Batir Ou Avek Lanmour

‘Kontan Zeova ou Bondye avek tou ou leker, avek tou ou lam, e avek tou ou lespri.’—MATYE 22:37.

1. (a) Nonm serten kalite ki en Kretyen i kiltive? (b) Lekel sa kalite Kretyen ki pli enportan, e akoz?

POUR vin en minis efikas, en Kretyen i kiltiv plizyer kalite. Liv Proverb i souliny valer konnesans, konpreansyon, ek lasazes. (Proverb 2:1-10) Lapot Pol ti diskit nesesite pour annan en lafwa solid ek en lesperans ferm. (Romen 1:16, 17; Kolosyen 1:5; Ebre 10:39) Perseverans ek kontrol lo nou prop lekor i osi tre esansyel. (Akt 24:25; Ebre 10:36) Toutfwa, i annan en kalite ki si nou manke i diminyen tou lezot kalite e menm fer zot napa valer. Sa eleman se lanmour.—1 Korentyen 13:1-3, 13.

2. Konman Zezi ti montre lenportans lanmour, e ki bann kestyon sa i souleve?

² Zezi ti montre lenportans lanmour kan i ti dir: “Dimoun pou war ki zot mon bann disip si zot kontan kanmarad.” (Zan 13:35) Vi ki lanmour i en mark ki idantifye nou konman en vre Kretyen, alor nou bezwen demann serten kestyon tel konman, Kisisa lanmour? Akoz i sitan esansyel ki Zezi ti dir ki, pli enportan ki tou keksoz, lanmour i idantifye son bann disip? Ki mannyer nou kapab kiltiv lanmour? Pour ki nou devret annan lanmour? Annou egzamin sa bann kestyon.

Kisisa Lanmour?

3. Konman nou kapab dekrir lanmour, e akoz i enplik lespri ensi ki leker en dimoun?

³ Dapre en deskripsyon, lanmour i kan ou ‘santi ou atase avek en dimoun oubyen ou ranpli avek lafeksyon profon pour li, ou atire ver li, son konpanni i agreab.’ I en kalite ki pous en endividi pour travay pour byennet lezot, parfwa an fezan gran sakrifis lo son par. Parey i ganny dekrir dan Labib, lanmour i enplik lespri ensi ki leker en dimoun. Lespri, oubyen lentelizans, i zwe en rol parski en dimoun ki kontan en lot, i konsyan e rekonnet ki li ek lezot ki i kontan, zot tou zot annan bann febles ensi ki bann kalite ki atiran. Lespri i pli enplike ankor vi ki i annan serten ki en Kretyen i kontan—parfwa, petet, kont son tandans natirel—akoz i konnen atraver son lektir Labib ki Bondye i anvi i fer sa. (Matye 5:44; 1 Korentyen 16:14) Toudmenm, lanmour i dabor sorti dan leker. Parey Labib i montre, vre lanmour pa zanmen lo kote lespri selman. I enplik en senserite profon ek en langazman ranpli avek santiman.—1 Pyer 1:22.

4. Dan ki fason ki lanmour i en lyen pwisan?

⁴ I rar pour bann dimoun ki egois kapab annan en relasyon ki reelman marke par lanmour, akoz en dimoun ki vreman annan lanmour i pare pour met lentere lezot avan sa ki pour li. (Filipyen 2:2-4) Parol Zezi ki “i annan plis lazwa pour donnen ki pour resevwar,” i vre sirtou kan donnen i en aksyon motive par lanmour. (Akt 20:35) Lanmour i soud keksoz ansanm. (Kolosyen 3:14) I souvan enkli lanmitye, me bann lyen lanmour i pli solid ki pour lanmitye. Sa relasyon romantik ki egziste ant  en mari ek son madanm i parfwa ganny dekrir konman lanmour; sepandan, sa lanmour ki Labib i ankouraz nou pour kiltive i pli dire ki latraksyon fizik. Kan en koup i vreman kontan kanmarad, zot reste ansanm menm si en relasyon fizik nepli posib pour rezon lavyeyes oubyen dezabilite.

