Loue Zeova Pour Son Bann Aksyon Merveye!
Loue Zeova Pour Son Bann Aksyon Merveye!
“Mon glorifye Senyer avek tou mon leker, . . . akoz Bondye-Toupisan in fer gran keksoz pour mwan.”—LIK 1:46-49.
1. Ki bann gran keksoz ki Zeova in fer ki donn nou rezon pour loue li?
ZEOVA i merit ganny loue pour sa bann gran keksoz ki i’n fer. Kan profet Moiz ti rakont an detay delivrans Izrael anba Lezip, i ti deklare: “Se zot lizye ki’n vwar tou bann gran keksoz ki Zeova in fer.” (Deterononm 11:1-7) Demenm, kan lanz Gabriyel ti anons larive nesans Zezi avek Mari ki ti en vyerz, i ti dir: “Mon glorifye Senyer avek tou mon leker, . . . akoz Bondye-Toupisan in fer gran keksoz pour mwan.” (Lik 1:46-49) Etan ki nou bann Temwen Zeova, nou loue li pour son bann gran keksoz ki i’n fer tel konman liber nasyon Izrael anba lesklavaz Lezip e konsepsyon mirakile son Garson byenneme.
2. (a) Ki “plan eternel” Bondye pour bann imen obeisan? (b) Ki Zan ti eksperyanse lo zil Patmos?
2 Plizyer gran keksoz ki Zeova in fer i relye avek son “plan eternel” pour beni bann imen obeisan par mwayen sa Mesi ek son renny dan Rwayonm. (Efezyen 3:8-13) Sa plan ti pe devlope progresivman kan lapot Zan, ki ti byen aze sa letan, ti ganny permet pour get par en laport ouver dan lesyel atraver en vizyon. I ti antann en lavwa ki ti sonn konman en tronpet dir: “Mont isi e mon a fer ou war sa ki pou arive apre sa.” (Revelasyon 4:1) Menm si i ti’n ganny deporte par gouvernman Romen lo zil Patmos “akoz Parol Bondye ek temwanyaz Zezi,” Zan ti resevwar en ‘revelasyon par Zezi Kri.’ Sa ki Zan ti vwar e tande ti devwal bokou keksoz konsernan plan eternel Bondye, an rezilta i ti fourni leklersisman spirityel ek lankourazman dan en letan apropriye pour bann vre Kretyen.—Revelasyon 1:1, 9, 10.
3. Sa 24 ansyen ki Zan ti vwar dan vizyon ti pe reprezant ki sennla?
3 Par sa laport ouver, Zan ti vwar 24 ansyen ki pe asize lo bann tronn e kouronnen parey bann lerwa. Zot ti tonm devan Bondye e dir: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” (Revelasyon 4:11) Sa bann ansyen i reprezant tou bann Kretyen swazir ki’n resisite e zot dan zot pozisyon eleve ki Bondye ti promet zot. Zot santi zot pouse pour loue Zeova akoz sa bann gran keksoz ki i’n kree. Nou osi nou emerveye par laprev ‘pisans eternel Zeova ek son natir konman Bondye.’ (Romen 1:20) E pli nou aprann lo Zeova, pli nou trouv rezon pour loue li pour tou son bann gran lakonplisman.
Deklar bann Aksyon Zeova ki merit ganny loue!
4, 5. Donn bann legzanp konman David ti loue Zeova.
4 Psalmis David ti loue Bondye pour Son bann aksyon ekstraordiner. Par egzanp, David ti sante: “Fer bann melodi pour Zeova ki pe reste Siyon; anons son bann aksyon parmi bann pep. Montre mwan faver, O Zeova; get mon soufrans fer par bann ki ay mwan, ou ki pe anlev mwan kot baro lanmor, afen ki mon a deklar tou ou aksyon ki merit ganny loue kot baro fiy Siyon.” (Psonm 9:11, 13, 14) Apre ki i ti’n donn plan tanp avek son garson Salomon, David ti beni e loue Bondye an dizan: “I pour ou, O Zeova, grander ek pwisans ek labote ek siperyorite ek dinite; . . . Rwayonm i pour ou, O Zeova, sa Enn ki osi elev ou menm konman sef lo tou. . . . E aprezan, O nou Bondye, nou pe remersi ou e loue ou non manifik.”—1 Kronik 29:10-13.
