Eski Ou’n Pran Laverite Aker?

“Transform zot par en sanzman konplet dan zot lentelizans. Pour ki zot a kapab konpran lavolonte Bondye: Sa ki bon, sa ki fer li plezir, sa ki parfe.”—ROMEN 12:2.

1, 2. Akoz ki i pa fasil pour vin en vre Kretyen denozour?

VIN en vre Kretyen dan sa “letan difisil”—bann dernyen zour—i pa fasil. (2 Timote 3:1) An realite, pour arive swiv legzanp Zezi nou bezwen ganny laviktwar lo lemonn. (1 Zan 5:4) Mazin sa ki Zezi ti dir konsernan semen en Kretyen: “Antre par laport etrwat! akoz laport i larz, semen i fasil ki anmenn perdisyon, e i annan bokou ki pas par la. Me laport i etrwat, e semen i difisil ki anmenn dan lavi, napa bokou ki trouv li.” I ti osi dir: “Si en dimoun i oule swiv mwan, fodre ki i aret mazin zis limenm e pran son [poto siplis, NW ] sak zour e swiv mwan.”—Matye 7:13, 14; Lik 9:23.

² Kan i trouv sa semen difisil ki anmenn ver lavi, lot defi ki en Kretyen i fer fas avek se pour reste lo sa semen. Akoz ki sa i en defi? Se parski nou dedikasyon ek batenm i fer nou vin en target pour bann riz Satan. (Efezyen 6:11) Dan en zefor pour ranvers nou spirityalite, i obzerv nou bann febles e i sey pran lavantaz lo la. Apre tou, pa i ti sey fer tonbe Zezi, alor akoz ki i a les nou trankil?—Matye 4:1-11.

Bann Taktik Satan

3. Ki mannyer Satan ti senm dout dan lespri Ev?

³ En taktik ki Satan i servi se pour senm bann dout dan nou lespri. I rod bann febles dan nou larmir spirityel. Depi okonmansman, i ti servi sa taktik avek Ev, an demandan: “Eski i vre ki Bondye in dir ki zot pa devret manz [fri sorti] dan tou pye dibwa sa zarden?” (Zenez 3:1) Andotmo, Satan ti pe dir, ‘Eski i vreman posib ki Bondye i a enterdi zot pour fer sa? Eski i ti a refiz zot en keksoz sitan bon koumsa? Gete, Bondye i konnen ki sa zour menm ki zot manz fri sa pye dibwa, zot lizye pou ouver e zot pou vin parey Bondye, pour konn sa ki bon ek sa ki move!’ Satan ti senm dout dan lespri Ev e i ti espere pour li zermen.—Zenez 3:5.

4. Ki bann dout ki kapab afekte serten ozordi?

⁴ Ki mannyer Satan i servi sa taktik ozordi? Si nou negliz nou lektir Labib, nou letid personnel, nou lapriyer, nou minister ek renyon Kretyen, nou pou kapab ganny dout kan lezot i soulev bann kestyon. Par egzanp: “Ki mannyer nou konnen ki sa i laverite parey Zezi ti ansenny li?” “Eski nou vreman dan bann dernyen zour? Apre tou, pa nou deza dan 21 tyenm syek?” “Eski Armagedon i vreman pros, oubyen i ankor byen lwen?” Si bann dout koumsa i leve, ki nou kapab fer pour retir zot?

5, 6. Ki nou devret fer si nou ganny bann dout?

⁵ Zak ti donn en konsey pratik kan i ti ekrir: “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros. Me fodre i demann avek lafwa san doute, parski en dimoun ki doute i parey laroul lo lanmer ki divan i anmennen e pous dan tou direksyon. En tel dimoun fodre pa ki i mazinen ki i pou ganny okenn keksoz avek Senyer, parski i en dimoun endesi e enserten dan sa ki i fer.”—Zak 1:5-8.

 ⁶ Alors, ki nou devret fer? Dan lapriyer, nou devret kontinyen “demann Bondye” lafwa ek konprenezon e pour soutenir nou bann zefor ki nou fer dan letid personnel konsernan okenn kestyon oubyen dout. Nou kapab osi demann led avek bann ki annan lafwa solid, e pa zanmen doute ki Zeova pa pou donn nou sa soutyen ki nou bezwen. Zak ti osi dir: “Soumet zot avek Bondye, me reziste kont Dyab e i ava sov lwen avek zot. Apros avek Bondye, e i ava apros avek zot.” Wi, anmezir ki nou apros avek Bondye atraver letid ek lapriyer, nou bann dout pou disparet.—Zak 4:7, 8.

