Lazwa Pour Bann Ki Mars Dan Lalimyer
Lazwa Pour Bann Ki Mars Dan Lalimyer
“Vini e annou mars dan lalimyer Zeova.”—IZAI 2:5.
1, 2. (a) Ki degre enportan lalimyer i ete? (b) Akoz ki sa lavertisman ki teneb pou kouver later i grav?
ZEOVA i Sours lalimyer. Labib i apel li “sa Enn ki donn soley pour lalimyer pandan lazournen, bann lalwa pour lalin ek zetwal donn lalimyer aswar.” (Zeremi 31:35; Psonm 8:3) Zeova i sa Enn ki’n kree nou soley ki, annefe, i en four nikleer imans ki larg en gran kantite lenerzi dan lespas, serten dan laform lalimyer ek lasaler. Sa pti poursantaz lenerzi ki ariv kot nou konman lalimyer i soutenir lavi lo later. San sa lalimyer ki soley i donnen, nou pa ti pou egziste. Lavi pa ti pou egziste lo later.
2 Avek sa antet, nou kapab konpran gravite en sitiasyon ki profet Izai ti dekrir. I ti dir: “Regarde! teneb li menm pou kouver later, e en fernwar epe bann kominote nasyonal.” (Izai 60:2) Byensir, sa pa pe refer avek teneb dan en sans fizik. Izai pa ti pe dir ki en zour soley, lalin ek bann zetwal pou aret klere. (Psonm 89:36, 37; 136:7-9) I ti pe plito koz lo teneb spirityel. Teneb spirityel i vedir lanmor. Nou pa kapab viv permanan san lalimyer spirityel zis parey nou pa kapab viv san lalimyer fizik.—Lik 1:79.
3. Avek parol Izai antet, ki bann Kretyen i devret fer?
3 Etan donnen ki sitiasyon i koumsa, i konsern bokou pour note ki parol Izai pe ganny en pli gran lakonplisman dan nou letan menm si i ti’n deza akonpli lo ansyen Zida. Wi, dan nou letan lemonn in ganny kouver par en teneb spirityel. Dan en sitiasyon osi danzere, lalimyer spirityel i ekstrememan enportan. Se pour sa ki bann Kretyen i devret ekout konsey Zezi: “Zot lalimyer i devre klere devan tou dimoun.” (Matye 5:16) Bann Kretyen fidel i kapab eklersi sa teneb pour bann dimoun ki dou, e dan sa fason donn zot loportinite pour ganny lavi.—Zan 8:12.
Bann Letan Sonm an Izrael
4. Kan ki parol profetik Izai ti ganny premye lakonplisman, me ki sitiasyon ki ti deza egziste dan son letan?
4 Parol Zeremi konsernan teneb ki kouver later ti ganny premye lakonplisman kan Zida ti reste dezerte e son pep ti an egzil an Babilonn. Me menm avan sa, dan letan Izai, en kantite dimoun ti deza dan teneb spirityel, en fe ki ti pous li pour sipliy son bann konpatriyot: “O bann zonm lakaz Zakob, vini e annou mars dan lalimyer Zeova”!—Izai 2:5; 5:20.
5, 6. Ki bann fakter ki ti kontribye ver sa teneb ki ti annan dan letan Izai?
5 Izai ti profetiz an Zida “dan letan Ouziya, Yotam, Aaz, ek Izkiya, bann lerwa Zida.” (Izai 1:1) I ti en letan difisil kot ti annan bann konfli politik, lipokrizi relizye, koripsyon lazistis, ensi ki lopresyon bann pov. Menm pandan renny bann lerwa fidel tel ki Yotam, lotel bann fo bondye ti kapab ganny trouve lo plizyer oter. Anba dominasyon bann lerwa enfidel, sitiasyon ti pli pir. Lerwa Aaz, par egzanp, ti al ziska pour ofer son zanfan dan en sakrifis rityel avek bondye Molek. Zot ti vreman dan fernwar!—2 Lerwa 15:32-34; 16:2-4.
