Gerizon Bann Blesir Lager

ABRAAM ti form parti en group larme gerila pour 20 an. * Me aprezan i nepli en konbatan e i pa pou zanmen al dan lager ankor. Annefe, serten son bann ansyen lennmi i aprezan son bann pli bon zanmi. Kwa ki’n fer li sanze? Labib ki’n fer sa. I’n donn Abraam lespwar ek disernman par ed li pour vwar sitiasyon imen parey Bondye i vwar. Labib in retir son dezir pour lager, e i’n konmans geri son lapenn, latristes, laenn, ek lakoler anmer. I’n dekouver ki Labib i kontyen en medikaman pwisan pour leker.

Konman ki Labib i ed en dimoun geri son bann blesir emosyonnel? I pa’n kapab sanz sa ki’n arive avek Abraam. Toudmenm, lir e medit lo Parol Bondye in fer son fason panse vin an armoni avek fason panse son Kreater. Aprezan i annan en lespwar pour lavenir, e i annan bann nouvo priyorite. Bann keksoz ki enportan pour Bondye in vin enportan pour li. Apartir sa moman, son leker desire in konmans geri. Se dan sa fason ki Abraam in ganny led pour sanze.

Anfonse Dan Lager Sivil

Abraam ti ne Lafrik dan bann lannen 1930. Apre dezyenm lager mondyal, son pei ti ganny dominen par en pei vwazen tre pwisan, me bokou konpatriyot Abraam ti anvi lendepandans. An 1961, Abraam ti zwenn en mouvman liberte ki ti angaz dan en lager gerila kont sa pei vwazen tre pwisan.

“Zot ti nou bann lennmi. Zot lobzektif ti pour touy nou, alor nou ti deside al touy zot,” Abraam i eksplike.

Lavi Abraam ti souvan an danze, alor an 1982, apre 20 an lalit arme, i ti sove e al Lerop. A sa moman i ti pros pour ganny 50 an, e i ti annan ase letan pour fer refleksyon lo son lavi. Ki ti’n arive avek son bann rev? Ki lavenir i rezerve pour li? Abraam ti rankontre serten Temwen Zeova e i ti konmans asiste zot bann renyon. I rapel ki ler i ti ankor Lafrik, i ti’n lir en papye ki i ti gannyen avek en Temwen. Lo sa papye ti dekrir en paradi ki pou ganny etablir lo later ek en gouvernman dan lesyel ki pou domin limanite. Eski sa ti pou vreman posib?

Abraam i dir: “Atraver Labib mon’n aprann ki tou sa bann lannen ki mon’n pase dan lager ti napa okenn valer. Sel  gouvernman ki pou tret tou dimoun dan en fason zis se Rwayonm Bondye.”

En pe letan apre ki Abraam ti batize konman en Temwen Zeova, en zonm nonmen Rober ti sove Lafrik e al dan sa lavil kot Abraam ti pe reste. Rober ek Abraam ti konbat dan menm lager me lo diferan kote. Rober in souvan kestyonn son lekor konsernan vre bi lavi. I ti en zonm relizye, e vi ki i ti’n deza lir plizyer porsyon dan Labib, i ti konnen ki non Bondye se Zeova. Kan bann Temwen sorti dan kongregasyon ki Abraam i ladan ti ofer Rober led pour pli byen konpran Labib, i ti pare pour aksepte.

Rober i eksplike: “Depi okonmansman menm, mon ti enpresyonnen par fason ki bann Temwen i servi non Zeova ek non Zezi, ki fer kler ki zot de dimoun separe. Sa i an armoni avek sa ki mon ti’n deza konnen dan Labib. Deplis bann Temwen i abiy byen e zot zantiy avek lezot dimoun nenport ki nasyonalite. Sa bann keksoz koumsa in enpresyonn mwan bokou.”

Lennmi i Vin Zanmi

Rober ek Abraam, de ansyen lennmi, i aprezan de bon zanmi. Zot tou lede zot pe anons sa bon nouvel aplentan dan menm kongregasyon. Abraam i eksplike, “pandan lager, mon’n souvan kestyonn mon lekor lo konman ki i posib pour dimoun ki sorti dan pei ki vwazen avek kanmarad—dan ki laplipar i dan menm larelizyon—pour ay kanmarad.” “Rober ek mwan nou ti sorti dan menm larelizyon, pourtan nou’n lager kont kanmarad. Ozordi nou tou lede nou Temwen Zeova, e nou lafwa in fer nou ini.”

