“Parol Bondye Ti Kontinyen Fannen”
“Parol Bondye Ti Kontinyen Fannen”
“I pe anvoy son deklarasyon lo later; avek lavites son parol pe taye.”—PSONM 147:15.
1, 2. Ki travay Zezi ti donn son bann disip, e ki sa ti enplike?
ENN parmi bann profesi pli emerveye dan Labib i trouve dan Akt 1:8. Zis avan i ti mont dan lesyel, Zezi ti dir avek son bann disip fidel: “Zot pou ranpli avek en pouvwar ler Sent-Espri pou desann lo zot. Alor zot a vin mon bann temwen . . . ziska tou bann landrwa pli elwannyen lo later.” Sa pa ti pou en pti latas!
2 Proklanm parol Bondye partou lo later ti bezwen paret en latas tre difisil pour sa pti ponnyen disip ki ti’n resevwar li. Reflesir lo sa ki i ti enplike. Zot ti pou bezwen ed dimoun pour konpran sa bon nouvel lo Rwayonm Bondye. (Matye 24:14) Rann temwannyaz lo Zezi ti osi enplik partaz son bann lansennyman pwisan avek lezot e eksplik son rol ki i zwe dan plan Zeova. Deplis, sa travay ti enplik fer dimoun vin bann disip e batiz zot. Sa ti bezwen ganny fer partou dan lemonn!—Matye 28:19, 20.
3. Ki Zezi ti asir son bann disip, e konman zot ti reazir anver sa travay ki zot ti’n gannyen?
3 Zezi ti kanmenm asir son bann disip ki lespri sen ti pou avek zot dan sa travay ki i ti’n donn zot pour fer. An konsekans, malgre lanpler sa travay e malgre lopozisyon vyolan pour aret li, bann premye disip Zezi ti reisi fer sa ki Zezi ti ordonn zot. Sa i en fe dan listwar ki pa kapab ganny demanti.
4. Konman ki lanmour Bondye i ganny demontre par sa lord pour pres e ansenny lezot?
4 Sa kanpanny pour prese e ansennyen partou dan lemonn ti en lekspresyon lanmour Bondye pour bann ki pa ti konn li. I ti donn zot loportinite pour rapros zot avek Zeova e ganny pardon pour zot pese. (Akt 26:18) Sa lord pour prese e ansennyen i osi demontre lanmour ki Bondye i annan pour sa bann ki pe anmenn sa mesaz, vi ki sa i permet zot pour eksprim zot devosyon anver Zeova e demontre zot lanmour pour zot prosen. (Matye 22:37-39) Lapot Pol ti akord sitan bokou valer avek minister Kretyen ki i ti apel li en “trezor.”—2 Korentyen 4:7.
5. (a) Kote ki nou trouv listwar diny konfyans lo bann Kretyen premye syek, e ki ogmantasyon ki ganny dekrir ladan? (b) Akoz liv Akt i tre enportan pour serviter Bondye ozordi?
5 Dan liv Akt nou kapab trouv listwar diny konfyans konsernan aktivite bann premye Kretyen, ki ti ganny ekrir par disip Lik. I en resi kot nou vwar en ogmantasyon rapid e enkrwayab. Sa ogmantasyon dan konnesans Parol Bondye i fer nou rapel Psonm 147:15, ki dir: “[Zeova] pe anvoy son deklarasyon lo later; avek lavites son parol pe taye.” Sa resi lo bann premye Kretyen, ki ti ganny pouvwar lespri sen, i eksitan e anmenmtan i tre enportan pour nou ozordi. Bann Temwen Zeova osi i enplike dan sa menm travay pour prese e fer disip, me lo en pli gran lesel. Nou osi nou fer fas avek menm problenm ki sa bann Kretyen dan premye syek ti fer fas avek. Anmezir ki nou etidye konman ki Zeova ti beni e donn zot lafors, nou lafwa ki li i soutenir nou osi pou ganny afermi.
