Akoz dimoun napa respe pour lavi?

ZWE

AKOZ I ENPORTAN POUR ANNAN RESPE POUR LAVI?

Ler ou fer bann keksoz ki pa bon pour ou lasante oubyen ki met lavi lezot an danze, sa i montre ki ou pa apresye ou lavi oubyen lavi lezot dimoun.

Fim sigaret pa zis fer nou ganny kanser me i osi fer li difisil pour nou lekor lalit avek kanser. Laplipar dimoun ki’n mor avek kanser poumon i akoz sa dimoun ti fimen oubyen en lot dimoun in fim o bor li.
Sak lannen, bann fiziyad i anmenn soufrans emosyonnel pour bokou dimoun. En rapor Stanford University i dir: “Resers i montre ki menm bann ki’n sirviv bann latak [kot lekol] e ki pa’n ganny okenn dimal fizik, zot ankor annan bann problenm mantal e emosyonnel ki kapab afekte zot lavi pour plizyer lannen.”
Bann dimoun ki dray anba lenfliyans lalkol oubyen drog i fer li danzere pour lezot ki pe dray oubyen pour lezot ki lo trotwar. Ler dimoun i montre ki zot napa respe pour lavi, bann inosan i soufer.

SA KI OU KAPAB FER

Protez ou lasante. I pa zanmen tro tar pour aret bann move pratik parey fimen, servi sigaret elektronik, bwar tro bokou oubyen servi drog. Sa bann pratik i afekte ou lavi e i montre ki ou napa respe pour lavi bann dimoun otour ou, enkli ou fanmir.

“Annou pirifye nou avek tou sa ki sali lekor.”—2 Korentyen 7:1.

Mazin ou sekirite ek sekirite lezot. Pour evit aksidan, gard ou lakour dan en bon leta. Pran prekosyon ler ou pe dray e gard ou transpor dan en bon kondisyon. Pa les lezot met presyon lo ou pour fer bann aktivite ki kapab koz dimal grav oubyen lanmor.

“Si ou konstri en nouvo lakaz, ou devret fer en pti miray toultour ou twa lakaz pour ki si en dimoun i tonbe, ou ek ou fanmir pa pou koupab pour lanmor sa dimoun.”—Deterononm 22:8. a

Demontre labonte anver lezot. Respe pour lavi i vedir ki nou demontre labonte anver dimoun tou ras, nasyonalite, menm si zot ris oubyen pov, edike oubyen pa edike. Apre tou, prezidis ek laenn i rezon prensipal akoz i annan bokou vyolans ek lager dan lemonn.

“Debaras zot avek tou sort rankin, lakoler, firer, kriye ek lensilt ensi ki okenn lezot keksoz ki kapab fer ditor. Me zot devret bon avek kanmarad.”—Efezyen 4:31, 32.

SA KI TEMWEN ZEOVA PE FER

Temwen Zeova i ansenny lezot pour annan en bon lasante. Nou progranm letid Labib in ed dimoun pour sirmont zot problenm adiksyon ek lezot move pratik.

Nou swiv bann standar strik konsernan sekirite lo nou bann proze konstriksyon. Bann volonter ki ede pour konstri bann landrwa kot nou fer nou bann renyon ek lezot fasilite ki ganny servi pour siport nou travay pour ansenny dimoun lo Labib, zot ganny formasyon pour evit bann aksidan. Nou bann batiman i ganny enspekte lo en baz regilye pour ki zot swiv bann lalwa lokal konsernan sekirite.

Nou ed dimoun ki fer fas avek dezas. Tou resaman, pour 12 mwan, nou ti ed apepre 200 dimoun ki zot lavi ti an danze akoz dezas partou dan lemonn e nou ti depans apepre 12 milyon dolar ki’n ganny anmase konman kontribisyon pour ed sa bann viktim.

Ler lepidemi Ebola ti konmanse dan Was Lafrik (2014) ek Repiblik Demokratik Kongo (2018), nou ti eksplik bann dimoun ki mannyer pour anpes sa lepidemi propaze. Nou ti anvoy bann reprezantan pour koz avek bann group lo sa size “Lobeisans i sov lavi.” Nou ti met lanfaz lo lenportans pour lav lanmen e nou ti met bann fasilite pour lav lanmen dan larantre sak landrwa ladorasyon. Nou ti osi eksplik zot ki lezot keksoz zot devret fer pour evite propaz sa maladi.

An Sera Leonn, i ti annan en lanons lo radyo ki ti felisit Temwen Zeova pour led ki zot in donn bann Temwen ek bann ki pa Temwen pour evite propaz viris Ebola dan kominote.

En landrwa kot dimoun i lav lanmen kot en Lasal Rwayonm Liberya, ler i ti annan lepidemi Ebola 2014

a Dan ansyen Mwayenn Oriyan, sa fason fer ti montre ki zot konsyan e konsernen pour sekirite zot fanmir ek lezot dimoun.

VEYE!