5 Souvan-d-fwa, Lekritir i envit nou—wi, i enplor nou—pour loue Bondye, parey David ti fer. Dan liv Psonm i annan en kantite louanz ki’n ganny dedye pour Bondye, e se David ki’n ekrir apepre lanmwatye sa bann kantik. I ti konstaman loue e remersi Zeova. (Psonm 69:30) Deplis, depi okonmansman bann konpozisyon David e pour lezot, ki ti ganny divinman enspire, ti ganny servi pour loue Zeova.
6. Konman ki bann Psonm i itil pour nou?
6 Konman sa bann Psonm i itil pour bann serviter Zeova! Kan nou anvi remersi Bondye pour tou son bann gran keksoz ki i’n fer dan nou faver, nou kapab mazin sa bann zoli parol dan bann Psonm. Par egzanp kan nou leve pour en nouvo zour, nou kapab santi nou pouse pour eksprim menm santiman avek sa enn: “I bon pour remersye Zeova e pour fer melodi lo ou non, O Tre O; pour koz konsernan ou bonte leker dan bomaten e konsernan ou fidelite pandan lannwit, . . . akoz ou’n fer mwan zwaye, O Zeova, par sa ki ou’n fer; par sa ki ou’n akonpli avek ou lanmen, mon kriye avek lazwa.” (Psonm 92:1-4) Kan nou sirmont en lobstak dan nou progre spirityel, petet nou anvi eksprim nou lazwa ek rekonesans dan lapriyer, parey sa psalmis ti fer ler i ti sante: “O vini annou kriy avek lazwa ver Zeova! Annou kriye avek laviktwar ver nou Ros delivrans. Annou vin devan li avek remersiman; avek melodi annou kriy anver li avek laviktwar.”—Psonm 95:1, 2.
7. (a) Kwa ki enteresan konnen lo plizyer kantik ki bann Kretyen i sante? (b) Pour ki rezon nou ariv boner dan bann renyon e reste ziska lafen?
7 Nou souvan sant bann kantik pour loue Zeova dan bann renyon kongregasyon ek bann lasanble. I enteresan konnen ki plizyer sa bann kantik i baze lo bann panse sorti dan liv Psonm. Pa nou kontan ki nou annan en liv kantik byen rekonfortan, ki adapte avek nou letan, pour loue Zeova! Sant bann louanz pour Zeova i enn bann bon rezon akoz nou ariv boner dan renyon e reste ziska lafen, ki ansanm avek nou bann konpanyon Kretyen nou loue Zeova par nou kantik ek lapriyer.
“Loue Ya Lepep!”
8. Ki lekspresyon ki sorti dan sa mo “Alelouya,” e konman ki i normalman ganny tradwir?
8 Lekspresyon loue Zeova i sorti dan sa mo “Alelouya,” en lekspresyon Ebre ki ganny tradwir “Loue Ya lepep” dan Traduction du monde nouveau. Par egzanp, dan Psonm 135:1-3, nou vwar sa lenvitasyon kordyal e avek ensistans: “Loue Ya lepep! Loue non Zeova, ofer louanz, bann serviter Zeova, zot ki pe debout dan lakaz Zeova, dan lakour lakaz nou Bondye. Loue Ya, akoz Zeova i bon. Fer bann melodi pour son non, parski sa i agreab.”
9. Kwa ki motiv nou pour loue Zeova?
9 Kan nou medit lo bann travay kreasyon merveye Bondye ensi ki tou son bann keksoz ki i’n fer dan nou faver, nou santi nou pouse par lapresyasyon profon pour loue li. Ler nou reflesir lo bann keksoz mirakile ki Zeova ti fer pour son pep dan lepase, nou leker i motiv nou pour loue li. E kan nou medit lo bann gran promes ki Zeova pou realize alavenir, nou rod bann fason pour loue e remersi li.