6 Sitiasyon enternasyonal ti osi sonm. Moab, Edom, ek Filisti ti pe menase lo bann frontyer Zida. Menm si Rwayonm nor Izrael ti en parante, i ti definitivman en lennmi. Pli lwen dan nor, Siri ti met an danze lape an Zida. Pli danzere ankor, ti Lasiri kriyel ki ti pe touzour sey rod loportinite pour ranforsi son pwisans. Diran sa letan ki Izai ti pe profetize, Lasiri ti konkerir nasyon Izrael e i ti pros pour detrir Zida. En serten moman, tou lavil fortifye dan Zida, eksepte Zerizalenm, ti dan lanmen Lasiri.—Izai 1:7, 8; 36:1.
7. Ki santye Izrael ek Zida ti swazir, e ki mannyer Zeova ti reazir?
7 Pep Bondye avek ki i ti fer lalyans, ti soufer bann dezas parey akoz Izrael ek Zida pa ti fidel avek li. Parey sa bann ki liv Proverb i mansyonnen zot ti pe, “kit bann santye ladrwatir pour mars dan bann semen teneb.” (Proverb 2:13) Pourtan, kantmenm Zeova ti ankoler avek son pep, i pa ti abandonn zot konpletman. Plito, i ti lev Izai ek lezot profet pour fourni lalimyer spirityel pour nenport ki dan sa nasyon ki ti ankor anvi servi Zeova fidelman. Sa lalimyer ki sa bann profet ti fourni ti vreman presye. I ti donn lavi.
Bann Letan Sonm Ozordi
8, 9. Ki bann fakter ki kontribye ver sa teneb ki lemonn i ladan ozordi?
8 Sa sitiasyon dan lepok Izai i resanble bokou avek bann kondisyon ozordi. Dan nou letan, bann dirizan in detourn zot ledo kont Zeova ek Lerwa ki i’n kouronnen, Zezi Kri. (Psonm 2:2, 3) Bann sef relizye Kretyen in tronp zot bann fidel. Sa bann sef i pretann dir ki zot pe servi Bondye, me an realite, laplipar zot pe promot bann bondye sa monn—nasyonalism, son bann larme, larises, ek serten endividi enportan—san mansyonn ansenny bann doktrin payen.
9 Dan en landrwa apre lot, bann relizyon Kretyente in enplike dan bann lager ek konfli kot zot profite pour fer bann netwayaz etnik ek lezot kriyote. Deplis, olye soutenir moralite ki trouve dan Labib, bokou legliz i swa inyor oubyen siport bann pratik imoral tel konman fornikasyon ek omoseksyalite. Vi ki zot in rezet bann standar Labib, bann fidel dan Kretyente i parey sa bann zonm ki en ansyen psalmis ti koz lo la: “Zot pa’n konnen, e zot pa konpran; dan teneb zot pe kontinyen ale vini.” (Psonm 82:5) Vreman, Kretyente i dan en teneb profon zis parey ansyen Zida.—Revelasyon 8:12.
10. Ki mannyer lalimyer i briye dan teneb ozordi, e konman bann dimoun dou i benefisye?
10 Dan sa teneb, Zeova pe fer lalimyer briye pour benefis bann ki dou. I pe servi son bann serviter swazir lo later, ‘lesklav fidel e pridan’ ki pe ‘briye konman bann lalimyer.’ (Matye 24:45; Filipyen 2:15) Sa group ki reprezant sa lesklav, siporte par plizyer milyon ‘lezot mouton,’ i reflekte lalimyer spirityel baze lo Parol Bondye, Labib. (Zan 10:16) Dan fernwar sa monn, sa lalimyer i donn bann dimoun dou lespwar, i asiste zot pour annan en relasyon avek Bondye, e i ed zot pour evit bann latrap spirityel. Sa lalimyer i presye, i donn lavi.
