Ziska Ki Zistans Ou Lanmour I Ale?

“Kontan ou prosen parey ou kontan ou prop lekor.”—MATYE 22:39.

1. Si nou kontan Zeova, akoz nou bezwen osi kontan nou prosen?

KAN Zezi ti ganny demande lekel pli gran komannman, i ti reponn: ‘Kontan Zeova ou Bondye avek tou ou leker, avek tou ou lam, e avek tou ou lespri.’ Apre sa i ti sit en dezyenm komannman en pe parey avek sa enn premye: “Kontan ou prosen parey ou kontan ou prop lekor.” (Matye 22:37, 39) Wi, lanmour pour nou prosen i en mark idantifikasyon pour en Kretyen. Anfet, si nou kontan Zeova nou devret kontan nou prosen. Akoz? Parski nou montre nou lanmour pour Bondye an obeisan son Parol, e son Parol i demann nou pour kontan nou prosen. Alors, si nou pa kontan nou bann frer ek ser, nou lanmour pour Bondye pa kapab senser.—Romen 13:8; 1 Zan 2:5; 4:20, 21.

2. Ki kalite lanmour nou devret annan pour nou prosen?

² Kan Zezi ti dir ki nou devret kontan nou prosen, i pa ti pe senpleman koz lo lanmitye. I ti pe pans en lanmour ki diferan avek sa ki natirelman egziste antre manm en fanmiy oubyen antre en zonm ek en fanm. I ti pe koz lo sa kalite lanmour ki Zeova i annan pour son bann serviter ki’n dedye zot lavi pour li e sa lanmour ki zot osi zot annan pour li. (Zan 17:26; 1 Zan 4:11, 19) En profeser lalwa Zwif, ki Zezi ti rekonnet ti pe koz avek lentelizans, ti dakor avek Zezi ki lanmour pour Bondye i devret “avek tou son leker, tou son lentelizans e tou son lafors.” (Mark 12:28-34) I ti’n byen dir. Lanmour ki en Kretyen i kiltive pour Bondye ensi ki pour son prosen i enplik nou bann  santiman ek nou lespri. Nou santi li dan nou leker e i ganny gide par nou lespri.

3. (a) Konman ki Zezi ti ansenny “en profeser lalwa” ki i merit annan en pwenn-vi pli elarzi lo ki sennla son prosen? (b) Ki mannyer ilistrasyon Zezi i aplik pour bann Kretyen ozordi?

³ Parey i ganny raporte dan Lik, kan Zezi ti dir ki nou devret kontan nou prosen, “en profeser lalwa” ti demande: “Lekel mon prosen?” Zezi ti reponn an servan en parabol. En zonm ti ganny bate, vole, e ganny lese demi mor dan kwen semen. Premye pour pase ti en pret e apre en Levit. Zot tou le de zot ti inyor li. Finalman, en Samariten ti pe pase, i ti vwar sa zonm blese, e azir avek gran bonte anver li. Lekel ant sa trwa ki ti azir konman en prosen pour sa zonm blese? Larepons ti kler. (Lik 10:25-37) Petet sa profeser lalwa ti soke pour antann Zezi dir ki en Samariten i kapab azir konman en pli bon prosen ki en pret ek en Levit. Evidaman, Zezi ti pe ed sa zonm pour elarzi son lanmour pour son prosen. Bann Kretyen osi i kontan dan sa fason. Annou egzamin tou sa ki zot lanmour i kouver.

Lanmour Antre Manm Fanmiy

4. Kote ki en Kretyen i premyerman egzers lanmour?

⁴ Bann Kretyen i kontan manm zot fanmiy—bann madanm i kontan zot mari, bann mari i kontan zot madanm, bann paran i kontan zot zanfan. (Eklezyast 9:9; Efezyen 5:33; Tit 2:4) I vre ki bann lyen lafeksyon natirel i egziste dan laplipar fanmiy. Toutfwa, bann rapor konsernan maryaz kase, labi antre konzwen, e bann zanfan ki ganny neglize oubyen abize i montre ki ozordi lafanmiy i anba presyon, e ki bann santiman natirel antre manm fanmiy i kapab pa sifi pour fer li ini. (2 Timote 3:1-3) Pour vreman reisi dan lavi fanmiy, bann Kretyen i bezwen egzers sa kalite lanmour ki Zeova ek Zezi i annan.—Efezyen 5:21-27.

