Pa Ekoute Pour Oubliye Apre

“Pa bezwen tronp ou lekor, pa zis ekout laparol me osi met li an pratik.”—ZAK 1:22.

1. Ki bann mirak ki bann ansyen Izraelit ti privilezye pour vwar?

“INOUBLIYAB” i sa mo ideal pour dekrir bann mirak ki Zeova ti fer an Lezip. Tou le Dis Fleo ti san dout tre efreyan. Sa bann kou ti swiv par delivrans eksepsyonnel pep Izrael ki ti travers Lanmer Rouz ki ti’n ganny ouver. (Deterononm 34:10-12) Si ou ti war sa bann levennman avek ou prop lizye, petet ou pa ti pou zanmen oubliy sa Enn ki ti par deryer sa. Pourtan, en psalmis ti sante: “Zot ti oubliy Bondye zot Sover, sa Enn ki ti fer bann gran keksoz an Lezip, bann travay merveye dan pei Kam, bann keksoz ki enspir lakrent kot Lanmer Rouz.”—Psonm 106:21, 22.

2. Kwa ki montre ki lapresyasyon ki Izrael ti annan pour bann gran keksoz ki Bondye ti fer pa ti dire?

² Apre ki zot ti’n travers Lanmer Rouz, bann Izraelit “ti konmans annan lakrent pour Zeova e met lafwa dan Zeova.” (Egzod 14:31) Bann zonm Izraelit ti zwenn ansanm ek Moiz pour sant en sanson laviktwar pour Zeova, e Miryam ek lezot madanm ti swiv par zwe tanbour e danse. (Egzod 15:1, 20) Wi, pep Zeova ti enpresyonnen par sa bann gran keksoz ki i ti fer. Me zot lapresyasyon pour sa Enn ki ti fer sa bann keksoz pa ti dire. Pa mank bokou letan apre, bokou parmi zot ti pe azir konmsi zot ti’n perdi zot memwar. Zot ti konmans plennyen e konplent kont Zeova. Serten ti enplike dan idolatri e dan imoralite seksyel.—Nonm 14:27; 25:1-9.

Kwa ki kapab fer nou oubliye?

3. Vi ki nou natir i enparfe, ki nou kapab oubliye?

³ I vreman difisil pour konpran sa mank lapresyasyon delapar bann Izraelit. Toudmenm, sa i kapab ariv avek nou osi. I vre ki nou pa’n temwanny sa bann mirak ki Bondye ti fer. Me sirman dan nou relasyon avek Bondye i’n bezwen annan serten lokazyon ki inoubliyab. Serten antre nou i kapab rapel kan i ti aksepte laverite dan Labib. Petet nou lapriyer dedikasyon avek Zeova ek nou batenm konman vre Kretyen i parmi lezot moman zwaye. Bokou parmi nou in santi lanmen Zeova en serten moman dan nou lavi. (Psonm 118:15) Pli enportan ki tou, nou’n resevwar lespwar pour delivrans atraver lanmor sakrifisyel Zezi Kri, Garson Bondye. (Zan 3:16) Toudmenm akoz nou natir enparfe, nou kapab tre fasilman oubliy bann bon keksoz ki Zeova in fer pour nou kan nou pe eksperyans bann move dezir ek bann traka lavi.

4, 5. (a) Konman ki Zak ti averti nou kont danze pour ekoute e apre oubliye? (b) Ki mannyer nou kapab aplik sa ilistrasyon ki Zak ti donnen konsernan sa zonm ki ti get dan laglas?

⁴ Dan son let ki i ti ekrir son bann konpanyon Kretyen, Zak, demi frer Zezi ti averti zot kont danze pour vin bann ki ekoute pour oubliye apre. I ti ekrir: “Pa bezwen tronp ou lekor, pa zis ekout laparol me osi met li an pratik. Sa ki zis ekout laparol, me pa met li an pratik, i parey en zonm ki get son figir dan laglas. Apre ki i’n byen war li  dan laglas, i ale e oubliy deswit konman i ti ete.” (Zak 1:22-24) Ki Zak ti oule dir par sa parol?

⁵ Normalman nou annan tandans pour get dan laglas apre ki nou’n leve dan bomaten pour vwar si i annan okenn pti sanzman ki nou bezwen fer avek nou laparans. Apre ki nou’n antre dan lezot aktivite e nou lespri pe konsantre lo lezot keksoz, nou aret mazin sa ki nou’n war dan laglas. Sa i osi kapab arive dan en sans spirityel. Kan nou get dan Parol Bondye, nou kapab konpar sa ki nou ete avek sa ki Bondye i ekspekte nou vini. Alor, nou vin fas-a-fas avek nou bann febles. Sa konnesans i devret pous nou pour fer bann sanzman dan nou personnalite. Me anmezir ki nou fer nou bann aktivite toulezour e nou lalit avek nou problenm, nou kapab fasilman oubliy bann keksoz spirityel. (Matye 5:3; Lik 21:34) I konmsi nou’n oubliy bann bon keksoz ki Zeova in fer pour nou. Si sa i arive, nou pou fasilman ganny anvai par bann move tandans.

6. Ki analiz Biblik ki kapab ed nou pour pa oubliy parol Zeova?

⁶ Dan son premye let ki i ti ekrir bann Korentyen, zapot Pol ti koz lo bann Izraelit dan dezer ki ti oubliy sa ki Zeova ti fer. Zis parey bann Kretyen premye syek ti benefisye atraver parol Pol, nou osi nou ganny led pour pa oubliy parol Zeova letan nou analiz sa ki i ti ekrir. Alor annou egzamin 1 Korentyen 10:1-12.

