Pep Restore Zeova I Loue Li Lo Later Antye
Pep Restore Zeova I Loue Li Lo Later Antye
“Mon pou sanz [langaz] bann pep pour en langaz pir, pour ki zot tou zot envok non Zeova.”—TSEFANYA 3:9.
1. Akoz bann mesaz kondannasyon ti akonpli lo Zida ek lezot nasyon?
EN MESAZ zizman telman pwisan ki Zeova ti enspir Tsefanya pour delivre! Sa bann parol kondannasyon ti akonpli lo nasyon Zida ek son kapital, Zerizalenm, parski sa bann dirizan ek lepep an zeneral pa ti pe fer lavolonte Zeova. Obor zot, bann nasyon tel konman Filisti, Moab, ek Amonn, ti pou osi eksperyans lakoler Bondye. Akoz? Pour zot lopozisyon kriyel pandan plizyer santenn lannen anver pep Bondye. Pour sa menm rezon, pwisans mondyal Asiryen ti pou ganny detrir e i pa ti pou zanmen ganny reetablir.
2. Lekel ki ti aparaman ganny adrese dan Tsefanya 3:8?
2 Toutfwa, ti annan serten ki ti byen dispoze dan ansyen Zida. Zot ti pe esper avek enpasyans egzekisyon zizman divin kont bann mesan e aparaman zot ti sa bann ki ti ganny adrese par sa parol: “ ‘Kontinyen espekte mwan,’ se sa ki Zeova i deklare, ‘ziska zour mon leve pour fer ravaz, akoz mon desizyon zizman se pour reini bann nasyon, pour mon rasanble bann rwayonm, pour devers lo zot mon denonsyasyon, tou mon lakoler brilan; akoz par dife mon larder tou later pou ganny devore.’ ”—Tsefanya 3:8.
“En Langaz Pir” pour Lekel?
3. Ki mesaz lespwar Tsefanya ti ganny enspire pour delivre?
3 Wi, Tsefanya ti anons mesaz kondannasyon Zeova. Me sa profet ti osi ganny enspire pour donn en mesaz lespwar merveye—enn ki ti pou tre rekonfortan pour bann ki ti kontinyen reste fidel avek Zeova. Parey ti rikorde dan Tsefanya 3:9, Zeova ti deklare: “Apre mon pou sanz [langaz] bann pep pour en langaz pir, pour ki zot tou zot envok non Zeova, pour ki zot servi li zepol kont zepol.”
4, 5. (a) Ki ti pou arive avek bann dimoun move? (b) Lekel ki ti pou benefisye atraver sa, e akoz?
4 Me ti pou annan dimoun ki pa ti pou ganny sa langaz pir. Sa profesi i fer remark lo zot an dizan: “Mon pou retir parmi ou, ou bann orgeye ki zwaye.” (Tsefanya 3:11) Alor bann orgeye ki ti montre laenn pour bann lalwa Bondye e ki ti pe pratik sa ki mal, ti pou ganny retire. Lekel ki pou benefisye atraver sa? Tsefanya 3:12, 13 i deklare: “Mon [Zeova] pou sertennman les parmi ou en pep ki annan limilite ek modesti, e zot pou vreman pran refiz dan non Zeova. Konsernan sa bann ki pou ganny lese an Izrael, zot pa pou fer sa ki move, ni koz en mansonz, ni en lalang rize pa pou ganny trouve dan zot labous; akoz zot menm zot pou manze e alonze vreman, e pou napa personn ki pour fer zot tranble.”
5 En restan fidel dan ansyen Izrael, ti pou benefisye. Akoz? Parski zot ti azir an armoni avek sa parol: “Resers Zeova, zot tou ki annan limilite lo later, ki’n pratik Son prop desizyon zizman. Resers ladrwatir, resers limilite. Probableman ou kapab ganny kasyet zour lakoler Zeova.”—Tsefanya 2:3.
6. Ki ti arive dan premye lakonplisman profesi Tsefanya?
6 Dan premye lakonplisman profesi Tsefanya, Bondye ti pini Zida enfidel an 607 A.N.L an permetan Pwisans Mondyal, Babilonn, pour kaptir li e anmenn son pep an egzil. Serten enkli profet Zeremi ti ganny proteze, e lezot ti reste fidel avek Zeova an egzil. An 539 A.N.L., Babilonn ti ganny defet par Med ek Pers anba Lerwa Siris. Apepre de an plitar, Siris ti deklar en lalwa ki ti permet larestan Zwif retourn dan zot pei natal. Avek letan, tanp Zerizalenm ti ganny rebatir, e bann pret ti dan en pozisyon pour ankor enn fwa enstri lepep dan Lalwa. (Malaki 2:7) Alor Zeova ti beni sa restan ki ti’n reetablir—osi lontan ki zot ti reste fidel.