Ogmantasyon dan Lakantite Disip
6. Ki fraz konsernan ogmantasyon ki aparet trwa fwa dan liv Akt, e sa pe refer avek ki?
6 En fason pour egzamin lakonplisman Akt 1:8 se pour konsider sa lekspresyon “Parol Bondye ti kontinyen fannen [“agrandir,” NW ]” en fraz ki aparet avek en pti diferans, selman trwa fwa dan Labib e tou le trwa fwa dan liv Akt. (Akt 6:7; 12:24; 19:20) “Parol Zeova,” oubyen “parol Bondye,” dan sa bann pasaz pe refer avek sa bon nouvel—en mesaz pasyonan lo laverite divin, en mesaz vivan e pwisan ki sanz lavi bann ki aksepte li.—Ebre 4:12.
7. Parol Bondye ki ti fannen dan Akt 6:7 i relye avek kwa, e ki ti arive zour Lapannkot 33 N.L.?
7 Premye referans avek ogmantasyon dan parol Bondye i trouve dan Akt 6:7. Nou lir: “Parol Bondye ti kontinyen fannen; lakantite bann ki ti krwar dan Zezi ti ogmant bokou dan Zerizalenm. E en gran kantite pret ti aksepte lafwa.” Isi nou vwar Parol Bondye ki fannen e sa i relye avek en ogmantasyon dan lakantite disip. Pli boner, zour Lapannkot 33 N.L, lespri sen Bondye ti ganny verse lo apepre 120 disip ki ti’n rasanble ansanm anler dan en lasanm. Apre sa, lapot Pyer ti donn en diskour pasyonan, e 3,000 parmi bann ki ti pe ekoute ti vin krwayan sa zour menm. Ti bezwen annan bokou azitasyon pandan ki sa lafoul dimoun ti pe diriz ver enn ou plizyer basen dan oubyen an deor Zerizalenm pour ganny batize onon Zezi, sa zonm ki 50 zour avan ti’n ganny kloute lo en poto konman en kriminel!—Akt 2:41.
8. Konman ki lakantite disip ti ogmante dan bann lannen apre Lapannkot 33 N.L.?
8 Byensir, sa ti zis en konmansman. Bann zefor kontini ki bann sef relizye Zwif ti fer pour aret aktivite predikasyon ti anven. Zeova “ti azout avek zot group [disip] tou bann ki ti pe ganny sove,” ki ti rann sa bann sef pli fristre. (Akt 2:47) En pti pe letan apre, “lakantite krwaryan ti ariv anviron 5000 zonm.” Answit, “en pli gran kantite dimoun, zonm ek fanm ti krwar e aksepte Senyer.” (Akt 4:4; 5:14) Nou lir konsernan plitar: “Sa letan la Legliz ti viv . . . an-pe dan Zide antye, dan Galile ek Samari; i ti vin for, i ti devlope, ogmante avek led Sent-Espri e zot ti viv avek respe pour Senyer.” (Akt 9:31) Detrwa lannen plitar, posibleman an 58 N.L., referans ti ganny fer avek “plizyer milye Zwif, ki’n adopte lafwa.” (Akt 21:20) Sa letan, ti osi annan plizyer non Zwif ki ti vin krwayan.
9. Konman ou ti a dekrir bann premye Kretyen?
9 Se sirtou bann nouvo konverti ki ti responsab pour ogmantasyon dan lakantite disip. Sa relizyon ti nouvo me tre aktif. Kontrerman avek bann manm legliz ki pasiv, bann disip ti antyerman devoue avek Zeova ek son Parol, etan donnen ki serten ti’n aprann laverite avek bann ki ti ganny persekite britalman. (Akt 16:23, 26-33) Bann ki ti aksepte pour vin Kretyen ti fer sa desizyon apre ki zot ti’n rezonnen e byen enformen. (Romen 12:1) Zot ti ganny edike bann prensip Bondye; laverite ti dan zot lespri ensi ki dan zot leker. (Ebre 8:10, 11) Zot ti pare pour mor pour zot krwayans.—Akt 7:51-60.