7, 8. Ki bann kriter ki determin sa form ladorasyon ki Zezi ti ansennyen e ki sennla ki satisfer sa bann kriter?

⁷ Pran, par egzanp, sa kestyon: Konman nou konnen ki nou pe pratik sa form ladorasyon ki Zezi ti ansennyen? Pour reponn sa, ki kriter nou bezwen pran an konsiderasyon? Labib i montre ki bann vre Kretyen i devret annan lanmour antre zot. (Zan 13:34, 35) Zot bezwen glorifye non Bondye, Zeova. (Izai 12:4, 5; Matye 6:9) E zot bezwen fer lezot konn sa non.—Egzod 3:15; Zan 17:26, NW.

⁸ En lot karakteristik ki idantifye vre ladorasyon se annan respe pour Parol Bondye, Labib. I sa sel liv ki revel personnalite Bondye ek son bann plan. (Zan 17:17; 2 Timote 3:16, 17) Anplis ki sa, bann vre Kretyen i anons Rwayonm Bondye konman sa sel lespwar pour lavi eternel dan en paradi lo later. (Mark 13:10; Revelasyon 21:1-4) Zot reste separe avek politik koronpi sa monn ek son fason viv ki degradan. (Zan 15:19; Zak 1:27; 4:4) Lekel ozordi ki’n vreman satisfer sa bann kriter? Bann fe i montre ki i annan en sel larepons—Temwen Zeova.

Me Si Bann Dout i Persiste?

9, 10. Ki nou kapab fer pour elimin bann dout ki persiste?

⁹ Ki nou devret fer si nou ganny anvai par bann dout? Lerwa saz, Salomon, i donn nou larepons: “Mon garson, si ou resevwar mon parol e apresye mon bann komannman, pour port latansyon lo lasazes avek ou zorey, afen ki ou a ensit ou leker ver disernman; si, anplis ki sa, ou kriy lentelizans li menm e ou fer rezonnen ou lavwa ver disernman li menm, si ou kontinyen rod li konmsi larzan, e ou kontinyen resers li konman resers en trezor kasyet, dan sa ka, ou pou konpran lakrent Zeova, e ou pou trouv konnesans Bondye”—Proverb 2:1-5.

¹⁰ Pa sa panse i enpresyonn nou! Si nou pare pour seryezman port latansyon lo son  sazes, nou pou “trouv konnesans Bondye.” Wi, nou kapab ganny akse avek konnesans Souvren Senyer liniver si nou pare pour resevwar e apresye son bann parol. Savedir ki nou tourn ver Zeova dan lapriyer e atraver letid personnel. Sa trezor kasyet ki dan son Parol i kapab elimin nou bann dout e ed nou pour vwar lalimyer laverite.

11. Konman ki serviter Elisa ti ganny afekte avek dout?

¹¹ Dan 2 Lerwa 6:11-18, nou vwar en legzanp evidan konman ki lapriyer ti ed en serviter Bondye ki ti annan lafreyer ek dout. Serviter Elisa ti mank persepsyon spirityel. I pa ti kapab vwar ki larme seles ti la pour soutenir profet Bondye, ki ti anba latak larme Siriyen. Avek lafreyer sa serviter ti kriye: “Aar! Mon met! Ki nou pou fer?” Ki mannyer Elisa ti reazir? “Pa per, parski i annan plis ki avek nou ki bann ki avek zot.” Me konman ki son serviter ti pou konvenki? I pa ti kapab vwar sa larme seles.

12. (a) Ki mannyer bann dout ki sa serviter ti annan ti disparet? (b) Ki mannyer nou kapab elimin okenn dout ki petet nou annan?