7, 8. Avek ki sa parol profetik dan Tsefanya 3:14-17 i aplike, e akoz ou dir sa?
7 Konsernan bann ki ti pou rezwir sa restorasyon, Tsefanya ti predir: “Pous bann kri lazwa, O fiy Siyon! Lans bann laklamasyon, O Izrael! Rezwir e montre lazwa avek ou tou leker, O fiy Zerizalenm! Zeova in retir sa bann zizman kont ou. I’n fer ale ou lennmi. Lerwa Izrael, Zeova, i parmi ou. Ou pou nepli per kalamite ankor. Sa zour Zerizalenm pou ganny dir: ‘Pa per, O Siyon. Ki ou lanmen pa tonbe. Zeova ou Bondye i parmi ou. Konman sa Enn pwisan, i pou delivre. I pou rezwir avek lazwa akoz ou. I pou vin silans dan son lanmour. I pou zwaye avek bann kriye lazwa akoz ou.’ ”—Tsefanya 3:14-17.
8 Sa parol profetik ti refer avek sa larestan ki ti ganny retire an egzil an Babilonn e ganny anmennen dan pei zot zanset. Sa i ganny met okler dan Tsefanya 3:18-20, kot nou lir: “ ‘Sa bann akable avek sagren akoz labsans zot sezon festival mon [Zeova] pou sertennman rasanble ansanm; zot ti lwen avek ou, parski zot ti pe port laont akoz li. La mon pe azir kont tou bann ki pe afliz ou, dan sa letan; e mon pou sov li ki pe bwate, e li ki’n disperse mon pou rasanble. E mon pou plas zot konman en non e konman en louanz dan tou pei zot laont. Dan sa letan mon pou fer zot antre, wi dan sa letan mon pou rasanble zot ansanm. Akoz mon pou fer zot en non ek en louanz parmi tou bann dimoun lo later, ler mon rasanble ankor zot bann prizonnyen devan zot lizye,’ Zeova in dir.”
9. Ki mannyer Zeova ti fer en non pour li menm an rapor avek Zida?
9 Imazin sok bann nasyon zalantour ki ti bann lennmi pep Bondye! Bann zabitan Zida ti’n ganny anmennen prizonnyen par pwisan Babilonn, aparaman san okenn lespwar pour ganny libere en zour. Deplis, zot pei ti reste inabite. Me par pwisans Zeova, zot ti ganny reetablir dan zot pei natal apre 70 lannen, tandis ki bann nasyon lennmi ti pe diriz ver destriksyon. Zeova ti vreman fer en gran non pour li menm kan i ti reetablir sa larestan fidel! I ti fer zot “en non ek en louanz parmi tou bann dimoun.” Konman sa restorasyon ti anmenn louanz pour Zeova e pour bann ki ti port son non!
Ladorasyon Zeova i Ganny Eleve
10, 11. Kan ki lakonplisman mazer restorasyon Tsefanya ti pou arive, e ki mannyer nou konn sa?
10 En lot restorasyon ti arive dan premye syek (Nou Lepok), ler Zezi ti rasanble en restan Izrael pour vre ladorasyon. Sa ti en apersi sa ki ti pou arive, akoz lakonplisman mazer sa restorasyon ti pou plitar dan lavenir. Profesi Mika ti predir: “I pou arive dan parti final bann zour ki montanny lakaz Zeova pou ganny solidman etabli parlao bann montanny, e i pou sertennman ganny eleve parlao bann kolin; e la ki bann pep pou rasanble.”—Mika 4:1.
11 Kan sa ti pou arive? Parey Mika ti dir, “dan parti final bann zour”—wi, pandan “bann dernyen zour.” (2 Timote 3:1) Sa pou arive avan lafen sa sistenm mesan, pandan ki bann nasyon i ankor pe ador bann fo bondye. Mika 4:5 i dir: “Tou bann pep, zot, zot pou mars, sakenn onon zot bondye.” E konsernan bann vre adorater? Profesi Mika i reponn: “Me nou, lo nou kote, nou pou mars onon Zeova nou Bondye pour letan endefini, menm pour touzour.”
12. Konman ki vre ladorasyon in ganny eleve dan bann dernyen zour?
12 Alor, dan sa bann dernyen zour, “montanny lakaz Zeova [in] ganny solidman etabli parlao bann montanny.” Vre ladorasyon Zeova, ki nob e siperyer, in ganny solidman reetablir, e eleve parlao tou lezot kalite larelizyon. Parey profesi Mika ti osi predir, “la ki bann pep pou rasanble.” E bann ki pe pratik vre relizyon pou “mars onon Zeova [zot] Bondye pour letan endefini, menm pour touzour.”
13, 14. Kan ki sa monn ti antre dan “parti final bann zour,” e ki in arive avek vre ladorasyon apartir sa letan?
