En Lasosyasyon Mondyal Pe Pran Swen Avek Kanmarad

PARTOU kot ou gete, i annan dimoun. En bon pe i bann dimoun aze, serten i sitan andikape ki zot pros pour pa kapab marse. I annan bann madanm ansent ek bann zenn koup avek zot pti piti ki pe swiv deryer. Zot tou zot bann refizye—zonm, fanm, ek zanfan—ki’n forse kit zot lakaz akoz lager sivil, dezas natirel, oubyen lezot sirkonstans pour al rod refiz dan en pei vwazen. Serten in ganny forse plizyer fwa pour kit zot lakour. Dek ki zot vwar premye siny konfi sivil oubyen en dezas natirel, zot ramas detrwa keksoz lakaz, pran zot zanfan, e diriz ver en landrwa pli an sekirite. Apre, ler kondisyon i retourn normal, bokou refizye i retournen pour rebatir zot lakaz e rekonmans ankor.

Diran bann lannen, Repiblik Lafrik Santral in aksepte bokou refizye sorti dan plizyer pei. Resaman, plizyer milye dimoun enkli bokou Temwen Zeova ti oblize kit Repiblik Demokratik Kongo, ki’n ganny desire par lager, pour al Repiblik Lafrik Santral ki pli an sekirite.

Led Aporte par Bann Frer

Bann Temwen an Repiblik Lafrik Santral ti konsider li en privilez pour organiz led imaniter. Bann akomodasyon ti ganny aranze pour bann frer Kretyen. O debi, bann lasanm dan bann lakaz prive ti disponib, me amezir ki lakantite refizye ti ogmante, i ti kler ki laranzman siplemanter i bezwen ganny fer. Serten Lasal Rwayonm ti ganny transformen dan bann dortwar. Bann Temwen lokal ti konmans travay pour enstal bann lalimyer anplis, met tiyo delo, e met siman ater pour konfor sa bann ki ti pou reste la. Bann refizye ti travay ansanm avek bann frer lokal pour etabli sa bann dortwar tanporer. En progranm an antye pour bann renyon Kretyen ti ganny organize dan langaz Lingala afen ki sa bann ki ti pe arive i kapab ganny bann nouritir spirityel ki soutenir lavi. Sa kolaborasyon etrwat ant bann Temwen lokal ek zot envite ti montre ki en lasosyasyon frer enternasyonal i en realite.

Bann fanmiy refizye pa ti toultan ariv ansanm. Parler, bann manm fanmiy ki ti’n  separe ti rezwenn kot zot destinasyon. En lalis sa bann ki ti ariv sen e sof ti ganny kite kot Lasal Rwayonm. Bann laranzman ti ganny fer pour trouv sa bann ki ti ankor manke. Biro brans ki diriz travay bann Temwen Zeova dan sa pei, ti anvoy trwa transpor par zour pour ed bann Temwen ki ti ankor lo semen e pour rod bann ki ti’n kapab perdi. Sa bann transpor ti ganny idantifye par en gran lansenny, ki lir “LATOUR VEYER—Bann Temwen Zeova.”

Imazin lazwa ki set zanfan refizye, ki ti’n separe avek zot paran, ti resanti ler zot ti vwar en vann bann Temwen Zeova. Deswit, zot ti tay kot sa transpor e idantifye zot konman bann Temwen. Bann frer ti fer zot anbarke e anmenn zot kot en Lasal Rwayonm, kot zot ti finalman reini avek zot fanmiy.

Kwa ki’n kapab ed sa bann Kretyen senser pour fer fas avek bann tel sirkonstans, pa zis en fwa, me plizyer fwa? Zot antyerman konvenki ki nou pe viv dan bann dernyen zour parey Labib ti predir.—2 Timote 3:1-5; Revelasyon 6:3-8.

Alor, zot konnen ki Zeova Bondye pou byento met en lafen avek lager, laenn, vyolans, ek konfli. Problenm refizye pou en keksoz lepase. Antretan, an armoni avek konsey Pol dan 1 Korentyen 12:14-26, bann Temwen Zeova i fer bokou zefor pour pran swen avek kanmarad. Kantmenm zot separe par bann larivyer, frontyer, langaz, ek distans, zot mazin kanmarad, alor zot pa tarde pour azir ler enn i dan bezwen.—Zak 1:22-27.

[Portre lo paz 30]

Mountain High Maps® Copyright © 1997 Digital Wisdom, Inc.

[Map lo paz 30]

(Pour prezantasyon, vwar piblikasyon)

LAFRIK

Repiblik Lafrik Santral

Repiblik Demokratik Kongo

[Portre lo paz 30]

Trwa Lasal Rwayonm ti servi konman bann sant lakey

[Portre lo paz 31]

Bann fasilite lakwizin ti ganny enstale imedyatman

[Portre lo paz 31]

Plis ankor ti kontinyen arive

[Portre lo paz 31]

Fek ne e deza refizye