Preokip Nou Avek Lespri E Viv!
Preokip Nou Avek Lespri E Viv!
“Preokip nou avek lespri i vedir lavi.”—ROMEN 8:6, NW.
1, 2. Ki diferans Labib i fer ant “laser” ek “lespri”?
I PA en latas fasil pour reste moralman prop devan Bondye, dan en sosyete koronpi ki glorifye satisfaksyon bann dezir laser. Sepandan, Lekritir i opoz “laser” avek “lespri,” i klerman fer en separasyon ant bann konsekans grav kan nou les nou ganny kontrole par nou laser peser ek bann benediksyon ki nou gannyen kan nou les nou ganny enfliyanse par lespri sen Bondye.
2 Par egzanp, Zezi Kri ti dir: “Se Lespri-sen ki donn lavi; [laser, NW] napa valer. Bann parol ki mon’n dir i Lespri e i lavi.” (Zan 6:63) Lapot Pol ti ekrir bann Kretyen an Galat: ‘Parski dezir laser i kont lespri, e dezir lespri i kont laser. Zot toulede zot konpletman opoze avek kanmarad.’ (Galat 5:17) Pol ti osi dir: ‘Si i senm sa ki fer plezir son laser, i pou rekolte dapre son laser, lanmor. Me si i senm sa ki fer plezir Lespri, i pou rekolte sorti kot Lespri, lavi eternel.’—Galat 6:8.
3. Kwa ki neseser pour kapab debaras nou avek bann move dezir ek tandans?
3 Lespri sen Zeova, setadir son lafors aktif, i kapab retir bann ‘dezir laser’ enpir ek dominasyon destriktif ki nou laser peser i egzers lo nou. (1 Pyer 2:11) Alor, pour arive debaras nou avek bann move tandans, i neseser ki nou ganny led avek lespri Bondye parski Pol ti ekrir: “Preokip nou avek laser i vedir lanmor, me preokip nou avek lespri i vedir lavi ek lape.” (Romen 8:6, NW) Ki savedir preokip nou avek lespri?
“Preokip nou avek Lespri”
4. Ki savedir “preokip nou avek lespri”?
4 Kan Pol ti ekrir konsernan “preokip nou avek lespri,” i ti servi en mo Grek ki vedir ‘fason panse, fikse nou lespri, . . . bi, aspirasyon, dezir.’ En lot verb ki en pe pros avek sa mo i sinifye “panse, tourn nou panse anver en serten keksoz.” Alors, preokip nou avek lespri i vedir ganny kontrole, dominen, e pouse par lafors aktif Zeova. Savedir ki nou volonterman les lespri sen Bondye konpletman enfliyans nou panse, nou bann tandans ek aspirasyon.
5. Ziska ki degre nou devret soumet avek lenfliyans lespri sen?
5 Pol ti met lanfaz lo ki degre nou devret soumet anba lenfliyans lespri sen, kan i ti koz lo ‘servi Bondye dapre Lespri.’ (Romen 7:6) Lo baz zot lafwa dan sakrifis ranson Zezi, bann Kretyen in ganny libere anba dominasyon pese e an rezilta, zot in “mor” an sa ki konsern lesklav pese, setadir zot nepli lesklav pese. (Romen 6:2, 11) Bann ki dan en sans figire in mor dan sa fason, i ankor vivan fizikman me zot aprezan lib pour swiv Kris konman bann “lesklav lazistis.”—Romen 6:18-20.
En Transformasyon Tre Remarkab
6. Ki transformasyon bann ki’n vin “lesklav lazistis” in eksperyanse?
6 Transformasyon pour sorti “bann lesklav pese” pour servi Bondye konman bann “lesklav lazistis” i vreman tre remarkab. Konsernan bann ki ti eksperyans en tel sanzman, Pol ti ekrir: “Zot in ganny lave, zot in ganny pirifye, zot in ganny zistifye o non Senyer Zezi-Kri e dan Lespri nou Bondye.”—Romen 6:17, 18; 1 Korentyen 6:11.
7. Akoz i enportan pour annan menm pwenn-vi avek Zeova lo serten keksoz?
7 Pour arive eksperyans en tel transformasyon remarkab, nou bezwen dabor aprann ki pwenn-vi Zeova i annan lo serten keksoz. Plizyer syek pase, psalmis David ti sipliy Bondye: “Fer mwan konn ou bann semen, O Zeova . . . Fer mwan mars dan ou laverite e ansenny mwan.” (Psonm 25:4, 5) Zeova ti ekout David, e ozordi osi I kapab reponn lapriyer son bann serviter lo sa size. Vi ki semen ek laverite Bondye i prop e sen, i pou itil pour medit lo zot si nou ganny tante pour satisfer nou bann dezir enpir laser.
