Eski Ou Pe Viv An Akor Avek Ou dedikasyon?

‘Dan tou sa ki zot fer, fer li avek tou zot leker, konmsi zot pe travay pour Zeova non pa pour en zonm.’—KOLOSYEN 3:23.

1. Dan konteks sportif, ki sa mo “dedikasyon” i oule dir?

KI MANNYER bann atlet i arive donn zot meyer performans? Dan tenis, foutbol, basketbol, besbol, atletik, golf, oubyen nenport ki lezot sport, sa enn ki sorti venker i arive fer li selman par en devouman total. Zot priyorite se zot kondisyon fizik ek mantal. Sa i al byen avek en definisyon sa mo “dedye,” ki vedir “antyerman devoue avek en serten krwayans oubyen kondwit.”

2. Ki savedir “dedikasyon” dan Labib? Sit en legzanp.

² Toutfwa, ki savedir “dedikasyon” dan en sans Biblik? “Dedye” in ganny tradwir apartir en verb Ebre ki donn sa sans “reste separe; separe; retire.” * Dan ansyen Izrael, Gran Pret Aron ti port en “siny sen dedikasyon” lo son tirban. Sa siny ti en plak klate fer avek lor pir e lo la ti grave “Sentete i pour Zeova” dan langaz Ebre. I ti servi konman en rapel pour gran pret ki i bezwen evit okenn keksoz ki ti a kapab montre en mank respe pour sa landrwa sen ‘akoz sa siny dedikasyon, delwil son Bondye, [ti] lo li.’—Egzod 29:6; 39:30; Levitik 21:12.

3. Konman ki dedikasyon i devret afekte nou kondwit?

³ Nou vwar ki dedikasyon dan sa konteks i en keksoz serye. I enplik volonterman idantifye nou konman en serviter Bondye, e i egziz en kondwit ki prop. Alors, nou kapab konpran akoz lapot Pyer ti sit sa ki Zeova ti dir: “Vin sen parey mwan mon sen.” (1 Pyer 1:15, 16) Konman bann Kretyen ki’n dedye nou lavi, nou annan en responsabilite serye pour viv an akor avek nou dedikasyon e pour reste fidel ziska lafen. Me ki i enplike dan dedikasyon Kretyen?—Levitik 19:2; Matye 24:13.

4. Ki mannyer nou ti ariv lo sa staz pour dedye nou lavi, e avek kwa i kapab ganny konpare?

⁴ Apre ki nou ti ganny konnesans egzakt lo Zeova ek son bann plan, lo Zezi Kri ek son rol dan sa bann plan, nou ti fer en desizyon personnel pour servi Bondye avek tou nou leker, lespri, nanm ek lafors. (Mark 8:34; 12:30; Zan 17:3) Sa i menm kapab ganny konsidere konman en ve personnel, en dedikasyon san rezerv pour Bondye. Nou pa’n fer nou dedikasyon par kapris. Nou’n byen reflesir e priy lo la, an servan nou kapasite pour rezonnen. Alor, i pa ti en desizyon tanporer. Nou pa kapab fer parey en dimoun ki konmans travay dan en bitasyon e apre abandonn dan semen akoz i tro difisil oubyen akoz i pa sanble ki i pou rekolte deswit, oubyen menm i pa sir si i pou rekolte. Annou vwar legzanp bann ki’n “konmans travay” dan bitasyon ki swa dan botan ou movetan.—Lik 9:62; Romen 12:1, 2.

Zot Pa Ti Renons Zot Dedikasyon

5. Konman ki Zeremi ti legzanp remarkab en serviter Bondye ki’n dedye son lavi?

⁵ Minister profetik Zeremi an Zerizalenm ti dir pour plis ki 40 an (647-607 A.N.L.), e sa pa ti en travay fasil. I ti byen konsyan son  bann limitasyon. (Zeremi 1:2-6) I ti bezwen kouraz ek perseverans toulezour pour fer fas avek bann dimoun antete an Zida. (Zeremi 18:18; 38:4-6) Toutfwa, Zeremi ti konfye dan Zeova Bondye, ki ti fortifye li afen ki i ti kapab demontre ki i en serviter Bondye ki’n vreman dedye son lavi.—Zeremi 1:18, 19.

6. Ki legzanp lapot Zan in kit pour nou?

⁶ Me ki nou kapab dir lo Zan, sa zapot fidel, ki ti ganny egzile lo en zil ostil dan son vye zour “akoz Parol Bondye ek temwanyaz Zezi.”? (Revelasyon 1:9) I ti andire e reste fidel avek son pozisyon konman en Kretyen ki’n dedye son lavi, pour apepre 60 an. I ti kontinyen viv menm apre destriksyon Zerizalenm par bann larme Romen. I ti privilezye pour ekrir en Levanzil, trwa let enspire, ek liv Revelasyon dan ki i ti vwar en apersi lager Armagedon. Eski i ti arete kan i ti aprann ki Armagedon pa ti pou vin dan son letan? Eski i ti tonm dan lendiferans? Non, Zan ti reste fidel ziska lanmor, e i ti konnen ki menm si “letan i pros,” lakonplisman son bann vizyon ti pou plitar.—Revelasyon 1:3; Danyel 12:4.

