Gidans Bondye Pour Swazir En Konzwen

“Mon pou fer ou annan disernman e enstri ou lafason ou devret ale. Mon lizye pou lo ou pour konsey ou.”—PSONM 32:8.

1. Ki bann diferan keksoz ki neseser pour en maryaz reisi?

EN AKROBAT i lanse lo son balans, i ploy son lekor, e devire dan ler. I rapidman redi son lekor, grandi son lebra e ganny atrape par en lot akrobat ki latet anba lo son balans lot kote. En koup ki pe glise lo laglas i glis fasilman ansanm dan en patinwar. En sel kou, sa zonm i lev son partner e anvoy li dan ler. I vire, e tonm lo en kote lipye, apre i kontinyen tournen avek son partner lo laglas. I paret ki sa de performans i ganny fer preski san okenn zefor. Pourtan, lekel ki ti a sey fer sa de legzersis san ki zot egzerse, san en partner ki kapab, e sirtou san en gidans oubyen bann konsey apropriye. Pareyman, nou kapab mazinen ki en bon maryaz i ariv par azar. Me pourtan, i depan lo en bon konzwen, lo zefor ki zot fer ansanm, e sirtou lo bann bon konsey. Sertennman, en gidans apropriye i esansyel.

2. (a) Lekel ki ti etablir laranzman maryaz, e pour ki bi? (b) Konman serten laranzman maryaz ti ganny fer?

² I normal pour en zenn selibater, garson ou fiy, pans lo en konzwen—en konpanny dan lavi. Depi ki i’n ganny etablir par Zeova Bondye, maryaz en zonm avek en fanm in vin en fason normal pour viv. Me sa premye zonm, Adan, pa ti swazir son madanm. Avek lanmour Zeova ti donn li enn. (Zenez 2: 18-24) Sa premye koup ti pou annan zanfan pour ki later i finalman ranpli avek imen. Apre sa premye linyon, bann laranzman maryaz ti ordinerman ganny fer par paran sa de fitir marye, parfwa apre ki zot in fini ganny konsantman sa de nouvo marye. (Zenez 21:21; 24:2-4, 58; 38:6; Zozye 15:16, 17) Menm si dan serten pei ek kiltir bann maryaz ki paran i aranze i ankor egziste, ozordi plizyer dimoun i swazir zot konzwen zot menm.

3. Kimannyer en konzwen i merit ganny swazir?

³ Konman nou devret swazir en konzwen? Serten i ganny enfliyanse par laparans—si zot vwar li zoli e atiran pour lizye. Lezot i rod benefis materyel, en dimoun ki pou pran byen swen avek zot, ki pou donn zot sa ki zot bezwen oubyen sa ki zot anvi. Me eski en tel lapros lo limenm i anmenn en relasyon ki bon e satisfezan? “Sarm i kapab fo, e labote i kapab anven,” Proverb 31:30 i dir “me sa fanm ki annan lakrent pour Zeova i sa enn ki pou ganny felisite.” Ladan i annan en pwen enportan: Pran Zeova an konsiderasyon letan ou pe swazir en konzwen.

Gidans sorti kot en Bondye ki kontan nou

4. Ki led ki Bondye in donnen pour ed nou swazir en konzwen?

⁴ Zeova, nou Papa i kontan nou e i’n donn son Parol an ekri pour gid nou dan tou fason. I’n dir: “Mwan, Zeova, mon ou Bondye, sa Enn ki pe ansenny ou pour ou prop profi, sa Enn ki pe fer ou mars lo sa semen lo ki ou devret marse.” (Izai 48:17) Alor, i pa etonnan ki Labib i donn bann konsey diny konfyans pour byen swazir en konzwen. Zeova i oule ki nou maryaz i ere e dir lontan. An konsekans, i’n donn nou led pour konpran e aplik sa  bann konsey. Eski pa sa ki nou ekspekte avek en Papa ki kontan nou?—Psonm 19:8.

5. Ki sa ki esansyel pour boner dirab dan en maryaz?

⁵ Letan Zeova ti etablir laranzman maryaz, i ti oule ki i vin en langazman ki dire. (Mark 10:6-12; 1 Korentyen 7:10, 11) Se pour sa rezon “ki i’n ay divors,” e ki i’n permet divors zis pour en rezon, “fornikasyon.” (Malaki 2:13-16; Matye 19:9, NW ) Sepandan, swazir en konzwen i enn bann pa pli enportan ki nou kapab pran e i pa devret ganny pran lezerman. Napa bokou desizyon ki kapab sitan sanz nou lavi pour anmenn swa boner swa tristes. En bon swa i kapab amelyor lavi en dimoun e fer li satisfezan, tandis ki en move swa i kapab anmenn soufrans ki dir pour lavi. (Proverb 21:19; 26:21) Pour nou eksperyans en boner dirab, i tre enportan pour nou byen swazir nou konzwen e pare pour fer en langazman ki pou dire, akoz Bondye ti etablir maryaz konman en linyon ki pou reisi dan larmoni ek korperasyon.—Matye 19:6.

