Mars Menm Pa Avek Lorganizasyon Zeova

“Ki Bondye lape . . . i ekip zot avek tou bon keksoz pour fer son lavolonte.”—EBRE 13:20, 21, NW.

1. Ki sif popilasyon lemonn, e ki kantite manm serten larelizyon i annan?

DIRAN lannen 1999, popilasyon lemonn ti ariv sis bilyon! Dan sa kantite, The World Almanac i dir ki 1,165,000,000 i Mizilman; 1,030,000,00 i Katolik Romen; 762,000,000 i Endou; 354,000,000 i Boudis; 316,000,000 i Protestan; e 214,000,000 i Ortodoks.

2. Ki nou kapab dir lo sitiasyon larelizyon ozordi?

² An rapor avek konfizyon ek divizyon relizye ki egziste ozordi, eski tou sa santenn milyon dimoun pe azir an armoni avek lavolonte Bondye? Non, “Bondye pa en Bondye dezord, me en Bondye lape.” (1 Korentyen 14:33) Lo lot kote, ki nou kapab dir konsernan fraternite enternasyonal bann serviter Zeova? (1 Pyer 2:17) En bon egzaminasyon i prouve ki ‘Bondye lape i ekip zot avek tou bon keksoz pour fer son lavolonte.’—Ebre 13:20, 21, NW.

3. Ki ti arive an Zerizalenm zour Lapannkot 33 N.L., e akoz?

³ Byensir, lakantite ki pe asosye avek Temwen Zeova i pa en kriter pour determinen si zot pe eksperyans faver divin; ni menm ogmantasyon dan lakantite pa enpresyonn Zeova. I pa ti swazir bann Izraelit parski zot ti “pli bokou” parmi bann nasyon. An realite, zot ti “sa pli ptipti” parmi bann nasyon. (Deterononm 7:7) Me parski Izrael ti prouve ki i enfidel avek Bondye, alor zour Lapannkot 33 N.L., Zeova ti transfer son faver lo en nouvo kongregasyon ki ti enkli bann disip Zezi Kri. Zot ti ganny swazir par lespri sen e avek zel zot ti al annavan pour deklar laverite lo Bondye ek Kris avek lezot.—Akt 2:41, 42.

Konstaman Mars Annavan

4. Akoz ki ou kapab dir ki kongregasyon Kretyen dan premye syek ti pe konstaman mars annavan?

⁴ Diran sa premye syek, kongregasyon Kretyen ti pe konstaman mars annavan, ouver bann nouvo teritwar, fer bann disip, e ganny pli gran konprenezon lo bann plan Bondye. Sa bann premye Kretyen ti reste azour avek leklersisman spirityel ki ti ganny fourni atraver bann let divinman enspire. Stimile par vizit personnel bann zapot,  zot ti akonpli plennman zot minister. Tou sa i ganny byen rakonte pour nou dan bann Lekritir Grek Kretyen.—Akt 10:21, 22; 13:46, 47; 2 Timote 1:13; 4:5; Ebre 6:1-3; 2 Pyer 3:17, 18.

5. Akoz ki lorganizasyon Bondye pe progrese ozordi, e akoz nou devret mars menm pa avek li?

⁵ Parey bann Kretyen premye syek, bann Temwen Zeova dan letan modern in devlope pour sorti en pti group okonmansman. (Zekarya 4:8-10) Depi lafen diznevyenm syek ziska venteentyenm syek, i annan levidans kler ki lespri Zeova i avek son lorganizasyon. Parski nou’n depan non pa lo pwisans imen me lo gidans lespri sen, nou’n kontinyen progrese dan nou konpreansyon Labib e an fezan lavolonte Bondye. (Zekarya 4:6) Ozordi ki nou dan “bann dernyen zour,” i esansyel ki nou mars menm pa avek lorganizasyon progresif Bondye. (2 Timote 3:1-5) An fezan sa, nou pou kapab gard nou lespwar vivan e pran par dan temwannyaz konsernan Rwayonm etabli par Bondye avan ki destriksyon final i frap sa sistenm aktyel.—Matye 24:3-14.