10, 11. Konman ki nou prop legzistans i donn nou rezon pour loue Bondye?
10 Nou prop legzistans i donn nou en rezon valab pour loue Ya. David ti sante: “Mon pou loue ou [Zeova] parski dan en fason ki enspir lakrent mon’n ganny fer dan en fason merveye. Ou bann travay i merveye, parey mon nanm i byen okouran.” (Psonm 139:14) Wi, nou’n ganny fer “dan en fason merveye” e nou annan bann don presye tel konman vwar, ekoute, ek kapasite pour reflesir. Alor, eski pa nou devret viv nou lavi dan en fason ki nou kapab loue nou Kreater? Pol ti annan preski menm panse kan i ti ekrir: “Alor, ki ou manze, oubyen bwar, ou nenport kwa ki ou fer, fer tou pour laglwar Bondye.”—1 Korentyen 10:31.
11 Si nou vreman kontan Zeova, nou pou fer tou keksoz pour son laglwar. Zezi ti dir ki premye komannman i: “Kontan Senyer Bondye avek tou ou leker, tou ou lam, tou ou lespri e avek tou ou lafors.” (Mark 12:30; Deterononm 6:5) Lefe ki Zeova i nou Kreater e sa Enn ki donn “tou don ekselan, tou kado parfe,” sirman nou bezwen kontan li e loue li. (Zak 1:17; Izai 51:13; Akt 17:28) Apre tou, nou abilite pour rezonnen, nou kapasite spirityel, ek nou lafors fizik—tou nou bann kalite ek abilite—i sorti kot Zeova. Vi ki i nou Kreater, i merite ganny nou lanmour ek nou louanz.
12. Ki ou santiman lo bann aksyon merveye Zeova e lo sa ki Psonm 40:5 i dir?
12 Nou pa pou zanmen fini trouv rezon pour kontan e loue Zeova pour tou sa bann keksoz merveye ki i’n fer! David ti sante: “Bokou keksoz ou menm ou’n fer, O Zeova mon Bondye, menm ou bann travay merveye e ou bann panse anver nou; okenn pa kapab ganny konpare avek ou. Si mon ti anvi dir e koz lo la, zot i’n vin pli bokou ki mon kapab rakonte.” (Psonm 40:5) David pa ti pou kapab koz lo tou travay merveye Zeova, e nou osi nou pa pou kapab fer li. Me annou touzour loue Bondye sak fwa ki son bann aksyon merveye i ganny nou latansyon.
Aksyon ki relye avek Plan eternel Bondye
13. Konman ki nou lespwar i relye etrwatman avek bann aksyon ekstraordiner Bondye?
13 Nou lespwar pour lavenir i relye etrwatman avek bann aksyon ekstraordiner Zeova ki merit ganny loue e ki relye avek son plan eternel. Apre rebelyon dan zarden Edenn, Zeova ti pronons premye profesi ki ti ofer en lespwar. Apre ki i ti deklar en santans lo sa serpan, Bondye ti dir: “Mon pou met en ostilite ant ou ek sa fanm, ant ou semans ek son semans. I pou mertri ou lo ou latet e ou pou mertri li dan talon.” (Zenez 3:15) Bann imen fidel ti gard zot lespwar dan Semans sa fanm apre ki Zeova ti fer en keksoz ekstraordiner kan i ti prezerv Noe ek son fanmiy dan sa Deliz global ki ti balye en monn mesan. (2 Pyer 2:5) Bann promes profetik ki bann zonm tel ki Abraam ek David ti gannyen, ti donn plis detay lo sa ki Zeova ti pou akonpli atraver sa Semans.—Zenez 22:15-18; 2 Samyel 7:12.