6. Akoz en zenn zan ek en zenn fiy i vreman bezwen fer atansyon ler zot pe swazir en konzwen, e konman zot kapab fer en pli bon desizyon?

⁶ Fodre ki bann zenn zan ek zenn fiy i veye ki labote fizik ek dezir seksyel pa deform zot zizman letan zot pe swazir en konzwen. Sertennman, en relasyon ki baz inikman lo sa bann fakter i kapab vitman ganny ranplase par lendiferans oubyen laenn. (2 Samyel 13:15) Dan lot kote, lanmour dirab i kapab ganny kiltive anmezir ki nou pe aprann konn nou konpanny e osi anmezir ki nou aprann konpran nou menm. Nou bezwen realize ki petet sa ki bon pour nou i pa sa ki nou leker i anvi premyerman. (Zeremi 17:9) Se pour sa rezon ki konsey divin ki dan Labib i vreman enportan. I ed nou pour distenge konman nou kapab fer bann desizyon ki saz dan lavi. Zeova i dir atraver sa psalmis: “Mon pou fer ou annan disernman e enstri ou lafason ou devret ale. Mon lizye pou lo ou pour konsey ou.” (Psonm 32:8; Ebre 4:12) Menm si maryaz i kapab satisfer en bezwen natirel pour resevwar lanmour ek lanmitye, i osi prezant problenm ki demann matirite ek disernman.

7. Akoz serten pa aksepte konsey baze lo Labib konsernan swazir en konzwen, e ki konsekans sa i kapab anmennen?

⁷ I saz pour port atansyon lo sa ki Loter maryaz i annan pour dir lo size swazir  en konzwen. Me toudmenm, nou kapab refize pour aksepte en konsey baze lo Labib ki nou gannyen avek bann paran oubyen bann ansyen dan kongregasyon. Nou kapab santi ki zot pa vreman konpran nou, e bann dezir emosyonnel ki tre for i kapab pous nou pour swiv tandans nou leker. Apre en serten letan, ler nou’n fer fas avek bann realite lavi, nou kapab regrete ki nou pa’n ekout bon konsey ki ti ganny ofer pour nou benefis. (Proverb 23:19; 28:26) Nou pou vwar nou dan en maryaz ki mank lanmour, avek bann zanfan ki nou rankontre difikilte pour elve e petet menm avek en konzwen non-krwayan. Pa i tris ki en langazman ki ti a kapab anmenn sitan boner i vin plito en sours detres!

Latasman avek Bondye —en Eleman esansyel

8. Konman ki latasman avek Bondye i ed en maryaz pour dir lontan e anmenn boner?

⁸ Zeneralman, latraksyon ki de dimoun i annan pour kanmarad i ede fer en maryaz solid. Me bann kalite ki zot annan an komen i pli enportan pour fer en linyon konzigal andire e pour anmenn boner. Si tou le de i annan menm devouman anver Zeova Bondye, sa i kree en lyen dirab e i promot linite dan en fason ki okenn lezot eleman pa kapab. (Eklezyast 4:12) Letan en koup Kretyen i santre zot lavi lo vre ladorasyon Zeova, zot ini spirityelman, mantalman, e moralman. Zot etidye Parol Bondye ansanm. Zot priy ansanm, e sa i inifye zot leker. Zot akonpanny kanmarad pour bann renyon Kretyen e zot travay ansanm dan predikasyon. Tousala i ede pour etabli en lyen spirityel ki anmenn zot pre avek kanmarad. Sa ki pli enportan ankor, se ki zot ganny benediksyon Zeova.

9. Ki Abraam ti fer pour rod en madanm pour Izaak, e avek ki rezilta?

⁹ Parski i ti annan latasman avek Bondye, sa fidel Patriars Abraam ti oule fer plezir Bondye letan ti’n ariv ler pour swazir en madanm pour son garson Izaak. Abraam ti dir avek son serviter diny konfyans: “Mon bezwen fer ou fer serman devan Zeova, Bondye lesyel e Bondye later, ki ou pa pou pran en madanm pour mon garson parmi bann fiy Kananeen kot mon reste, me ou pou al dan mon pei ek mon parante, e vreman ou ava pran en madanm pour mon garson, pour Izaak. . . . [Zeova] pou anvoy son lanz devan ou, e ou pou vreman pran en madanm laba pour mon garson.” Letan ti prouve ki Rebeka ti en madanm eksepsyonnel, ki Izaak ti kontan bokou.—Zenez 24:3, 4, 7, 14-21, 67.