Rol Endispansab Parol Bondye
8. Akoz i tre enportan ki nou etidye Labib?
8 Parol Bondye, Labib, in ganny prodwi par son lespri. Alor, en fason endispansab pour les lespri travay lo nou se par lir e etidye Labib—toulezour si i posib. (1 Korentyen 2:10, 11; Efezyen 5:18) Ranpli nou lespri ek leker avek bann verite ek prensip Labib, pou ed nou reziste bann latak lo nou spirityalite. Anfet, kan nou rankontre bann tantasyon imoral, lespri Bondye i kapab fer nou rapel bann Lekritir ek prensip ki kapab ranforsi nou determinasyon pour azir an armoni avek lavolonte Bondye. (Psonm 119:1, 2, 99; Zan 14:26) Alor, nou pa ganny anbete pour swiv sa ki mal.—2 Korentyen 11:3.
9. Konman ki Labib i ranforsi nou determinasyon pour prezerv nou relasyon avek Zeova?
9 Anmezir ki nou kontinyen etidye Labib seryezman e senserman avek led bann piblikasyon baze lo Labib, lespri Bondye i enfliyans nou lespri ek nou leker, ki fer nou ganny en pli gran respe pour bann standar Zeova. Nou relasyon avek Bondye i vin sa keksoz pli enportan dan nou lavi. Kan nou fer fas avek tantasyon, nou pa nouri nou lespri avek bann panse lo plezir ki petet nou ti a gannyen si nou angaz dan en serten move pratik. Plito, sa ki trakas nou osito se pour mentenir nou lentegrite avek Zeova. En lapresyasyon profon pour nou relasyon avek li, i pous nou pour konbat kont okenn tandans ki ti a kapab gat sa relasyon oubyen detrir li.
“Konbyen Mon Kontan Ou Lalwa!”
10. Pour arive preokip nou avek lespri, akoz i neseser ki nou obeir lalwa Zeova?
10 Si nou oule preokip nou avek lespri, konnesans lo Parol Bondye pa sifi. Lerwa Salomon ti konpran bann standar Zeova tre byen, me i pa ti reisi gard zot dan son letan lavyeyes. (1 Lerwa 4:29, 30; 11:1-6) Si nou lespri i preokipe avek bann keksoz spirityel, i pou fer nou vwar sa nesesite pour pa senpleman konn sa ki Labib i dir me osi pour obeir lalwa Bondye avek tou nou leker. Sa i vedir egzamin bann standar Zeova afon e fer nou mye pour swiv zot byen. Sa psalmis ti annan sa kalite latitid. I ti sante: “Konbyen mon kontan ou lalwa! I okip mon panse toudilon lazournen.” (Psonm 119:97) Kan nou vreman annan en profon dezir pour swiv lalwa Bondye, nou santi nou pouse pour demontre bann kalite Kretyen. (Efezyen 5:1, 2) Olye les nou ganny atire ver bann move keksoz san ki nou kapab fer nanryen, nou manifeste fri lespri, e sa dezir pour fer plezir Zeova i detourn nou kont bann ‘aktivite laser’ degradan.—Galat 5:16, 19-23; Psonm 15:1, 2.
11. Eksplike konman ki lalwa Zeova ki enterdi fornikasyon i en proteksyon pour nou.
11 Ki mannyer nou kapab devlop respe ek lanmour profon pour lalwa Zeova? Egzamin son valer i en fason pour fer sa. Annou reflesir en pe lo lalwa Bondye ki pa permet relasyon seksyel an deor maryaz e ki enterdi fornikasyon ek adilter. (Ebre 13:4) Eski obeir sa lalwa i priv nou okenn bon keksoz? Eski en Papa ki annan lanmour ti a fer en lalwa ki refiz nou en keksoz ki ti pou benefisye nou? Ditou! Get en pe ki pe arive dan lavi bokou ki pa viv an armoni avek bann standar moral Zeova. Lansentman non dezirab i souvan swivi par lavortman oubyen petet sa ki nou apel marye dan kannson ble, ki souvan malere. Bokou i bezwen elve en zanfan san en mari oubyen en madanm. Deplis, bann ki pratik fornikasyon i ganny ekspoze avek bann maladi ki ganny seksyelman transmet. (1 Korentyen 6:18) Si en serviter Zeova i komet fornikasyon, i kapab ganny akable avek bann lefe emosyonnel ki tre lour. Esey metriz bann remor konsyans i kapab fer li pa dormi pour plizyer lannwit e reste dan gran lenkyetid. (Psonm 32:3, 4; 51:3) Alor, eski pa i kler ki lalwa Zeova ki enterdi fornikasyon in ganny fer pour protez nou? Wi, nou vreman benefisye en kantite kan nou mentenir lapropte moral!