10. Ki responsabilite bann premye Kretyen ti aksepte, e ki similarite nou trouve ozordi?
10 Bann ki ti’n akeyir lansennyman Kretyen ti rekonnet zot responsabilite pour partaz sa verite avek lezot. Sa ti direkteman kontribye ver plis ogmantasyon dan lakantite disip. En spesyalis Labib ti dir: “Kominik ou lafwa pa ti ganny rezerve selman pour bann ki ti tre zele oubyen pour bann evanzelizater ki ti’n ganny dezinyen ofisyelman. Anons Levanzil ti drwa ek devwar tou manm Legliz. . . . Lefe ki kominote Kretyen antye ti volonterman al anver lezot, sa ti donn en lelan imans sa aktivite depi ki i ti demare.” Deplis, i ti ekrir: “Anons Levanzil ti dan disan bann premye Kretyen.” I menm parey avek bann vre Kretyen denozour.
Ogmantasyon dan Lakantite Teritwar
11. Ki kalite ogmantasyon ki ganny dekrir dan Akt 12:24, e ki mannyer sa ti arive?
11 En dezyenm referans avek ogmantasyon dan parol Bondye i trouve dan Akt 12:24: “Mesaz Parol Bondye ti fannen e miltipliye [“propaze,” NW ] plis ankor.” Isi sa fraz pe relye avek parol Bondye ki pe propaz dan plis teritwar. Kantmenm lopozisyon gouvernman, sa travay ti kontinyen prospere. Lespri sen ti ganny verse an Zerizalenm, e apartir sa landrwa laparol ti propaz byen vitman. Persekisyon an Zerizalenm ti fer ki bann disip ti dispers dan bann rezyon atraver Zide ek Samari. Avek ki rezilta? “Bann krwaryan ki ti’n disperse ti al partou pour anons Levanzil.” (Akt 8:1, 4) Filip ti ganny gide pour temwanny avek en zonm ki ti anmenn sa mesaz Etyopi apre ki i ti’n batize. (Akt 8:26-28, 38, 39) Laverite ti pran rasin byen vit an Lida, Laplenn Saron, ek Zope. (Akt 9:35, 42) Plitar, lapot Pol ti travers plizyer milye kilomet lanmer ek later, e i ti etablir bann kongregasyon partou dan bann pei Mediterane. Lapot Pyer ti al Babilonn. (1 Pyer 5:13) Dan en lespas 30 lannen apre ki lespri sen ti ganny verse zour Lapannkot, Pol ti ekrir ki sa bon nouvel in “ganny anonse avek tou dimoun dan lemonn antye.” Posibleman i ti pe refer avek sa parti lemonn ki dimoun ti konnen sa letan.—Kolosyen 1:23.
12. Ki mannyer bann ki ti opoz Kristyanism ti admet ki parol Bondye ti pe propaz dan plis teritwar?
12 Menm bann ki ti opoz bann Kretyen ti admet ki parol Bondye ti’n pran rasin partou dan Lanpir Romen. Par egzanp, Akt 17:6 i rakonte ki an Tesalonik, nor Lagres, bann ki ti opoze ti kriye: “Sa bann zonm in met dezord partou. La aprezan zot in ariv dan nou lavil.” Deplis, okonmansman dezyenm syek, Pline le Jeune ki ti an Bitini ti ekrir Lanperer Romen Trazan konsernan Kristyanism. I ti konplent an dizan: “[I] pa’n kontant li selman dan bann lavil, me in propaz son lenfeksyon partou dan bann vilaz ek lakanpanny ki dan zalantour.”
13. Lefe ki parol Bondye ti propaz dan plis teritwar, konman ki sa i reflekte son lanmour pour limanite?
13 Lefe ki parol Bondye ti pe propaz dan plis teritwar, sa ti eksprim lanmour profon ki Zeova ti annan pour bann imen ki ankor kapab ganny sove. Kan Pyer ti obzerv lespri sen ganny manifeste dan Korney, i ti dir: “Aprezan, mon vreman konpran ki Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:34, 35) Wi, sa bon nouvel ti en mesaz pour tou dimoun, e lefe ki parol Bondye ti pe propaz dan plis teritwar sa ti donn dimoun partou loportinite pour demontre zot reaksyon anver lanmour Zeova. Sa i touzour vre denozour. Diran sa ventyenm syek, parol Bondye in literalman propaz partou lo later.
