Bon Nouvel Rwayonm—Ki Sa Nouvel?

Lannen pase dan 235 pei otour later, 6,035,564 dimoun, zenn konman vye, ti depans 1,171,270,425 er-d-tan pour koz avek lezot konsernan sa. Anplis ki transmet sa par parol, zot ti plas avek piblik plis ki 700 milyon piblikasyon ki proklanm e eksplik sa. Zot ti osi distribye plizyer milye kaset ek video pour propaz sa. Lo kwa ki nou pe koze?

“SA” SE bon nouvel Rwayonm Bondye. Vreman, zanmen oparavan dan listwar imen “sa bonn nouvel Rwayonm” in ganny prese lo sa nivo ki nou pe vwar ozordi.—Matye 24:14.

Sa bann ki pe fer sa travay pour prese e ansennyen dan lemonn antye zot tou zot bann volonter. Pour lemonn, sa bann volonter i kapab paret pa byen kalifye pour fer sa travay. Alor kwa ki par deryer zot kouraz ek zot sikse? Pouvwar sa bon nouvel Rwayonm i en fakter mazer, akoz i en nouvel konsernan bann benediksyon ki pou vin lo limanite. Sa i bann benediksyon ki tou dimoun i swete—boner, lafen bann difikilte ekonomik, bon gouvernman, lape ek sekirite, e en lot keksoz ki laplipar dimoun pa ni menm esey pans lo la—lavi eternel! Sa i vreman bon nouvel pour dimoun ki pe rod bi lavi ek rezon pour viv. Wi, tou sa bann benediksyon ek plis ankor i kapab vin pour ou si ou reazir favorableman anver proklanmasyon bon nouvel Rwayonm.

Kisisa Rwayonm?

Ki sa Rwayonm, ki pe ganny deklare konman bon nouvel? I sa Rwayonm ki plizyer milyon dimoun in ganny ansennyen pour priy lo la dan sa bann mo familye: “Nou Papa ki dan lesyel ki ou non sen i ganny glorifye; ki ou Renny i ganny etabli; ki ou lavolonte i ganny akonpli lo later parey dan lesyel.”—Matye 6:9, 10.

Se sa Rwayonm ki Danyel, en profet Ebre, ti koz lo la plis ki 25 syek pase ler i ti ekrir: “Bondye lesyel pou etabli en rwayonm ki pa pou zanmen ganny detrir. E sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour letan endefini.”—Danyel 2:44.

Donk, sa bon nouvel i konsernan en Rwayonm, oubyen gouvernman, etabli par Bondye ki pou elimin tou mesanste e apre domin later antye dan lape. I pou fer plan orizinal Kreater pour limanite e pour later vin en realite.—Zenez 1:28.

 “Rwayonm Bondye I Pros”

Preski 2,000 an pase, bon nouvel Rwayonm ti ganny deklare piblikman pour premye fwa par en zonm voue ki ti annan en laparans ek en mannyer ki ti atir bokou latansyon. Sa zonm ti Zan-Batis, garson pret Zwif Zakari ek Elizabet, son madanm. Zan ti met en lenz ki ti fer avek pwal samo, avek en sang lapo otour son leren, parey profet Eliya ki ti en lonbraz Zan-Batis. Me se son mesaz ki ti atrakte latansyon bokou dimoun. “Sanz zot lavi” i ti proklanmen, “akoz Rwayonm Bondye i pros.”—Matye 3:1-6.

Bann ki ti ekout Zan ti bann Zwif, ki ti pretann dir ki zot bann vre adorater sa vre Bondye, Zeova. Konman en nasyon, zot ti’n resevwar lalyans Lalwa atraver Moiz apepre 1,500 an avan. A sa moman an Zerizalenm sa tanp manifik ti ankor la, kot bann sakrifis ti pe ganny ofer an akor avek Lalwa. Bann Zwif ti konvenki ki zot ladorasyon ti byen dan lizye Bondye.

Sepandan, ler zot ti antann Zan, serten dimoun ti konmans realize ki zot larelizyon pa ti sa ki zot ti pe krwar i ete. Kiltir ek filozofi Grek ti’n enfiltre dan bann lansennyman relizyon Zwif. Lalwa ki zot ti resevwar sorti kot Bondye atraver Moiz ti aprezan koronpi, menm perdi son valer, par bann lansennyman ek tradisyon zonm. (Matye 15:6) Vi ki laplipar ti ganny tronpe par bann dirizan relizye avek en leker dir e san pitye, zot ti nepli pe ador Bondye dan en fason akseptab. (Zak 1:27) Zot ti bezwen repantir pour zot pese kont Bondye e kont lalyans Lalwa.

A sa moman, bokou Zwif ti pe ekspekte laparisyon sa Mesi promiz oubyen Kris, serten ti pe demann zot lekor “si Zan pa limenm li Mesi.” Zan, sepandan, ti deklare ki pa li Mesi e plito diriz zot latansyon lo en lot dimoun, lo ki i ti dir: “Mon pa diny pour delarg lase son sandal.” (Lik 3:15, 16) Kan i ti entrodwir Zezi avek son bann disip, Zan ti deklare: “La Lanyo Bondye ki efas pese lemonn.”—Zan 1:29.

Sa ti vreman en bon nouvel, akoz Zan ti an realite pe endik tou dimoun sa semen ver lavi ek boner—Zezi, sa enn ki “efas pese lemonn.” Konman bann desandans Adan ek Ev, tou imen i ne anba dominasyon pese ek lanmor. Romen 5:19 i eksplike: “Parey ki bokou in vin peser par dezobeisans en sel zonm [Adan], demenm lobeisans en sel zonm [Zezi] pou zistifye bokou dimoun.” Zis parey en mouton sakrifisyel, Zezi ti pou ‘retir pese’ e anmenn en sanzman dan kondisyon deplorab imen. “Rekonpans pour pese i lanmor,” Labib i eksplike, “me don gratwit ki Bondye i donnen i lavi eternel dan Kris-Zezi nou Senyer.”—Romen 6:23.

 Konman en zonm parfe—annefe sa pli gran zonm ki’n deza viv—Zezi ti konmans pres bon nouvel. Resi dan Mark 1:14, 15 i dir nou: “Apre ki Zan ti’n ganny arete e met dan prizon, Zezi ti vin Galile, e i ti pres Levanzil an dizan: ‘Ler in arive, Rwayonm Bondye i pros, sanz zot lavi e krwar dan sa Bonn Nouvel.’ ”

Sa bann ki ti reazir favorableman avek mesaz Zezi e egzers lafwa dan bon nouvel ti ganny bokou beni. Zan 1:12 i dir: “Sepandan, tou bann dimoun ki’n aksepte li [Zezi], tou sa ki’n krwar li, i’n donn zot pouvwar pour vin zanfan Bondye.” Konman zanfan oubyen bann garson Bondye, zot ti dan en pozisyon pour resevwar rekonpans lavi eternel.—1 Zan 2:25.

Me sa privilez pour resevwar bann benediksyon Rwayonm pa ti limite selman pour sa bann dimoun dan premye syek. Parey i’n ganny mansyonnen pli boner, ozordi bon nouvel Rwayonm Bondye pe ganny anonse e ansennyen lo tou later abite. Alor bann benediksyon Rwayonm i ankor disponib. Ki ou devret fer pour resevwar bann tel benediksyon? Lartik swivan pou eksplik sa.