Port Latansyon Lo Bann Travay Merveye Zeova
Port Latansyon Lo Bann Travay Merveye Zeova
“Bokou keksoz ou menm ou’n fer, O Zeova mon Bondye, menm ou bann travay merveye e ou bann panse anver nou; okenn pa kapab ganny konpare avek ou.”—PSONM 40:5.
1, 2. Ki laprev i annan lo bann travay merveye Zeova, e ki sa i devret pous nou pour fer?
KAN ou lir Labib, ou kapab fasilman vwar ki Bondye ti fer bann keksoz merveye pour son pep ansyen, Izrael. (Zozye 3:5; Psonm 106:7, 21, 22) Menm si Zeova pa pe aktyelman enterfer dan bann zafer imen parey i ti fer an Izrael, nou vwar bokou laprev son bann travay merveye otour nou. Alor nou annan tou rezon pour dir ansanm avek sa psalmis: “Konman ou bann travay i bokou, O Zeova! Zot tou ou’n fer avek lasazes. Later i ranpli avek ou bann prodiksyon.”—Psonm 104:24; 148:1-5.
2 Bokou dimoun ozordi i inyor oubyen rezet levidans kler bann aktivite Kreater. (Romen 1:20) Toutfwa, i dan nou lentere pour reflesir lo zot e pour tir bann konklizyon an rapor avek nou pozisyon devan nou Kreater ensi ki nou devwar anver li. Zob sapit 38 a 41 i bann led ekselan dan sa domenn parski nou vwar ki Zeova pe atir latansyon Zob lo serten laspe Son bann travay merveye. Annou egzamin serten kestyon valab ki Bondye ti souleve.
Bann Travay Pwisan e Merveye
3. Dan Zob 38:22, 23, 25-29, lo kwa Bondye i demann kestyon?
3 En serten moman, Bondye ti demann Zob: “Eski ou’n antre dan bann stor lanez, oubyen eski ou’n menm vwar bann stor lagrel, ki mon’n rezerve pour letan ladetres, pour zour konba ek lager?” Dan plizyer rezyon lo nou later, lanez ek lagrel i form par lavi. Bondye i kontinyen: “Lekel ki’n prepar en pasaz pour linondasyon ek en semen pour bann nyaz tanpet toner, pour fer lapli tonm lo later kot napa okenn zonm, dan dezer kot napa okenn zonm tire dan lapousyer, pour satisfer bann landrwa ki ganny tape avek tanpet e dezerte e pour fer zermen zerb? Eski i egziste en papa pour lapli, oubyen lekel ki ti donn nesans bann gout laroze? Dan vant lekel ki ays i vreman sorti, e konsernan laroze lesyel ki’n vin ays, lekel vreman ki donn li nesans?”—Zob 38:22, 23, 25-29.
4-6. Dan ki sans zonm napa en konnesans konplet lo lanez?
4 Serten ki viv dan en sosyete kot tou dimoun i prese e bezwen vwayaze i kapab vwar lanez senpleman konman en lobstak. Parkont, plizyer lezot dimoun i vwar lanez konman en keksoz agreab, ki prodwir en landrwa merveye pandan liver e ki prezant bann loportinite pour bann aktivite spesyal. Avek kestyon Bondye antet, eski ou annan en konnesans profon lo lanez, menm lo ki mannyer i ete? Dakor, nou konnen konman en kantite lanez i ete, petet nou’n vwar bann baraz lanez lo portre oubyen nou’n vwar an realite en kantite lanez. Me bann gren lanez? Eski ou konnen ki mannyer zot ete, petet eski ou’n egzamin zot kot zot sours?
5 Serten in pas plizyer dizenn lannen pour etidye e tir portre bann gren lanez. En gren lanez i kapab konpoze avek san kristal ays tre frazil ki dan en varyete bann zoli laform. Liv Atmosphere i dir: “Sa varyete enfini bann gren lanez i lezander, e kantmenm bann syantis i ensiste ki okenn lalwa lanatir pa anpes zot prodwir de ki idantik, de fragman parey pa’n zanmen ganny trouve. En tre gran resers ti ganny kondwir par . . . Wilson A. Bentley, ki’n pas plis ki 40 an pour egzamin e tir portre bann gren lanez atraver en mikroskop san zanmen arive dekouver de ki egzakteman parey.” E menm si, dan en ka rar, de i paret idantik, eski sa ti pou vreman sanz mervey sa gran varyete gren lanez?