5. Bann paran i depan lo ki sennla pour ed zot elve zot zanfan, e ki rezilta bokou in gannyen?

⁵ Bann paran Kretyen i konsider zot zanfan konman en keksoz presye ki Zeova in konfye zot, e zot depan lo li pour ed zot elve zot zanfan. (Psonm 127:3-5; Proverb 22:6) Dan sa fason zot kiltiv lanmour Kretyen ki ed zot protez zot zanfan kont bann lenfliyans imoral ki bann zenn i kapab vin viktim. An rezilta, bokou paran Kretyen in eksperyans en lazwa parey sa manman an Peiba. Apre ki i ti’n get son garson—enn parmi sa 575 endividi ki ti batize an Peiba lannen pase—i ti ekrir sa: “Sa moman, mon ti vwar rezilta sa ki mon ti envestir pour sa 20 an. Tou mon letan ek lenerzi—ensi ki mon soufrans, zefor ek lapenn—in aprezan ganny oubliye.” Konman i ti zwaye ki son garson in volonterman swazir pour servi Zeova. Dan sa maksimonm 31,089 proklanmater ki ti ganny raporte an Peiba lannen pase, i annan plizyer ki’n aprann avek zot paran pour kontan Zeova.

6. Konman ki lanmour Kretyen i kapab ede pour fortifye en linyon maryaz?

⁶ Pol ti apel lanmour “en lyen linyon parfe,” e i kapab prezerv en linyon maryaz menm dan bann movetan. (Kolosyen 3:14 NW, 18, 19; 1 Pyer 3:1-7) Kan en zonm an Ririti, en pti zil ki 700 km avek Taiti, ti konmans etidye Labib avek bann Temwen Zeova, son madanm ti opoz li severman. Finalman i ti kit li, pran bann zanfan, e al reste Taiti. Kantmenm sa, i ti montre son lanmour an anvoyan larzan regilyerman e telefonn zot pour demande si i annan okenn keksoz ki li ouswa bann zanfan ti bezwen. Dan sa fason i ti fer son mye pour akonpli son bann lobligasyon Kretyen. (1 Timote 5:8) I ti priye konstaman pour ki son fanmiy i reini ankor, e finalman son madanm ti retournen. Kan i ti retournen, son mari ti tret li avek ‘lanmour, perseverans ek labonte.’ (1 Timote 6:11) An 1998, i ti batize e plitar i ti ranpli avek lazwa kan son madanm ti aksepte pour etidye Labib. Sa letid ti enn parmi sa 1,351 ki’n ganny kondwir lannen pase dan teritwar ki tonm anba brans Taiti.

7. Dapre en zonm an Lalmanny, kwa ki’n ranforsi son maryaz?

⁷ An Lalmanny, en zonm ti opoz lentere ki son madanm ti montre dan laverite Biblik e i ti konvenki ki bann Temwen Zeova ti anvi anbet  li. Plitar, toutfwa, i ti ekrir sa Temwen ki ti premye ganny kontak avek son madanm: “Mersi pour entrodwir mon madanm avek bann Temwen Zeova. Premye kou, mon ti trakase akoz mon ti’n antann sitan kantite keksoz negatif lo zot. Me aprezan ki mon’n asiste bann renyon avek mon madanm, mon realize ki mon ti vreman mal. Mon konnen ki mon pe antann laverite, e sa in fer nou maryaz vin pli solid.” Sa 162,932 Temwen Zeova an Lalmanny e sa 1,773 lo bann zil ki tonm anba brans Taiti, i enkli bokou fanmiy ki’n ganny ini par lanmour Kretyen.

Lanmour pour Nou Bann Frer Kretyen

8, 9. (a) Lekel ki ansenny nou pour kontan nou frer, e ki lanmour i pous nou pour fer? (b) Donn en legzanp konman lanmour i ed bann frer pour soutenir kanmarad.

⁸ Pol ti dir avek bann Kretyen Tesalonisyen: “Zot in deza ganny ansennyen par Bondye pour kontan kanmarad.” (1 Tesalonisyen 4:9) Wi, bann ki “ganny ansennyen par Zeova” i kontan kanmarad. (Izai 54:13) Zot lanmour i ganny eksprimen par aksyon, parey Pol ti montre ler i ti dir: “Les zot ganny gide par lanmour pour servi kanmarad.” (Galat 5:13; 1 Zan 3:18) Se sa ki zot fer kan, par egzanp, zot vizit bann frer ek ser malad, ankouraz bann ki dekouraze, e soutenir bann ki pli feb. (1 Tesalonisyen 5:14) Nou lanmour veritab ki nou Kretyen nou annan i kontribye ver lagrandisman nou paradi spirityel.