“Mon Loue Ou Non”
11. Ki lenformasyon Zeova ti fourni dan letan Izai?
11 Ki kalite gidans Zeova ti fourni dan sa lepok teneb ki Izai ti viv ladan e dan sa peryod pli fernwar ki ti swiv apre ki bann Babilonnyen ti anmenn nasyon Zeova an egzil? Apar ki fourni gidans moral, i ti klerman donn en apersi lo konman i ti pou akonpli son bann plan an rapor avek son pep. Pran, par egzanp, sa bann profesi merveye ki dan Izai sapit 25 a 27. Dan sa bann sapit nou vwar konman ki Zeova ti diriz bann levennman dan sa letan e konman i pe fer li osi denozour.
12. Ki Izai ti eksprimen ofon son leker?
12 Premyerman, Izai ti deklare: “O Zeova, ou mon Bondye. Mon glorifye ou, mon loue ou non.” En lekspresyon louanz telman profon! Me kwa ki ti pous sa profet pour pronons en tel lapriyer? En rezon pli enportan i ganny revele dan larestan sa verse, kot nou lir: “Akoz ou’n [Zeova] fer bann keksoz merveye, bann konsey depi lontan, avek fidelite, avek lwayote.”—Izai 25:1.
13. (a) Ki konnesans ki ti ranforsi lapresyasyon ki Izai ti annan pour Zeova? (b) Konman nou kapab aprann par legzanp Izai?
13 Dan letan Izai, Zeova ti’n fer plizyer keksoz merveye pour Izrael, e sa bann keksoz ti’n ganny met an ekrir. Evidaman, Izai ti familye avek sa bann lekritir. I ti konnen, par egzanp, ki Zeova ti tir son pep an lesklavaz Lezip e delivre zot dan lakoler larme Faraon kot Lanmer Rouz. I ti konnen ki Zeova ti gid son pep dan dezer e anmenn zot dan Later Promiz. (Psonm 136:1, 10-26) Sa bann resi istorik ti demontre ki Zeova Bondye i fidel e diny konfyans. Son “bann konsey”—tou sa ki i deside—i vin vre. Konnesans egzakt, fourni par Bondye li menm, ti fortifye Izai pour kontinyen mars dan lalimyer. Alor, i ti en bon legzanp pour nou. Si nou etidye atantivman Parol Bondye ki’n ganny met an ekrir e aplik li dan nou lavi, nou osi nou pou kapab reste dan lalimyer.—Psonm 119:105; 2 Korentyen 4:6.
En Lavil i Ganny Detrir
14. Ki ti ganny profetize lo en serten lavil, e probableman ki lavil sa?
14 En legzanp konsey Bondye i trouve dan Izai 25:2, kot nou lir: “Ou’n fer en lavil vin parey en ta ros, en lavil fortifye en rin, ki en latour abite par bann etranze i nepli en lavil, ki pa pou ganny rebatir pour letan endefini.” Lekel sa lavil? Dan en sans profetik Izai ti kapab pe koz lo Babilonn. Byensir, letan ti vreman arive kan Babilonn ti vin senpleman en ta ros.
15. Ki sa “gran lavil” ki egziste ozordi, e ki pou arive avek li?
15 Eski i annan en lot lavil ozordi ki koresponn avek lavil ki Izai ti mansyonnen? Wi. Liv Revelasyon i koz lo “sa gran lavil ki domin lo tou lerwa later.” (Revelasyon 17:18) Sa gran lavil i “Gran Babilonn,” lanpir mondyal fo relizyon. (Revelasyon 17:5) Ozordi, parti prensipal Gran Babilonn i Kretyente, avek son bann sef relizye ki premye pour opoz travay predikasyon konsernan Rwayonm ki pep Zeova pe akonpli. (Matye 24:14) Parey ansyen Babilonn, sepandan, Gran Babilonn pou tre byento ganny detri, i pa pou zanmen lev ankor.
16, 17. Konman ki bann lennmi Zeova in glorifye li dan letan ansyen e modern?
