Bann Benediksyon Rwayonm I Kapab Vin Pour Ou

LAPOT Pol ti kapab koz fasilman dan serten langaz mazer dan son letan. I ti’n resevwar en ledikasyon ki egal avek en nivo liniversite ozordi. I ti rezwir tou lavantaz ek drwa konman en sitwayen Romen. (Akt 21:37-40; 22:3, 28) Sa bann kalifikasyon ti pou’n kapab permet li vin ris e vin en dimoun distenge. Me, i ti dir: “Tou sa bann keksoz ki mon ti krwar ti en gen pour mwan, aprezan mon konsider zot konman en pert akoz Kris . . . mon konsider tousala konman salte, pour mwan kapab ganny Kris.” (Filipyen 3:7, 8) Akoz ki Pol ti fer en tel deklarasyon?

Avan sa i ti renonmen konman Sol ki sorti Tars e konman en persekiter sa bann “ki pe swiv Semen Senyer.” Pol ti vin en krwayan apre ki i ti’n ganny en vizyon lo Zezi ki ti’n resisite e ganny glorifye. (Akt 9:1-19) Pour Pol, sa leksperyans lo semen Damas ti prouve enn fwa pour tou ki Zezi ti sa Mesi promiz, oubyen Kris, sa fitir dirizan Rwayonm promiz. I ti osi anmenn en sanzman remarkab dan lavi Pol, parey i ti endike pli boner dan son deklarasyon pwisan. Andotmo, vi ki i ti senser e annan en leker onnet, Pol ti repantir.—Galat 1:13-16.

 Dan Labib, sa verb “repantir” i souvan ganny tradwir apartir en mo Grek ki literalman vedir “konnen apre,” opoze avek “konnen avan.” Savedir repantans i enkli en sanzman dan leta lespri, latitid, oubyen lentansyon en dimoun, ki fer li rezet sa fason viv lepase konmkwa ki i pa ti satisfezan. (Akt 3:19; Revelasyon 2:5) Dan ka Pol, i pa ti les sa moman enportan lo semen Damas reste konman zis en leksperyans emosyonnel oubyen senpleman en leksperyans spirityel. Pour li sa levennman ti sekwe li pour fer li realize ki fason ki i ti pe viv avan, dan inyorans Kris, ti san valer. I ti osi realize, ki pour li benefisye avek son nouvo konnesans lo Kris, i ti devret fer serten keksoz pour koriz son fason viv.—Romen 2:4; Efezyen 4:24.

En Sanzman Ki Anmenn Benediksyon

En gran poursantaz konnesans ki Pol ti’n deza gannyen lo Bondye ti sorti dan sekt Farizyen, dan ki i ti en manm. Zot bann krwayans ti enkli bokou filozofi ek tradisyon zonm. Akoz bann prezidis relizye, zel ek zefor Pol ti’n ganny mal dirize. Kantmenm i ti krwar ki i ti pe servi Bondye, i ti an realite pe lager kont li.—Filipyen 3:5, 6.

Apre ki i ti’n resevwar konnesans egzakt lo Kris ek son rol dan plan Bondye, Pol ti kapab realize ki i ti annan en swa devan li: Eski i devret reste en Farizyen e kontinyen rezwir privilez ek lestim, oubyen eski i devret sanz son fason viv e konmans fer tou sa ki ti neseser pour ganny laprouvasyon Bondye? Erezman, Pol ti fer sa bon swa, akoz i ti dir: “Mon pa onte pour anons Levanzil, i en pisans Bondye pour sov tou sa ki kwar, premyerman Zwif, answit bann Grek.” (Romen 1:16) Pol ti vin en predikater zele bon nouvel lo Kris e lo Rwayonm.

Bokou lannen plitar, Pol ti dir son bann konpanyon Kretyen: “Mon bann frer, mon pa dir ki mon’n fini ganny sa pri, me mon fer en sel keksoz: mon oubliy tou sa ki deryer mwan, e mon fer tou pour ganny sa ki par devan. Mon tay for pour mwan ariv lo bit, pour ganny sa pri, ki Bondye par Kris-Zezi, in apel nou pour resevwar lao.” (Filipyen 3:13, 14) Pol ti benefisye avek bon nouvel parski i ti volonterman abandonn tou sa ki ti pe elwanny li avek Bondye e i ti pourswiv avek tou son leker bann lobzektif ki ti anliny avek plan Bondye.

Ki Ou Pou Fer?