“Se sa diferans,” Rober i azoute. “Nou aprezan apartenir avek en lafwa ki fer nou form parti en vre fraternite. Nou pa pou zanmen al lager ankor.” Labib in annan en lenfliyans pwisan lo leker sa de dimoun ki ti oparavan lennmi. Santiman laenn ek lakoler anmer ti gradyelman ganny ranplase par konfyans ek lanmitye.

Anmenmtan ki Abraam ek Rober ti pe lager, de lezot zennonm ti’n pran pozisyon lo diferan kote dan en lot konfli ant de pei vwazen. San tarde, Labib ti azir parey en medikaman pwisan pour geri zot leker zot osi. Konman?

Touye—Apre Mor Konman en Ero

Gabriyel, ki ti’n ganny elve dan en fanmiy relizye, ti’n ganny ansennyen ki son pei natal ti enplike dan en lager sen. Alor, alaz 19 an, i ti volonterman ofer son lekor pour servis militer e demande pour ganny anvoye lo fron batay. Pour 13 mwan i ti dan bann batay feros, e en serten moman i ti zis en kilomet edmi avek son lennmi. I rakonte: “Mon rapel en serten moman, nou komandan ti dir nou ki lennmi pou atake sa lannwit. Telman nou ti nerve, nou ti tir mortar tou dilon lannwit.” I ti konsider dimoun dan bann pei vwazen konman son bann lennmi, ki merit lanmor. “Sa ki ti dan mon lespri, se pour touy otan dimoun posib. E apre, parey bokou mon bann zanmi, mon ti anvi mor konman en ero.”

 Sepandan, avek letan Gabriyel ti dezapwente. I ti sov dan bann montanny e apre an kasyet, i ti travers frontyer en pei ki pa ti pe siport okenn kote e diriz ver Lerop. Tanzantan i ti demann Bondye akoz lavi ti sitan difisil, e si bann problenm ti en pinisyon sorti kont Bondye. I ti rankontre bann Temwen Zeova, ki ti montre li atraver Labib akoz denozour lavi i sitan ranpli avek problenm.—Matye 24:3-14; 2 Timote 3:1-5.

Pli Gabriyel ti ogmant son konnesans lo Labib, pli i ti realize ki i kontyen laverite. “Mon’n aprann ki nou kapab viv pour touzour dan en paradi lo later. I enkrwayab akoz se sanmenm sa ki mon ti anvi ler mon ti ankor zanfan.” Labib ti rekonfort Gabriyel e apez son leker trouble. Son bann blesir emosyonnel tre profon ti konmans geri. Alor ler i ti rankontre Danyel, en ansyen lennmi, Gabriyel ti nepli santi okenn laenn. Me kwa ki’n fer Danyel ariv Lerop?

“Si Ou Vreman Egziste, Silvouple Ed Mwan!”

Danyel ti ganny elve konman en Katolik e alaz 18 an i ti ganny apele pour fer servis militer. I ti ganny anvoye pour lager dan menm konba ki Gabriyel ti ladan me lo kote opoze. Danyel ti dan en transpor militer ler zot ti ganny tape avek en misil obor fron batay. Son bann zanmi ti mor, e li i ti ganny blese severman e ganny pran konman prizonnyen. I ti pas plizyer mwan lopital e dan en kan avan ki i ti ganny deporte dan en pei ki pa ti pe pran par dan sa lager. Tousel e san okenn resours, i ti mazin pour swiside. Danyel ti priy Bondye: “Si ou vreman egziste, silvouple ed mwan!” Son lannmen, bann Temwen Zeova ti vizit li e zot ti kapab reponn bokou son bann kestyon. Finalman, i ti al Lerop konman en refizye. Ankor enn fwa, Danyel ti asosye avek bann Temwen e etidye Labib. Sa ki i ti aprann ti soulaz son lenkyetid ek dezapwentman.

Ozordi Gabriyel ek Danyel i de bon zanmi, ini dan en fraternite spirityel konman bann Temwen batize. “Mon lanmour pour Zeova ek konnesans Labib in ed mwan pour vwar bann keksoz parey li i vwar. Danyel i nepli mon lennmi. Dan detrwa lannen avan, mon ti pou’n volonterman pare pour touy li. Labib in ansenny mwan egzakteman lekontrer—pare pour mor pour li,” Gabriyel i dir.

