Ki Mannyer Viv Konman En Vev Ti Afekte De Madanm
Ki Mannyer Viv Konman En Vev Ti Afekte De Madanm
SANDRA i en vev ki viv Lostrali. Detrwa lannen pase ler son mari ti mor, son premye reaksyon ti en gran sok. “Ler mon ti realize ki en sel kou mon’n perdi mon partner e mon pli bon zanmi, sa ti tro bokou pour mwan. Vreman, mon pa kapab rapel konman mon ti fer pour retourn kot lakaz sorti lopital oubyen ki mon ti fer larestan sa zour. Pandan sa detrwa semenn ki ti swiv, mon lafreyer ti devlop dan en douler fizik ki mon ti resanti tanzantan.”
Sandra i annan en zanmi pli aze ki li, ki apel Elaine, e ki annan apepre sis an depi ki i en vev. Elaine ti pran swen avek son mari, David, pour sis mwan avan ki i ti mor avek kanser. Son latristes ti sitan profon ki en pe letan apre lanmor son mari, i pa ti vwar kler pour en serten letan. De an plitar i ti tonbe an piblik. Son dokter pa ti vwar okenn siny maladi fizik. Sepandan, i ti dekouver ki Elaine ti’n gard son latristes anndan, alor sa dokter ti sizere ki i al kot li e fer zefor pour plere. Elaine ti admet: “I ti pran mwan en bon pe letan pour fer fas avek mon latristes,” kan i ti vwar li tousel i dir, “Mon ti menm abitye al dan lasanm e kouver mon latet avek bann lenz David.”
Wi, lanmor en partner ki ti tre pros i kapab koz diferan reaksyon, akoz viv konman en vev i an realite enplik plis ki senpleman viv san en mari. Par egzanp, Sandra ti santi ki i ti’n perdi son lidantite pour en serten letan. Parey bokou lezot vev ki’n fek perdi zot partner, i ti osi santi li vilnerab e pa an sekirite. Sandra i rapel: “Vi ki mon ti’n abitye avek sa labitid ki mon mari i pran bann desizyon final, en sel kou mon ti trouv mwan tousel pour fer sa bann desizyon. Mon pa ti dormi byen. Mon ti santi mwan fay e fatige. I ti difisil konnen ki pou fer.”
Toulezour, partou dan lemonn, bokou i eksperyans menm sitiasyon avek Sandra ek Elaine. Maladi, aksidan, lager, netwayaz etnik, ek vyolans an zeneral i kontribye pour ogmant lakantite vev. * Bokou sa bann madanm i soufer an silans, zot pa konnen ki pour fer. Ki bann zanmi ek fanmiy i kapab fer pour ed sa bann ki pe aziste zot lavi konman vev? Lartik swivan i donn serten sizesyon ki kapab itil.
[Not anba lo paz]
^ par. 5 I annan lezot madanm ki zot sitiasyon i parey avek bann vev parski zot mari i kit zot. Kantmenm separasyon ek divors i annan son prop problenm, detrwa prensip ki pou ganny diskite dan sa lartik swivan i kapab osi ed sa bann madanm ki dan sa sitiasyon.