Legzanp Modern Bann Ki’n Dedye Zot Lavi

7. Konman ki en frer ti demontre en bon legzanp an rapor avek son dedikasyon Kretyen?

⁷ Dan letan modern, plizyer milyon Kretyen devoue in reste fidel avek zot dedikasyon menm ki zot pa’n viv pour vwar Armagedon. Enn sa bann endividi ti Ernest E. Beavor ki ti viv an Langleter. I ti vin en Temwen an 1939, okonmansman dezyenm Lager Mondyal e i ti abandonn en biznes fotografik pour lapres, ki ti pe prospere, afen ki i kapab pran servis aplentan. Akoz i ti refize pran par dan lager, i ti al dan prizon pour 2 an. Son fanmiy ti donn li tou sipor, e an 1950 son trwa zanfan ti asiste Lekol Gilead pour formasyon misyonner, New York. Frer Beavor ti sitan zele dan son aktivite predikasyon ki son bann zanmi ti apel li Erni Armagedon. I ti fidelman viv an akor son dedikasyon, e i ti proklanm lager Bondye, Armagedon, ziska son lanmor an 1986. I pa ti konsider son dedikasyon konman en kontra avek Bondye zis pour en serten letan! *—1 Korentyen 15:58.

8, 9. (a) Pandan sistenm Franco, ki legzanp ki plizyer zennonm an Lespanny in kite? (b) Ki kestyon ki apropriye pour demande?

⁸ An Lespanny, nou vwar ankor legzanp kot zel pa’n refrwadir. Pandan sistenm Franco (1939-75), en santenn zenn Temwen ki ti’n dedye zot lavi ti pran pozisyon konman bann Kretyen ki pa siport okenn parti politik e okenn lager. Bokou parmi zot ti pas 10  an ou menm plis lannen dan prizon. Santans Jesús Martin, en Temwen, ti menm akimile ziska 22 an! I ti ganny bate severman kan i ti an detansyon dan en prizon Nor Lafrik. Sa pa ti fasil ditou, me i ti refize pour konpromi.

⁹ Laplipar-di-tan, sa bann zennonm ti napa okenn lide kan, si zanmen en zour, zot ti pou ganny large dan prizon, parski zot ti pe sibir plizyer santans konsekitif. Pourtan, zot ti gard zot lentegrite e mentenir zot zel pour minister pandan ki zot ti an prizon. Kan zot sitiasyon ti finalman amelyore an 1973, plizyer parmi sa bann Temwen, ki ti dan zot 30 an sa letan, ti ganny libere dan prizon e zot ti al direkteman dan minister aplentan, serten ti vin pionye spesyal ek sirveyan rezyonal. Zot ti reste fidel avek zot dedikasyon dan prizon e laplipar ti kontinyen fer li apre ki zot ti ganny large. * Me nou ozordi, eski nou pe reste fidel avek nou dedikasyon parey sa bann serviter devoue?—Ebre 10:32-34; 13:3.

Pwenn-vi Apropriye lo Nou Dedikasyon

10. (a) Konman nou devret konsider nou dedikasyon? (b) Konman ki Zeova i vwar nou servis ki nou ofer li?

¹⁰ Ki mannyer nou konsider dedikasyon ki nou’n fer avek Bondye pour fer son lavolonte? Eski i premye keksoz dan nou lavi? Nenport ki sitiasyon ki nou ladan, ki swa nou zenn ou vye, marye ou selibater, an bonn sante ou malad, nou devret fer zefor pour viv an akor avek nou dedikasyon, depandan lo nou sirkonstans. Sitiasyon en endividi i kapab permet li servi aplentan konman en pionye, konman en volonter dan en biro brans Lasosyete, konman en misyonner, oubyen konman en sirveyan rezyonal. Serten paran, parkont, i kapab tre okipe avek bann bezwen fizik ensi ki bezwen spirityel zot fanmiy. Eski lakantite letan ki zot pase dan minister tou le mwan i annan mwens valer dan lizye Zeova ki sa kantite ki bann serviter aplentan i depanse? Non. Bondye pa zanmen ekspekte nou pour donn li sa ki nou napa. Lapot Pol ti sit sa prensip: “Si nou donn avek bonn volonte nou don i ganny aksepte par Bondye dapre sa ki nou annan, non pa dapre sa ki nou napa.”—2 Korentyen 8:12.