⁹ Dan Kongregasyon Ankón—enn parmi sa 544 kongregasyon an Ekwater—bann frer ti demontre zot lanmour dan en fason pratik. Akoz en kriz finansyel, zot ti vwar zot san en travay ou en saler, alor bann proklanmater ti deside anmas larzan par vann manze avek bann peser lokal ki ti pe antre se zot apre ki zot ti’n pas en lannwit lapes. Tou dimoun ti kontribye, enkli bann zanfan. Zot ti bezwen konmans 1 er bomaten afen ki manze i a’n pare ver 4 er bomaten kan sa bann peser pe antre. Larzan ki ti anmase ti ganny partaze antre zot dapre zot bezwen. En lesanz led parey sa enn ti demontre lanmour veritab bann Kretyen.

10, 11. Konman nou kapab montre lanmour pour nou bann frer ki nou pa konn zot personnelman?

¹⁰ Toutfwa, nou lanmour pa limite selman  pour bann Kretyen ki nou personnelman konnen. Lapot Pyer ti dir: “Annan lanmour pour tou lasosyasyon bann frer.” (1 Pyer 2:17, NW ) Nou kontan tou nou bann frer ek ser parski zot tou zot ador Zeova ansanm avek nou. Bann letan difisil i kapab servi konman en loportinite pour nou demontre sa lanmour. Par egzanp, pandan lannen servis 2000, linondasyon sever ti ravaz Mozanbik, e en lager sivil ki pe kontinyen an Angola ti koz lapovrete pour plizyer. En gran nonm parmi sa 31,725 frer an Mozanbik ek 41,222 an Angola ti ganny afekte par sa bann levennman. Alor, bann Temwen an Sid-Afrik ti anvoy en kantite provizyon dan sa bann landrwa pour soulaz ladetres zot bann frer. Zot lantouzyasm pour partaz zot “labondans” avek zot bann frer ki ti dan bezwen in demontre lanmour ki zot annan.—2 Korentyen 8:8, 13-15, 24.

¹¹ Lanmour i osi ganny demontre kan bann frer dan plizyer pei i kontribye pour batir bann Lasal Rwayonm ek Lasal Lasanble dan bann pei mwen prospere. Nou vwar en legzanp dan bann zil Salomon. Malgre bokou troub, bann zil Salomon ti eksperyans en ogmantasyon 6 poursan lannen pase, avek en maksimonm 1,697. Zot ti plàn pour konstri en Lasal Lasanble. Menm si bokou zabitan ti pe kit sa pei akoz bann troub, bann volonter sorti Lostrali ti vin ede avek konstriksyon lasal. Avek letan, bann volonter ti bezwen retournen me avan ki zot ti ale zot ti form bann frer lokal pour ki zot konplet fondasyon. Striktir an feray sa lasal, ki ti’n pare pour asanble, ti ganny ekspedye sorti Lostrali e finisyon sa zoli batiman pour ladorasyon—dan en peryod letan kot bokou sit batiman in ganny abandonnen—pou rann en bon temwannyaz pour non Zeova e pour lanmour nou bann frer.

Parey Bondye, Nou Kontan Lemonn

12. Konman nou imit Zeova dan nou latitid ki nou annan anver bann ki pa partaz nou lafwa?

¹² Eski nou lanmour i limite selman pour nou fanmiy ek nou bann konpanyon Kretyen? I pa devret si nou sa bann ki ‘fer tou parey Bondye.’ Zezi ti dir: ‘Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.’ (Efezyen 5:1; Zan 3:16 ) Parey Zeova, nou azir avek lanmour anver tou dimoun—enkli bann ki pa partaz  nou lafwa. (Lik 6:35, 36; Galat 6:10) Sirtou an rapor avek sa, nou pres bon nouvel lo Rwayonm e dir lezot konsernan sa gran akt lanmour ki Bondye in fer dan zot faver. Sa i kapab anmenn delivrans pour bann ki ekoute.—Mark 13:10; 1 Timote 4:16.

13, 14. Donn serten leksperyans bann frer ki ti demontre lanmour anver bann ki pa Temwen menm si sa ti kout zot gran lenkonvenyans?

