“Si Bondye I Pour Nou, Lekel Ki Pou Kapab Kont Nou?”

“Ki nou kapab dir alor lo sa size? Si Bondye i pour nou, lekel ki pou kapab kont nou?”—ROMEN 8:31.

1. Lekel ki ti kit Lezip ansanm avek bann Izraelit, e akoz zot ti fer sa?

KAN bann Izraelit ti pe sorti Lezip apre ki zot ti’n laba pour 215 an, laplipar-di-tan konman lesklav, “en gran lafoul dimoun tou sort ti osi al avek zot.” (Egzod 12:38) Sa bann dimoun ki pa ti Izraelit, ti’n eksperyans dis fleo terifyan ki ti devaste Lezip e fer son bann fo bondye vin bann lobze ridikil. Anmenmtan, zot in vwar—sirtou apartir katriyenm ple—ki Zeova i kapab protez son pep. (Egzod 8:23, 24) Menm si zot konnesans lo plan Zeova ti ase limite, ti annan en keksoz ki zot ti asire: Bann bondye Lezip pa’n reisi protez bann Ezipsyen, tandis ki Zeova ti prouve ki i for an faver bann Izraelit.

2. Akoz Raab ti pran zentere bann espyon Izraelit, e akoz i ti’n byen fer pour met son konfyans dan zot Bondye?

² Karant an plitar, zis avan bann Izraelit ti antre dan later Promiz, Zozye, sikseser Moiz, ti anvoy de zonm espyonn sa landrwa. Laba zot ti rankontre Raab, en zabitan Zeriko. Dapre sa ki Raab ti’n tande konsernan pwisans Zeova e konman ki i ti pe protez bann Izraelit pour sa 40 an ki zot ti’n kit Lezip, i ti konnen ki i bezwen pran zentere pep Bondye si i ti anvi son benediksyon. Son desizyon saz ti fer li ek son fanmiy ganny prezerve kan bann Izraelit ti pran sa lavil plitar. Sa fason mirakile ki zot ti ganny sove ti en levidans kler lo li menm ki zot ti annan laprouvasyon Bondye. Alor, Raab ti’n byen fer pour met son konfyans dan Bondye bann Izraelit.—Zozye 2:1, 9-13; 6:15-17, 25.

3. (a) Ki mirak ki Zezi ti fer obor nouvo lavil Zeriko, e ki mannyer bann sef relizye Zwif ti reazir? (b) Ki serten Zwif, e plitar bokou non-Zwif, ti realize?

³ Kenz syek plitar, Zezi Kri ti geri en mandyan ki pa ti vwar kler obor lavil Zeriko ki ti’n ganny rekonstri. (Mark 10:46-52; Lik 18:35-43) Sa zonm ti sipliy Zezi pour demontre mizerikord, ki endike ki i ti rekonnet ki Bondye ti pe soutenir Zezi. Parkont, bann sef relizye ek bann ki ti  swiv zot ti refize rekonnet ki bann mirak ki Zezi ti fer ti en laprev ki i ti pe fer travay Bondye. Okontrer, zot ti kritik li. (Mark 2:15, 16; 3:1-6; Lik 7:31-35) Menm kan zot ti konpran ki Zezi ti’n vreman resisite apre ki zot ti’n met li amor, zot pa ti pare pour admet ki Bondye ti par deryer sa. Zot ti plito pran linisyativ pour persekit bann disip Zezi e esey aret sa travay pour anons “Bonn Nouvel ki konsern Senyer Zezi.” Me serten Zwif, e plitar bokou non-Zwif, ti pran kont sa bann levennman e zot ti fer en bon zizman lo la. I ti kler pour zot ki Bondye ti’n rezet bann sef relizye Zwif, ki ti tro krwar zot zis, e ki i ti aprouv bann disip Zezi.—Akt 11:19-21.

Lekel ki Bondye pe soutenir ozordi?

