Zour Zizman Zeova I pros!

“Sa gran zour Zeova i pros. I pros, e i pe depes bokou.”—TSEFANYA 1:14.

1. Ki Bondye ti averti atraver Tsefanya?

ZEOVA pe al lans an aksyon kont bann mesan. Ekoute! Sa i son lavertisman: “Mon pou met en lafen avek zonm tire dan sirfas later . . . mon pou retrans bann imen lo sirfas later.” (Tsefanya 1:3) Sa parol Souvren Senyer Zeova ti ganny anonse atraver son profet Tsefanya, petet aryer-aryer pti zanfan Lerwa fidel, Izkiya. Sa deklarasyon, ki ti ganny anonse dan letan sa bon Lerwa, Yosiya, pa ti pe predir dibyen pour bann mesan ki ti pe reste an Zida.

2. Akoz bann aksyon ki Yosiya ti pran pa ti anpes zour zizman Zeova arive?

² Aktivite Tsefanya an rapor avek sa profesi, san dout, ti sansibiliz konsyans zenn Yosiya lo nesesite pour debaras Zida avek ladorasyon enpir. Me bann aksyon lerwa pour debaras sa pei avek bann fo larelizyon pa ti elimin tou mesanste parmi lepep oubyen kouver bann pese son granpapa, Lerwa Manase, ki ti’n “ranpli Zerizalenm avek disan inosan.” (2 Lerwa 24:3, 4; 2 Kronik 34:3) Sirman, alor, zour zizman Zeova ti pou vini.

3. Ki mannyer nou kapab sir ki i posib pour sirviv “zour lakoler Zeova”?

³ Sa zour efreyan ti pou annan, toudmenm, bann sirvivan. Alor, profet Bondye ti sipliye: “Avan ki sa ki’n ganny ordonnen i donn nesans okenn keksoz, avan ki lazournen i pase zis parey lapousyer lapay, avan ki i ariv lo zot lakoler brilan Zeova, avan ki i ariv lo zot zour lakoler Zeova, resers Zeova, zot tou ki annan limilite lo later, ki’n pratik Son desizyon zizman. Resers ladrwatir, resers limilite. Probableman ou kapab ganny kasyet zour lakoler Zeova.” (Tsefanya 2:2, 3) Annou egzamin liv Labib Tsefanya, verse par verse, an gardan antet lespwar pour sirviv zour zizman Zeova. Sa liv ti ganny ekrir an Zida avan 648 A.N.L. (Avan Nou Lepok), e i form parti ‘parol profetik’ aki nou tou nou devret antyerman port atansyon.—2 Pyer 1:19.

Lanmen Zeova Pou Avanse

4, 5. Konman ki Tsefanya 1:1-3 ti akonpli lo bann dimoun mesan an Zida?

⁴ “Parol Zeova” adrese avek Tsefanya i konmans avek sa lavertisman ki ti ganny site pli boner. Bondye i deklare: “ ‘Mon pou san fot met en lafen avek tou keksoz lo sirfas later,’ se sa deklarasyon Zeova. ‘Mon pou met en lafen avek zonm tire dan sirfas later ek bebet. Mon pou met en lafen avek kreatir volan lesyel ek bann pwason lanmer, ek bann lobstak ki fer tonbe, avek bann mesan; e mon pou retrans bann imen lo sirfas later,’ se sa deklarasyon Zeova.”—Tsefanya 1:1-3.

⁵ Wi, Zeova ti pe al met en lafen avek mesanste ki ti sokan dan pei Zida. Lekel ki Bondye ti pou servi pour “met en lafen avek tou keksoz lo sirfas later”? Vi ki Tsefanya ti aparaman profetiz boner dan renny Lerwa Yosiya, ki ti konmans an 659 A.N.L., sa bann parol profetik ti ganny en lakonplisman kan Zida ek son kapital, Zerizalenm, ti ganny devaste par bann Babilonnyen an  607 A.N.L. Sa letan, bann dimoun mesan an Zida ti eksperyans en ‘lafen total.’