6 Rapel kestyon Bondye: “Eski ou’n antre dan bann stor lanez?” Bokou dimoun i panse ki se bann nyaz ki bann stor lanez. Eski ou kapab imazinen ki ou pe al dan sa bann stor pour klasifye bann gren lanez dan zot varyete enfini e pour etidye konman ki zot in aparet? En ansiklopedi lasyans i dir: “Natir ek lorizin sa bann pti partikil ki neseser pour fer bann gout delo dan nyaz vin solid dan en tanperatir apepre -40°C, i ankor touzour pa kler.”—Psonm 147:16, 17; Izai 55:9, 10.
7. Ki degre konplet sa konnesans ki imen i annan lo lapli?
7 Oubyen konsernan lapli? Bondye ti demann Zob: “Eski i egziste en papa pour lapli, oubyen lekel ki ti donn nesans bann gout laroze?” Sa menm ansiklopedi lasyans i dir: “Parski konpleksite bann mouvman dan latmosfer ek sa kantite diferan form vaper ek partikil dan konpozisyon ler, i sanble enposib pour etabli en detay, en teori zeneral lo formasyon bann nyaz ek lapli.” Andotmo, bann syantis in sizer bann teori byen detaye me zot pa vreman kapab byen konpran lapli. Pourtan, ou konnen ki lapli i esansyel e i tonbe, i aroz later, i soutenir bann plant, i fer lavi posib e agreab.
8. Akoz parol Pol rikorde dan Akt 14:17 i apropriye?
8 Eski ou pa dakor avek konklizyon ki lapot Pol ti fer? I ti ankouraz lezot pour vwar dan sa bann travay merveye en temwannyaz lo sa Enn ki par deryer tousala. Pol ti dir konsernan Bondye: “Me kantmenm sa i’n touzour revel son lekor par bann dibyen ki i’n fer: I’n donn zot son lapli sorti dan lesyel, ek bann rekolt, sakenn son sezon. I’n donn zot osi manze e i’n ranpli zot leker avek lazwa.”—Akt 14:17; Psonm 147:8.
9. Konman ki bann travay merveye Bondye i demontre son gran pwisans?
9 Napa okenn dout ki sa Enn ki’n fer sa bann travay merveye e itil i annan sazes enfini ek en gran pwisans. Pour met lanfaz lo son pwisans, reflesir lo sa: I’n ganny dir ki i annan apepre 45,000 tanpet avek zekler sak zour, plis ki 16 milyon dan en lannen. Sa i vedir ki konmela menm i annan apepre 2,000 tanpet ki pe arive. Bann nyaz konpleks pour zis en tanpet i kontyen lenerzi ki egal dis fwa oubyen plis pwisans ki bann bonm nikleer, ki ti ganny large dan Dezyenm Lager Mondyal. Ou kapab vwar en pe sa lenerzi dan laform zekler. Me sa bann zekler pa zis fer per, an realite zot ede pour prodwir en kalite kemikal nitrozenn ki antre dan later, kot bann plant i absorb zot konman bann langre natirel. Alor zekler pa zis montre son lenerzi, me i osi anmenn bann vre benefis.—Psonm 104:14, 15.
Ki Lefe i Annan lo Ou?
10. Konman ou ti a reponn sa bann kestyon ki ganny trouve dan Zob 38:33-38?
10 Imazinen ki ou dan plas Zob, pe ganny kestyonnen par Bondye Tou Pwisan. Probableman ou pou dakor ki laplipar dimoun i port tre pe latansyon lo bann travay merveye Bondye. Zeova i demann nou sa bann kestyon ki nou lir dan Zob 38:33-38. “Eski ou’n arive konn bann lalwa lesyel, oubyen eski ou ti a kapab met son lotorite lo later? Eski ou kapab lev ou lavwa ziska nyaz, afen ki en mas delo azite i kouver ou? Eski ou kapab anvoy bann zekler afen ki zot kapab ale e dir avek ou, ‘La nou la!’? Lekel ki’n met lasazes dan bann lepeser nyaz, oubyen lekel ki ti donn konpreansyon avek fenomenn lesyel? Lekel ki kapab avek sazes kont nyaz dan en fason egzakt, oubyen bann potao delo lesyel—lekel ki kapab ranvers zot, ler lapousyer i koul parey en mas metal fonn e bann mas later i ganny kole ansanm?”