6, 7. Ki sa trwa domenn ki nou pou egzaminen dan ki lorganizasyon Zeova in mars annavan?

⁶ Parmi nou i annan bann ki ti konmans asosye avek lorganizasyon Zeova dan bann lannen 1920, 1930 ek 1940. Pandan sa bann letan ki’n pase, lekel parmi nou ki ti ava imazin sa lagrandisman remarkab ek devlopman progresif ki’n arive dan lorganizasyon ziska ozordi? Zis mazin sa bann levennman enportan ki’n arive dan nou listwar letan modern! Vreman, i satisfezan spirityelman pour reflesir lo sa ki Zeova in akonplir par mwayen son pep organize dan en fason teokratik.

⁷ Dan son letan, David ti ganny touse oprofon ler i ti kontanple bann travay merveye Zeova. “Si mon ti anvi dir e koz lo la,” i ti dir, “zot in vin pli bokou ki mon kapab rakonte.” (Psonm 40:5) Parey i ganny mansyonnen dan lartik presedan, nou fer fas avek menm limitasyon. Dan nou letan nou pa kapab rakont tou sa bann aksyon Zeova ki merveye e ki vo lapenn glorifye. Toudmenm, annou konsider trwa domenn dan ki lorganizasyon Zeova in mars annavan: (1) leklersisman spirityel progresif, (2) en minister elarzi e amelyore, ek (3) bann azisteman aler dan nou fason organize.

Rekonesan Pour Leklersisman Spirityel

8. An armoni avek Proverb 4:18, ki leklersisman spirityel in ed nou konpran an rapor avek Rwayonm?

⁸ Konsernan leklersisman spirityel progresif, Proverb 4:18 in sirman vin en realite. I dir: “Santye bann dimoun drwat i parey sa lalimyer briyan ki vin pli kler e pli kler ziska sa zour i solidman etabli.” Konbyen nou rekonesan pour leklersisman spirityel progresif ki nou’n eksperyanse! Dan lasanble Cedar Point, Ohio, an 1919, lanfaz ti ganny mete lo Rwayonm Bondye. Sa Rwayonm i lenstriman ki Zeova i servi pour sangtifye son non e zistifye son souvrennte. Annefe, leklersisman spirityel in permet nou pour konpran ki depi premye liv, Zenez, ziska dernyen liv, Revelasyon, Labib i ateste plan Zeova pour sangtifye son non par mwayen son Rwayonm dirize par son Garson. Ladan nou trouv sa pli gran lespwar pour tou bann ki kontan ladrwatir.—Matye 12:18, 21.

9, 10. An 1920, ki nou ti aprann konsernan Rwayonm ek sa de lorganizasyon opoze, e konman sa in ed nou?

 ⁹ Dan lasanble Cedar Point, an 1922, orater prensipal frer J. F. Rutherford ti ankouraz pep Bondye pour “anonse, anonse, anons sa Lerwa ek son rwayonm.” Dan en lartik entitile “Nesans sa Nasyon,” pibliye dan Latour Veyer 1 Mars 1925, latansyon ti konsantre lo persepsyon spirityel konsernan bann profesi ki ti’n endik etablisman Rwayonm Bondye an 1914. Dan bann lannen 1920, nou ti konpran osi ki ti annan de lorganizasyon opoze—enn pour Zeova e enn pour Satan. I annan en lager ant lede, e nou pou lo kote viktorye si selman nou reste menm pa avek lorganizasyon Zeova.

¹⁰ Konman ki en tel leklersisman spirityel in ed nou? Vi ki Rwayonm Bondye ek son Lerwa Zezi Kri pa form parti lemonn, nou osi nou pa kapab form parti lemonn. An restan separe avek lemonn nou montre ki nou lo kote laverite. (Zan 17:16; 18:37) Ler nou obzerv lakantite problenm konplike ki pe akable sa sistenm mesan, pa nou rekonesan ki nou pa form parti lorganizasyon Satan! E pa nou privilezye pour annan sekirite spirityel dan lorganizasyon Zeova!