6-8. Ki Tsefanya 1:4-6 ti predir, e konman ki sa profesi ti akonpli dan ansyen Zida?

⁶ Tsefanya 1:4-6 i predir bann aksyon ki Bondye ti pou pran kont bann fo adorater. Nou lir: “Mon pou avans mon lanmen kont Zida e kont tou zabitan Zerizalenm, e mon pou retrans dan sa landrwa larestan ki pour Baal, non bann pret bann bondye etranze ansanm avek sa bann pret, e sa bann ki pe salye larme lesyel lo bann twa, e sa bann ki pe salye, pe fer bann serman avek Zeova e pe fer serman par Malkam; e sa bann ki pe rekile pour swiv Zeova e ki pa’n resers Zeova e pa’n enteroz li.”

⁷ Zeova ti avans son lanmen kont bann dimoun an Zida ek Zerizalenm. I ti determinen pour retrans dan lanmor bann adorater bondye Kananeen, Baal, ki ti senbol fertilite. Plizyer rezyon ti annan zot bondye Baal lokal akoz zot adorater ti panse ki sa bann Baal ti posed e enfliyans serten rezyon. Par egzanp, ti annan sa Baal adore par bann Moabit ek bann Madyanit, lo montanny Peor. (Nonm 25:1, 3, 6) Partou dan Zida, Zeova ti pou retrans bann pret Baal, osi byen ki bann pret Levit enfidel ki ti pe vyol lalwa Bondye ler zot ti asosye avek sa bann endividi.—Egzod 20:2, 3.

⁸ Bondye ti pou osi retrans sa bann ki ‘pe salye larme lesyel,’ evidaman pe pratik astrolozi e pe ador soley. (2 Lerwa 23:11; Zeremi 19:13; 32:29) Lakoler divin ti pou osi ganny lanse, lo sa bann ki ti pe esey melanz vre ladorasyon avek fo larelizyon an ‘fezan bann serman avek Zeova e par Malkam.’ I posib ki Malkam i en lot non pour Molek, bondye prensipal bann Amonit. Ladorasyon Molek ti enkli sakrifis zanfan.—1 Lerwa 11:5; Zeremi 32:35.

Byento Lafen Kretyente!

9. (a) Kretyente i koupab pour kwa? (b) Kontrerman avek bann enfidel an Zida, ki nou devret determinen pour fer?

⁹ Tousala i kapab fer nou mazin Kretyente, anfonse dan fo ladorasyon ek astrolozi. Son rol dan sakrifis plizyer milyon lavi lo lotel lager, siporte par bann sef relizye, i vreman degoutan! Annou pa zanmen vin parey bann enfidel an Zida, ki ti ‘rekile pour swiv Zeova,’ vin endiferan e nepli resers li oubyen rod son gidans. Plito, annou mentenir nou lentegrite avek Bondye.

10. Konman ou ti a eksplik sinifikasyon profetik Tsefanya 1:7?

¹⁰ Bann parol swivan sa profet i adapte avek bann ki ti pe fer move an Zida ensi ki bann mesan denozour. Tsefanya 1:7 i dir: “Gard silans devan Souvren Senyer Zeova;  akoz zour Zeova i pros, akoz Zeova in prepar en sakrifis; i’n sangtifye son bann envite.” Sa bann “envite” ti aparaman lennmi Zida, bann Kaldeen. Zida li menm, enkli son lavil, ti sa “sakrifis.” Tsefanya ti alor anons plan Bondye pour detrir Zerizalenm, e sa profesi i osi endik destriksyon bann swadizan Kretyen. Anfet, avek zour zizman Bondye ki sitan pros ozordi, lemonn antye i devret ‘gard silans devan Souvren Senyer Zeova’ e ekout sa ki i dir atraver sa “pti troupo,” bann disip Zezi ki’n ganny swazir, ek zot konpanyon, ‘lezot mouton.’ (Lik 12:32; Zan 10:16) Destriksyon total pe esper tou bann ki pa pou ekoute e ki dan sa fason pe pran pozisyon kont Rwayonm Bondye.—Psonm 2:1, 2.