11. Nou delivrans i depan lo kwa?

¹¹ Antouka, nou delivrans pa depan lo okenn keksoz ki nou ti a kapab fer, me i depan lo faver imerite Zeova atraver Zezi Kri, nou Senyer. Pol ti klerman eksplike: “Parski tou dimoun in fer pese e pa’n arive ganny laglwar Bondye, zot in ganny zistifye par son lagras ki i’n donn gratwitman, par Kris Zezi ki’n delivre zot.” Sepandan, nou bann aksyon i laprev ki nou annan lafwa aktif dan promes Bondye.—Romen 3:23, 24; Zak 2:17, 18, 24.

12. Akoz nou pa devret fer bann konparezon?

 ¹² I pa neseser ki nou konpar letan ki nou depanse dan servis Bondye, kantite piblikasyon ki nou plase, oubyen kantite letid Labib ki nou kondwir avek lezot. (Galat 6:3, 4) Malgre tou sa ki nou akonpli dan minister Kretyen, nou tou nou bezwen mazin parol Zezi ki fer nou abes nou: “Zot osi, ler zot in fini fer sa ki zot ti’n ganny ordonnen pour fer, dir dan zotmenm, ‘Nou senpleman en bann serviter initil; nou’n zis fer nou devwar.’ ” (Lik 17:10) Laplipar-di-tan, eski nou vreman kapab dir ki nou’n fer tou ‘sa ki nou’n ganny ordonnen pour fer’? Alor kestyon ki nou demande i: Ki kalite servis ki nou devret ofer Zeova?—2 Korentyen 10:17, 18.

Fer Sak Zour Konte

13. Ki latitid nou bezwen annan anmenmtan ki nou pe akonpli nou dedikasyon?

¹³ Apre ki i ti’n donn konsey bann madanm, mari, zanfan, paran ek bann serviter, Pol i ekrir: “Dan tou sa ki zot fer, fer li avek tou zot leker, konmsi zot pe travay pour [ Zeova, NW ] non pa pour en zonm. Annefe, rapel zot ki zot pou resevwar avek [ Zeova, NW ] son leritaz konman zot rekonpans. Se nou Senyer Kris ki zot pe servi.” (Kolosyen 3:23, 24) Nou pa pe servi dan en bi pour enpresyonn zonm par sa ki nou akonpli dan servis Zeova. Nou pe sey servi Bondye an swivan legzanp Zezi Kri. I ti akonpli son minister, ki ti ase kourt, avek en santiman irzan.—1 Pyer 2:21.

14. Ki lavertisman Pyer ti donnen konsernan bann dernyen zour?

¹⁴ Lapot Pyer osi ti demontre ki i ti konsyan ki letan i kourt. Dan son dezyenm let, i ti averti ki dan bann dernyen zour, pou annan bann monker—bann aposta ek bann ki doute—ki, an swivan zot prop dezir, ti pou demann kestyon konsernan prezans Kris. Toutfwa,  Pyer ti dir: “Nou Senyer pa tarde pour akonpli son promes parey serten i mazinen, me i pran pasyans avek zot, i pa oule ki personn i ganny detri, me ki tou dimoun i arive repanti. E pourtan, Zour Senyer pou ariv konman en voler.” Wi, napa okenn dout ki zour Zeova pa pou vini. Alors, toulezour nou devret enkyet ki kantite solid e serten nou lafwa dan promes Bondye i ete.—2 Pyer 3:3, 4, 9, 10.

15. Konman nou devret get sak zour dan nou lavi?

¹⁵ Pour reste fidel avek nou dedikasyon dan en fason konsyansye, nou devret servi sak zour pour loue Zeova. Eski nou kapab vwar alafen sak zournen konman ki nou’n kontribye dan en fason ou en lot pour sangtifye non Bondye e proklanm sa bon nouvel lo son Rwayonm? Petet nou’n fer li par nou bon kondwit, nou konversasyon edifyan, oubyen nou konsern ranpli avek lanmour pour nou fanmiy ek zanmi. Eski nou’n servi bann loportinite ki nou’n gannyen pour partaz nou lesperans Kretyen avek lezot? Eski nou’n ed kelken pour mazin seryezman lo bann promes Bondye? Annou sak zour akimil keksoz ki annan valer dan en sans spirityel, konmsi nou pe batir en zoli kont spirityel labank.—Matye 6:20; 1 Pyer 2:12; 3:15; Zak 3:13.