Ogmantasyon ki Pli For
14. Ki kalite ogmantasyon ki ganny dekrir dan Akt 19:20, e lo ki parol Bondye ti dominen?
14 Trwazyenm referans avek ogmantasyon dan parol Bondye i trouve dan Akt 19:20: “Ensi, dan sa fason, Parol Senyer ti fannen avek gran pisans e [“i ti pli for.” NW ]” Sa mo orizinal Grek ki’n ganny tradwir “pli for” i donn sa lide “egzers lafors.” Bann verse avan sa enn, i rakonte ki bokou dimoun ti vin krwayan an Efez e plizyer ki ti pratik lar mazik ti bril zot liv devan tou dimoun. Alor, parol Bondye ti pli for ki bann krwayans fo relizyon. Sa bon nouvel ti osi pli for ki lezot lobstak, tel ki persekisyon. Ti napa nanryen ki ti kapab aret li. Dan sa domenn nou trouv ankor en similarite frapan avek bann vre Kretyen denozour.
15. (a) Ki en istoryen Labib ti ekrir konsernan bann premye Kretyen? (b) Ki sennla ki bann disip ti rekonnet in donn zot sikse?
15 Bann zapot ek lezot premye Kretyen ti proklanm parol Bondye avek zel. En istoryen Labib ti obzerv sa lo zot: “Kan bann zonm i annan sa dezir pour koz lo zot Senyer, zot trouv plizyer mwayen pour fer li. Anfet, se motivasyon sa bann zonm ek fanm ki enpresyonn nou plis ki zot metod.” Kantmenm sa, sa bann premye Kretyen ti rekonnet ki sikse ki zot gannyen dan minister pa ti depan selman lo zot zefor. Zot ti ganny lord divin pour fer sa travay e zot ti ganny sipor divin pour akonpli li. Progre spirityel i sorti kot Bondye. Lapot Pol ti rekonnet sa dan son let ki i ti ekrir kongregasyon an Korent. I ti dir: “Mwan mon’n plante, Apolos in aroze, me Bondye li in fer pouse. Parski nou, nou pe travay ansanm pour Bondye.”—1 Korentyen 3:6, 9.
Lespri Sen pe Travay
16. Kwa ki montre ki lespri sen ti fortifye bann disip pour koz avek lardyes?
16 Mazinen ki Zezi ti asir son bann disip ki lespri sen ti pou zwe en rol pour propaz parol Bondye e ki lespri sen ti pou donn bann disip lafors dan zot aktivite predikasyon. (Akt 1:8) Konman ki sa ti arive? Pa mank bokou letan apre ki lespri ti desann lo bann disip zour Lapannkot, Pyer ek Zan ti ganny anmennen pour koz devan Konsey pep Zwif, pli gran lakour dan sa pei, ki son bann ziz ti responsab pour lanmor Zezi. Eski bann zapot ti pou tranble avek lafreyer devan en lasanble sitan enpresyonan e ostil? Ditou! Lespri sen ti donn pouvwar Pyer ek Zan pour koz avek en tel lardyes ki zot bann oponan ti etonnen, e “zot ti rekonnet ki sa bann zonm ti avek Zezi.” (Akt 4:8, 13) Lespri sen ti osi fer Etyenn temwanny avek lardyes devan Konsey. (Akt 6:12; 7:55, 56) Pli boner, lespri sen ti’n pous bann disip pour pres avek lardyes. Lik i raporte: “Kan zot ti’n fini priye, landrwa kot zot ti’n reini ti sekwe, zot tou zot ti ranpli avek Sent-Espri e zot ti konmans anons mesaz Bondye san okenn . . . lafreyer.”—Akt 4:31.