11. Ki non biblik ki pep Bondye ti adopte an 1931?

¹¹ Dan lasanble Columbus, Ohio, laplikasyon apropriye ti ganny fer lo Izai 43:10-12. Bann Etidyan Labib ti adopte sa non byen distenge, Temwen Zeova. Pa i en gran privilez pour fer konnen non Bondye afen ki lezot i kapab apel lo sa non pour ganny sove!—Psonm 83:18; Romen 10:13.

12. An 1935, ki leklersisman spirityel konsernan sa gran lafoul ti ganny fourni?

¹² Avan bann lannen 1930, bokou parmi pep Bondye pa ti tro sir konsernan zot lespwar pour lavenir. Serten ti santi serten aspirasyon pour lavi seles e anmenmtan zot ti enterese par bann lansennyman Labib konsernan en paradi lo later. I ti annan en gran leksitasyon dan lasanble an 1935 Washington, D.C., ler zot ti konnen ki sa gran miltitid oubyen sa gran lafoul ki ganny mansyonnen dan Revelasyon sapit 7 i en group ki annan lespwar teres. Depi sa, rasanbleman sa gran lafoul in avans avek en pli gran lelan. Eski nou pa rekonesan ki lidantite sa “gran lafoul” i pa en mister pour nou? Lefe ki dimoun pe ganny rasanble an gran kantite sorti dan tou nasyon, tribi, ek lalang, sa i motiv nou pour fer plis anmezir ki nou gard menm ritm avek lorganizasyon Zeova.

13. Ki sa kestyon prensipal ki ti ganny souleve dan lasanble St. Louis an 1941?

¹³ Kestyon prensipal ki devret konsern lasosyete imen ti resorti an 1941 dan lasanble St. Louis, Missouri. Se dominasyon iniversel, ouswa souvrennte! Sa i kestyon ki devret ganny regle byento, e sa gran zour efreyan kot sa pou ganny regle pe apros rapidman! Size relye avek lentegrite ti osi ganny eklersi an 1941, ki ti permet nou pour montre kote nou debout endividyelman an rapor avek souvrennte Bondye.

14. Dan lasanble enternasyonal an 1950, ki nou ti aprann konsernan bann prens mansyonnen dan Izai 32:1, 2?

¹⁴ An 1950 dan lasanble enternasyonal, New York, sa bann prens dan Izai 32:1, 2 ti presizeman ganny idantifye. I ti en moman eksitan ler Frer Frederick Franz ti koz lo sa size e eksplike ki bann fitir prens sa nouvo later ti parmi nou. Dan sa lasanble ek bann ki ti swiv apre, i’n annan bokou reyon lalimyer spirityel. (Psonm 97:11) Pa nou apresye ki nou santye “i parey sa lalimyer briyan ki vin pli kler e pli kler”!

Mars Annavan dan Nou Minister

15, 16. (a) Konman ki nou’n mars annavan dan nou minister diran bann lannen 1920 ek 1930? (b) Ki bann piblikasyon ki’n donn en lelan dan minister Kretyen dan bann dernyen deseni?

¹⁵ En dezyenm fason ki lorganizasyon Zeova in mars annavan i annan pour fer avek nou travay prensipal—predikasyon  Rwayonm e fer disip. (Matye 28:19, 20; Mark 13:10) Pour akonpli sa travay, lorganizasyon in konstaman met devan nou lenportans pour elarzi nou minister. An 1922, tou Kretyen ti ganny envite pour partisip dan aktivite predikasyon. Sak Kretyen ti devret rekonnet ki i en responsabilite personnel pour les son lalimyer briye e alor annan en par personnel pour rann temwannyaz lo laverite. (Matye 5:14-16) An 1927, laranzman ti ganny fer pour met Dimans dekote konman en zour predikasyon. Konmansman Fevriye 1940, ti normal pour vwar bann Temwen lo semen dan bann landrwa komersyal pe ofer Latour Veyer ek Consolation (ozordi Réveillez-vous!).

