Nouvel bann Proklanmater Rwayonm

 Lenn—En “Linite Omilye Diversite”

“LINITE Omilye Diversite” i en slogan popiler ki ganny servi pour dekrir lentegrasyon nasyonal dan Lenn. Pour arive akonpli linite dan sa gran pei ki annan gran diversite dan kiltir, langaz, relizyon, lorizin etnik, ek nouritir, i pa enn pti latas. Sepandan, en tel linite i egziste dan biro ladministrasyon bann Temwen Zeova dan Lenn, kantmenm sa bann volonter ki viv e travay laba i sorti dan bokou leta ek plizyer rezyon e zot koz diferan langaz.

• Annou rankontre Rajrani—en zenn madanm ki sorti Punjab, ki sitye dan en landrwa pli retire dan nor was Lenn. Ler Rajrani ti ankor lekol, enn son kanmarad lekol ti konmans etidye Labib avek Temwen Zeova. Sa zenn fiy ti esey fer Rajrani enterese avek Labib. Vi ki nivo Angle son kanmarad lekol ti limite e vi ki a sa moman Latour Veyer pa ti disponib an Punjabi, sa fiy ti osi demann Rajrani led pour tradwir sa magazin pour li. Sa ki Rajrani ti lir dan Latour Veyer ti konmans enfliyans li bokou, e kantmenm lopozisyon son paran, i ti progrese ziska pour dedye son lavi avek Zeova Bondye. Ozordi, i pe servi dan Betel Lenn e i pe fer sa menm keksoz ki ti ouver son lizye pour vwar laverite. I pe tradwir bann piblikasyon Kretyen an Punjabi!

• Konsider osi Bijoe, ki sorti dan en lot parti dan Lenn—leta sid was an Kerala. Bijoe ti ganny pouse lekol segonder akoz ki i pa ti pran par dan bann seremoni patriyotik. Apre ki son ka ti’n pas ankour pour en bon pe letan, i ti fini avek en laviktwar remarkab pour ladorasyon pir, e Bijoe ti retourn lekol. * I ti osi al kolez. Sepandan, latmosfer imoral dan kolez ti fatig son konsyans, ki ti fer li kit kolez kan i ti lo son premye term lekol. Ozordi apre dis an dan Betel, i santi ki i’n pli benefisye par vin en manm lafanmiy Betel Lenn, ki divers me ini, ki si i ti pou pourswiv en ledikasyon pli onivo.

• Tou le de, Norma ek Lily, i vev depi plizyer lannen e zot parlao 70 an. Sakenn in pas plis ki 40 an dan servis aplentan. Pour apepre 20 an, Lily pe travay dan biro brans Lasosyete konman en tradikter pour langaz Tamil. Norma ti antre Betel 13 an pase apre ki i ti perdi son mari. Anplis ki zot bann bon legzanp konman bann travayer ki travay dir e serye, zot en lenfliyans ki ini lafanmiy Betel antye. Zot kontan resevwar bann viziter, e zot rezwir konpanni bann manm pli zenn dan lafanmiy, partaz avek lezot lazwa ki zot in eksperyanse konman en Kretyen pour bokou lannen. E bann zenn i pas letan avek zot pour montre an retour zot lapresyasyon, par envit zot dan zot lasanm e ed zot kot i neseser. Vreman bann bon legzanp!

Vi ki zot in sirmont bann diferans ki koz divizyon ek dezakor dan bokou landrwa, sa bann volonter i travay ansanm avek lazwa pour servi lezot konman bann manm ini dan lafanmiy Betel Lenn.—Psonm 133:1.

[Not anba lo paz]

[Portre lo paz 18]

Par deryer: Mountain High Maps® Copyright © 1997 Digital Wisdom, Inc.