“LESPWAR I ESANSYEL POUR NOU ANNAN EN BON LANMITYE AVEK BONDYE.” Se sa ki nou lir dan en liv ki apel Hope in the Age of Anxiety. Sa liv i osi dir ki lespwar “i sa pli bon latizann ki kapab ed nou sirmont bann santiman parey lafreyer, ler nou santi nou tousel e ler nou santi ki nou pa kapab fer nanryen.”

Labib i koz lo akoz bann imen i bezwen lespwar e i osi averti kont danze pour annan fo lespwar. Psonm 146:3 i dir: “Pa met ou konfyans dan bann sef, dan bann imen ki pa kapab sov ou.” Dan plas met konfyans dan zefor ki bann imen pe fer pour sov nou, nou devret met konfyans dan nou Kreater ki annan sa pouvwar pour akonplir son bann promes. Ki Zeova in promet nou? Annou vwar serten legzanp:

BANN MOVE DIMOUN POU DISPARET E I POU ANNAN LAPE PARMI BANN KI DRWAT: Psonm 37:10, 11, (NWT) i dir: “Dan ankor en pti pe letan, move dimoun pou nepli la, . . Me bann dimoun ki annan limilite pou posed later e zot pou trouv bokou plezir dan labondans lape.” Dan verse 29 (NWT) i dir ki sa enn ki “drwat pou posed later e zot pou reste lo la pour touzour.”

I POU NEPLI ANNAN LAGER: “[Zeova] . . . i fer lager arete partou lo later; i kas bann fles, i detri bann lans; i met dife dan bann boukliye.”​—Psonm 46:8, 9.

I POU NEPLI ANNAN MALADI, SOUFRANS OUBYEN LANMOR: “Latant Bondye i avek bann imen . . . I pou eswiy tou larm dan zot lizye, i pou nepli annan ni lanmor, ni dey, ni leokri, ni douler ankor.”​—Revelasyon 21:3, 4.

I POU ANNAN ASE MANZE POUR TOU DIMOUN: “Fer sa pei prodwi en kantite dible e bann kolin ava kouver avek bann zepi.”​—Psonm 72:16.

KRIS KONMAN LERWA POU DIRIZ LATER ANTYE: “[Zezi Kri] ti resevwar lotorite, loner ek rwayote; tou bann pep, tou bann nasyon, dimoun ki sorti dan tou langaz ti servi li. Son pouvwar pou reste pour touzour. Son renny pa pou zanmen fini. Son rwayonm pa pou zanmen ganny detri.”​—Danyel 7:14.

Ki mannyer nou kapab asire ki sa bann promes pou vin vre? Letan i ti lo later, Zezi ti montre ki i kalifye pour vin Lerwa dan sa Rwayonm. I ti geri bann malad, donn manze bann pov e i ti resisit bann mor. Sa ki pli enportan i son lansennyman akoz i ti donn bann prensip ki pou ed bann imen viv ansanm dan lape ek linite pour touzour. Zezi ti osi dir ki pou arive dan lavenir. Sa i enkli sa ki pou arive dan bann dernyen zour.

Zezi ti dir ki dan bann dernyen zour i pou napa lape ek sekirite. Sa siny ki montre ki “lafen sa lemonn i pros pour arive” i enkli lager partou dan lemonn, mankman manze, lepidemi ek bann gran tranblemandter. (Matye 24:3, 7; Lik 21:10, 11; Revelasyon 6:3-8) Zezi ti osi dir: “Akoz i pou annan en kantite pese, lanmour lamazorite dimoun pou diminyen.”​—Matye 24:12.

Sa i evidan dan plizyer fason. En lot ekriven Labib ti dir sa ki nou lir dan 2 Timote 3:1-5. Sa verse i dir ki dan “bann dernyen zour,” dimoun an zeneral pou kontan zis zot lekor, kontan larzan ek plezir. Zot pou arogan e kriyel. Bann fanmir pou napa lanmour pour kanmarad e zanfan pou dezobeisan anver zot paran. Dimoun partou pou fer krwar zot annan devosyon pour Bondye.

Sa bann move keksoz ki pe arive i montre ki sa lemonn i dan bann dernyen zour. Zot osi montre ki sa Rwayonm ki pou anmenn bann bon keksoz i pros. Anfet, Zezi ti dir sa dan son profesi konsernan bann dernyen zour: “Sa bon nouvel Rwayonm pou ganny anonse partou lo later pour donn en temwannyaz avek tou nasyon e apre sa, lafen pou arive.”​—Matye 24:14.

Sa bon nouvel i donn en lavertisman pour bann dimoun ki pe fer sa ki mal e lespwar pour bann ki obei. I asir bann ki obei ki sa bann benediksyon ki Bondye in promet pou byento vin en realite. Eski ou ti pou kontan konn plis lo sa bann benediksyon? Silvouple, kontinyen lir sa magazin.