10. Ki bann lobligasyon Biblik ki’n ganny plase lo bann mari ek bann madanm?

¹⁰ Si nou en Kretyen ki pa ankor marye, latasman avek Bondye pou ed nou pour devlop bann kalite ki pou permet nou desarz bann lobligasyon ki enplike dan en lavi maryaz. Parmi bann lobligasyon ki bann mari ek bann madanm i annan, zapot Pol ti site: ‘Bann madanm, zot devre obei zot mari, parey zot obei Senyer. . . . Zot bann mari, kontan zot madanm, parey Kris in kontan kongregasyon e in donn son lavi pour li . . . Bann zonm devre alor, kontan zot madanm parey zot kontan zot prop lekor. . . . Fodre ki sak mari i kontan son madanm parey son prop lekor e ki sak madanm i respekte son mari.’ (Efezyen 5:22-33) Parey nou kapab vwar, parol Pol ki ti ganny enspire i met lanfaz lo bezwen pour annan lanmour ek respe. Pour kapab swiv sa konsey i demann lakrent ek respe pour Zeova. I osi demann langazman senser dan botan ek move tan. Bann Kretyen ki anvizaze marye i devre kapab pran sa responsabilite.

Deside kan pour marye

11. (a) Ki konsey ki ganny donnen dan Lekritir konsernan kan pour marye? (b) Ki legzanp ki montre ki i saz pour swiv konsey Labib parey i ganny rikorde dan 1 Korentyen 7:36?

¹¹ Konnen kan nou pare pour marye i esansyel. Vi ki sa i varye dapre sak endividi, Labib pa spesifye en laz. Parkont, i byen montre ki i pli bon pour esper ziska ler nou’n ‘pas lafler  nou laz,’ kot bann dezir seksyel ki for i kapab deform nou bon zizman. (1 Korentyen 7:36, NW ) “Letan mon ti vwar mon bann zanmi pe frekante e marye, plizyer dan zot laz adolesan, sa ti fer li parfwa difisil pour aplik sa konsey,” Michelle ti dir. “Me mon ti realize ki konsey i sorti kot Zeova, e ki i ansenny nou selman sa ki pour nou benefis. Alor, antretan ki mon ti esper pour marye plitar, mon ti konsantre lo mon relasyon avek Zeova e esey ganny enpe leksperyans dan lavi, ki ou pa kapab gannyen letan ou ankor adolesan. Detrwa lannen plitar, mon ti’n pli byen prepare pour kapab desarz bann responsabilite e osi mannye bann problenm ki arive dan maryaz.”

12. Akoz i saz pour pa prese pour marye tre zenn?

¹² Bann ki prese pour marye en laz tre zenn i parfwa vwar ki zot lanvi ek dezir i sanze letan zot vin matir. Apre zot realize ki sa bann keksoz ki zot ti vwar dezirab lo konmansman in nepli enportan. En zenn ser Kretyen ti’n determinen pour marye letan i ti annan 16 an. Son granmanman ti marye sa laz, ensi ki son manman. Letan en zennonm ti refize marye avek li, i ti swazir en lot dimoun ki ti pare pour marye avek li pandan sa letan. Apre, plitar, i ti vreman plenny son move desizyon enpridan.

13. Ki bann ki marye tro vit i souvan manke?

¹³ Ler ou anvizaze marye, i enportan ki ou annan en konpreansyon matir lo sa ki i enplike. En maryaz prematire i kapab anmenn kantite problenm ki en zenn koup pour vwar difisil pour fer fas avek. Zot kapab mank leksperyans ek matirite neseser pour fer fas avek presyon lavi maryaz ek ledikasyon zanfan. Nou devret marye selman letan nou fizikman, mantalman, e spirityelman pare pour pran responsabilite en relasyon dirab.

14. Ki nou bezwen pour rezoud bann sitiasyon difisil dan maryaz?

¹⁴ Pol ti ekri ki sa bann ki marye ‘pou ganny problenm dan zot lavi.’ (1 Korentyen 7:28) Problenm pou leve akoz i annan de personnalite diferan, e bann pwenn-vi pou diferan. Akoz lenperfeksyon imen, i kapab difisil pour ranpli bann rol Biblik ki tou le de i annan dan laranzman maryaz. (1 Korentyen 11:3; Kolosyen 3:18, 19; Tit 2:4, 5; 1 Pyer 3:1, 2, 7) Fodre annan matirite ek stabilite spirityel pour sers e swiv konsey divin afen ki bann sitiasyon difisil i kapab ganny rezoud avek lanmour.