Lanmour—En Kalite Esansyel

5. Akoz lanmour i en kalite esansyel pour en Kretyen?

⁵ Akoz lanmour i en kalite esansyel pour en Kretyen? Premyerman, akoz Zezi ti konmann son bann disip pour kontan kanmarad. I ti dir: “Zot mon bann zanmi, si zot obei mon konmannman. Alor la mon konmannman ki mon donn zot: kontan kanmarad.” (Zan 15:14, 17) Dezyenmman, parski Zeova i model siprenm lanmour, e etan son bann adorater nou devret imit li. (Efezyen 5:1; 1 Zan 4:16) Labib i dir ki pran konnesans lo Zeova ek Zezi i sinifye lavi eternel. Ki mannyer nou kapab dir ki nou konn Bondye si nou pa esey vin parey li? Lapot Zan ti rezonnen: “Sa ki pa kontan son prosen, pa konn Bondye, parski Bondye i lanmour.”—1 Zan 4:8.

6. Konman ki lanmour i kapab fer nou ekilibre dan diferan laspe nou lavi?

⁶ En trwazyenm rezon akoz lanmour i enportan se ki i ed nou vin ekilibre dan diferan laspe nou lavi e i azout bon motiv avek sa ki nou fer. Par egzanp, i endispansab pour kontinyelman pran konnesans lo Parol Bondye. Pour en Kretyen, en tel konnesans i parey nouritir. I ed li pour devlop matirite e pour azir an armoni avek lavolonte Bondye. (Psonm 119:105; Matye 4:4; 2 Timote 3:15, 16) Me Pol ti averti: “Konnesans i fer nou gonfle, me tandis ki lanmour i konstri.” (1 Korentyen 8:1) Anfet, i napa nanryen mal avek konnesans egzakt. Problenm i avek nou—nou annan bann move tandans. (Zenez 8:21) Si lanmour pa la pour ed en dimoun reste ekilibre, konnesans ti a kapab fer li gonfle, an pansan ki i pli siperyer ki lezot. Me sa pa pou arive si ofon sa dimoun i motive par lanmour. “Lanmour pa . . . vant son prop lekor. I pa arogan.” (1 Korentyen 13:4, 5) En Kretyen ki motive par lanmour pa krwar ki i pli siperyer menm si i posed en konnesans profon. Lanmour i fer li reste senp e i anpes li devlop en dezir pour vin en gran dimoun.—Psonm 138:6; Zak 4:6.

7, 8. Ki mannyer lanmour i ed nou pour konsantre lo bann keksoz pli enportan?

⁷ Pol ti ekrir bann Filipyen: “Mon demande dan mon lapriyer ki zot lanmour i ogmante e vin plis ankor, avek en vre konnesans ek en zizman parfe, pour zot kapab swazir [keksoz pli enportan, NW ].” (Filipyen 1:9, 10) Lanmour Kretyen pou ed nou swiv sa lankourazman pour kapab swazir bann keksoz pli enportan. Konman en legzanp, annou konsider sa ki Pol ti dir avek Timote: ‘Si en dimoun i swete ganny plas sirveyan i dezir en fonksyon nob.’ (1 Timote 3:1) Pandan lannen servis 2000, bann kongregasyon partou dan lemonn in ogmante par 1,502, ki fer en nouvo total 91,487. Alor, i annan en gran bezwen pour plis ansyen, e bann ki aspir en tel privilez i ganny felisite.

⁸ Sepandan, bann ki aspir privilez pour sirveyans pou mentenir en bon balans si zot kit antet lobzektif sa privilez. Senpleman annan lotorite oubyen ganny vwar par lezot i pa bann keksoz pli enportan. Bann ansyen ki fer plezir Zeova i ganny motive par lanmour pour li e pour zot bann frer. Zot pa pe rod loner oubyen lotorite. Apre ki Lapot Pyer ti konsey bann ansyen dan kongregasyon pour mentenir en bon  latitid, i ti met lanfaz lo nesesite pour “montre bokou limilite.” I ti konsey tou bann dan kongregasyon: “Avek limilite plas zot anba kontrol pisans Bondye.” (1 Pyer 5:1-6) I ti a byen si bann ki pe aspir en tel privilez i konsider legzanp sa gran nonm ansyen partou dan lemonn ki pe travay dir avek limilite, e ki alor vin en benediksyon pour zot kongregasyon.—Ebre 13:7.