Priye Pour Led Zeova
12, 13. Akoz i apropriye pour priye ler nou ganny akable par bann move dezir?
12 San dout, lapriyer senser i neseser pour preokip nou avek lespri. I byen pour demann led lespri Bondye parski Zezi ti dir: “Si, zot, . . . zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?” (Lik 11:13) Dan lapriyer, nou kapab eksprimen konman nou depan lo lespri pour ed nou dan nou bann febles. (Romen 8:26, 27) Si nou realize ki bann move dezir oubyen latitid pe afekte nou, oubyen si en bon konpanyon Kretyen in atir nou latansyon lo la, i pou saz si nou presiz nou problenm dan nou bann lapriyer e demann Bondye son lasistans pour sirmont sa bann tandans.
13 Zeova i kapab ed nou pour konsantre lo bann keksoz ki zis, ki pir, ki bon e ki merit felisitasyon. E konman i apropriye pour sipliy li pour ki “lape Bondye” i gard nou leker ek nou lespri! (Filipyen 4:6-8) Annou alor priy pour son led pour swiv ‘lazistis, latasman avek Bondye, lafwa, lanmour, perseverans, ek labonte.’ (1 Timote 6:11-14) Avek led nou Papa ki dan lesyel, bann lenkyetid ek tantasyon pa pou vin ziska en pwen ki nou nepli kapab kontrole. Plito, nou lavi pou marke par sa trankilite ki Bondye i donnen.
Pa Sagrin Lespri Sen
14. Akoz lespri Bondye i en lafors pour lapirte?
14 Bann serviter mir Zeova i personnelman aplik konsey Pol: “Pa bezwen tenny Lespri.” (1 Tesalonisyen 5:19) Vi ki lespri Bondye i “Sent-Espri [Lespri sentete, NW],” i alor prop, pir e sakre. (Romen 1:4) Sa lespri i en lafors pour sentete oubyen lapropte kan i travay lo nou. I ede gard nou dan en fason viv ki prop, ki marke par lobeisans anver Bondye. (1 Pyer 1:2) Okenn pratik enpir i reprezant en mepri pour sa lespri, e sa i kapab anmenn bann konsekans grav. Konman?
15, 16. (a) Konman nou ti a kapab sagrin lespri Bondye? (b) Ki mannyer nou kapab evite sagrin lespri Zeova?
15 Pol ti ekrir: “Pa bezwen ofans [sagrin, NW] Sent-Espri Bondye, limenm mark Bondye ki i’n plas lo nou konman son garanti pour sa zour ki i pou delivre nou konpletman.” (Efezyen 4:30) Labib i idantifye lespri Zeova konman en “garanti” sa ki pou arive pour bann Kretyen swazir. Sa se lavi imortel dan lesyel. (2 Korentyen 1:22; 1 Korentyen 15:50-57; Revelasyon 2:10) Lespri Bondye i kapab gid bann Kretyen swazir ensi ki zot bann konpanyon ki annan lespwar pour viv lo later, pour viv en lavi ki fidel e pour evit bann move aktivite.
16 Sa zapot ti averti nou kont bann tandans pour koz manti, vole, kondwir nou dan en fason ki anmenn laont, eksetera. Si nou les nou ganny atire ver sa bann keksoz, nou pou pe al kont konsey Parol Bondye ki enspire par son lespri. (Efezyen 4:17-29; 5:1-5) Dan en serten degre, omwen, nou ti a kapab pe sagrin lespri Bondye e sirman sa i en keksoz ki nou oule evite fer. Pour sa rezon ki, si okenn antre nou i konmans inyor konsey Parol Zeova, nou ti a kapab konmans devlop bann latitid ek tre ki fer nou volonterman fer pese e konpletman perdi laprouvasyon divin. (Ebre 6:4-6) Menm si petet nou pa pe pratik pese la konmela, nou kapab pe al dan sa direksyon. Par kontinyen al kontrerman avek direksyon lespri, nou pou pe sagrin li. Nou pou osi pe reziste e fer tris Zeova, li ki sours lespri sen. Konman bann ki kontan Bondye, nou pa zanmen anvi fer sa. Plito, annou priy pour led Zeova pour ki nou pa sagrin lespri me ki nou kapab anmenn loner lo son non par kontinyen preokip nou avek lespri.
