Ou Larzan oubyen ou Lavi?

Ou’n kapab antann konsernan bann bandi ki met fizi dan figir zot viktim, an dizan: “Ou larzan oubyen ou lavi!” Ozordi, sa parol byen familye in ganny reflekte dan en sitiasyon difisil ki nou tou nou pe fer fas avek—spesyalman pour bann ki pe viv dan bann pei ris. Toutfwa, denozour, pa bandi ki dir sa parol. Plito, se lanfaz ki lasosyete i mete lo larzan ek bann reisit materyel.

EN TEL lanfaz in lakoz tou sort problenm ek lenkyetid. A ki pri eski larzan ek keksoz materyel i devret ganny pourswiv? Eski nou kapab kontant nou avek pli pti gin? Eski an realite bann dimoun pe sakrifye “vre lavi” avek bi ganny plis keksoz materyel? Eski larzan i sa tiket pour en lavi ere?

Obsesyon pour Larzan

Parmi bann dezir ek pasyon imen—ki swa i zistifye oubyen non—lanmour pour larzan i vin premye. Kontrerman avek dezir pour sèks ek manze, dezir pour larzan i kapab vin permanan e pa zanmen disparet. Lavyeyes pa paret satisfer li. Dan bokou ka bann laz pli avanse i kapab ogmant lentere oubyen lenkyetid en dimoun konsernan larzan e sa ki i kapab aste avek.

Vorasite pe ogmante. Akter prensipal dan en film popiler ti dir: “Vorasite i marse. Vorasite i normal.” Kantmenm bokou dimoun ti apel sa peryod ant 1980 ek 1990 konman Zenerasyon Vorasite, sa ki’n arive avan e apre i montre ki reaksyon imen anver larzan in sanz en pti gin diran bann lannen.

Sa ki nouvo se ki bokou dimoun i vwar bann loportinite pour satisfer imedyatman zot dezir pour plis larises materyel. I paret ki lamazorite dimoun dan lemonn i souvannfwa depans plis zot lenerzi pour prodwir e sers deplizanpli plis keksoz. Petet ou a dakor ki sa dezir pour annan bann byen materyel e depans larzan in vin deplizanpli for—e souvan pli kreatif—dan lavi modern.

Me eski dimoun i pli ere? Pour reponn sa kestyon, Salomon ki ti en lerwa saz e tre ris ti ekri 3,000 an pase: “En dimoun ki kontan larzan pa pou satisfe avek larzan, ni enn ki kontan larises, avek reveni. Sa osi i anven.” (Eklezyast 5:10) Bann letid sosyal denozour i donn bann menm konklizyon ki enteresan.

Larzan ek Boner

Enn bann keksoz sirprenan ki zot in dekouver konsernan kondwit imen se ki akimilasyon larzan ek keksoz materyel pa neseserman ogmant satisfaksyon ek boner. Bokou bann serser in realize ki enn fwa ki en dimoun i ariv lo en serten nivo larises, son satisfaksyon ek boner i pa depan lo lakantite byen ki i annan.

Par konsekan, resers pour keksoz materyel ek larzan i fer bokou dimoun demande,  ‘I paret ki nou rezwir sak fwa ki nou aste en nouvo keksoz; pourtan, akoz, finalman sa bann plezir pa donn pli bon satisfaksyon?’

Dan son liv Happy People, loter Jonathan Freedman ti note: “Enn fwa ki ou’n ganny en pti reveni, sa kantite larzan ki ou’n resevwar pa kontribye pour anmenn boner. Par lao nivo lapovrete, relasyon ant reveni ek boner i ekstrememan pti.” Bokou in realize ki sa ki kontribye pour boner en endividi se bann byen spirityel, travay ki annan en bi dan lavi, e valer moral. Bann relasyon antre imen e letan nou pa dan bann konfli oubyen anba presyon ki kapab anpes nou rezwir sa ki nou annan, i osi enportan.

Bokou in vwar sa rasin ki koz laplipar problenm sosyal aktyel, se tandans pour esey servi prosperite materyel pour rezourd bann problenm ki vreman personnel. Serten travayer sosyal i koz lo dout ek mekontantman ki zeneralman anvai nou sosyete. Zot osi remarke ki i annan en ogmantasyon dan tandans pour bann dimoun dan bann sosyete ris konsilte bann spesyalis oubyen rod sinifikasyon lavi ek lespri anpe avek bann lider spirityel, bann lorganizasyon relizye, ek diferan group ki propoz led. Sa i montre ki bann byen materyel pa kapab azout vre sans avek lavi.

Pouvwar ek febles Larzan

I vre ki larzan i annan pouvwar. I kapab aste bon lakaz, bann lenz tre atiran, bann meb enpresyonan. I kapab osi aste bokou ladmirasyon, konfyans, oubyen flatri, menm aste ennde zanmi ki la pare pour ede pour lemoman. Me sanmenm tou ki larzan i kapab fer. Sa ki nou pli bezwen, larzan pa kapab aste—lanmour en vre zanmi, lape lespri, en pti pe konfor letan nou pre pour mor. E pour bann ki zot relasyon avek zot Kreater i enportan, larzan pa kapab aste laprouvasyon Bondye.

Lerwa Salomon, ki ti annan tou bann bon keksoz ki larzan ti kapab aste dan son letan, ti rekonnet ki met konfyans dan bann byen materyel pa anmenn en boner ki dirab. (Eklezyast 5:12-15) Letan labank i faid oubyen letan bann pri keksoz i monte nou kapab perdi nou larzan. Bann byen i kapab ganny detri par bann tanpet vyolan. Letan zot parsyelman ranbours bann pert materyel, bann polisi lasirans, pa efas bann pert emosyonnel. Bann lenvestisman i soudennman kapab perdi valer ler lekonomi en pei i faid. Menm en louvraz ki byen peye i kapab la ozordi e disparet demen.

Alor, konman, nou kapab gard larzan dan son plas? Ki rol ki larzan oubyen bann byen i kapab zwe dan nou lavi? Silvouple egzamin sa size pli lwen pour vwar konman ou kapab posed en keksoz ki vreman annan valer—“vre lavi.”

[Portre lo paz 4]

Bann byen materyel pa anmenn boner dirab