13 Bann levennman dan lakonplisman profesi Labib i prouve ki lemonn in antre dan “parti final bann zour”—son bann dernyen zour—an 1914. (Mark 13:4-10) Listwar i montre ki Zeova ti konmans rasanble en restan bann fidel Kretyen swazir, ki annan lesperans seles. Sa ti swiv par rasanbleman “en gran lafoul, . . . sorti dan tou nasyon, tribi, pep ek lalang”—bann ki annan lespwar pour viv eternelman lo later.—Revelasyon 7:9.
14 Depi Premye Lager Mondyal ziska ozordi, ladorasyon Zeova par bann ki port son non, in avans pli devan avek pwisans anba direksyon Zeova. I’n annan en ogmantasyon dan bann adorater Zeova sorti detrwa mil apre Premye Lager Mondyal pour apepre sis milyon ozordi, ki rasanble dan 91,000 kongregasyon dan 235 pei. Sak lannen, sa bann proklanmater Rwayonm pe dedye plis ki en bilyon er-d-tan pour loue Bondye piblikman. I kler ki bann Temwen Zeova i sa bann ki pe akonpli parol profetik Zezi: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:14.
15. Konman ki Tsefanya 2:3 pe ganny akonpli denozour?
15 Tsefanya 3:17 i fer sa remark: “Zeova ou Bondye i parmi ou. Konman sa Enn pwisan, i pou delivre.” Si bann serviter Zeova i beni avek prosperite spirityel pandan sa bann dernyen zour, se senpleman akoz zot annan li ‘parmi zot’ konman zot Bondye tou pwisan. Sa i osi vre ozordi zis parey i ti leka pandan restorasyon ansyen Zida an 537 A.N.L. Alor, nou kapab vwar konman Tsefanya 2:3 i trouv son lakonplisman mazer dan nou letan ler i dir: “Resers Zeova, zot tou ki annan limilite lo later.” An 537 A.N.L., “tou” ti enkli larestan bann Zwif ki ti sorti an egzil Babilonn. Me ozordi i reprezant bann dimoun avek limilite ki sorti dan tou nasyon atraver lemonn antye, sa bann ki pe favorableman reponn lapel sa travay global predikasyon e ki pe rasanble kot “montanny lakaz Zeova.”
Vre Ladorasyon Pe Prospere
16. Ki reaksyon ki probableman nou bann lennmi i annan ler zot vwar prosperite bann serviter Zeova dan nou letan?
16 Apre 537 A.N.L., bokou dan bann pei zalantour ti etonnen par restorasyon bann serviter Bondye dan zot pei natal e pour vre ladorasyon. Pourtan, sa restorasyon ti relativman lo en pti lesel. Eski ou kapab imazinen ki serten—menm bann lennmi pep Bondye—pe dir ler zot vwar sa lagrandisman eksepsyonnel, sa prosperite, e sa lelan ki bann serviter Zeova in pran dan letan modern? I tre probab ki serten sa bann lennmi i santi parey bann Farizyen ler zot ti vwar konman ki dimoun ti pe al ver Zezi. Zot ti eksklanmen: ‘Zot war! La tou dimoun pe swiv li.’—Zan 12:19.
17. Ki en ekriven ti dir lo bann Temwen Zeova, e ki devlopman ki zot in eksperyanse?
17 Dan son liv These Also Believe, Profeser Charles Braden ti dir: ‘Bann Temwen Zeova in literalman kouver later avek zot temwannyaz. Nou vreman kapab dir ki napa okenn lezot group relizye dan lemonn ki’n montre plis larder ek persistans dan zefor pour propaz sa bon nouvel Rwayonm ki bann Temwen Zeova. Sa mouvman pou tre probab kontinyen agrandi avek pli gran lafors.’ Pa i ti’n byen dir! Kan i ti ekrir sa 50 an pase, ti annan zis 300,000 Temwen ki ti pe prese atraver lemonn. Ki i ti pou dir ozordi, kot i annan apepre 20 fwa plis sa kantite—anviron sis milyon—ki pe pres sa bon nouvel?
18. Kisisa sa langaz pir, e avek ki Bondye in donn li?
18 Atraver son profet, Bondye ti promet: “Apre mon pou sanz [langaz] bann pep pour en langaz pir, pour ki zot tou zot envok non Zeova, pour ki zot servi li zepol kont zepol.” (Tsefanya 3:9) Dan sa bann dernyen zour, se bann Temwen Zeova ki envok non Zeova, ki servi li dan linite, dan en lyen lanmour ki pa pou zanmen kase—wi, “zepol kont zepol.” Zot sa bann aki Zeova in donn sa langaz pir. Sa langaz pir i enkli en konprenezon egzakt lo laverite konsernan Bondye ek son bann plan. Se selman Zeova ki kapab fourni sa konprenezon par mwayen son lespri sen. (1 Korentyen 2:10) Avek ki i’n donn son lespri? I’n donn selman “bann ki pe obei li” konman sef. (Akt 5:32) Selman bann Temwen Zeova ki pare pour obei Bondye konman Sef dan tou keksoz. Se pour sa rezon ki zot resevwar lespri Bondye e koz sa langaz pir, laverite konsernan Zeova ek son bann plan merveye. Zot servi sa langaz pir pour loue Zeova lo later antye e sa lo en lesel deplizanpli gran.
