Spirityalite
Parey i’n ganny dir dan premye lartik sa magazin, en kantite dimoun i konsider Labib konman en liv sakre. Zot trouve ki ler zot lir li e aplik son gidans, zot santi zot pli pros avek Bondye e zot konpran ki zot lavi i annan en bi.
Labib i servi sa mo spirityalite pour refer avek en latitid oubyen lapros anver lavi. (Zid 18, 19) En dimoun spirityel i konsantre lo bann standar Bondye kontrerman avek en dimoun ki pa spirityel ki konsantre plis lo li menm.—Efezyen 5:1.
LESPWAR
PRENSIP LABIB: “Si ou montre ou dekouraze dan letan maler, alor, ou [pou] napa bokou lafors.”—Proverb 24:10.
KI I VEDIR: Dekourazman i kapab afeblir nou lafors ki nou bezwen pour fer fas avek problenm dan lavi. De lot kote, lespwar i kapab donn nou kouraz ki nou bezwen. Ler nou annan lespwar nou realize ki laplipar nou problenm i tanporer. Anfet, nou osi kapab retir en bon keksoz ladan.
SA KI OU KAPAB FER: Mazin bann bon keksoz ki pou arive dan lavenir. Olye enkyet lo sa ki kapab arive oubyen esper keksoz vin dan ou lavantaz, konmans fer sa ki ou’n mazinen pour fer. Byensir, “levennman san ekspekte” i kapab arive. (Eklezyast 9:11, NWT) Kantmenm sa, keksoz i souvandfwa vin pli byen ki nou ti pe ekspekte. Pour ed nou konpran, Labib i servi legzanp en fermye e i dir: “Alor, byen granmaten senm ou legren e menm aswar, pa arete. Ou pa konnen lekel ant zot ki pou reisi, oubyen lekel ki bon.”—Eklezyast 11:6.
LAREPONS BANN KESTYON ENPORTAN DAN LAVI
PRENSIP LABIB: “Donn mwan disernman . . . Ou parol i laverite.”—Psonm 119:144, 160.
KI I VEDIR: Labib i reponn bann kestyon ki laplipar dimoun i demande. Par egzanp, i reponn sa bann kestyon tel parey
-
Kote nou sorti?
-
Akoz nou lo later?
-
Ki i arive ler en dimoun i mor?
-
Eski i annan en lavi apre sa enn?
Plizyer milyon dimoun dan lemonn in amelyor zot lavi par egzamin bann larepons ki Labib i donnen pour sa kat kestyon e plizyer lezot ankor.
SA KI OU KAPAB FER: Egzamin pour ou menm sa ki Labib i dir. Demann nenport Temwen Zeova pour ed ou konpran Labib. Al lo jw.org oubyen asiste enn nou bann renyon ki tou dimoun i kapab asiste.
LEZOT PRENSIP LABIB
Get sa video Akoz i bon etidye Labib? lo jw.org. I disponib dan 880 langaz
REKONNET OU BEZWEN SPIRITYEL.
“Ere bann ki rekonnet ki zot bezwen gidans Bondye, parski Rwayonm lesyel i pour zot.”—MATYE 5:3.
APRANN PLIS LO SA BONDYE KI DAN LABIB.
“Rod [Bondye], . . . e reisi trouv li . . . I pa lwen avek sakenn ant nou.”—AKT 17:27.
LIR E REFLESIR LO MESAZ SORTI DAN LABIB.
“I pran plezir dan lalwa [Zeova] * e medit lo son komannman, lizour koman aswar . . . I reisi dan tou sa ki i antreprann.”—PSONM 1:2, 3.
^ par. 23 Dapre Labib, Zeova i non Bondye.