¹³ Annou vwar legzanp kat pionye an Nepal. Zot ti ganny dezinyen pour travay dan en lavil ki dan sid was sa pei, e pour sa senk dernyen lannen, zot in montre zot lanmour par temwanny avek pasyans dan sa lavil ek bann vilaz dan zalantour. Pour kouver zot teritwar, zot souvan vwayaz plizyer er-d-tan lo bisiklet dan en tanperatir plis ki 40 degre. Zot lanmour ek “perseverans dan sa ki byen” ti prodwir bann bon rezilta kan en group letid liv ti formen dan enn sa bann vilaz. (Romen 2:7) Mars 2000, 32 dimoun ti vin ekout diskour piblik ki ti ganny fer par sirveyan rezyonal. Nepal ti annan en maksimonm 430 proklanmater lannen pase—en ogmantasyon 9 poursan. I kler ki Zeova pe beni zel ek lanmour bann frer dan sa landrwa.

¹⁴ An Kolonbi bann pionye spesyal tanporer ti al pres bann Endyen Wayou. Pour arive fer sa, zot ti bezwen aprann en nouvo langaz me zot lentere, ranpli avek lanmour, ti ganny rekonpanse kan 27 dimoun ti asiste en diskour piblik malgre ti annan en gro lapli toransyel. Larder motive par lanmour ki sa bann pionye in demontre in kontribye ver sa ogmantasyon 5 poursan e en maksimonm 107,613 proklanmater an Kolonbi. An Dennmark, en ser aze ti anvi partaz sa bon nouvel avek lezot me i ti annan en dezabilite. I pa ti les sa dekouraz li, i ti pran kontakt avek bann dimoun enterese atraver let. Aktyelman, i pe koresponn avek 42 dimoun e pe kondwir 11 letid Labib. I enn parmi sa maksimonm 14,885 proklanmater ki’n ganny raporte an Dennmark lannen pase.

Kontan Ou Bann Lennmi

15, 16. (a) Ziska ki zistans Zezi ti dir nou lanmour i devret ale? (b) Ki mannyer bann frer responsab ti azir dan en bon fason avek en endividi ki ti fer bann fo lakizasyon lo bann Temwen Zeova?

¹⁵ Zezi ti dir avek sa profeser lalwa ki en Samariten i kapab ganny konsidere konman son prosen. Zezi ti al pli lwen ki sa kan i ti dir dan son Sermon lo Montanny: “Zot in tande ki i’n ganny dir: ‘Kontan zot zanmi e ay zot lennmi.’ Me mwan mon dir zot: kontan zot lennmi e priy pour bann ki persekit zot, koumsa, zot a vin garson zot Papa ki dan lesyel.” (Matye 5:43-45) Menm kan en endividi i opoz nou, nou esey “domin lemal par sa ki byen.” (Romen 12:19-21) Si i posib, nou partaz avek li nou posesyon pli presye, laverite.

¹⁶ An Likrenn, en lartik dan zournal Kremenchuk Herald ti dir ki bann Temwen Zeova i en sekt danzere. Sa ti en keksoz grav akoz an Lerop serten i koz lo bann Temwen Zeova dan sa fason afen ki zot a kapab persyad bann dimoun ki bann aktivite bann Temwen i devret ganny restrikte oubyen enterdi. Alor sa editer ti ganny aprose e i ti ganny demande pour pibliy en lot lartik pour koriz sa lartik avan. I ti aksepte, me avek sa lartik, i ti enprim en deklarasyon pour dir ki sa lartik orizinal ti baze lo bann fe. Alor bann frer responsab ti apros li ankor avek plis lenformasyon. Finalman, sa editer ti realize ki sa lartik orizinal ti mal fonde, e i ti pibliy en lot lartik kot i ti renye sa ki i ti pibliye avan. Koz avek li dan en fason fran e zantiy ti en bon mannyer pour tret sa sitiasyon, e sa ti anmenn en bon rezilta.

Konman Nou Kapab Kiltiv Lanmour?

17. Kwa ki endik nou ki i pa touzour fasil pour tret lezot avek lanmour?

¹⁷ Kan en pti baba i ne, deswit son paran i tonm anmoure avek li. Me tret bann adilt avek lanmour i pa touzour sitan natirel. Se pour sa probableman akoz Labib i kontinyelman demann nou pour kontan kanmarad—i en keksoz ki nou bezwen travay lo la. (1 Pyer 1:22; 4:8; 1 Zan 3:11) Zezi ti konnen ki nou lanmour  pou ganny teste kan i ti dir ki nou devret pardonn nou frer “ziska swasanndiset fwa.” ( Matye 18:21, 22, NW ) Pol osi ti konsey nou pour kontinyen “siport kanmarad.” (Kolosyen 3:12, 13) I pa etonnan ki nou ganny demande pour: “Rod lanmour”! (1 Korentyen 14:1) Konman nou kapab fer sa?

