Kestyon Lekter

Konman ki bann vre Kretyen i devret konsider sa pratik komen, kot bann endividi i donn lezot dimoun bann kopi progranm softwer komersyal pour konpiter?

Par mal konprenezon, serten i esey ekskiz sa pratik an fezan referans avek bann parol Zezi: “Zot in resevwar pour nanryen alor donn osi pour nanryen.” Byensir, Zezi pa ti pe dir donn pour nanryen bann kopi en piblikasyon ki annan en kopirayt oubyen en progranm konpiter (softwer), ki son lizaz i ganny gouvernen par lalwa. I ti pe koz lo konman pour donnen dan nou minister. Zezi ti dir avek bann zapot ki ti pe al dan plizyer lavil ek vilaz ki zot ti bezwen anons Rwayonm, geri malad, e sas bann demon. Olye fer sa bann dimoun peye pour sa, bann zapot ti pou “donn pour nanryen.”—Matye 10:7, 8.

Avek ogmantasyon dan lizaz konpiter, swa personnel oubyen dan biznes, bokou dimoun i bezwen bann softwer. Ordinerman nou bezwen aste sa bann softwer. Byensir, i annan serten endividi ki ekri bann progranm ki zot fer disponib pour nanryen e zot dir ki i kapab ganny kopye e donnen avek lezot ankor. Me laplipar softwer konpiter i ganny vann komersyalman. Ki swa pour lizaz personnel kot lakour oubyen pour biznes, bann ki servi softwer i sipoze aste sa bann progranm, peye pour ganny zot. Si en dimoun i pran oubyen fer kopi en lansanm softwer san peye, sa pou ilegal zis parey kan ou fer fotokopi bann liv an ekse, menm si i pe donn zot gratwit.

Laplipar progranm konpiter (enkli bann zwe) i ganny proteze par en laysenns, sa propriyeter oubyen itilizater i ganny demande pour konform avek son bann provizyon ek limitasyon spesifik. Bokou sa bann laysenns i deklare ki selman en dimoun ki kapab enstal e servi sa progranm—ordinerman i ganny enstale lo selman en konpiter, ki swa lo en konpiter kot lakour, dan biznes oubyen kot lekol. Serten laysenns i dir ki sa enn ki pe servi sa progranm i kapab annan en kopi an rezerv pour li menm, me i pa kapab fer bann kopi pour lezot dimoun. Si sa propriyeter i anvi donn sa progranm antye (ki enkli laysenns ek dokimantasyon) i kapab fer li. Sepandan, sa i fer li perdi son drwa pour servi li. Bann laysenns i varye, alor en dimoun ki pe aste en progranm oubyen pe ganny ofer enn i devret verifye bann kondisyon ki sa laysenns i annan.

Bokou nasyon i form bann group dan ki zot fer bann lakor kopirayt ki protez en “propriyete entelektyel” tel konman bann progranm konpiter, e zot esey enplimant bann lalwa kopirayt. Par egzanp, The New York Times le 14 Zanvye, 2000, ti raporte ki “bann zofisye lapolis Alman ek Danwa ti aret bann manm sa ki zot ti dekrir konman en geng piratri softwer mazer” ki ti pe fer kopi e distribye bann zwe ek progranm konpiter, menm vann en pe lo internet.

Ki pozisyon kongregasyon Kretyen lo sa size? Bon, Zezi ti dir: “Rann Sezar sa ki pour Sezar, e Bondye sa ki pour Bondye.” (Mark 12:17) Sa pe demann bann Kretyen pour obeir bann lalwa zot pei ki pa an konfli avek lalwa Bondye. An sa ki konsern bann gouvernman, lapot Pol ti ekri: “Tou dimoun i devre soumet li avek bann lotorite ki gouvernen . . . Sa ki opoz lotorite, i opoz lord ki’n ganny etabli par Bondye, e ensi i pe atir kondannasyon lo li menm.”—Romen 13:1, 2.

Bann ansyen dan kongregasyon Kretyen pa responsab pour verifye konpiter lezot, konmsi zot in ganny otorize pour enterpret e enplimant bann lalwa kopirayt. Me zot krwar e ansennyen ki bann Kretyen i devret evite pran sa ki pa pour zot e devret esey zot mye pour soumet avek lalwa. Sa i protez bann Kretyen kont pinisyon pour kas lalwa e permet zot pour annan en bon konsyans devan Bondye. Pol ti ekri: “Alor i bon soumet avek lalwa non pa zis akoz lakoler Bondye me akoz nou konsyans.” (Romen 13:5) Pareyman, Pol ti eksprim dezir bann vre Kretyen par sa bann parol: “Nou sir ki nou annan en konsyans kler, parski nou oule fer sa ki byen dan tou sirkonstans.”—Ebre 13:18.

[Bwat lo paz 31]

Serten biznes ek lekol i aste bann laysenns pour plizyer itilizater, ki agree ki en serten kantite itilizater i kapab servi sa menm progranm. An 1995, bann kongregasyon Temwen Zeova ti egzamin en lartik ki ti enkli sa konsey:

“Laplipar lakonpannyen ki prepar e vann bann progranm konpiter i met en kopirayt lo sa bann prodwi, e zot fourni en laysenns ki detaye konman ki sa bann progranm i kapab ganny servi legalman. Ordinerman sa laysenns i dir ki sa propriyeter pa kapab donn lezot dimoun bann kopi sa progranm; annefe, lalwa enternasyonal pour kopirayt i fer li ilegal pour fer sa. . . . Serten gran lakonpannyen i vann bann konpiter ki kontyen bann progranm ki’n deza fini ganny enstale ladan e osi annan laprouvasyon lalwa. Sepandan, serten laboutik konpiter pa fourni bann laysenns parski sa bann progranm ki zot in enstale davans i bann kopi ilegal, sa i vedir ki sa aster i vyol lalwa an servan sa bann progranm. An relasyon avek sa, bann Kretyen i devret evite distribye oubyen pran bann lenformasyon lo bann electronic bulletin boards ki annan kopirayt (tel konman bann piblikasyon Lasosyete) ki pe ganny kopye san permisyon legal son loter.”