11, 12. Ki serten keksoz ki prouve ki Bondye i sa Enn ki fer bann keksoz merveye?
11 Nou’n abord selman ennde pwen ki Eliou ti souleve avek Zob e nou’n not serten keksoz ki Zeova ti demann Zob pour reponn “parey en zonm robis.” (Zob 38:3) Nou dir “serten” parski dan sapit 38 ek 39, Bondye ti port latansyon lo lezot laspe kreasyon. Par egzanp, bann konstelasyon dan lesyel. Lekel ki konn tou zot lalwa ou lareg? (Zob 38:31-33) Zeova ti diriz latansyon Zob lo serten zannimo—lyon ek korbo, kabri montanny ek zeb, toro sovaz ek otris, seval pwisan ek leg. Annefe, Bondye ti demann Zob si i ti’n donn sa varyete zannimo zot karakteristik, ki permet zot kontinyen viv e prospere. Petet ou apresye etidye sa bann sapit, sirtou si ou kontan seval oubyen lezot zannimo.—Psonm 50:10, 11.
12 Ou kapab egzamin osi Zob sapit 40 ek 41, kot ankor Zeova i demann Zob pour reponn serten kestyon lo de kreatir partikilye. Nou mazinen ki sa de kreatir i ipopotanm (Beemot), enorm lo groser e lo lafors, ek krokodil larivyer Nil, ki ekstraordiner (Levyatan). Sakenn i en kreasyon merveye, dan son prop fason, ki merit nou latansyon. Annou aprezan vwar ki konklizyon nou devret tire.
13. Ki lefe bann kestyon Bondye ti annan lo Zob, e ki mannyer sa i devret afekte nou?
13 Zob sapit 42 i montre nou lefe ki bann kestyon Bondye ti fer lo Zob. Avan sa Zob ti pe port tro bokou latansyon lo li menm ek lezot. Me, apre ki i ti aksepte koreksyon endirek ki i ti gannyen atraver bann kestyon Bondye, Zob ti sanz son fason panse. I ti konfese: “Mon’n arive konnen ki ou kapab fer tou keksoz, e napa okenn lide ki enposib pour ou. ‘Lekel sa enn ki asonbri konsey san konnesans?’ Alor mon ti koze, me mon pa ti pe konpran bann keksoz tro merveye pour mwan, ki mon pa konnen.” (Zob 42:2, 3) Wi, apre ki i ti’n port latansyon lo bann travay Bondye, Zob ti dir ki sa bann keksoz i tro merveye pour li. Apre ki nou’n vwar sa bann keksoz merveye dan kreasyon, nou osi nou devret enpresyonnen avek lasazes ek pwisans Bondye. Avek ki lobzektif ? Eski senpleman pour enpresyonnen avek son gran pwisans ek abilite? Oubyen eski nou devret ganny touse pli profon?
14. Ki mannyer David ti reakte anver bann travay merveye Bondye?
14 Dan Psonm 86, bann lekspresyon parey ti ganny prononse par David, ki pli boner dan en psonm i ti dir: “Lesyel pe deklar laglwar Bondye; e travay son lanmen letandi pe anonse. En zour apre en lot zour fer sorti laparol, e en lannwit apre en lot lannwit revel konnesans.” (Psonm 19:1, 2) David ti kontinyen. Dan Psonm 86:10, 11, nou lir: “Ou gran e pe fer bann keksoz merveye; se ou, ou tousel ki Bondye. Enstri mwan, O Zeova, konsernan ou semen. Mon pou mars dan ou laverite. Inifye mon leker pour annan lakrent pour ou non.” Respe ki David ti annan pour son Kreater pour tou Son bann travay merveye, ti enkli en serten lakrent apropriye. Ou kapab konpran akoz. David pa ti anvi depler sa Enn ki kapab perform sa bann travay merveye. Nou osi nou pa devret fer li.