Bon Motiv i Ed Nou Andire

9. Akoz bann Kretyen i kit antet bann benediksyon ki Zeova in promet?

⁹ Lenportans ganny motive par lanmour i ganny gete dan en lot fason. Pour bann ki atase avek Bondye par lanmour, Labib i promet bann benediksyon ris la konmela ek bann benediksyon ekstrememan merveye dan lavenir. (1 Timote 4:8) En Kretyen ki antyerman krwar dan sa bann promes e ki konvenki ki Zeova “i rekonpans tou bann ki rod li” i ganny led pour reste ferm dan lafwa. (Ebre 11:6) Laplipar nou i tre enpasyan pour vwar lakonplisman bann promes Bondye e nou repet santiman lapot Zan: “Amenn! Vini, Senyer Zezi!” (Revelasyon 22:20) Wi, medit lo bann benediksyon ki’n ganny rezerve pour nou si nou reste fidel, pou ed nou pour andire zis parey “lazwa ki ti ganny plase devan” Zezi ti ed li pour andire.—Ebre 12:1, 2, NW.

10, 11. Konman ki ler nou motive par lanmour sa i ed nou pour andire?

¹⁰ Me ki pou arive si nou dezir pour viv dan nouvo monn i nou sel motif pour servi Zeova? Dan sa ka, nou pou kapab fasilman vin enpasyan oubyen dezapwente kan i annan serten difikilte ouswa kan bann levennman pa ariv parey oubyen omoman ki nou swete. Nou kapab dan danze pour ganny antrennen. (Ebre 2:1; 3:12) Pol ti koz lo en konpanyon nonmen Demas ki ti abandonn li. Akoz? Parski “i pli kontan sa monn prezan.” (2 Timote 4:10) Tou sa ki servi Zeova senpleman pour bann rezon egois i riske fer parey Demas. Zot kapab ganny atire par bann loportinite imedyat ki sa monn pe ofer e pa pare pour fer bann sakrifis la konmela e pour esper bann benediksyon ki pou vini.

¹¹ Menm si i byen e tou natirel pour annan en dezir pour resevwar bann benediksyon e pour swete ganny soulaze dan bann leprev, lanmour i batir nou lapresyasyon pour sa ki devret vin an premye plas dan nou lavi. Se lavolonte Zeova, pa sa ki nou anvi, ki keksoz pli enportan. (Lik 22:41, 42) Wi, lanmour i batir nou. I fer nou kontant nou pour esper an Zeova avek pasyans, satisfe avek nenport ki benediksyon i donnen e annan konfyans ki dan son letan apropriye nou pou resevwar tou sa ki i’n promet—e plis ankor. (Psonm 145:16; 2 Korentyen 12:8, 9) Antretan, lanmour i ed nou pour kontinyen servi san pans zis nou menm akoz “lanmour pa rod son prop lentere.”—1 Korentyen 13:4, 5.

 Lekel ki Bann Kretyen i Devret Kontan?

12. Dapre Zezi, lekel ki nou devret kontan?

¹² Konsernan lekel ki nou devret kontan, Zezi ti donn en lareg zeneral kan i ti sit de deklarasyon sorti dan Lalwa Mozaik. I ti dir: ‘Kontan Zeova ou Bondye avek tou ou leker, avek tou ou lam, e avek tou ou lespri’ e, “Kontan ou prosen parey ou kontan ou prop lekor.”—Matye 22:37-39.

