyen ou larelizyon? Petet ou pe esper en keksoz ki pou fer ou ere, parey ler ou pou fini lekol, ganny en bon travay oubyen aste en loto nef.

Bokou dimoun i santi zot ere ler zot atenn en lobzektif oubyen ganny en keksoz ki zot ti anvi. Me eski sa santiman i dire? Souvandfwa, sa santiman i tanporer e sa i kapab anmenn dezapwentman.

En dimoun ki ere i en dimoun ki dan lazwa, ki kontan oubyen ki dan lakontantman. Sa dimoun i santi li byen pour en serten letan e sa lazwa i kapab ogmante. Sa i kapab fer li kontan son lavi e anvi sa santiman dire.

Deplis, sa santiman lakontantman oubyen lazwa ki dire, in osi ganny dekrir konman en vwayaz e non pa en destinasyon oubyen lobzektif. Si ou dir, “Mon pou ere kan . . .” i konmsi ou pe anpes ou lekor ere.

Par egzanp, en dimoun ere i kapab ganny konpare avek enn ki annan en bon lasante. Ki mannyer nou kapab annan en bon lasante? Nou fer sa kan nou swiv en bon ladyet, fer legzersis e viv en bon lavi. Pareyman, nou pou ere si nou fer bann bon swa dan lavi e si nou viv an armoni avek bann bon prensip.

Ki bann bon konsey oubyen kalite ki kapab fer nou ere? Menm si serten prensip oubyen kalite i pli enportan, sa bann ki swiv i esansyel:

• KONTANT NOU E VIN ZENERE

• EN BON LASANTE EK REZILYANS

• LANMOUR

• PARDONNEN

• EN BI DAN LAVI

• LESPWAR

En liv ki ranpli avek bann konsey saz e ki ganny byen respekte i dir: “Byennere sa enn ki . . . pran plezir dan lalwa [Zeova] e medit lo son komannman, lizour konman aswar.” (Psonm 1:1, 2) Annou vwar ki mannyer nou kapab fer sa.