¹² “Elisa ti konmans priye e dir: ‘O Zeova, ouver son lizye, silvouple, pour ki i kapab vwar.’ Osito, Zeova ti ouver lizye sa serviter, pour ki i vwar; e, regarde! sa rezyon montanny ti ranpli avek bann seval ek saret lager an dife tou otour Elisa.” Dan sa ka, Zeova ti fer sa serviter vwar larme seles ki ti pe protez Elisa. Ozordi, toutfwa, nou pa pou ekspekte sa menm kalite led divin. Mazinen ki serviter sa profet ti napa Labib antye pour etidye afen ki son lafwa i ganny fortifye. Nou, nou annan Labib. Si nou byen servi li, pareyman nou lafwa pou kapab ganny afermi. Par egzanp, nou kapab medit lo bann resi ki dekrir Zeova dan son lakour seles. Si nou fer sa, napa posibilite pour doute ki Zeova i annan en lorganizasyon seles ki pe siport son bann serviter dan sa travay edikasyonnel ki pe ganny fer dan lemonn antye.—Izai 6:1-4; Ezekyel 1:4-28; Danyel 7:9, 10; Revelasyon 4:1-11; 14:6, 7.

Fer Atansyon Bann Riz Satan!

13. Ki mwayen Satan i servi pour sey afebli nou latasman avek laverite?

¹³ Ki bann lezot fason ki Satan i servi pour afebli nou spirityalite ek nou latasman avek laverite? En fason se atraver limoralite, dan tou son diferan form. Dan sa monn ozordi  kot dimoun i obsede avek seks, annan en relasyon (enfidelite) oubyen sorti avek en fiy (fornikasyon) in vin en keksoz normal pour sa zenerasyon, ki determinen zis pour anmize. Zot tanpi konbyen i kapab kout zot. Bann film, televizyon, ek video i promot sa stil lavi. Pornografi i anvai medya, sirtou Internet. Pour bann ki kirye, tantasyon i la pe esper zot.—1 Tesalonisyen 4:3-5; Zak 1:13-15.

14. Akoz serten Kretyen in vin viktim bann riz Satan?

¹⁴ Serten Kretyen in soumet avek zot kiryozite e zot in polye zot lespri ek zot leker an regardan bann zimaz pornografik, menm parfwa pornografi tre sokan. Zot in les zot tonm dan latrap Satan ki tre atiran. Sa in souvan anmenn nofraz spirityel. Bann tel endividi pa’n reisi reste “konman zanfan konsernan sa ki mal.” Zot pa’n ‘montre matirite dan zot rezonnman.’ (1 Korentyen 14:20) Sak lannen, plizyer milyon i pey konsekans pour lefe ki zot pa’n konform avek bann prensip ek standar Parol Bondye. Zot in neglize pour port e gard zot “lekipman batay ki Bondye i donnen.”—Efezyen 6:10-13; Kolosyen 3:5-10; 1 Timote 1:18, 19.

Apresye Sa ki Nou Annan

15. Akoz serten i kapab vwar li difisil pour apresye zot leritaz spirityel?

¹⁵ “Zot a konn laverite e laverite i ava fer zot lib,” Zezi ti dir. (Zan 8:32) Laplipar Temwen ti bezwen kit deryer zot stil lavi ek zot bann lasosyasyon relizyez ki zot ti annan oparavan. Alor, petet zot pli fasilman apresye sa liberte ki laverite i anmennen. De lot kote, serten zenn ki’n ganny elve par zot paran dan laverite i kapab vwar li difisil pour apresye zot leritaz spirityel. Zot pa’n zanmen form parti fo relizyon oubyen form parti sa monn ki met lanfaz lo plezir, depandans lo drog ek imoralite. Pour sa rezon ki zot pa arive vwar sa diferans total ki egziste ant nou paradi spirityel ek lemonn koronpi Satan. Serten i menm les zot ganny persyade pour gout pwazon sa monn e konn sa ki zot in manke!—1 Zan 2:15-17; Revelasyon 18:1-5.

16. (a) Ki bann kestyon ki nou kapab demann nou lekor? (b) Ki nou ganny ansennyen e ankouraze pour fer?

¹⁶ Fodre absoliman ki nou bril nou ledwa pour konn douler ek soufrans? Eski nou pa kapab aprann par move leksperyans lezot? Eski nou bezwen tourn dan “labou” sa monn pour konnen si nou’n mank en keksoz? (2 Pyer 2:20-22) Pyer ti rapel bann Kretyen premye syek ki ti dan lemonn Satan oparavan: “Pandan ase lontan zot in viv konman bann payen, dan vis, move dezir, lavi soular, bann parti bwar avek move laksyon, e ladorasyon zidol.” Sirman, nou pa bezwen eksperyans “move fason viv” sa monn pour vwar ki kantite degradan lavi i kapab ete. (1 Pyer 4:3, 4) Okontrer, nou ganny ansennyen bann standar moral eleve par Zeova dan nou bann Lasal Rwayonm, ki  bann sant ledikasyon lo Labib. Deplis, nou ganny ankouraze pour servi nou kapasite pour rezonnen afen ki nou a prouve ki nou annan laverite e ki nou pe pran li aker.—Zozye 1:8; Romen 12:1, 2; 2 Timote 3:14-17.

