Temwen Zeova Pe Al Annavan Avek en Konviksyon Ferm!

Rapor Lo Miting Annyel

BANN Temwen Zeova i ganny distenge konman bann Kretyen ki annan en konviksyon ferm, dan sa letan ki ranpli avek dout. Sa ti resorti klerman dan miting annyel Lasosyete Watch Tower Bible and Tract of Pennsylvania, ki ti ganny fer Jersey City, New Jersey, kot Lasal Lasanble bann Temwen Zeova Sanmdi le 7 Oktob, 2000. *

Dan son bann parol lentrodiksyon, tyermenn, John E. Barr, en manm Konsey Direkter bann Temwen Zeova, ti deklare: “Parmi sa plizyer bilyon dimoun lo later, nou konnen e krwar ki Garson byenneme Zeova, Zezi Kri, i deza kouronnen dan lesyel e pe rennyen omilye son bann lennmi.” Laprev en tel konviksyon ferm ti ganny prezante dan sis rapor tre stimilan sorti atraver lemonn.

Laverite Biblik i Venk Pratik Grigri an Aiti

Pratik grigri i ase popiler an Aiti. “Normalman, dimoun pou pratik vodou pour protez zot,” John Norman, kordinater Komite Brans, i rakonte. En bonnonm dibwa ti konmans ganny bann dout kan i ti perdi en kote lipye dan en aksidan. I ti demann son lekor: ‘Ki mannyer sa i kapab ariv avek mwan si mon pe ganny proteze par bann lespri?’ Parey bokou lezot, sa zonm in ganny ansennyen laverite par bann Temwen Zeova e i’n ganny led pour debaras li avek grigri. Potansyel pour plis devlopman spirityel an Aiti i ganny demontre par lefe ki kat fwa plis sa kantite proklanmater dan sa pei ti asiste Memoryal lanmor Kris le 19 Avril, 2000.

Zel dan Teritwar Imans Kore

Karant poursan bann Temwen Zeova an Kore i dan servis aplentan. “Avek sa larme imans,” kordinater Komite Brans, Milton Hamilton, i deklare, “nou teritwar ki annan plis ki 47 milyon dimoun i ganny kouver preski tou le mwan.” Progre i vreman remarkab dan bann kongregasyon ki kominik par siny. Dan enn bann rezyon kot zot kominik par siny, 800 letid Labib pe ganny kondwir. Sa i fer an mwayenn en letid pour sak proklanmater. Malerezman, bann zenn frer i ankor pe ganny met dan prizon akoz zot pa pran par dan zafer sa monn. Toudmenm, sa bann Kretyen fidel i  ganny trete favorableman, e souvan zot ganny konfye bann travay ki bezwen kelken ki diny konfyans.

Satisfer Demann Pour Plis Progre an Meksiko

En maksimonm 533,665 proklanmater Rwayonm an Meksiko ti raport zot servis an Out 2000. Plis ki trwa fwa sa sif ti asiste Memoryal. “Nou lobzektif pour sa lannen se pour konstri 240 Lasal Rwayonm,” kordinater Komite Brans, Robert Tracy, ti dir. “Kantmenm sa, nou bezwen bokou plis ankor,” i ti azoute.

Bann zenn ki ganny elve parmi bann Temwen Zeova an Meksiko i egzanpler. Konsernan en zenn, en pret Katolik ti dir: “Mon ti a kontan annan kantmenm zis enn parey li parmi mon bann disip. Mon admir sa bann dimoun pour zot determinasyon e lafason ki zot byen servi Labib. Zot in defann Bondye, menm ziska pwen pour perdi zot prop lavi.”

Lentegrite Malgre Konfli an Siera Leonn

Depi Avril 1991, kan lager sivil ti konmanse an Siera Leonn, plizyer milye dimoun in ganny touye, blese, oubyen en serten andikap. “Lager ek difikilte in annan en lefe profon lo sa bann dimoun,” Bill Cowan, kordinater Komite Brans, i raporte. “Bokou ki ti endiferan avek nou mesaz i aprezan ekout avek lentere. I pa en keksoz rar pour dimoun vin asiste zot premye renyon lo zot menm. Souvan dimoun i aret bann frer lo semen pour demann zot en letid Labib.” Malgre ki kondisyon dan sa pei i kontinyen enstab, travay predikasyon lo Rwayonm pe raport fri an Siera Leonn.

Gran Progranm Konstriksyon Sid Afrik

Aktyelman, i annan en bezwen pour plizyer milye Lasal Rwayonm dan teritwar okipe par biro brans Sid Afrik. Plizyer santenn lasal in deza fini konstri. “Olye zwenn dan en kabann oubyen anba en pye dibwa, parey zot ti fer oparavan, nou bann frer i kapab zwenn dan en landrwa apropriye kot zot kapab byen asize,” manm Komite Brans, John Kikot, ti fer sa remark. “Menm si sa bann Lasal Rwayonm i senp, zot normalman distenge avek lezot batiman dan zot zalantour, konman sa enn ki pli enpresyonan. Dan serten landrwa, nou’n remarke ki apre konstriksyon en Lasal Rwayonm, kongregasyon pou plis ki double son lannen swivan.”

En Nouvo Zenerasyon Temwen an Likrenn

Pandan lannen servis 2000, sa pei in ganny en maksimonm 112,720 proklanmater. Plis ki 50,000 sa sif in aprann laverite Biblik diran sa senk dernyen lannen. “Vreman, Zeova in lev en zenerasyon Temwen tou nouvo e zenn, pour deklar son non!” John Didur, kordinater Komite Brans ti dir. I ti azoute: “Diran sa de dernyen lannen nou’n plas plis ki 50 milyon magazin, menm kantite avek popilasyon sa pei. Tou le mwan nou resevwar, an mwayenn, en milye let sorti kot bann dimoun enterese ki pe demann plis lenformasyon.”

Lezot Laspe Pasyonan sa Progranm

Daniel Sydlik, en manm Konsey Direkter, ti donn en diskour ki ti kaptir latansyon total. Sa lartik “Konman ki Konsey Direkter i Diferan Avek en Lasosyasyon Legal,” ki aparet dan sa magazin, i baze lo sa prezantasyon byen enstriktif.

Theodore Jaracz, manm Konsey Direkter, ti delivre en diskour ki ti fer reflesir, entitile “Nominasyon Teokratik bann Sirveyan ek Asistan Ministeryel.” I annan en lartik dan sa magazin ki baze lo sa size.

Dan sa miting annyel, ti osi annan en diskour tre ankourazan lo teks pour lannen 2001 ki ti ganny prezante par manm Konsey Direkter, David Splane. Sa teks ki baze lo parol lapot Pol i: “Konplet e avek en konviksyon ferm dan tou lavolonte Bondye.” (Kolosyen 4:12, NW ) Bann Temwen Zeova partou dan lemonn i determinen pour fer sanmenm anmezir ki zot fidelman pres sa bon nouvel lo Rwayonm Bondye partou lo later.—Matye 24:14.

[Not anba lo paz]