16 Ki Izai ti profetize ankor lo sa “lavil fortifye”? Izai i dir avek Zeova: “Bann ki en pep for pou glorifye ou, lavil bann nasyon dominer, pou per ou.” (Izai 25:3) Konman ki sa lavil ostil, “lavil bann nasyon dominer,” ti pou glorifye Zeova? Byen, mazinen ki ti arive avek Lerwa pli for ki’n annan an Babilonn, Neboukadnetsar. Apre en leksperyans ki ti fer li reflesir e ekspoz son prop febles, i ti forse rekonnet grander Zeova ek Son pouvwar tou pwisan. (Danyel 4:34, 35) Kan Zeova i egzers son pouvwar, menm son bann lennmi i forse, menm kontreker, pour rekonnet son bann travay pwisan.
17 Eski Gran Babilonn in deza forse rekonnet bann travay pwisan Zeova? Wi. Pandan premye lager mondyal, bann serviter swazir Zeova ti pres dan persekisyon. An 1918, zot ti anba detansyon spirityel kan bann zofisye prensipal Lasosyete Watch Tower ti ganny met dan prizon. Travay predikasyon ti preski aret net. Apre sa an 1919, Zeova ti reetablir son bann serviter e fortifye zot avek son lespri, apre kwa zot ti konmans akonpli sa lenstriksyon pour pres sa bon nouvel dan tou later abite. (Mark 13:10) Tousala, enkli lefe ki sa ti pou fer lo zot oponan, ti ganny profetize dan liv Revelasyon. Zot oponan ti “ranpli avek lafreyer e zot ti donn glwar Bondye lesyel.” (Revelasyon 11:3, 7, 11-13) I pa vedir ki zot tou zot ti konverti me zot ti forse rekonnet travay pwisan Zeova sa letan, zis parey Izai ti’n predir.
“En Forteres pour bann Dimoun Senp”
18, 19. (a) Akoz bann oponan pa’n reisi kas lentegrite pep Zeova? (b) Ki mannyer “lanmizik bann lider dominer” pou tennyen?
18 Izai i diriz son latansyon aprezan lo fason ki Zeova i azir avek bann ki mars dan lalimyer, i dir avek Zeova: “Ou’n vin en forteres pour bann dimoun senp, en forteres pour bann pov dan ladetres, en refiz kont tanpet lapli, en lonbraz kont lasaler, kan bann kou bann dominer i parey en tanpet lapli kont en miray. Parey lasaler dan en pei san delo, ou soumet tapaz bann etranze, lasaler avek lonbraz en nyaz. Lanmizik bann dominer in tennyen.”—Izai 25:4, 5.
19 Depi 1919, bann diktater in sey fer tou pour kas lentegrite bann vre adorater, me zot pa’n reisi. Akoz? Parski Zeova i forteres e en refiz pour son pep. I pe fourni lonbraz fre kont lasaler persekisyon brilan e pe debout parey en miray for kont tanpet lapli lopozisyon. Nou ki pe mars dan lalimyer Bondye, nou esper avek konfyans sa letan kot ‘lanmizik bann lider dominer pou ganny tennyen.’ Wi, nou esper avek enpasyans sa zour ler bann lennmi Zeova pou’n ganny retire.
20, 21. Ki festen ki Zeova i fourni, e ki sa festen pou enkli dan nouvo monn?
20 Zeova i fer plis ki protez son bann serviter. I pran swen avek zot konman en Papa ki kontan son zanfan. Apre ki i ti liber son pep avek Gran Babilonn an 1919, i ti met devan zot en festen laviktwar, en provizyon nouritir spirityel an abondans. Sa ti ganny predir dan Izai 25:6, kot nou lir: “Zeova bann larme pou sertennman fer pour tou pep, dan sa montanny, en festen avek bann nouritir ris an lwil, en festen avek diven ki’n repoze lo son lanmar, bann nouritir ris an lwil ranpli avek lanmwel, diven ki’n repoze lo son lanmar, filtre.” Konman nou privilezye pour annan en par dan sa festen! (Matye 4:4) ‘Latab Zeova’ i vreman sarze avek bann bon keksoz pour manze. (1 Korentyen 10:21) Atraver “lesklav fidel e pridan,” nou’n resevwar tou sa ki nou bezwen dan en sans spirityel.