Nou Non Pa Zis en Tit

17. Konman ki nou kapab vin bann Temwen Zeova efikas?

¹⁷ Si nou pran laverite aker, nou pou rod en fason pour partaz li avek lezot dan tou lokazyon ki apropriye. Sa pa vedir ki nou pou esey fors lezot ki pa montre okenn lentere pour aksepte. (Matye 7:6) Plito, nou pa pou kanmi pour fer lezot konnen ki nou en Temwen Zeova. Si en dimoun i montre en pti lentere par demann en kestyon senser oubyen par aksepte en piblikasyon, nou pou pare e dispoze pour partaz nou lesperans. Byensir pour sa posib, nou ganny konseye pour touzour annan serten piblikasyon avek nou nenport ki landrwa ki nou ete—ki swa dan lakour, dan travay, dan lekol, dan magazen, oubyen dan bann landrwa detann.—1 Pyer 3:15.

18. Konman ki i pou benefisye nou si nou klerman idantifye nou konman en Kretyen?

¹⁸ Kan nou klerman idantifye nou konman bann Kretyen, nou pe fortifye nou defans kont latak tronper Satan. Si i annan en parti lanniverser nesans, Nwel oubyen en lotri ki pou deroule kot ou travay, souvan bann koleg travay pou dir, “Pa fatig ou avek li. I en Temwen Zeova.” Pour sa menm rezon, lezot pou annan tandans pour pa fer bann fars sal dan nou prezans. Donk si nou fer konnen nou pozisyon relizyez, sa i en gran benefis pour nou parey lapot Pyer ti fer resorti: “Dir mwan aprezan lekel ki pou fer zot dimal si zot annan gran dezir pour fer sa ki byen? Me malgre ki zot soufer an fezan sa ki byen, zot ere.”—1 Pyer 3:13, 14.

19. Konman ki nou konnen ki nou byen avanse dan bann dernyen zour?

¹⁹ En lot benefis ki nou gannyen kan nou pran laverite aker se ki nou pou konvenki ki nou pe viv dan bann dernyen zour sa sistenm. Nou pou konnen ki plizyer profesi Labib pe realize dan nou letan. * Lavertisman Pol ki “dan bann dernyen zour pou annan letan difisil” in ganny sifizaman konfirmen par bann levennman sokan ki’n arive pandan sa syek ki’n pase. (2 Timote 3:1-5; Mark 13:3-37) Konsernan 20 tyenm syek, ti annan en lartik dan en zournal resaman entitile “I Pou Grave dan Memwar Konman en Syek Kriyote.” Sa lartik ti site: “1999 ti lannen pli marke par mert dan dezyenm lanmwatye sa syek pli marke par mert.”

20. La i letan pour fer kwa?

²⁰ La i pa letan pour ezite. I evidan ki Zeova pe beni sa pli gran travay edikasyonnel lo Labib ki’n deza ganny fer atraver lemonn konman en temwannyaz pour tou nasyon. (Matye 24:14) Pran laverite aker e partaz li avek lezot. Ou lavi eternel i depan lo sa ki ou pe fer la konmela. Si nou krwaz lebra nou pa pou merit benediksyon Zeova. (Lik 9:62) Plito, la i letan pour ‘reste ferm e solid, pour montre touzour plis lentere dan travay Senyer, parski nou konnen ki dan Senyer nou travay pa anven.’—1 Korentyen 15:58.

[Not anba lo paz]

Eski Ou Mazinen?

• Konman ki nou kapab elimin bann dout?

• Ki nou kapab aprann par legzanp serviter Elisa?

• Ki bann tantasyon imoral ki nou devret kontinyelman veye?

• Akoz ki nou devret klerman idantifye nou konman bann Temwen Zeova?

[Kestyon]

[Portre lo paz 19]

Etidye Labib e priye regilyerman i kapab ed nou pour elimin bann dout

[Portre lo paz 20]

Bann dout serviter Elisa ti ganny rezourd par en vizyon

[Portre lo paz 21]

Zeova i ansenny nou son bann standar moral eleve dan bann Lasal Rwayonm parey sa enn an Benen