14. Ki sa legzanp siprenm kot Zeova in fer bann gran keksoz an faver limanite?
14 Zeova ti manifeste dan en fason siprenm ki i sa enn ki fer bann gran keksoz an faver limanite kan i ti donn son sel Garson—sa Semans promiz, Zezi Kri—konman en sakrifis ranson. (Zan 3:16; Akt 2:29-36) Sa ranson ti fourni en baz pour rekonsilyasyon avek Bondye. (Matye 20:28; Romen 5:11) Zeova ti rasanble sa premye group ki ti’n rekonsilye dan en kongregasyon Kretyen, ki ti ganny etabli an Lapannkot 33 N.L. Avek led lespri sen, zot ti pres sa bon nouvel partou, e montre konman ki lanmor ek rezireksyon Zezi i ouver semen pour bann imen obeisan eksperyans bann byenfe eternel anba dominasyon Rwayonm seles Bondye.
15. Konman ki Zeova in azir dan en fason merveye dan nou letan?
15 Dan nou letan, Zeova in azir dan en fason merveye pour rasanble bann dernyen Kretyen swazir. Divan destriksyon in ganny retenir pour permet ki larestan sa 144,000 ki pou renny avek Zezi dan lesyel i ganny sele. (Revelasyon 7:1-4; 20:6) Bondye in fer sir ki bann Kretyen swazir i ganny delivre anba lesklavaz spirityel “Gran Babilonn,” lanpir mondyal bann fo larelizyon. (Revelasyon 17:1-5) Ki zot delivrans an 1919 ensi ki proteksyon divin ki zot ti eksperyanse apre sa, ti permet larestan Kretyen swazir pour fer? Pour briye dan zot dernyen temwannyaz ki zot pe donnen avan ki Zeova i anmenn en lafen avek sa sistenm mesan Satan dan “gran ladetres” ki pe apros byen vit.—Matye 24:21, NW; Danyel 12:3; Revelasyon 7:14.
16. Ki pe arive an rezilta sa travay predikasyon ki pe ganny fer dan lemonn antye?
16 Bann Temwen swazir Zeova in avek zel anmenn travay predikasyon partou dan lemonn. An rezilta, i annan “ankor mouton” ki pe vin bann adorater Zeova, zot form en group ki pe kontinyelman ogmante. (Zan 10:16) Nou kontan ki loportinite i ankor touzour la pour bann dimoun ki annan en karakter dou zwenn ansanm avek nou pour loue Zeova. Bann ki reponn sa lenvitasyon pour “vini” i dan pozisyon pour ganny prezerve dan gran ladetres, avek lespwar pour loue Zeova diran leternite.—Revelasyon 22:17.
Plizyer Milye pe rasanble pour vre Ladorasyon
17. (a) Konman ki Zeova pe fer bann gran keksoz an rapor avek nou aktivite predikasyon? (b) Ki mannyer Zekarya 8:23 pe ganny akonpli?
17 Zeova pe aktyelman fer bann keksoz ekstraordiner e ki merit ganny loue an rapor avek nou aktivite predikasyon. (Mark 13:10) Dan bann lannen resan, i’n ‘ouver laport pour en gran travay.’ (1 Korentyen 16:9) Sa in fer li posib pour sa bon nouvel ganny proklanmen partou dan bann gran teritwar kot bann lennmi laverite ti oparavan en lobstak. Bokou ki ti pe viv dan teneb spirityel pe aprezan reponn sa lenvitasyon pour ador Zeova. Zot pe akonpli sa parol profetik: “La sa ki Zeova bann larme in dir, ‘I pou dan sa bann zour ki dis zonm sorti dan tou langaz bann nasyon pou tyonbo, wi, zot pou vreman tyonbo zip en zonm ki en Zwif, an dizan: “Nou pou al avek zot, akoz nou’n antann ki Bondye i avek zot.” ’ ” (Zekarya 8:23) Sa “dis zonm” pe adres sa parol avek bann Zwif spirityel, setadir larestan Kretyen swazir dan nou letan. Vi ki nimero dis i kapab reprezant leta konplet en keksoz teres, sa “dis zonm” i reprezant sa “gran lafoul” ki’n ganny asosye avek “Izrael Bondye,” e ansanm zot form “en sel troupo.” (Revelasyon 7:9, 10; Galat 6:16, NW ) Pa i en lazwa pour vwar sitan en gran kantite dimoun pe aprezan rann en servis sakre ansanm konman bann serviter Zeova!