15. Akoz sa lakrent reveransyel ki David ti annan pour Zeova ti apropriye?
15 David ti’n bezwen realize ki etan donnen ki Bondye i annan en pwisans ekstraordiner e ki se li ki kontrol son pwisans, i kapab diriz li kont nenport ki ki pa merit son faver. Pour sa bann, sa i pa en bon nouvel. Bondye ti demann Zob: “Eski ou’n antre dan bann stor lanez, oubyen eski ou’n menm vwar bann stor lagrel, ki mon’n rezerve pour letan ladetres, pour zour konba ek lager?” Lanez, lagrel, tanpet lapli, divan, ek zekler, tousala i dan larmiri Bondye. Pa sa bann lafors natirel i annan en pwisans spektakiler!—Zob 38:22, 23.
16, 17. Kwa ki ilistre sa pwisans enpresyonan ki Bondye i annan, e konman ki i’n servi sa pwisans dan lepase?
16 Probableman ou rapel serten katastrof lokal koze par enn sa bann lafors—en siklonn, en tanpet lagrel, oubyen en lavalas. Par egzanp, boner dan lannen 2000, en gro tanpet ti tap sid was Lerop. Sa ti sirprann menm bann eksper letan. Bann divan pli for ti ariv 200 kilomet par er-d-tan, retir plizyer milye twa lakaz, zet bann poto elektrik, e savir bann kanmyon. Esey mazin sa: Sa peryod tanpet ti derasin oubyen kas an de 270 milyon pye dibwa, 10,000 zis dan zarden Versailles, an deor Pari. Plizyer milyon lakour ti reste san elektrisite. Lakantite ka lanmor ti preske 100. Tousala ti pas selman dan en kourt peryod. Ki kantite lafors!
17 En dimoun i kapab konsider bann tanpet konman bann lensidan ki pa kapab ganny kontrole e planifye. Ki ti pou arive, toudmenm, si sa Enn tou pwisan i perform bann travay merveye an servan bann tel lafors dan en fason kontrole e dirize? I ti fer en keksoz parey dan letan Abraam, ki ti aprann ki Ziz tou later ti’n evalye mesanste de lavil, Sodonm ek Gomor. Zot ti telman koronpi ki bann konplent konsernan zot ti’n ariv ziska kot Bondye, ki ti ed tou bann dimoun drwat pour sove dan sa de lavil ki ti’n ganny kondannen. Listwar i raporte: “Alor Zeova ti fer tonbe lapli souf ek dife sorti kot Li dan lesyel,” lo sa de lavil. Sa ti en travay merveye, ki ti prezerv bann zis e detri bann ki konpletman mesan.—Zenez 19:24.
18. Ki bann keksoz merveye Izai sapit 25 pe montre?
18 Plitar, Bondye ti pran en desizyon zizman kont ansyen lavil Babilonn, ki petet i ti sa lavil ki Izai sapit 25 ti refer avek. Bondye ti predir ki en lavil ti pou vin en rin: “Ou’n fer en lavil vin parey en ta ros, en lavil fortifye en rin, ki en tour abite par bann etranze i nepli en lavil, ki pa pou ganny rebatir pour letan endefini.” (Izai 25:2) Ozordi bann viziter ki vizit sa landrwa kot Babilonn ti ete, i kapab konfirmen ki sa i vre. Eski destriksyon Babilonn ti zis en kwensidans? Non. Plito nou aksepte evalyasyon Izai: “O Zeova, ou mon Bondye. Mon glorifye ou, mon loue ou non, akoz ou’n fer bann keksoz merveye, bann konsey depi lontan, avek fidelite, avek lwayote.”—Izai 25:1.
Bann Travay Merveye dan Lavenir
19, 20. Ki lakonplisman ki nou pe ekspekte dan Izai 25:6-8?
19 Bondye ti akonpli sa profesi, ki nou’n fek vwar, dan lepase e i pou azir osi merveye dan lavenir. Dan sa konteks kot Izai i mansyonn “bann keksoz merveye” Bondye, nou trouv en profesi ki nou asire pou ganny akonpli zis parey zizman lo Babilonn ti ganny akonpli. Ki ‘keksoz merveye’ ki ganny promet? Izai 25:6 i dir: “Zeova bann larme pou sertennman fer pour tou pep, dan sa montanny, en festen avek bann nouritir ris an lwil, en festen avek diven ki’n repoze lo son lanmar, bann nouritir ris an lwil ranpli avek lanmwel, diven ki’n repoze lo son lanmar, filtre.”