¹⁶ Lannen 1937, nou ti vwar lentrodiksyon sa pti liv Model Study, e lanfaz ti ganny mete pour fer retourn vizit afen ki nou a ansenny lezot laverite. Dan bann lannen swivan, bokou lanfaz ti ganny mete lo letid Labib. Nou ti pran en lelan dan sa laspe minister kan sa liv “Que Dieu soit reconnu pour vrai” ti ganny lanse an 1946 e La vérité qui conduit à la vie éternelle an 1968. Konmela, nou pe servi liv Konnesans Ki Anmenn ver Lavi Eternel. Egzamin sa bann lenformasyon i etabli en fondasyon solid pour fer bann disip.

Mars Annavan an Rapor Avek Azisteman dan Nou Fason Organize

17. Pour konform avek Izai 60:17, konman ki lorganizasyon Zeova in mars annavan?

¹⁷ En trwazyenm fason ki lorganizasyon Zeova in mars annavan se dan azisteman bann fason ki i organize. Dapre Izai 60:17, Zeova ti promet: “Olye kwiv mon pou anmenn lor, olye feray mon pou anmenn larzan, olye dibwa ek kwiv e olye bann ros ek feray; mon pou etabli lape konman ou bann sirveyan e ladrwatir konman bann ki donn ou latas.” Pour konform avek sa profesi, bann mezir in ganny pran pour amelyor sirveyans lo travay predikasyon Rwayonm e pour pran swen troupo.

18, 19. Pandan bann lannen ki’n pase ki bann azisteman ki’n ganny fer dan fason ki nou organize?

¹⁸ An 1919, en direkter pour servis ti ganny apwente dan sak kongregasyon ki ti responsab pour organiz predikasyon. Sa nouvo laranzman ti donn en lelan dan aktivite predikasyon. Eleksyon bann ansyen ek dyak dan bann kongregasyon ti terminen an 1932, e sa ti mark nou detasman avek bann fason demokratik. En lot moman enportan ti arive an 1938, ler tou serviter dan kongregasyon ti ganny apwente dan en fason pli pros avek bann nominasyon teokratik ki ti ganny fer dan kongregasyon Kretyen premye syek. (Akt 14:23; 1 Timote 4:14) An 1972, bann sirveyan ek asistan ministeryel ti ganny apwente pour servi zis parey bann zonm ti ganny apwente parmi bann premye Kretyen. Olye annan zis en zonm ki servi konman sirveyan en kongregasyon, Filipyen 1:1 ek lezot verse i endike ki sa bann ki ranpli kalifikasyon Labib pour bann sirveyan pou form en konsey bann ansyen.—Akt 20:28; Efezyen 4:11, 12.

¹⁹ An 1975, en laranzman ti pran lefe pour bann konmite Konsey Direkter sirvey bann aktivite lorganizasyon Zeova dan lemonn antye. Bann Konmite Brans ti ganny apwente pour sirvey travay dan zot teritwar respektif. Depi sa, bokou lanfaz in ganny mete pour senplifye travay dan biro prensipal ek bann brans pour “fer sir bann keksoz pli enportan.” (Filipyen 1:9, 10, NW ) Bann responsabilite ki bann berze anba Kris pe desarze i enkli pran linisyativ dan travay predikasyon, ansenny kongregasyon e pran byen swen avek troupo Bondye dan kongregasyon.—1 Timote 4:16; Ebre 13:7, 17; 1 Pyer 5:2, 3.

Gidans Aktif Zezi

20. Pour reste menm pa avek lorganizasyon Zeova ki nou bezwen rekonnet konsernan pozisyon Zezi?

²⁰ Pour mars menm pa avek lorganizasyon progresif Zeova, i neseser ki nou rekonnet rol aktif ki Zezi Kri in resevwar avek Bondye konman  “sef kongregasyon.” (Efezyen 5:22, 23, NW ) I vo lapenn port latansyon osi lo Izai 55:4, kot i dir nou: “Regarde! Konman en temwen pour bann kominote nasyonal mon’n [Zeova] donn li, konman en lider ek komandan pour bann kominote nasyonal.” Sirman Zezi i konnen konman pour dirize. I konn osi son mouton, e i konn zot aktivite. Annefe, ler i ti fer lenspeksyon lo sa set kongregasyon dan Lazi Miner, senk fwa i ti dir: “Mon konn ou bann aktivite.” (Revelasyon 2:2, 19; 3:1, 8, 15) Zezi i konn osi nou bann bezwen, zis parey son Papa, Zeova i konnen. Avan ki i ti donn lapriyer model, Zezi ti deklare: “Bondye zot Papa i konnen sa ki zot bezwen avan menm ki zot demann li.”—Matye 6:8-13.