Kit Ou Vizyon Kler

16. Ki bann mwayen ki Satan i kapab servi pour afebli nou dedikasyon avek Bondye?

¹⁶ Nou pe viv dan en letan ki pe vin deplizanpli difisil pour bann Kretyen. Satan ek son bann reprezantan pe sey konfonn sa ki byen ek sa ki mal, sa ki prop ek sa ki sal, sa ki moralman byen ek sa ki imoral. (Romen  1:24-28; 16:17-19) I’n fer li telman fasil pour nou polye nou leker ek nou lespri par mwayen en remot kontrol televizyon oubyen en kibord konpiter. Nou vizyon spirityel i kapab vin sonm, oubyen brouye, ki fer ki nou pa arive detekte bann riz Satan. Si nou fer konpromi avek nou bann valer spirityel, nou rezolisyon pour reste fidel avek nou dedikasyon i kapab afebli e nou kapab “get deryer.”—Lik 9:62; Filipyen 4:8.

17. Konman ki konsey Pol i kapab ed nou pour gard nou relasyon avek Bondye?

¹⁷ Parol Pol ki i ti adres avek kongregasyon an Tesalonik i alor byen apropriye: “Vwala sa ki Bondye i anvi, zot sangtifikasyon, ki zot abstenir fornikasyon; ki sakenn parmi zot i konnen konman pour gard kontrol lo son prop vaz dan sangtifikasyon ek loner, non pa dan bann dezir seksyel voras parey bann nasyon ki pa konn Bondye i annan zot osi.” (1 Tesalonisyen 4:3-5, NW ) Serten in ganny ekskli dan kongregasyon Kretyen akoz imoralite—zot in negliz zot dedikasyon avek Bondye. Zot in permet ki zot relasyon avek Bondye i afebli, ziska ki i nepli annan lenportans dan zot lavi. Pourtan, Pol ti dir: “Bondye pa’n apel nou pour viv dan limoralite me dan sentete. Pour sa rezon, sa ki rezet en tel lansennyman pa rezet en zonm me Bondye ki donn zot son Lespri Sen.”—1 Tesalonisyen 4:7, 8.

Ki Ou Determinen Pour Fer?

18. Ki nou devret determinen pour fer?

¹⁸ Si nou rekonnet ki nou dedikasyon avek Bondye i serye, ki nou devret determinen pour fer? Nou devret seryezman determinen pour annan en bon konsyans an rapor avek nou kondwit ensi ki nou minister. Pyer ti donn sa konsey: “Gard en bon konsyans pour ki, kan zot ganny akize zot, sa bann ki koz dimal lo zot bon kondwit ki enspire par Kris, a onte zotmenm.” (1 Pyer 3:16) Petet nou bezwen soufer e fer fas avek bann move tretman, me Kris osi ti pas atraver menm zafer akoz son lafwa ek son fidelite anver Bondye. “Alor,” Pyer ti dir, “parski Kris in soufer fizikman, zot osi zot devre arme avek sa menm konviksyon. Parski sa ki’n soufer fizikman in fini avek pese.”—1 Pyer 4:1.

19. Ki parol nou anvi tande lo nou?

¹⁹ Anfet, nou determinasyon ferm pour reste fidel avek nou dedikasyon pou protez nou kont bann latraksyon lemonn Satan ki malad spirityelman, moralman, e fizikman. Anplis ki sa, nou pou ganny konfyans ki nou annan laprouvasyon Bondye, ki bokou pli meyer ki okenn keksoz ki Satan ek son bann reprezantan i kapab ofer. Alor pa les personn dir nou ki nou’n perdi sa lanmour ki nou ti annan kan nou ti fek konn laverite. Plito, annou fer ki nou a ganny dir menm parol avek bann ki ti dan kongregasyon premye syek an Tyatir: “Mon konn tou sa ki ou fer, mon konn ou lanmour, ou lafwa, ou devouman dan servis, ek ou perseverans. Ou bann dernyen aktivite i pli gran ki bann okonmansman.” (Revelasyon 2:4, 18, 19) Wi, annou pa vin tyed an rapor avek nou dedikasyon, me annou les nou ganny “pouse par Lespri,” zele ziska lafen.—Romen 12:11; Revelasyon 3:15, 16.

[Not anba lo paz]

Eski Ou Mazinen?

• Kwa ki enplike dan dedikasyon?

• Ki bann legzanp serviter Bondye dan letan ansyen ek modern, ki merite ganny imite?

• Ki mannyer nou devret konsider servis ki nou ofer Bondye?

• Ki nou devret determinen pour fer an rapor avek nou dedikasyon avek Bondye?

[Kestyon]

[Portre lo paz 24]

Zeremi ti reste fidel malgre i ti ganny trete dan en fason kriyel

[Portre lo paz 25]

Etan en Kretyen zele, Ernest Beavor ti donn legzanp son bann zanfan

[Portre lo paz 26]

An Lespanny, plizyer santenn zenn Temwen ki ti dan prizon ti gard zot lentegrite

[Portre lo paz 27]

Annou sak zour akimil keksoz ki annan valer dan en sans spirityel