4, 5. (a) Ki santiman serten dimoun i annan konsernan swazir en larelizyon? (b) Ki kestyon enportan nou kapab demande kan nou pe esey idantifye vre larelizyon?

⁴ Resaman, dan en entervyou lo televizyon ki ti baze lo size vre larelizyon, reprezantan en larelizyon ti dir: “Mon ti a ensiste ki en larelizyon i vre si i sanz en dimoun pour vin pli meyer kan i viv an akor avek son prensip.” Nou admet ki vre larelizyon i sanz en dimoun pour vin pli meyer. Me eski senpleman lefe ki en larelizyon i sanz dimoun pour vin pli meyer, sa i prouve ki sa larelizyon i annan laprouvasyon Bondye? Eski sa i sel fason pour determinen si en larelizyon i vre?

⁵ Tou dimoun i kontan ki i kapab fer bann swa personnel, ki enkli swazir zot prop larelizyon. Me lefe ki en dimoun i annan liberte pour swazir, sa pa garanti ki i pou fer en bon swa. Par egzanp, i annan ki swazir en larelizyon akoz lakantite dimoun ki annan ladan, akoz son larises, son bann seremoni i paret atiran, oubyen akoz son fanmiy i dan sa larelizyon. Okenn sa bann keksoz pa esansyel pour determinen si en larelizyon i vre oubyen non. Alor en kestyon enportan ki nou kapab demande se: Lekel sa larelizyon ki ensiste ki son bann disip i fer lavolonte Bondye e ki annan laprev solid ki Bondye pe soutenir li, afen ki son bann dimoun i kapab dir avek konfyans, “Bondye i pour nou”?

6. Ki parol Zezi ti dir ki donn en apersi lo size vre larelizyon ek sa ki fo?

⁶ Zezi ti etablir en lareg ki permet nou disteng vre ladorasyon avek sa ki fo kan i ti dir: ‘Mefye ou bann fo profet. Zot vin kot ou parey mouton, me anndan zot bann loulou feros. Zot a ganny rekonnet par zot fri.’ (Matye 7:15, 16; Malaki 3:18) Annou egzamin serten “fri,” andotmo serten mark, ki idantifye vre larelizyon afen ki nou kapab determinen avek senserite ki sennla ki Bondye i aprouve ozordi.

Mark ki idantifye bann ki Bondye pe soutenir

7. Ki savedir ansenny selman sa ki baze lo Labib?

⁷ Zot lansennyman i baze lo Labib. Zezi ti dir: “Lansennyman ki mon donnen i pa mon prop lansennyman, me i sorti kot Bondye ki’n anvoy mwan. Tou dimoun ki dakor pour fer sa ki Bondye i oule, i pou konnen si mon lansennyman i sorti kot Bondye oubyen si  mon koz par mon prop lotorite.” I ti dir osi: “Sa ki pour Bondye i ekoute sa ki Bondye i dir.” (Zan 7:16, 17; 8:47) Lozikman, pour ki Bondye i donn son soutyen en larelizyon, sa larelizyon i devret ansenny selman sa ki Bondye i fer konnen dan son Parol e i rezet bann lansennyman ki baze lo sazes oubyen tradisyon.—Izai 29:13; Matye 15:3-9; Kolosyen 2:8.

8. Akoz i enportan pour servi non Bondye dan ladorasyon?

⁸ Zot servi e fer lezot konn non Bondye, Zeova. Izai ti predir: “Sa zour zot pou sertennman dir: ‘Donn remersiman Zeova! Apel lo son non. Fer konnen parmi lepep son bann fason azir. Fer mansyon ki son non i ganny eleve. Fer melodi pour Zeova, akoz i’n azir dan en fason ki napa son parey. Sa pe ganny fer konnen dan tou later.’ ” (Izai 12:4, 5) Zezi ti ansenny son bann disip pour priye: “Nou Papa ki dan lesyel ki ou non sen i ganny glorifye.” (Matye 6:9) Alor bann Kretyen ti ekspekte servi konman ‘en pep pour non Bondye,’ ki swa zot en desandans Zwif ou non. (Akt 15:14) Evidaman Bondye i byen kontan pour soutenir bann ki fyer pour vin “en pep pour son non.”