15. Ki rol bann paran i kapab zwe pour prepar zot zanfan pour maryaz? Donn en legzanp.

¹⁵ Bann paran i kapab prepar zot zanfan pour maryaz par fer zot konpran lenportans pour swiv gidans Bondye. E paran i osi kapab ed zot pour determinen si zot oubyen zot fitir konzwen in pare pour desarz lobligasyon maryaz par byen servi Labib ek bann piblikasyon Kretyen. * Blossom ti annan dizwit an kan i ti krwar ki i ti anmoure avek en zennonm dan son kongregasyon. Sa frer ti en pionye aplentan, e zot ti oule marye. Me paran sa ser ti demann li pour esper ankor en lannen, akoz zot ti mazinen ki i ti ankor tro zenn. Plitar Blossom ti ekri: “Mon tre rekonesan ki mon’n ekout sa bon konsey. Pandan sa lannen, mon’n matir e mon ti konmans vwar ki sa zennonm pa ti annan sa bann kalite ki kapab fer li vin en bon konzwen. I ti finalman kit lorganizasyon, e mon’n sov sa katastrof ki ti’n kapab ariv lo mwan. Konman i gou letan ou annan bann paran saz kot ou kapab depan lo zot zizman!”

‘Marye selon Senyer’

16. (a) Konman serten Kretyen i kapab ganny teste pour ‘marye selon Senyer’? (b) Ler bann Kretyen i ganny tante pour marye avek en non-krwayan, lo ki legzanp zot merit reflesir?

¹⁶ Lenstriksyon Zeova pour bann Kretyen i tre kler: ‘Marye selon Senyer.’ (1 Korentyen 7:39) Bann paran Kretyen ek zot zanfan i kapab ganny teste lo sa pwen. Ki fason? Bann zenn i kapab anvi marye, me zot pa trouv en  konzwen dan kongregasyon. Antouka i paret koumsa. Dan serten landrwa i kapab annan mwens frer ki ser, oubyen zot krwar ki napa personn ki konvenab dan sa landrwa. En zennonm dan kongregasyon ki pa ankor dedye son lavi avek Zeova i kapab montre lentere dan en zenn ser Kretyen (oubyen lekontrer) e i annan presyon pour mepriz bann prensip ki Zeova in mete. Dan bann sirkonstans parey, i pou pli bon reflesir lo legzanp Abraam. En fason ki i ti mentenir son bon relasyon avek Bondye i letan i ti fer sir ki son garson Izaak i marye avek en vre adorater Zeova. Izaak osi ti fer menm parey avek son garson Zakob. Sa ti demann zefor delapar tou bann dimoun konsernen, me i ti fer plezir Bondye e ti anmenn son benediksyon.—Zenez 28:1-4.

17. Akoz marye avek en non-krwayan i katastrofik, e ki rezon enportan i annan pour ‘marye selon Senyer’?

¹⁷ Dan serten ka, ennde non-krwayan i finalman vin Kretyen. Parkont, marye avek bann non-krwayan in souvan vin katastrofik. Bann ki’n asosye avek en non-krwayan, pa partaz menm krwayans, prensip, oubyen lobzektif. (2 Korentyen 6:14) Sa i annan en lefe negatif lo kominikasyon ek boner dan maryaz. Par egzanp, en fanm Kretyen ti vreman sagren lefe ki apre en renyon byen ankourazan, i pa ti kapab rantre kot lakour e diskit keksoz spirityel avek son mari non-krwayan. Pli enportan ankor, letan nou  ‘marye selon Senyer’ i demontre nou fidelite anver Zeova. Letan nou konform avek Parol Bondye, nou leker pa kondann nou, akoz nou pe fer sa ki “fer li plezir.”—1 Zan 3:21, 22.

18. Letan maryaz pe ganny konsidere, ki bann keksoz enportan ki devret ganny konsidere, e akoz?

¹⁸ Letan maryaz i ganny konsidere, bon kalite ek spirityalite sa fitir konzwen i merit vin premye konsern. En personnalite Kretyen, ansanm avek lanmour ek devouman senser pour Bondye i annan pli gran valer ki labote. Sa bann ki rekonnet e ranpli zot lobligasyon pour vin bann konzwen ki spirityelman for i rezwir laprouvasyon ki sorti kot Bondye. Pli gran lafors ki en koup i kapab gannyen i letan tou le de i devoue pour zot Kreater e aksepte antyerman son gidans. Dan sa fason, Zeova i ganny onore, e sa maryaz i konmans lo en fondasyon spirityel solid ki pou kontribye anver en linyon ki dirab.

Kimannyer ou pou reponn?

• Akoz gidans Bondye i neseser pour swazir en bon konzwen?

• Konman latasman avek Bondye i ede pour fortifye en maryaz?

• Konman bann paran i kapab prepar zot zanfan pour maryaz?

• Akoz i enportan pour ‘marye selon Senyer’?

[Not anba lo paz]

[Kestyon]

[Portre lo paz 13]

Aplik konsey Bondye pour swazir en konzwen i kapab anmenn bokou boner

[Portre lo paz 16]

Bann benediksyon manifik i vin atraver ‘marye selon Senyer’