13. Ki mannyer nou kapab aprann kontan Zeova menm si nou pa kapab vwar li?

¹³ Dapre parol Zezi, i kler ki avan tou nou devret kontan Zeova. Sepandan, nou pa’n ne avek en lanmour konplet pour Zeova. I en keksoz ki nou bezwen kiltive. Kan nou ti antann konsernan li pour premye fwa, nou ti santi nou atire ver li par sa ki nou ti antann. Ptit-a-pti, nou ti aprann konman i ti prepar later pour bann imen. (Zenez 2:5-23) Nou ti aprann konman i’n azir avek imen, i pa ti abandonn nou kan lafanmiy imen ti ganny anvai par pese pour premye fwa, me i ti pran serten mezir pour sov nou. (Zenez 3:1-5, 15) I ti azir bon avek bann ki ti fidel, e avek letan i ti fourni son sel Garson pour pardon nou pese. (Zan 3:16, 36) Anmezir ki sa konnesans ti ogmante, sa ti agrandi nou lapresyasyon pour Zeova. (Izai 25:1) Lerwa David ti dir ki i ti kontan Zeova akoz avek bokou lanmour, I ti pran swen avek li. (Psonm 116:1-9) Ozordi, Zeova i pran swen avek nou, i gid nou, i fortifye nou, e ankouraz nou. Pli nou aprann lo li, pli nou lanmour pour li i agrandi.—Psonm 31:23; Tsefanya 3:17; Romen 8:28.

Konman Nou Kapab Montre Nou Lanmour?

14. Dan ki fason nou kapab montre ki nou lanmour pour Bondye i senser?

¹⁴ Byensir, en kantite dimoun partou dan lemonn i dir ki zot kontan Bondye, me lafason ki zot azir i demanti sa. Ki mannyer nou kapab konnen si vreman nou kontan Zeova? Nou kapab koz avek li dan lapriyer e dir li konman nou santi. Nou kapab azir dan en fason ki demontre nou lanmour. Lapot Zan ti dir: “Sa ki gard son parol [parol Bondye], lanmour pour Bondye i vreman parfe dan li. Koumsa, nou kapab asire ki nou ini avek li.” (1 Zan 2:5; 5:3) Anplis ki sa, Parol Bondye i demann nou pour asosye ansanm e pour viv en lavi ki prop moralman. Nou evit lipokrizi, nou koz laverite e gard nou panse prop. (2 Korentyen 7:1; Efezyen 4:15; 1 Timote 1:5; Ebre 10:23-25) Nou montre lanmour par fourni led materyel bann ki dan bezwen. (1 Zan 3:17, 18) E nou pa ezite pour koz lo Zeova avek lezot. Sa i enkli partisip dan proklanmasyon sa bon nouvel Rwayonm ki pe ganny fer partou dan lemonn. (Matye 24:14; Romen 10:10) Lobeisans Parol Bondye dan bann keksoz koumsa, i laprev ki nou lanmour pour Zeova i senser.

15, 16. Konman ki lanmour pour Zeova in enfliyans lavi bokou dimoun lannen pase?

¹⁵ Lanmour pour Zeova i ed dimoun pour fer bann bon desizyon. Lannen pase, en tel lanmour ti pous 288,907 endividi pour dedye zot lavi avek li e senboliz sa desizyon par batenm delo. (Matye 28:19, 20) Zot dedikasyon ti ranpli avek sans. I ti mark en sanzman dan zot lavi. Par egzanp, Gazmend ti enn parmi bann meyer vedet basketbol an Albani. Pour en pe lannen, li ek son madanm ti pe etidye Labib e malgre serten lobstak avek letan zot in kalifye konman  proklanmater Rwayonm. Lannen pase Gazmend ti enn parmi sa 366 ki ti batize an Albani pandan lannen servis 2000. En zournal ti pibliy en lartik lo li e ti dir: “Son lavi i annan en bi, e se pour sa ki li ek son fanmiy pe rezwir bann letan pli ere dan zot lavi. Pour li, i nepli enportan pour vwar konman i kapab profit lavi me plito konbyen i kapab donnen pour ed lezot dimoun.”