Byento—En Zour Irlman!

11. Ki mesaz Tsefanya 1:8-11 i fer resorti?

¹¹ Konsernan zour Zeova, Tsefanya 1:8-11 i azoute: “ ‘I devret arive zour sakrifis Zeova ki mon pou donn latansyon bann prens, ek bann garson lerwa, ek tou sa bann ki pe met bann resanz etranze. E mon pou donn latansyon tou dimoun ki pe mont lo en platform sa zour, sa bann ki pe ranpli lakaz zot met avek vyolans ek tronpri. E i devret arive sa zour,’ se sa deklarasyon Zeova, ‘tapaz en leokri sorti kot Baro Pwason, ek en irlman sorti kot dezyenm seksyon lavil, ek en gran fraka sorti dan bann kolin. Irle, ou zabitan Maktes, akoz tou dimoun ki marsan in vin silans; tou sa bann ki pe pez larzan in ganny retranse.’ ”

12. Konman ki serten i ganny trouve pe “met resanz etranze”?

¹² Yeoaaz, Yeoyakim ek Yeoakin ti pou vin Lerwa apre Yosiya. Apre ti pou vin dominasyon Izkiya, ki ti ganny marke par destriksyon Zerizalenm. Menm si en tel kalamite ti devan zot, serten ti aparaman rod laprouvasyon bann nasyon dan zalantour par “met bann resanz etranze.” Pareyman, ozordi bokou pe montre klerman, dan diferan fason, ki zot pa form parti lorganizasyon Zeova. Vi ki, dan en fason evidan, zot form parti lorganizasyon Satan, zot pou ganny pini.

13. An armoni avek profesi Tsefanya, ki ti pou arive kan bann Babilonnyen ti pou atak Zerizalenm?

¹³ “Sa zour” pour Zida rann kont i koresponn avek zour Zeova pour egzekit zizman lo son bann lennmi, pour met lafen avek mesanste, e pour prouv son  siperyorite. Pandan ki bann Babilonnyen ti atak Zerizalenm, ti pou annan en leokri sorti kot Baro Pwason. I posib ki i’n ganny apele koumsa parski i pros avek bazar pwason. (Neemya 13:16) Bann troup Babilonnyen ti pou antre dan sa landrwa ki apel dezyenm seksyon, e sa “gran fraka sorti dan bann kolin” i kapab pe dekrir tapaz ki bann Kaldeen i fer anmezir ki zot aprose. Ti pou annan “en irlman” par bann zabitan Maktes, petet pli o dan Vale Tiropeonn. Akoz zot ti pou irle? Parski aktivite komersyal, enkli “sa bann ki pe pez larzan,” ti pou termin lanmenm.

14. Ziska ki pwen Bondye pou egzamin son bann adorater ki pretann servi li?

¹⁴ Ziska ki pwen Zeova ti pou egzamin son bann adorater ki pretann servi li? Sa profesi i kontinyen: “I pou arive dan sa letan ki mon pou egzamin, avek bokou swen, Zerizalenm avek bann lalanp, e mon pou donn latansyon sa bann zonm ki pe kaye parey diven son lanmar e pe dir dan zot leker, ‘Zeova pa pou fer bon, e i pa pou fer move.’ E zot fortin pou vin en keksoz pour depouye e zot lakaz pour en landrwa abandonnen. E zot pou konstri bann lakaz, me zot pa pou reste ladan; e zot pou plant bann plantasyon rezen, me zot pa pou bwar son diven.”—Tsefanya 1:12, 13.

15. (a) Ki ti pe al arive avek bann pret enfidel an Zerizalenm? (b) Kwa ki’n ganny rezerve pour bann pratikan fo larelizyon ozordi?