9. (a) Akoz lazwa i disteng bann manm vre larelizyon? (b) Konman ki Izai i fer diferans ant vre larelizyon avek sa ki fo?

⁹ Zot reflekte personnalite ere Bondye. Etan donnen ki Zeova i loter “sa bon nouvel,” i en “Bondye ere.” (1 Timote 1:11, NW ) Alor, akoz ki son adorater i ava malere oubyen toultan negatif? Malgre ki i annan bokou soufrans dan sa monn e deplis bann problenm personnel, bann vre Kretyen i gard zot lazwa parski zot pe regilyerman manz en labondans nouritir spirityel. Izai i konpar zot avek bann ki pratik fo larelizyon: “Se sa ki Souvren Senyer Zeova in dir: ‘Gete! Mon prop serviter pou manze, me zot zot pou lafen. Gete! Mon prop serviter pou bwar, me zot zot pou swaf. Gete! Mon prop serviter pou rezwir, me zot zot pou sibir laont. Gete! Mon prop serviter pou kriye avek lazwa akoz zot bon leta leker, me zot zot pou kriye akoz douler dan zot leker e zot pou irle senpleman akoz depresyon.’ ”—Izai 65:13, 14.

10. Ki mannyer bann ki dan vre larelizyon i evite aprann par zot fot?

¹⁰ Zot kondwit ek zot desizyon i baze lo bann prensip Labib. “Met ou konfyans dan Zeova avek tou ou leker e pa apiy lo ou prop lentelizans. Dan tou ou semen port latansyon lo li, e li i pou fer drwat tou ou santye,” ekriven liv Proverb i donn nou sa konsey. (Proverb 3:5, 6) Bondye i soutenir bann ki resers son gidans olye met zot konfyans dan bann teori kontradiktwar bann zonm ki inyor lasazes divin. Pli en dimoun i pare pour les son lavi ganny fasonnen par Parol Bondye, pli i pou evite aprann par son fot.—Psonm 119:33; 1 Korentyen 1:19-21.

11. (a) Akoz bann dimoun ki dan vre larelizyon pa devret ganny divize dan de group, en group dirizan ek en group ordiner? (b) Ki legzanp bann berze parmi pep Bondye i devret demontre pour troupo?

¹¹ Zot organiz zot dan menm fason ki kongregasyon Kretyen premye syek ti organize. Zezi ti eksplik sa prensip: “Zot, zot pa devre apel personn ‘Met’ akoz zot tou, zot frer e zot annan zis en sel Met. E pa apel personn isi lo later ‘Papa’, akoz zot annan zis en sel Papa ki dan lesyel. Pa fer apel zot ‘sef’ akoz zot annan en sel ‘Sef’, limenm Mesi. Sa enn ki pli enportan parmi zot i bezwen vin zot serviter.” (Matye 23:8-11) En kongregasyon ki konpoze avek bann frer pa sipoze annan en group dirizan ki arogan e ki onor zot lekor avek bann tit ki elev zot e fer zot vin pli siperyer ki larestan manm. (Zob 32:21, 22) Bann ki pe pran swen avek troupo Bondye i ganny demande pour “pa fer li kontre-ker me avek bonn volonte, konman Bondye i oule. Pa fer li pour ganny larzan me avek devouman. Pa bezwen domin lo bann ki’n ganny konfye dan zot responsabilite, me zotmenm, zot devre vin en model pour troupo.” (1 Pyer 5:2, 3) Bann vre berze Kretyen i evite sey domin lafwa lezot. Konman bann konpanyon travay dan servis Bondye,  zot senpleman fer zot mye pour donn en bon legzanp.—2 Korentyen 1:24.