Petet resaman ou’n antann bon nouvel Rwayonm. Eski lespwar pour viv pour touzour dan en paradi parfe i atir ou? I devret, vi ki nou tou nou annan en dezir natirel pour viv e rezwir lavi dan lape ek sekirite. Labib i dir ki Bondye in met “letan endefini” dan nou leker. (Eklezyast 3:11) Alor i natirel pour nou esper sa moman ler dimoun pou kapab viv pour touzour dan lape ek boner. E se sa ki bon nouvel Rwayonm i ofer nou.

Sepandan, pour fer sa lespwar vin en realite, ou bezwen egzaminen e dekouver kisisa sa bon nouvel. Lapot Pol ti donn sa konsey: “Pour ki zot a kapab konpran lavolonte Bondye: Sa ki bon, sa ki fer li plezir, sa ki parfe.” (Romen 12:2) Alor parey Pol, apre ki ou’n resevwar konnesans ek konpreansyon, ou bezwen fer en swa.

Lo lot kote, ou kapab deza annan serten krwayans konsernan ou lavenir. Mazinen ki Sol ti annan son prop lide lo lavolonte Bondye avan ki i ti vin lapot Pol. Me olye ekspekte en revelasyon mirakilez sorti kot Bondye, akoz ou pa egzamin sa size san okenn prezidis? Demann ou lekor: ‘Eski mon vreman konnen ki lavolonte Bondye pour limanite ek later? Ki bann laprev ki mon kapab ofer pour siport mon bann krwayans? Eski mon laprev i kapab reste solid si i ganny egzaminen an servan Parol Bondye, Labib?’ Ou pa pou perdi nanryen si ou egzamin ou bann krwayans relizye dan sa fason. Annefe, ou ti a bezwen anvi fer sa parski Labib i ankouraz nou pour “egzamin tou keksoz; gard sa ki bon.” (1 Tesalonisyen 5:21) Apre tou, eski se  pa laprouvasyon Bondye ki konte?—Zan 17:2, 3; 1 Timote 2:3, 4.

Bann dirizan relizye i kapab promet nou en lavenir eternel. Me amwen ki sa promes i baze lo lansennyman Labib, i pa pou ed nou pour ganny bann benediksyon Rwayonm Bondye. Dan son sermon lo Montanny ki byen renonmen, Zezi ti dir avek bokou konviksyon: “Pa tou sa ki apel mwan Senyer, Senyer ki pou antre dan Rwayonm lesyel, me zis bann ki fer lavolonte mon Papa ki dan lesyel.”—Matye 7:21.

Remark lanfaz ki Zezi i mete lo fer lavolonte son Papa ki dan lesyel konman kriter pour resevwar bann benediksyon Rwayonm Bondye. Andotmo, sa ki sanble annan laparans devosyon avek Bondye i pa neseserman ganny aprouve par Bondye. Annefe, Zezi ti kontinyen an dizan: “Bokou pou dir mwan, ‘Senyer, Senyer! an ou non nou’n profetize, an ou non, nou’n sas en kantite demon e an ou non, nou’n fer en kantite mirak.’ Alor mon a reponn zot, ‘Mon pa’n zanmen konn zot. Sorti la, zot ki pratik lemal!’ ” (Matye 7:22, 23) I evidan, ki keksoz pli enportan se ki nou fer sir ki nou konpran egzakteman kisisa vreman sa bon nouvel Rwayonm e apre azir an armoni avek.—Matye 7:24, 25.

Led I Disponib

Pour plis ki 100 an, bann Temwen Zeova pe pres bon nouvel Rwayonm Bondye. Par mwayen bann piblikasyon e an parol, zot pe ed dimoun partou lo later pour ganny en konnesans lo sa ki Rwayonm i ete, bann benediksyon ki i pou anmennen, e ki en dimoun i devret fer pour ganny bann tel benediksyon.

Nou ankouraz ou pour byen reazir anver sa mesaz ki pe ganny prese par bann Temwen Zeova. Par aksepte e azir an armoni avek sa bon nouvel, ou kapab resevwar bann gran benediksyon pa selman ozordi me osi dan lavenir ler Rwayonm Bondye i domin later antye.—1 Timote 4:8.

Azir konmela menm, akoz bann benediksyon Rwayonm Bondye i pros!

[Portre lo paz 7]

Par mwayen bann piblikasyon e par parol, bann Temwen Zeova i pres bon nouvel Rwayonm Bondye