“Blesir ki ganny fer par en Zanmi”

ZAPOT Pol ti vwar li neseser pour administre serten koreksyon avek bann Kretyen Galat dan premye syek. Probableman pour evit okenn mekontantman, i ti demande: “Eski aprezan mon’n vin zot lennmi akoz mon’n dir zot laverite?”—Galat 4:16.

An ‘dizan laverite,’ Pol pa ti vin zot lennmi. Annefe i ti pe azir an armoni avek prensip Labib: “Blesir ki ganny fer par en zanmi i fidel.” (Proverb 27:6, King James Version) I ti konnen ki lafyerte en dimoun ki ti pe fer pese ti kapab ganny blese. Pourtan, i ti konnen ki si ou pa donn en peser disiplin ki i bezwen, konsekans ki i kapab annan se ki Zeova pa pou demontre son lanmour anver sa dimoun. (Ebre 12:5-7) Alors, konman en zanmi fidel ki annan gran lentere kongregasyon aker, Pol pa ti ezite pour ofer son konsey pour redres zot.

Ozordi, bann Temwen Zeova pe akonpli zot latas ‘pour fer tou pep vin disip, . . . ansenny zot pour obeir tou sa ki [Zezi Kri] in konmande.’ An fezan sa, sa bann Kretyen senser pa pe sey kasyet bann verite Biblik ki ekspoz e kondann bann fo lansennyman ek kondwit ki kretyen pa sipoze annan. (Matye 15:9; 23:9; 28:19, 20; 1 Korentyen 6:9, 10) Plito ki vin bann lennmi ki bezwen ganny rezete, zot pe manifeste lentere en vre zanmi.

Anba lenspirasyon divin, en psalmis ti ekrir: “Si en dimoun drwat i tap mwan, i pou en labonte leker; e si i reprimann mwan, i pou delwil lo mon latet, ki mon latet pa pou refize.”—Psonm 141:5.

[Caption on page 32]

ESKI OU TI A KONTAN EN VIZIT?

Menm dan sa monn trouble ozordi, ou kapab trouv boner atraver konnesans egzakt Labib lo Bondye, son Rwayonm, ek son plan merveye pour limanite. Si ou ti a kontan plis lenformasyon oubyen ou swete ki en dimoun i vizit ou kot ou lakour pour en letid Labib gratwit, ekrir Watchtower, Rue Baissac, Petit Verger, Pointe aux Sables, Île Maurice, oubyen ladres apropriye lo paz 2.