Akoz dimoun nepli annan respe pour lezot?
AKOZ I ENPORTAN POUR ANNAN RESPE POUR LEZOT
Ler nou annan respe pour lezot, nou kapab anpese ki en sityasyon i vin pli pir.
-
En proverb dan Labib i dir: “En larepons ki dous i fer en dimoun aret ankoler me en dimoun ki koz brit i fer dimoun ankoler.” (Proverb 15:1) Bann parol ek aksyon ki montre ki en dimoun napa respe i zis azout bennzin dan dife e souvan sa i fer bokou dega.
-
Zezi ti dir: “Parski labous i koz sa ki deborde dan leker.” (Matye 12:34) Ler nou napa respe, sa i kapab montre ki mannyer nou vreman santi anver dimoun ki zot ras, tribi, nasyonalite oubyen ran sosyal i diferan avek sa ki pour nou.
Dan en resers ki’n ganny fer resaman kot plis ki 32,000 dimoun dan 28 pei ti partisipe, plis ki lanmwatye sa bann dimoun ti dir ki zot pa’n deza vwar sa kantite dimoun ki napa respe.
SA KI OU KAPAB FER
Menm si ou kot lekol oubyen ou kot travay, annan respe pour tou dimoun menm si ou pa dakor avek zot pwennvi. Rod bann keksoz ki zot tonm dakor lo la. Sa pou ed ou evite kritike oubyen zize.
Tret lezot parey ou ti pou kontan lezot i tret ou. Si nou annan konsiderasyon e nou onnet avek lezot, i tre probab ki lezot pou tret nou dan menm fason.
Pare pour pardonnen. Ler nou les pase bann move keksoz ek bann parol blesan, nou montre ki nou annan konfyans ki sa dimoun pa ti anvi ofans nou.
SA KI TEMWEN ZEOVA PE FER
Temwen Zeova i promot respe pour lezot dan bann landrwa kot zot reste e kot zot travay.
Nou ofer letid Labib gratwit avek tou dimoun me nou pa fors zot pour aksepte nou krwayans ek nou lopinyon. O kontrer, nou esey aplik bann konsey Labib par partaz nou mesaz “avek ladouser ek bokou respe.”—1 Pyer 3:15; 2 Timote 2:24.
Nou pa fer diskriminasyon e nou akeyir dimoun sorti dan diferan kiltir ki anvi aprann sa ki Labib i ansennyen ler zot asiste nou bann renyon. Nou esey vin toleran e “montre respe pour tou dimoun.”—1 Pyer 2:17, New International Version.
Nou respekte lotorite gouvernman ki an plas. (Romen 13:1) Nou obei lalwa e nou pey taks. Menm si nou pa pran kote dan bann zafer politik, nou respekte drwa lezot pour fer zot prop desizyon lo bann zafer politik.
