Ler en koup i travay ansanm dan maryaz, en msye ek en madanm i parey en pilot ek en kopilot ki pe al ver menm destinasyon. Menm ler bann problenm i arive, bann konzwen i devret dir “nou” olye dir “mwan.”

PRENSIP LABIB: “Zot nepli de me en sel.”​—Matye 19:6.

“Napa zis en dimoun dan maryaz. Msye ek madanm i devret travay ansanm pour fer li reisi.”​—Christopher.

Ler i annan problenm, en msye oubyen madanm ki pa travay ansanm, pou lager antre zot dan plas atak sa problenm. Bann pti problenm pou vin en gro zafer.

“Pour en maryaz reisi, sa koup i bezwen travay ansanm konman en lekip. Si mwan ek mon msye pa ti travay ansanm, nou ti pou parey de dimoun ki viv dan menm lakaz me ki napa menm lobzektif. Sa ti pou en problenm sirtou ler i annan bann desizyon enportan pour pran.”​—Alexandra.

REFLESIR

• Eski mon vwar sa larzan ki mon gannyen konmsi i “zis pour mwan”?

• Pour mon kapab detann, eski fodre mon konzwen pa la?

• Eski mon gard zistans ek fanmir mon konzwen menm si li i pros avek zot?

KOZ AVEK OU KONZWEN

• Konman en koup, dan ki domenn nou annan sa bon korperasyon?

• Kote nou kapab amelyore?

• Ki nou kapab fer pour amelyor lafason ki nou travay konman en tim dan nou maryaz?

SIZESZYON

• Mazinen ou pe zwe tenis e ou konzwen pe zwe kont ou. Ki ou kapab fer pour zwenn li pour ki zot dan menm lekip?

• Dan plas mazin ‘ki mannyer mon kapab ganny laviktwar?’ mazin plito ‘ki mannyer nou kapab ganny laviktwar?’

“Bliye lekel ki byen e lekel ki mal. I pli enportan pour annan lape ek linite dan en maryaz.”​—Ethan.

PRENSIP LABIB: “Pa rod zis zot prop lentere, me lentere lezot osi.”​—Filipyen 2:3, 4.