21. Konman gidans Zezi i evidan dan kongregasyon Kretyen?

²¹ Konman ki gidans Zezi i ganny manifeste? En fason se atraver bann sirveyan Kretyen, bann “don an zonm.” (Efezyen 4:8, NW ) Revelasyon 1:16 i endike ki zot dan son lanmen drwat, anba son kontrol. Ozordi, Zezi pe diriz laranzman bann ansyen, sa bann zonm ki annan en lespwar seles ouswa teres. Zot ganny apwente par lespri sen an armoni avek bann kalifikasyon Labib. (1 Timote 3:1-7; Tit 1:5-9) O premye syek, en group zonm mir an Zerizalenm ti form en Konsey Direkter pour sirvey bann kongregasyon ek aktivite predikasyon Rwayonm an zeneral. Menm model pe ganny swiv ozordi dan lorganizasyon Zeova.

Mars Menm Pa!

22. Ki led Konsey Direkter i fourni?

²² Tou lentere Rwayonm lo later in ganny konfye avek ‘lesklav fidel e pridan,’ ki ganny reprezante par Konsey Direkter. (Matye 24:45-47) Konsey Direkter i prensipalman enterese pour fourni lenstriksyon ek gidans spirityel pour kongregasyon Kretyen. (Akt 6:1-6) Sepandan, ler bann frer i ganny afekte par bann dezas natirel, Konsey Direkter i pran aksyon pour fourni led sekour e pour repar oubyen restor bann lakaz andomaze ek bann Lasal Rwayonm. Si serten Kretyen i ganny trete dan en fason kriyel oubyen persekite, mezir i ganny pran pour batir zot spirityelman. E ‘dan letan ki pa favorab,’ tou zefor i ganny fer pour ki travay predikasyon Rwayonm i kontinyen al annavan.—2 Timote 4:1, 2.

23, 24. Nenport keksoz ki arive avek son pep, ki Zeova i konstaman fourni, e ki nou devret determinen pour fer?

²³ Nenport ki sitiasyon ki kapab ariv lo son pep, Zeova i konstaman fourni nouritir spirityel ek gidans neseser. Zeova i osi donn bann frer responsab disernman ek bon zizman pour prepare pour plis progre ek amelyorasyon dan lorganizasyon teokratik. (Deterononm 34:9; Efezyen 1:16, 17) Annou, alor, determinen pour akonpli nou travay fer disip e pour akonpli nou minister dan lemonn antye.—2 Timote 4:5.

²⁴ Nou annan konfyans total ki Zeova pa pou zanmen abandonn son pep fidel; i pou delivre zot dan sa ‘gran ladetres’ ki pe vini. (Revelasyon 7:9-14; Psonm 94:14; 2 Pyer 2:9) Nou annan tou rezon pour mentenir sa konfyans ferm ki nou ti annan okonmansman ziska lafen. (Ebre 3:14) Annou, alor, determinen pour mars menm pa avek lorganizasyon Zeova.

Konman Ou ti a Reponn?

• Akoz nou kapab dir ki lorganizasyon Zeova pe kontinyen mars annavan?

• Ki levidans i annan ki pep Bondye pe rezwir leklersisman spirityel progresif?

• Konman ki i’n annan bann amelyorasyon dan minister Kretyen?

• Ki bann azisteman aler ki’n ganny fer dan fason ki bann serviter Zeova i organize?

[Kestyon]

[Portre lo paz 11]

Parey David, nou pa kapab rakont tou bann travay merveye Zeova

[Portre lo paz 12]

Troupo Bondye in benefisye avek bann azisteman aler dan fason organize