19. Koz sa langaz pir i enplik kwa?
19 Koz sa langaz pir i pa senpleman krwar laverite e ansenny li avek lezot me i osi enkli armoniz nou kondwit avek lalwa Bondye ek son bann prensip. Bann Kretyen swazir in pran linisyativ pour resers Zeova e koz sa langaz pir. Mazin sa ki zot in akonpli! Menm si bann Kretyen swazir in diminyen ziska mwens ki 8,700, apepre sis milyon lezot pe imit zot lafwa par resers Zeova e koz sa langaz pir. Sa i sa gran lafoul, ki pe kontinyen agrandi, sorti dan tou nasyon e ki pe egzers lafwa dan sakrifis ranson Zezi, ki pe rann en servis sakre dan lakour teres tanp spirityel Bondye, e ki pou sirviv sa “gran ladetres” ki pou byento abat lo sa monn enzis.—Revelasyon 7:9, 14, 15.
20. Ki lavenir i rezerve pour bann Kretyen swazir ki fidel e pour bann ki form parti sa gran lafoul?
20 Sa gran lafoul pou ganny entrodwir dan nouvo monn zis Bondye. (2 Pyer 3:13) Zezi Kri ek sa 144,000 Kretyen swazir ki ganny resisite pour servi konman bann lerwa ek pret avek li dan lesyel, pou form nouvo gouvernman later. (Romen 8:16, 17; Revelasyon 7:4; 20:6) Bann sirvivan sa gran ladetres pou travay pour fer later vin en paradi e pou kontinyen koz sa langaz pir ki Bondye in donn zot. Anfet, sa parol i aplik pour zot: “Tou ou garson [ek bann fiy, byensir] pou bann dimoun ki pou ganny ansennyen par Zeova, e lape ou bann garson pou an abondans. Ou pou solidman etabli dan ladrwatir.”—Izai 54:13, 14.
Pli Gran Travay Lansennyman dan Listwar
21, 22. (a) Parey Akt 24:15 i endike lekel ki pou bezwen ganny ansennyen sa langaz pir? (b) Ki travay lansennyman enkonparab ki pou deroule lo later anba dominasyon Rwayonm?
21 En gran group dimoun pou ganny loportinite pour aprann sa langaz pir dan nouvo monn. Sa i bann ki ganny mansyonnen dan Akt 24:15, kot i dir: “Tou dimoun bon konman move, pour resisite.” Dan lepase, bilyon in viv e mor san en konnesans egzakt lo Zeova. Dan en fason annord, i pou redonn zot lavi. E sa bann resisite pou bezwen ganny ansennyen sa langaz pir.
22 Pa i pou en privilez pour partisip dan sa gran travay lansennyman! I pou pli gran travay lansennyman ki’n deza arive dan listwar imen. Tousala pou ganny akonpli anba dominasyon emab Kris Zezi dan son pouvwar Rwayal. Par laswit, bann imen pou finalman vwar lakonplisman Izai 11:9, ki dir: “Later pou sertennman ganny ranpli avek lakonnesans Zeova parey ki delo pe kouver lanmer.”
23. Akoz ou kapab dir ki nou, etan pep Zeova, nou bokou privilezye?
23 Konman nou privilezye dan sa bann dernyen zour, pour prepare pour sa letan merveye kan konnesans Zeova pou vreman ranpli later! E ki privilez nou annan la konmela pour form parti avek pep Bondye, nou sa bann ki pe eksperyans lakonplisman sa parol rikorde dan Tsefanya 3:20! La Zeova i asir nou: “Mon pou fer zot en non ek en louanz parmi tou bann dimoun lo later.”
Konman Ou ti a Reponn?
• Ki bann lakonplisman ki profesi restorasyon Tsefanya ti annan?
• Konman ki vre ladorasyon in prospere dan sa bann dernyen zour?
• Ki gran travay lansennyman ki pou deroule dan nouvo monn?
[Kestyon]
[Portre lo paz 16]
Pep Zeova ti retourn dan zot pei natal pour reetablir ladorasyon pir. Eski ou konnen ki son lenportans ozordi?
[Portre lo paz 18]
Par koz sa “langaz pir,” bann Temwen Zeova i ofer dimoun mesaz rekonfortan dan Labib