¹⁶ Pareyman, en nouvo ser batize ki ti pe travay avek en lakonpannyen petrol an Gwam ti resevwar en lof tre atiran. Apre ki i ti’n mont lesel profesyonnel pour plizyer lannen, i ti finalman ganny ofer loportinite pour vin premye madanm pour vin vis prezidan dan listwar sa lakonpannyen. Toutfwa, sa letan i ti’n dedye son lavi avek Zeova. Alor, apre ki i ti’n diskit sa size avek son mari, sa nouvo ser ti refiz sa lof e i ti plito aranze pour travay amitan afen ki i kapab progrese pour vin en minis aplentan, setadir en pionye. Lanmour pour Zeova ti pous li pour anvi servi konman en pionye olye pourswiv bann lentere finansyel sa monn. Anfet, en tel lanmour ti motiv 805,205 endividi dan lemonn antye pour partisip dan diferan laspe minister pionye pandan lannen servis 2000. En lekspresyon lanmour ek lafwa ekstraordiner delapar nou bann pionye!

Motive pour Kontan Zezi

17. Ki bon legzanp lanmour nou trouve dan Zezi?

¹⁷ Zezi i legzanp merveye en dimoun ki’n ganny motive par lanmour. Avan ki i ti vin lo later, i ti kontan son Papa e i ti kontan bann imen. Reprezante par lasazes dan laform imen, i ti dir: “Mon ti akote [Zeova] konman en zouvriye abil, e mon ti vin sa enn aki i ti partikilyerman atase avek zour apre zour, mon ti rezwir toultan devan li, mon ti rezwir osize teren prodiktif son later, e bann keksoz ki mon ti atase avek ti bann garson zonm.” (Proverb 8:30, 31) Lanmour Zezi ti pous li pour abandonn son demer seles e ne konman en pti baba san defans. I ti tret bann dimoun ki dou e senp avek pasyans ek bonte. Finalman, i ti mor pour limanite lo en poto siplis. (Zan 3:35; 14:30, 31; 15:12, 13; Filipyen 2:5-11) Pa sa i en legzanp ekselan pour bon motivasyon!

18. (a) Ki mannyer nou kiltiv lanmour pour Zezi? (b) Dan ki fason nou demontre nou lanmour pour Zezi?

¹⁸ Kan sa bann ki annan en bon kondisyon  leker i lir resi lo lavi Zezi dan bann Levanzil e medit lo kantite benediksyon ki son fidelite in anmennen pour zot, sa i fer grandi en lanmour profon dan zot pour li. Nou ozordi nou parey bann ki Pyer ti adrese ler i ti dir: “Zot kontan [Zezi], menm si zot pa’n zanmen war li.” (1 Pyer 1:8) Nou demontre nou lanmour kan nou egzers lafwa dan li e imit son lespri sakrifis. (1 Korentyen 11:1; 1 Tesalonisyen 1:6; 1 Pyer 2:21-25) Le 19 Avril, 2000, en total 14,872,086 endividi ti revwar bann rezon pour kontan Zezi kan zot ti asiste Memoryal son lanmor ki ganny fer tou le-z-an. Vreman sa ti en gran nonm! E konman i fortifyan pour konnen ki sitan en kantite dimoun i enterese dan delivrans atraver sakrifis Zezi! Vreman, nou ganny batir par lanmour ki Zeova ek Zezi i annan pour nou, ensi ki par nou lanmour ki nou annan pour zot.

19. Ki bann kestyon konsernan lanmour pou ganny diskite dan lartik swivan?

¹⁹ Zezi ti dir ki nou devret kontan Zeova avek tou nou leker, nou nanm, nou lespri ek lafors. Me i ti osi dir ki nou devret kontan nou prosen parey nou menm. (Mark 12:29-31) Sa i enkli lekel? Konman ki lanmour pour nou prosen i ed nou mentenir en bon lekilib ek en bon motiv? Sa bann kestyon pou ganny diskite dan lartik swivan.

Eski Ou Mazinen?

• Akoz lanmour i en kalite esansyel?

• Ki mannyer nou kapab aprann kontan Zeova?

• Konman ki nou kondwit i prouve ki nou kontan Zeova?

• Ki mannyer nou demontre nou lanmour pour Zezi?

[Kestyon]

[Portre lo paz 20]

Lanmour i ed nou pour esper soulazman avek pasyans

[Portre lo paz 22]

Sa gran sakrifis ki Zezi in ofer i pous nou pour kontan li