12. Ki pozisyon ekilibre Bondye i ekspekte bann ki anvi son soutyen annan konsernan bann gouvernman imen?

¹² Zot soumet avek bann gouvernman imen me pourtan zot pa pran kote dan bann zafer sa monn. Sa ki pa “soumet li avek bann lotorite ki gouvernen” pa kapab ekspekte ki Bondye i soutenir li. Akoz? Se akoz “bann lotorite ki egziste i ganny etabli par Bondye. Alor sa ki opoz lotorite, i opoz lord ki’n ganny etabli par Bondye.” (Romen 13:1, 2) Toutfwa, Zezi ti realize ki i riske annan konfli kan i ti dir: “Rann Sezar sa ki pour Sezar, e Bondye sa ki pour Bondye.” (Mark 12:17) Bann ki anvi soutyen Bondye i bezwen “rod plito Rwayonm Bondye ek son lazistis,” e anmenmtan obeir lalwa son pei ki pa an konfli avek son responsabilite anver Bondye, ki an priyorite. (Matye 6:33; Akt 5:29) Zezi ti aksantye ki son bann disip pa merit pran okenn kote dan bann zafer sa monn kan i ti dir konsernan zot: “Zot pa fer parti lemonn parey mwan mon pa fer parti lemonn.” Plitar i ti azoute: “Mon Rwayonm pa sorti lo sa later.”—Zan 17:16; 18:36.

13. Ki rol lanmour i zwe dan idantifikasyon pep Bondye?

¹³ Zot pa fer lapreferans kan zot “fer dibyen tou dimoun.” (Galat 6:10) Lanmour Kretyen pa fer lapreferans, i aksepte tou dimoun nenport ki kouler, pozisyon ekonomik oubyen ledikasyon, nasyonalite, oubyen langaz. Fer dibyen tou dimoun sirtou bann ki annan menm lafwa avek zot i ede idantifye bann ki Bondye i donn son soutyen. Zezi ti dir: “Dimoun pou war ki zot mon bann disip si zot kontan kanmarad.”—Zan 13:35; Akt 10:34, 35.

14. Eski bann dimoun ki Bondye i soutenir i forseman ganny byen akeyir par lezot? Eksplike.

¹⁴ Zot pare pour sibir persekisyon an fezan lavolonte Bondye. Zezi ti averti son bann disip: “Si zot in persekit mwan, zot osi, zot pou ganny persekite, si sa bann dimoun in obei mon lansennyman, zot pou obei lansennyman ki zot osi zot pou donnen.” (Zan 15:20; Matye 5:11, 12; 2 Timote 3:12) An zeneral, bann ki Bondye in soutenir pa’n zanmen ganny byen akeyir par lezot, zis parey Noe ki ti kondann lemonn par son lafwa. (Ebre 11:7) Ozordi, bann ki anvi soutyen Bondye pa oze sanz son Parol oubyen trai son bann prensip pour evit persekisyon. Osi lontan ki zot servi Bondye fidelman, zot konnen ki dimoun pou “trouv sa drol, e kritik” zot.—1 Pyer 2:12; 3:16; 4:4.

Aprezan annou analiz bann Levidans

15, 16. (a) Ki bann kestyon ki pou ed nou idantifye sa larelizyon ki Bondye i soutenir? (b) Ki konklizyon plizyer milyon dimoun in tonm lo la, e akoz?

¹⁵ Demann ou lekor, ‘Lekel sa larelizyon ki  annan repitasyon pour swiv Parol Bondye fidelman, menm si son lansennyman i diferan avek sa ki laplipar dimoun i krwar? Lekel ki met lanfaz lo lenportans non personnel Bondye, e menm servi sa non pour idantifye zot? Lekel ki, avek optimism, pe montre bann dimoun ki Rwayonm Bondye i sel solisyon pour bann problenm ki imen pe fer fas avek? Lekel ki pe mentenir bann standar Labib dan lafason ki zot kondwir zot, kantmenm zot riske ganny konsidere konman bann ki an retar? Lekel sa group ki napa en klerze ki pe ganny peye e ki tou son bann dimoun pe prese? Lekel ki ganny felisite pour obeir lalwa gouvernman, menm si zot pa pran par dan okenn politik? Lekel ki depans bokou letan ek larzan pour ed lezot aprann konsernan Bondye ek son bann plan? E lekel ki malgre tou sa bann pwen pozitif ki zot annan, pe touzour ganny meprize, ganny boufonnen, e persekite?’