17. Dan ki lezot fason ki lespri sen ti asiste bann disip dan zot minister?
17 Atraver son lespri sen tre pwisan, Zeova ansanm avek Zezi ki ti’n resisite, ti diriz sa aktivite predikasyon. (Zan 14:28; 15:26) Kan lespri sen ti ganny verse lo Korney, son bann fanmiy ensi ki lo son bann zanmi entim, lapot Pyer ti konpran ki bann non Zwif ensirkonsi ti pou kapab batiz onon Zezi Kri. (Akt 10:24, 44-48) Plitar, lespri sen ti zwe en rol kle pour apwent Barnabas ek Sol (lapot Pol) dan aktivite misyonner e diriz zot dan landrwa kot zot ti devret ale oubyen kot zot pa ti devret ale. (Akt 13:2, 4; 16:6, 7) I ti diriz bann prosedir kot desizyon ti bezwen ganny fer par bann zapot ek ansyen an Zerizalenm. (Akt 15:23, 28, 29) Lespri sen ti osi gid nominasyon bann sirveyan dan kongregasyon Kretyen.—Akt 20:28.
18. Konman ki bann premye Kretyen ti eksprim zot lanmour?
18 Deplis, lespri sen ti osi evidan dan bann Kretyen zot menm, i ti prodwi bann kalite dan zot tel ki lanmour. (Galat 5:22, 23) Lanmour ti pous bann disip pour partaz avek lezot. Par egzanp, apre Lapannkot 33 N.L., en fon ti ganny ramase par zot tou pour fourni bezwen fizik bann disip an Zerizalenm. Resi Labib i dir: “Personn parmi zot pa ti mank zot neseser. Annefe tou sa ki ti posed propriyete ou lakaz ti vann e ti anmenn larzan ki zot ti gannyen pour lavant, e donn avek bann zapot, e bann zapot ti distribye avek sakenn dapre zot bezwen.” (Akt 4:34, 35) Sa lanmour pa ti senpleman pour bann ki ti annan menm krwayans avek zot me ti al osi pour lezot, par egzanp, kan bann disip ti partaz sa bon nouvel avek zot e fer dibyen pour zot. (Akt 28:8, 9) Zezi ti dir ki lanmour dezenterese ti pou idantifye son bann disip. (Zan 13:34, 35) Sirman, sa kalite tre esansyel ki apel lanmour ti atir bann dimoun ver Bondye e kontribye anver ogmantasyon dan premye syek zis parey i pe fer ozordi.—Matye 5:14, 16.
19. (a) Nonm sa trwa fason ki parol Zeova ti fannen dan premye syek? (b) Ki nou pou egzaminen dan lartik ki pou swiv?
19 Antou, lekspresyon “Sent-Espri” i aparet 41 fwa dan liv Akt. Evidaman, ogmantasyon dan lakantite Kretyen dan premye syek ti relye etrwatman avek pouvwar ek gidans lespri sen. Lakantite disip ti ogmante, parol Bondye ti propaz dan plis rezyon, e i ti vin pli for ki bann relizyon ek filozofi ki ti egziste sa lepok. Sa ogmantasyon ki ti arive premye syek i koresponn avek travay bann Temwen Zeova denozour. Dan nou lartik swivan nou pou vwar ki dan nou letan parol Bondye pe fannen dan en fason osi enpresyonan.
Eski Ou Mazinen?
• Konman ki lakantite Kretyen dan premye syek ti ogmante?
• Dan ki fason ki parol Bondye ti propaz dan plis teritwar?
• Konman ki parol Bondye ti pli for dan premye syek?
• Ki rol ki lespri sen i zwe pour propaz parol Bondye?
[Kestyon]
[Portre lo paz 20]
Anler adrwat: Model Lavil Zerizalenm dan lepok dezyenm tanp ki sitye kot lotel Holyland, Zerizalenm
[Portre lo paz 22]
Filip ti pres avek en Etyopyen, sa ti propaz sa bon nouvel dan en lot teritwar
[Portre lo paz 23]
Lespri sen ti diriz bann zapot ek ansyen an Zerizalenm