18, 19. Ki laprev nou annan ki Zeova pe beni sa travay predikasyon?
18 Nou frisonnen avek lazwa pour vwar ki plizyer dizenn milye—anfet, plizyer santenn milye—pe akeyir vre ladorasyon dan bann pei ki ti oparavan ganny dominen par fo relizyon e ou pa ti a zanmen krwar ki en zour sa bann dimoun ti pou aksepte sa bon nouvel. Konsilte liv resan Annuaire des Témoins de Jéhovah, e remark bann pei ki aprezan pe raport 100,000 a 1,000,000 proklanmater Rwayonm. Sa i en laprev solid ki Zeova pe beni sa travay predikasyon lo Rwayonm.—Proverb 10:22.
19 Nou konman pep Zeova, nou loue e remersye li pour donn nou en vre bi dan lavi, en travay satisfezan dan son servis, e en perspektiv briyan pour lavenir. Nou pe esper avek enpasyans lakonplisman tou bann promes divin e nou determinen pour ‘reste dan lanmour Bondye, an atandan lavi eternel.’ (Zid 20, 21) Konman nou rezwir pour vwar ki sa gran lafoul ki pe loue Bondye in aprezan ariv 6,000,000! Avek benediksyon Zeova, sa larestan Kretyen swazir ansanm avek zot bann konpanyon, lezot mouton, i organize dan apepre 91,000 kongregasyon dan 235 pei. Nou tou nou ganny byen nouri spirityelman gras a zefor enfatigab “lesklav fidel e pridan.” (Matye 24:45, NW ) En lorganizasyon teokratik progresif avek en sirveyans ki ganny fer avek lanmour, pe administre sa aktivite Rwayonm dan 110 biro brans Temwen Zeova. Nou byen kontan ki Zeova in tous leker son pep ‘pour onor li avek zot bann keksoz valer.’ (Proverb 3:9, 10) An konsekans, nou travay predikasyon partou dan lemonn i kontinyen, avek bann fasilite pour enprimen, bann betel ek lakaz misyonner, bann Lasal Rwayonm, ek bann Lasal Lasanble ki pe ganny konstrir dapre bezwen.
20. Ki lefe sa i fer lo nou kan nou medit lo bann gran keksoz ki Zeova in fer ki merit ganny loue?
20 I enposib pour nou mansyonn tou sa bann gran keksoz ki nou Papa seles in fer ki merit ganny loue. Me eski en dimoun ki annan en leker drwat pou refize zwenn sa lafoul ki pe loue Zeova? Definitivman non! Alor, fotespere ki tou sa ki kontan Bondye i kriye avek lazwa: “Loue Ya, lepep! Loue Zeova depi lesyel, loue li dan bann oter. Loue li, zot tou bann lanz . . . , zot bann zennonm e zot osi bann vyerz, zot bann zonm aze ansanm avek bann garson. Ki zot loue non Zeova, parski son non tousel i lo en oter ki pa aksesib. Son dinite i pli o ki later ek lesyel.” (Psonm 148:1, 2, 12, 13) Wi, annou loue Zeova pour son bann aksyon merveye la konmela e pour touzour!
Konman ou ti a reponn?
• Nonm serten aksyon Zeova ki merit ganny loue.
• Akoz ou santi ou pouse pour loue Zeova?
• Konman ki nou lespwar i relye avek bann gran keksoz ki Bondye i fer?
• Konman ki Zeova pe fer bann keksoz ki merit ganny loue an rapor avek travay predikasyon lo Rwayonm?
[Kestyon]
[Portre lo paz 8]
Eski ou sant avek tou ou leker bann kantik louanz pour Zeova?
[Portre lo paz 11]
Nou byen kontan ki loportinite i touzour la pour bann dimoun dou an karakter zwenn avek nou pour loue Zeova