Eski Ou Pe “Servi Byen Tou Bann Lokazyon”?

LAPOT Pol ti konsey bann Kretyen dan premye syek an Efez: “Fer byen atansyon ki mannyer zot viv. Pa viv konman bann dimoun inyoran, me konman bann dimoun saz. Servi byen tou bann lokazyon ki prezant devan zot, parski sa letan ki nou pe viv ladan i move.” (Efezyen 5:15, 16) Akoz sa ti en konsey apropriye? Pour kapab reponn sa kestyon i neseser konnen ki kondisyon ki bann Kretyen ti pe fer fas avek dan sa ansyen lavil.

Efez ti renonmen pour son gran larises, limoralite degradan, bokou krim, ek en varyete aktivite demonyak. Anplis, bann Kretyen dan sa landrwa ti bezwen lite kont bann krwayans filozofik konsernan letan. Bann Grek ki pa ti Kretyen pa ti krwar ki letan i mars dan en direksyon. Filozofi Grek ti’n ansennyen ki lavi ti ganny repete dan bann sik enfini. En dimoun ki ti gaspiy son letan dan en sik lavi ti pou kapab reganny sa letan dan en lot sik. Sa kalite panse ti kapab ankouraz bann Kretyen an Efez pour pa port tro bokou lentere lo bann levennman dan progranm Zeova, enkli son letan fikse pour zizman divin. Alor, konsey Pol pour ‘servi byen tou bann lokazyon’ ti apropriye.

Pol pa ti pe koz lo letan dan en sans zeneral. Sa mo Grek ki i ti servi i vedir en letan fikse, en letan apropriye pour en bi spesifik. Pol ti pe konsey bann Kretyen premye syek pour servi dan en fason saz sa peryod apropriye oubyen lepok favorab, ki zot ti pe aktyelman rezwir, avan ki sa peryod i fini e ki mizerikord divin ek loportinite pour delivrans i ganny retire.—Romen 13:11-13; 1 Tesalonisyen 5:6-11.

Nou osi nou pe viv dan en peryod letan apropriye. Olye gaspiy sa letan favorab ki pa pou zanmen ganny repete par rod bann plezir tanporer ki sa monn i ofer, bann Kretyen i montre zot saz si zot servi sa letan disponib pour fer bann aksyon ki montre “respe pour Bondye” e alor fortifye zot relasyon avek zot Kreater, Zeova Bondye.—2 Pyer 3:11; Psonm 73:28; Filipyen 1:10.