Bann paran ki donn bon legzanp i viv dapre sa ki zot ansenny zot zanfan. Par egzanp, en paran pa kapab ekspekte son zanfan i koz laverite si sa zanfan i tann li pe dir, “Dir li mon pa la,” ler i pa anvi koz avek en dimoun.

“Bokou dimoun i kontan dir, ‘Fer sa ki mon dir me pa sa ki mon fer.’ Me sa pa marse avek zanfan. Zot parey leponz ki anmas tou sa ki nou dir e fer. Zot pou dir nou si sa ki nou pe fer pa parey avek sa ki nou dir.”​—David.

PRENSIP LABIB: “Ou ki pe ansennyen, ‘Pa vole,’ eski ou vole?”​—Romen 2:21.

Paran i annan en pli gran lenfliyans lo zot zanfan ek adolesan ki okenn lezot dimoun, enkli bann kanmarad lekol. Alor, ou dan sa pli bon pozisyon pour gid ou zanfan e met li lo sa bon semen. Byensir, sa pou marse si ou donn en bon legzanp.

“Nou kapab repet menm keksoz en santenn fwa e krwar nou zanfan pa tande. Me sa en fwa ki nou pa fer sa ki nou dir, nou zanfan pou dir nou kwa ki nou’n fer mal. Zanfan i get byen tou sa ki nou fer menm ler nou krwar zot pa vwar nou.”​—Nicole.

PRENSIP LABIB: “Lasazes ki sorti dan lesyel . . . pa ipokrit.”​—Zak 3:17.

Egzamin ou lekor pour gete si ou pe viv dapre ou prop standar. Ki kalite divertisman ki ou kontan? Ki mannyer ou tret ou konzwen ek ou zanfan? Ki kalite zanmi ou annan? Eski ou mazin lentere lezot? An bref, eski ou sa kalite dimoun ki ou anvi ou zanfan i vini?

“Mwan ek mon msye, nou pa met en standar pour nou zanfan ki nou menm nou pa pare pour swiv.”​—Christine.

Demann leskiz ler ou fer fot. Ou zanfan i konnen ki ou pa parfe. Ler ou demann leskiz ou konzwen ek ou zanfan kan ou fer en fot, ou zanfan pou aprann ki mannyer pour onnet e i pou annan limilite pour admet ler i fer fot.

“Nou zanfan i bezwen tande ki nou admet ler nou’n fer fot e ki nou demann leskiz. Si nou pa fer sa, zot pou aprann kasyet zot fot.”​—Robin.