20 Sa profesi pou sirman ganny akonpli dan nouvo monn promiz par Bondye, ki zis devan nou. Sa letan, limanite pou ganny soulaze avek bann problenm ki pe akable bokou dimoun ozordi. Annefe, sa profesi dan Izai 25:7, 8 i garanti ki Bondye pou servi son pouvwar kreatif pour fer enn bann travay pli merveye dan tou letan: “I pou aktyelman anval lanmor pour touzour, e Souvren Senyer Zeova pou sertennman eswiy bann larm lo tou figir. E repros son pep i pou tire lo tou later, akoz Zeova li menm in dir.” Lapot Pol ti plitar sit sa menm pasaz e aplik li avek rezireksyon bann mor, kot Bondye pou redonn lavi bann ki’n mor. Pa i pou en travay merveye!—1 Korentyen 15:51-54.
21. Ki bann travay merveye Bondye pou fer an faver bann ki’n mor?
21 En lot rezon akoz larm ladetres pou disparet se ki bann maladi pou ganny eliminen. Ler Zezi ti lo later, i ti geri bokou dimoun —i ti fer bann aveg vwar kler, fer tande bann sourd, e donn lafors bann andikape. Zan 5:5-9 i rakonte ki i ti geri en zonm ki ti bwate pour 38 an. Bann obzervater ti panse ki sa ti en mervey oubyen en travay merveye. E i ti egzakteman sanmenm! Me Zezi ti dir zot ki kan i pou resisit bann mor sa pou en keksoz pli merveye ankor: “Pa bezwen etonnen ler mon dir sa, akoz sa ler pe arive kan tou bann mor ki dan tonbo pou tann son lavwa, e zot pou sorti dan zot tonbo. Bann ki’n fer sa ki byen, pou resisite pour resevwar lavi, me bann ki’n fer sa ki mal, pou resisite pou ganny kondannen.”—Zan 5:28, 29.
22. Akoz bann pov ek bann aflize i kapab get lavenir avek lespwar?
22 Sa pou sirman arive parski Zeova i sa enn ki’n promet pour fer li. Ou kapab sir ki ler i servi e diriz avek swen son gran pwisans, rezilta pou merveye. Psonm 72 i endike ki i pou fer atraver son Garson Lerwa. Apre sa, sa ki drwat pou zermen. Lape pou an abondans. Bondye pou delivre sa bann ki pov e aflize. I promet: “I pou annan legren an abondans lo later; anler lo bout montanny pou annan en provizyon. Son fri pou parey [ansyen] Liban, e bann ki sorti dan sa lavil pou fleri parey vezetasyon later.”—Psonm 72:16.
23. Bann travay merveye Bondye i devret pous nou pour fer kwa?
23 Evidaman, nou annan rezon pour port latansyon lo tou travay merveye Zeova—sa ki i’n fer dan lepase, sa ki i pe fer ozordi, e sa ki i pou fer dan lavenir pros. “Beni Zeova Bondye, Bondye Izrael, ki li tousel pe fer bann travay merveye. E beni son non manifik pour letan endefini, e les son laglwar ranpli later antye. Amenn e Amenn.” (Psonm 72:18, 19) Sa i devret regilyerman vin size nou konversasyon pasyonan avek nou fanmiy ek lezot. Wi, annou “deklar son laglwar parmi bann nasyon, son bann travay merveye parmi tou pep.”—Psonm 78:3, 4; 96:3, 4.
Konman Ou Ti a Reponn?
• Konman ki sa bann kestyon ki Zob ti ganny demande i met lanfaz lo limit konnesans imen?
• Ki bann legzanp travay merveye Bondye dan Zob sapit 37-41, ki’n enpresyonn ou?
• Ki mannyer ou devret reazir apre ki ou’n egzamin bann travay merveye Bondye?
[Kestyon]
[Portre lo paz 16]
Ki konklizyon ou kapab tire lo sa varyete gren lanez ek lo pwisans enpresyonan ki zekler i annan?
[Portre lo paz 16]
snowcrystals.net
[Portre lo paz 18]
Les bann travay merveye Bondye vin en par regilye ou konversasyon