¹⁵ Bann pret enfidel Zerizalenm ti pe melanz ladorasyon Zeova avek bann fo larelizyon. Menm ki zot ti santi zot an sekirite, Bondye ti pou rod zot konmsi i pe rod avek bann lalanp briyan ki ti pou penetre sa fernwanr spirityel kot zot ti’n pran refiz. Personn pa ti pou sov sa proklanmasyon ek egzekisyon zizman divin. Sa bann enfidel ensousyan in poze parey lanmar diven dan fon en barik. Zot pa ti anvi ganny deranze par okenn deklarasyon lentervansyon divin dan bann zafer imen, me zot pa ti pou sap legzekisyon zizman Bondye lo zot. Bann pratikan fo larelizyon ozordi, enkli bann relizyon swadizan Kretyen, ek bann ki’n devye avek ladorasyon Zeova pa pou reisi sove zot osi. An refizan pour krwar ki nou pe viv dan “bann dernyen zour,” zot dir dan zot leker, “Zeova pa pou fer bon, e i pa pou fer move.” Pa zot tronpe!—2 Timote 3:1-5; 2 Pyer 3:3, 4, 10.

16. Ki ti pou arive kan zizman divin i ganny egzekite lo Zida, e konman ki sa konnesans i afekte nou?

¹⁶ Bann enfidel an Zida ti ganny averti ki bann Babilonnyen ti pou depouy zot fortin, devaste zot lakaz, e pran fri zot bann plantasyon rezen. Bann byen materyel ti pou nepli annan valer ler zizman divin i ganny egzekite lo Zida. I pou koumsa menm zour zizman Zeova i vin lo sa sistenm aktyel. Alor, fotespere ki nou annan en pwenn-vi spirityel e ‘akimil bann trezor dan lesyel’ an gardan servis Zeova premye dan nou lavi!—Matye 6:19-21, 33.

“Gran Zour Zeova i Pros”

17. Dapre Tsefanya 1:14-16, eski zour Zeova i pros?

¹⁷ Eski zour zizman Zeova i ankor lwen oubyen i pros? Dapre Tsefanya 1:14-16, Bondye i donn sa lasirans: “Sa gran zour Zeova i pros. I pros, e i pe depes bokou. Dibri zour Zeova i anmer. En leokri pe sap en zonm. Sa zour i en zour firer, en zour ladetres ek langwas, en zour tanpet ek dezolasyon, en zour fernwar ek teneb, en zour nyaz ek teneb epe, en zour tronpet ek sinyal alarm, kont bann lavil fortifye e kont bann gran latour dan kwen miray.”

18. Akoz ki nou pa merit konklir ki zour Zeova i ankor byen lwen?

¹⁸ An Zida, bann pret, bann prens, ek bann dimoun peser ti ganny averti ki ‘gran zour Zeova ti pros.’ Pour Zida, ‘zour Zeova ti pou depes bokou.’ Pareyman dan nou letan, fodre ki personn pa panse ki egzekisyon zizman Zeova lo mesan i ankor byen lwen dan  lavenir. Okontrer, zis parey Bondye ti azir vit an Zida, son zour egzekisyon pou osi ‘depese.’ (Revelasyon 16:14, 16) Pa i pou en letan anmer pour tou bann ki inyor lavertisman donnen par son bann Temwen e ki pa’n soutenir vre ladorasyon!

19, 20. (a) Dekrir legzekisyon lakoler Zeova ki ti ganny eksprimen lo Zida ek Zerizalenm? (b) Ki kestyon ki ganny demande an rapor avek destriksyon selektif sa monn aktyel?

¹⁹ Kan legzekisyon lakoler Bondye ti ganny eksprimen lo Zida ek Zerizalenm, i ti “en zour ladetres ek langwas.” Bann anvaiser Babilonnyen ti koz bann zabitan Zida bokou soufrans, enkli langwas pour fer fas avek lanmor ek destriksyon. Sa “zour tanpet ek dezolasyon” ti enn ki ti fernwanr, nyaze, ek teneb epe, petet pa selman senbolikman me osi literalman parski lafimen ek masak ti partou. I ti “en zour tronpet ek sinyal alarm,” me bann lavertisman ti sonn anven.