21 I annan plis ankor avek sa festen ki ganny divinman fourni. Sa festen spirityel ki nou pe rezwir ozordi i rapel nou labondans nouritir fizik ki pou annan dan sa nouvo monn ki Bondye in promet. Alor, sa “festen avek bann nouritir ris an lwil” pou enkli nouritir fizik an abondans. Donk, personn pa pou lafen ni dan en sans fizik ni dan en sans spirityel. Vreman sa pou en soulazman pour nou bann Kretyen fidel ki ozordi pe soufer akoz bann “lafamin” ki ti ganny predir dan “siny” prezans Zezi! (Matye 24:3, 7) Pour zot, parol sa Psalmis i vreman rekonfortan. I ti dir: “I pou annan legren an abondans lo later, anler lo bout montanny pou annan en provizyon.”—Psonm 72:16.
22, 23. (a) Ki “travay trikote,” oubyen “lanvlop,” ki pou ganny retire, e akoz? (b) Konman ki ‘repros pep Zeova’ pou ganny retire?
22 Aprezan ekout sa pli zoli promes ankor. An konparan pese ek lanmor avek en “travay trikote” ouswa en “lanvlop,” Izai i dir: “Dan sa montanny [Zeova] pou sertennman anval lafas sa lanvlop ki pe anvlop tou dimoun, e sa travay trikote ki’n ganny trikote lo tou nasyon.” (Izai 25:7) Zis mazinen! Pese ek lanmor, ki’n pez limanite parey en blennket etoufan, pou nepli egziste. Konman nou pe esper sa zour kot bann benefis sakrifis ranson Zezi i ganny plennman aplike lo bann imen obeisan e fidel!—Revelasyon 21:3, 4.
23 Konsernan sa letan merveye, sa profet enspire i asir nou: “[Bondye] pou vreman anval lanmor pour touzour, e Souvren Senyer Zeova pou sertennman eswiy bann larm lo tou figir. E repros son pep i pou tire lo tou later, akoz Zeova li menm in dir.” (Izai 25:8) Personn pa pou mor avek bann lakoz natirel ouswa plere akoz zot in perdi en byenneme. Pa sa sanzman i en benediksyon! Deplis, pou napa okenn landrwa lo later kot ou pou antann repros ek bann propagann mansonz ki Bondye ek son bann serviter in andire sitan lontan. Akoz sa? Parski Zeova pou retir zot sours—Satan Dyab ki papa mansonz, ansanm avek tou son semans.—Zan 8:44.
24. Konman ki bann ki mars dan lalimyer i reazir anver bann travay pwisan Zeova dan zot faver?
24 Kan bann ki mars dan lalimyer i medit lo bann manifestasyon pwisans Zeova, zot ganny motive pour kriye avek lazwa: “Regarde! Sa i nou Bondye. Nou’n annan lespwar dan li, e i pou sov nou. Sa i Zeova. Nou’n annan lespwar dan li. Annou zwaye e rezwir dan delivrans par li.” (Izai 25:9) Byento bann dimoun drwat pou annan tou rezon pour rezwir. Sa teneb pou ganny retire konpletman, e bann fidel pou bennyen dan lalimyer Zeova pour leternite. Eski i annan okenn lespwar pli merveye ki sa? Ditou!
Eski Ou Kapab Eksplike?
• Akoz denozour i enportan pour mars dan lalimyer?
• Akoz Izai ti loue non Zeova?
• Akoz bann lennmi pa pou zanmen kas lentegrite pep Bondye?
• Ki bann benediksyon ris ki pe esper bann ki mars dan lalimyer?
[Kestyon]
[Portre lo paz 21]
Bann zabitan Zida ti sakrifye zanfan avek Molek
[Portre lo paz 23]
Konnesans lo bann akt pwisan Zeova ti pous Izai pour loue non Zeova
[Portre lo paz 24]
Bann ki drwat pou benny dan lalimyer Zeova pour touzour