¹⁶ Plizyer milyon dimoun partou dan lemonn in evalye bann levidans e zot konvenki ki zis Temwen Zeova ki pe pratik vre larelizyon. Zot in ariv lo sa konklizyon akoz sa ki Temwen Zeova i ansennyen, lafason ki zot kondwir zot, ensi ki bann benefis ki zot larelizyon in anmennen pour zot. (Izai 48:17) Parey ti ganny predir dan Zekarya 8:23, plizyer milyon dimoun pe annefe dir avek bann Temwen Zeova: “Nou pou al avek zot, akoz nou’n antann ki Bondye i avek zot.”

17. Akoz ki Temwen Zeova pa pe al tro lwen ler i dir ki i sa vre larelizyon?

¹⁷ Eski Temwen Zeova pe al tro lwen kan i dir ki se li tousel ki Bondye pe donn son soutyen? Anfet, zot deklarasyon i parey ler bann Izraelit ti dir ki Bondye pe soutenir zot malgre bann Ezipsyen ti annan zot prop krwayans, oubyen kan bann Kretyen premye syek ti dir ki Bondye pe soutenir zot e ki i pa pe donn son soutyen bann pratikan larelizyon Zwif. Bann levidans i koz pour zot menm. Dan 235 pei, bann Temwen Zeova pe fer sa travay ki Zezi ti dir son bann vre disip pour fer dan letan lafen: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:14.

18, 19. (a) Akoz napa okenn rezon pour bann Temwen Zeova aret zot travay predikasyon menm si zot ganny opoze? (b) Konman ki Psonm 41:11 i siport levidans ki Bondye i soutenir bann Temwen?

¹⁸ Bann Temwen Zeova pou kontinyen akonpli sa travay, e zot pa pou les persekisyon oubyen lopozisyon anpes zot fer zot bann aktivite. Travay Zeova i bezwen ganny fer e i pou ganny fer. Tou lesey ki’n ganny fer pandan sa syek ki’n pase pour anpes bann Temwen akonpli travay Bondye pa’n reisi, parski Zeova in promet: “Nenport ki zarm ki pou ganny formen kont ou pa pou reisi, e nenport ki lalang ki pou lev kont ou dan zizman ou pou kondannen. Sa i posesyon erediter bann serviter Zeova, e zot ladrwatir i sorti kot mwan.”—Izai 54:17.

¹⁹ Lefe ki Temwen Zeova i pli for e pli aktif ozordi ki zanmen oparavan—menm an fas lopozisyon partou dan lemonn—sa i prouve ki Zeova i pran plezir dan sa ki zot pe fer. Lerwa David ti dir: “Akoz sa mon konnen ki ou’n pran plezir dan mwan, parski mon lennmi pa kriy avek laviktwar lo mwan.” (Psonm 41:11; 56:9, 11) Bann lennmi Bondye pa pou zanmen kapab kriy avek laviktwar lo pep Zeova, parski zot Sef, Zezi Kri, pe al an avan ver laviktwar final!

Eski ou kapab reponn?

• Donn legzanp serten dimoun ki Bondye ti soutenir dan lepase.

• Nonm serten mark ki idantifye vre larelizyon.

• Akoz ki ou personnelman konvenki ki Bondye pe donn son soutyen Temwen Zeova?

[Kestyon]

[Portre lo paz 24]

Bann ki anvi Bondye donn zot son soutyen i bezwen baz zot lansennyman selman lo son Parol

[Portre lo paz 26]

Bann ansyen i servi konman bann legzanp pour troupo