²⁰ Bann veyer Zerizalenm pa ti kapab fer nanryen kan bann poto destriksyon Babilonn ti zet “sa bann gran latour” ater. Pareyman bann sistenm defans sa monn aktyel pa pou servi dan nanryen kont bann zarm larmiri seles Bondye, ki i pare pour servi dan en destriksyon selektif. Eski ou swete ganny proteze? Alor, eski ou’n pran en pozisyon ferm lo kote Zeova, ki ‘gard tou bann ki kontan li, me ki pou elimin tou bann mesan’?—Psonm 145:20.

21, 22. Konman ki Tsefanya 1:17, 18 pou akonpli dan nou letan?

²¹ Pa i teribleman efreyan sa zour zizman ki’n ganny predir dan Tsefanya 1:17, 18! “Mon pou koz ladetres pour limanite,” Zeova Bondye i dir, “e zot pou sertennman mars parey bann zonm aveg; parski se kont Zeova ki zot in pese. E zot disan pou aktyelman ganny verse parey lapousyer, e zot trip parey malpropte. Ni zot larzan ni zot lor pa pou kapab delivre zot zour firer Zeova; me par dife son larder tou later pou ganny devore, parski i pou fer eksterminasyon, enn vreman terib, lo tou zabitan later.”

²² Parey i ti fer dan letan Tsefanya, Zeova pou byento anmenn ladetres lo “tou  zabitan later,” sa bann ki refize pour ekout son lavertisman. Parski zot fer pese kont Bondye, zot pou marse partou san defans parey bann zonm aveg, enkapab pour trouv delivrans. Zour zizman Zeova, zot disan “pou aktyelman ganny verse parey lapousyer,” konman en keksoz san valer. Zot lafen pou vreman en lafen laont, akoz Bondye pou eparpiy lekor—menm zantray—sa bann mesan lo later, “parey malpropte.”

23. Menm si bann ki pratik lemal pa pou sove “zour lakoler Zeova,” ki lespwar profesi Tsefanya i ofer nou?

²³ Napa personn ki kapab sov bann ki lager kont Bondye ek son pep. Ni larzan ni lor pa ti pou kapab delivre sa bann ki ti pe pratik lemal an Zida, demenm bann stok fortin ek bann gous larzan pa pou fourni okenn proteksyon oubyen delivrans “zour lakoler Zeova” lo Kretyente ek larestan sa sistenm mesan. Sa zour desizyon, “tou later pou ganny devore” par dife larder Bondye pandan ki i ekstermin bann mesan. Parski nou annan lafwa dan parol profetik Bondye, nou konvenki ki nou aktyelman byen avanse dan “letan lafen.” (Danyel 12:4) Zour zizman Zeova i pros, e i pou byento egzekit vanzans lo son bann lennmi. Toutfwa, profesi Tsefanya i ofer lespwar pour delivrans. Alor, ki nou bezwen fer si nou anvi ganny kasyet zour lakoler Zeova?

Konman Ou Ti Pou Reponn sa?

• Ki mannyer profesi Tsefanya ti akonpli lo Zida ek Zerizalenm?

• Kwa ki’n ganny rezerve pour Kretyente ek tou bann mesan denozour?

• Akoz nou pa devret panse ki zour zizman Zeova i ankor byen lwen?

[Kestyon]

[Portre lo paz 4]

Avek lardyes, Tsefanya ti anonse ki zour zizman Zeova i pros

[Portre lo paz 4]

Apartir Self-Pronouncing Edition of the Holy Bible, ki kontyen versyon King James ek Revised

[Portre lo paz 5]

An 607 A.N.L., zour Zeova ti abat lo Zida ek Zerizalenm anba lanmen bann Babilonnyen

[Portre lo paz 7]

Eski ou swete ganny eparnyen ler Zeova i detri mesanste?