Kontinyen Preokip nou avek Lespri
17. Nonm serten lobzektif spirityel ki nou kapab etabli, e akoz i saz pour travay afen ki nou atenn zot?
17 En fason remarkab pour nou kontinyen preokip nou avek lespri se par etabli bann lobzektif spirityel e travay pour realiz zot. Depandan lo nou bezwen ek sirkonstans, nou bann lobzektif i kapab enkli amelyor nou bann labitid letid, ogmant nou partisipasyon dan predikasyon, oubyen aspir en privilez spesifik, tel ki pionye, servis Betel, oubyen travay misyonner. Sa pou kit nou lespri okipe avek bann lentere spirityel e pou ed nou reziste nou bann febles imen oubyen pa les nou ganny antrennen par bann lobzektif materyel ek bann move dezir ki komen dan sa monn. Sirman i saz pour fer sa, parski Zezi ti ensiste: “Pa akimil zot larises lo later, kot i a ganny detri par lever ek larouy, kot voler a kas laport e vole. Plito akimil zot larises dan lesyel, kot i pa pou ganny detri ni par lever, ni par larouy, kot voler pa pou kapab kas laport e vole, parski la kot ou larises i ete, ou leker pou lanmenm.”—Matye 6:19-21.
18. Akoz i sitan enportan pour kontinyen preokip nou avek lespri dan sa bann dernyen zour?
18 Sertennman i saz pour preokip nou avek lespri e kontrol bann dezir sa monn dan sa “bann dernyen zour.” (2 Timote 3:1-5) Apre tou, “lemonn pou disparet ek tou son bann dezir; me sa ki fer lavolonte Bondye i reste eternelman.” (1 Zan 2:15-17) Par egzanp, si en zenn Kretyen i pourswiv lobzektif pour servis aplentan, sa i kapab servi konman en konpa pour li pandan bann lannen difisil son staz ladolesans oubyen zenn adilt. Kan i anba presyon pour aksepte en move latitid, en tel endividi pou annan en vizyon kler lo sa ki i anvi akonpli dan servis Zeova. En dimoun ki annan en tel spirityalite, pou vwar li enpridan, menm bet, pour perdi realizasyon son bann lobzektif spirityel akoz i’n resers bann keksoz materyel oubyen plezir ki pese i promet pour donnen. Mazinen ki Moiz, ki ti annan lentere pour keksoz spirityel, ti “swazir ganny maltrete ansanm avek pep Bondye, plito ki zouir pese pandan en pti pe letan.” (Ebre 11:24, 25) Ki swa nou zenn ou vye, nou fer bann swa parey kan nou kontinyen preokip nou avek lespri olye avek nou laser peser.
19. Ki benefis nou pou eksperyanse si nou kontinyen preokip nou avek lespri?
19 “Preokip nou avek laser i vedir ostilite avek Bondye” tandis ki si nou “preokip nou avek lespri i vedir lavi ek lape.” (Romen 8:6, 7, NW) Par kontinyen preokip nou avek lespri, nou pou eksperyans en lape ki presye. Nou leker ek nou fakilte mantal pou pli byen ganny proteze kont lenfliyans nou leta peser. Nou pou pli kapab reziste bann tantasyon pour angaz dan bann keksoz mal. E nou pou ganny led divin pour fer fas avek sa konba kontini ki annan ant nou laser ek nou lespri.
20. Akoz nou kapab asire ki i posib pour sorti viktorye dan sa batay ant laser ek lespri?
20 Par kontinyen preokip nou avek lespri, nou mentenir en lyen esansyel avek Zeova, sours lavi ensi ki lespri sen. (Psonm 36:9; 51:11) Satan Dyab ek son bann reprezantan pe fer tou sa ki zot kapab pour gat nou relasyon avek Zeova. Zot pe esey pran kontrol lo nou lespri, e zot konnen ki si nou renonse sa pou finalman fer nou vin lennmi Bondye e trouv lanmor. Me nou kapab sorti viktorye dan sa batay ant lespri ek laser. Pol ti eksperyans sa, parski kan i ti ekrir konsernan son prop batay, i ti avan tou demande: “Lekel ki pou delivre mwan avek sa lekor lanmor?” Apre i ti montre ki i posib ganny delivre kan i ti dir: “Gran mersi Bondye par Zezi-Kri nou Senyer!” (Romen 7:21-25) Nou osi nou kapab remersi Bondye atraver Kris pour fourni lemwayen pour fer fas avek bann febles imen e kontinyen preokip nou avek lespri avek sa lesperans merveye, lavi eternel.—Romen 6:23.
Eski Ou Mazinen?
• Ki savedir preokip nou avek lespri?
• Konman nou kapab les lespri Zeova travay lo nou?
• Eksplike akoz dan nou batay kont pese, i endispansab pour etidye Labib, pour obeir lalwa Zeova, e pour priy li.
• Konman ki etabli bann lobzektif spirityel i gard nou lo semen lavi?
[Kestyon]
[Portre lo paz 14]
Letid Labib i ed nou reziste bann latak lo nou spirityalite
[Portre lo paz 15]
I byen ki nou priy Zeova pour led pour sirmont bann move dezir
[Portre lo paz 16]
Bann lobzektif spirityel i kapab ed nou preokip nou avek lespri