18. Kwa ki pou ed nou kiltiv lanmour pour lezot?

¹⁸ Premyerman, nou kapab touzour gard antet sa lanmour ki nou annan pour Zeova. Sa lanmour i en motivasyon vreman for pour kontan nou prosen. Akoz? Parski kan nou azir avek lanmour, sa i reflekte byen nou Papa ki dan lesyel e i anmenn laglwar ek louanz pour li. (Zan 15:8-10; Filipyen 1:9-11) Dezyenmman, nou kapab vwar keksoz lafason ki Zeova i vwar li. Sak fwa nou fer pese, nou fer li kont Zeova; pourtan, i pardonn nou ankor e ankor, e i kontinyen kontan nou. (Psonm 86:5; 103:2, 3; 1 Zan 1:9; 4:18) Si nou kiltiv menm pwenn-vi avek Zeova, nou pou dispoze pour kontan lezot e pardonn zot lofans kont nou. (Matye 6:12) Trwazyenmman, nou tret lezot parey nou anvi ki zot tret nou. (Matye 7:12) Etan enparfe nou souvan bezwen ganny pardonnen. Par egzanp, kan nou dir en keksoz ki bles lezot, nou swete ki zot pou mazinen ki tou dimoun i komet lerer dan sa ki i dir detanzaot. (Zak 3:2) Si nou anvi ki lezot i tret nou avek lanmour, nou osi nou devret tret zot avek menm lanmour.

19. Konman nou kapab resers led lespri sen pour kiltiv lanmour?

¹⁹ Katriyenmman, nou kapab resers led lespri sen parski lanmour i form parti sa fri ki lespri i prodwi. (Galat 5:22, 23) Lanmitye, lafeksyon familyal, ek lanmour romantik i souvan natirel. Me nou bezwen led lespri Zeova pour kiltiv sa lanmour ki Zeova i annan, sa lanmour ki en lyen linyon parfe. Nou kapab resers led lespri sen an lizan Labib enspire. Par egzanp, si nou etidye lavi Zezi, nou pou vwar konman i ti tret dimoun, e nou kapab aprann imit li. (Zan 13:34, 35; 15:12) Deplis, nou kapab demann Zeova son lespri sen, sirtou dan bann sitiasyon ki fer li difisil pour nou azir avek lanmour. (Lik 11:13) Finalman, nou kapab resers lanmour an restan pros avek kongregasyon Kretyen. Kan nou parmi nou bann frer ek ser ki annan lanmour, sa i ed nou pour kiltiv lanmour.—Proverb 13:20.

20, 21. Ki temwannyaz lanmour remarkab ki bann Temwen Zeova in donnen pandan lannen servis 2000?

²⁰ Lannen pase, ti annan en maksimonm 6,035,564 proklanmater sa bon nouvel partou dan lemonn. Bann Temwen Zeova ti depans en total 1,171,270,425 er-d-tan pour rod bann endividi e pour donn zot sa bon nouvel. Se lanmour ki ti fer zot siport lasaler, lapli ek lafreser kan zot ti pe fer sa travay. Se lanmour ki ti pous zot pour koz avek bann kanmarad lekol ek bann konpanyon travay, e pour apros bann dimoun ki zot pa konn ditou lo semen e dan lezot landrwa. Bokou ki ti resevwar vizit par bann Temwen ti endiferan, serten ti opoze. Sepandan, serten ti montre lentere, ki fer ki 433,454,049 retourn vizit ti ganny fer e 4,766,631 letid Labib ti ganny kondwir. *

²¹ Sa i en temwannyaz lanmour remarkab ki bann Temwen Zeova in montre pour Bondye e pour zot prosen! Sa lanmour pa pou zanmen refrwadir. Nou annan konfyans ki diran lannen servis 2001, limanite pou resevwar en pli gran temwannyaz ankor. Esperon ki benediksyon Zeova i kontinyen avek son bann adorater fidel e zele anmezir ki zot “fer tou keksoz avek lanmour”!—1 Korentyen 16: 14.

[Not anba lo paz]

Ou Kapab Eksplike?

• Ki sennla ki nou imite kan nou kontan nou prosen?

• Ki zistans nou lanmour i devret ale?

• Nonm serten fe ki demontre lanmour Kretyen?

• Konman nou kapab kiltiv lanmour Kretyen?

[Kestyon]

[Tablo lo paz 28-31]

RAPOR MONDYAL LANNEN SERVIS 2000 BANN TEMWEN ZEOVA

[Portre lo paz 25]

Lanmour Kretyen i kapab fer en fanmiy reste ini

[Portre lo paz 26]

Lanmour i pous nou pour partaz nou lesperans avek lezot