“Mon’n vwar dimoun diferan relizyon ek nasyonalite pe touy kanmarad,” Danyel i dir. “E i ti annan dimoun dan menm larelizyon me lo diferan kote lager pe touy kanmarad. Ler mon ti vwar sa, mon ti santi ki Bondye ti sa enn pour blanmen. Aprezan mon konnen ki se Satan ki par deryer tou sa bann lager. Gabriyel ek mwan, nou ozordi bann konpanyon Kretyen. Nou pa pou zanmen pran par dan lager ankor!”

 “Parol Bondye I Vivan e I Annan Pisans”

Akoz ki Abraam, Rober, Gabriyel, ek Danyel in sanze dan en fason sitan remarkab? Konman zot in kapab efas bann laenn ek latristes ki ti’n anrasinen dan zot leker?

Sa bann zonm in lir, reflesir, e aprann laverite ki trouve dan Labib, ki “vivan e i annan pisans.” (Ebre 4:12) Loter Labib se Kreater limanite, ki konnen konman pour enfliyans pour lebyen leker en dimoun ki pare pour ekoute e aprann. “Tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye.” Enn fwa ki en lekter i les li ganny gide par Labib, i etablir pour li menm bann nouvo prensip ek valer. I konmans aprann konman Zeova i vwar keksoz. Sa transformasyon i anmenn bokou benefis, ki enkli en gerizon pour bann blesir lager.—2 Timote 3:16.

Parol Bondye i eksplike ki napa okenn group nasyonal, oubyen etnik ki pli meyer oubyen pli enferyer ki en lot. “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” Sa lekter ki aksepte sa, i ganny led pour gradyelman sirmont laenn rasyal ou nasyonal.—Akt 10:34, 35.

Bann profesi Labib i endike ki Bondye pou byento ranplas sa sistenm dominasyon imen par Rwayonm Kris. Par mwayen sa gouvernman, Bondye pou “fer arete bann lager ziska ekstremite later.” Bann lenstitisyon ki promot bann lager e ankouraz dimoun pour pran par dan lager pou ganny retire. Bann viktim lager pou ganny resisite e ganny en sans pour viv dan paradi lo later. Personn pa pou bezwen sov prezans en lot ki pe atak oubyen domin li.—Psonm 46:9; Danyel 2:44; Akt 24:15.

Pour tou bann imen ki pou viv dan sa letan, Labib i dir: “Zot pou konstri bann lakaz e zot pou reste ladan; wi, zot pou plant bann pye rezen e zot pou manz son fri. Zot pa pou konstri pour en lot reste. . . . Zot pa pou rente pour nanryen, e zot pa pou ganny zanfan pour donn problenm.” I pou napa okenn domaz oubyen blesir ki pa pou ganny geri. Kan nou met lafwa dan en tel lespwar, sa i gradyelman retir latristes ek sagrinasyon dan leker en dimoun.—Izai 65:21-23.

Labib i vreman en medikaman pwisan pour leker. Son bann lansennyman pe deza geri bann blesir lager. Bann ansyen lennmi pe ini dan en fraternite enternasyonal. Sa gerizon pou kontinyen dan nouvo monn Bondye ziska ki i nepli annan okenn laenn ek lakoler anmer, regre ek latristes, dan leker imen. Kreater i promet ki “nou pa pou rapel sa bann keksoz ansyen, zot pa ni pou vin dan leker.”—Izai 65:17.

[Not anba lo paz]

[Portre lo paz 3]

Kan refizye: UN PHOTO 186811/J. Isaac

[Ekstre lo paz 3]

“Atraver Labib, mon’n aprann ki tou sa bann lannen ki mon’n pase dan lager ti napa okenn valer”

[Ekstre lo paz 4]

Labib i kapab annan en lenfliyans pwisan lo leker bann ansyen lennmi

[Ekstre lo paz 5]

Laenn ek lakoler anmer ti gradyelman ganny ranplase par konfyans ek lanmitye

[Ekstre lo paz 5]

Enn fwa ki en lekter i les li ganny gide par Labib, i etablir pour li menm bann nouvo prensip ek valer

[Portre lo paz 6]

Bann ansyen lennmi pe aprezan ganny inifye dan en fraternite enternasyonal