Rezet bann Dezir Lemonn

7. Ki laprev sir bann Izraelit ti annan konsernan lanmour Bondye pour zot?

⁷ Sa ki Pol ti dir lo bann Izraelit i servi konman en lavertisman pour bann Kretyen. Pol ti ekrir: “Frer mon oule ki zot konnen ki nou bann zanset ti zot tou anba proteksyon nyaz, e zot tou, zot ti pas atraver lanmer, e zot tou, zot ti batize an Moiz dan nyaz e dan lanmer.” (1 Korentyen 10:1-4) Dan letan Moiz, bann Izraelit ti vwar pwisans Zeova ganny manifeste dan en fason ekstraordiner. Sa ti enkli letan Bondye ti kondwir zot pandan lazournen avek en kolonn nyaz mirakile e letan i ti ed zot pour sove atraver Lanmer Rouz. (Egzod 13:21; 14:21, 22) Sirman, bann Izraelit ti annan laprev sir ki Bondye i kontan zot.

8. Ki konsekans bann Izraelit ti sibir kan zot ti oubliye dan en sans spirityel?

⁸ “Pourtan,” Pol ti kontinyen, “Bondye pa ti kontan avek laplipar antre zot, e zot ti tonbe e mor dan dezer.” (1 Korentyen 10:5) Pa i tris! Laplipar Izraelit ki ti kit Lezip ti diskalifye zot lekor pour antre dan Later Promiz. Zot ti mor dan dezer parski Bondye ti rezet zot akoz zot ti mank lafwa. (Ebre 3:16-19) Ki leson nou kapab tire dan sa? Pol i dir: “Sa ki’n arive i servi legzanp pour nou pour ki nou pa ganny bann move dezir parey zot.”—1 Korentyen 10:6.

9. Konman ki Zeova ti fer provizyon pour son pep, me konman ki Izrael ti reazir?

⁹ Bann Izraelit ti annan bokou pour konsantre lo la spirityelman. Zot ti antre dan en lalyans avek Zeova e zot ti vin en nasyon ki ti’n ganny dedye avek li. Deplis zot ti ganny bann pret, en tabernak konman sant ladorasyon, e en laranzman pour ofer Zeova bann sakrifis. Olye apresye sa bann don spirityel, zot ti plito annan mekontantman pour bann keksoz materyel ki Zeova ti’n donn zot.—Nonm 11:4-6.

10. Akoz ki nou devret touzour mazin Bondye?

¹⁰ Kontrerman avek bann Izraelit dan dezer, pep Zeova ozordi i annan laprouvasyon Bondye. Toudmenm, i enportan ki endividyelman nou kontinyen mazin lo Bondye. Si nou fer sa, i pou ed nou pour rezet bann dezir egois ki ti a kapab fer nou vizyon spirityel vin sonm. Nou bezwen determinen “pour abandonn nou move lavi ek son bann move dezir, pour viv en lavi rezonnab, zis e fidel avek Bondye lo sa later.” (Tit 2:12) Bann parmi nou ki depi lanfans pe asosye avek kongregasyon Kretyen pa devret zanmen krwar ki zot pe mank en bon keksoz. Si bann panse koumsa i vin dan nou lespri, i ti a byen si nou mazin  Zeova e mazin bann benediksyon merveye ki i’n rezerve pour nou.—Ebre 12:2, 3.

Lobeisans total anver Zeova

11, 12. Ki mannyer en dimoun i kapab pratik idolatri kantmenm i pa pe ador bann zidol?

¹¹ Pol i donn nou en lot lavertisman ler i ekrir: “Pa ador zidol parey serten antre zot ti fer, konman lekritir in dir: ‘Lepep ti asiz pour manze e bwar, apre zot ti leve pour danse.’ ” (1 Korentyen 10:7) Pol pe refer avek sa lokazyon kot bann Izraelit ti reisi persyad Aaron pour fer en pti bef annor. (Egzod 32:1-4) Menm si nou pa ti a direkteman ador zidol, nou ti a kapab pratik idolatri si nou les nou prop dezir egois anpes nou ador Zeova avek en leker konplet.—Kolosyen 3:5.

¹² En lot rafal, Pol ti ekrir konsernan serten ki ti enterese prensipalman avek bann keksoz materyel olye bann keksoz spirityel. Konsernan bann ki viv en lavi konman lennmi poto siplis Kris, i ti ekrir: “Zot pou ganny detri, zot vant i zot bondye.” (Filipyen 3:18, 19) Sa ki zot ti adore pa ti en stati. I ti zot dezir pour bann keksoz materyel. Byensir, pa tou dezir ki mal. Zeova ti kree nou avek bann bezwen ek abilite pour apresye diferan plezir. Me bann ki met plezir avan zot relasyon avek Bondye, zot pe vreman pratik idolatri.—2 Timote 3:1-5.

13. Ki nou kapab aprann atraver sa resi lo sa pti bef annor?

¹³ Apre ki zot ti sorti Lezip, bann Izraelit ti fer en pti bef annor pour adore. Apard sa lavertisman kont idolatri, nou kapab ganny en lot leson dan sa resi. Bann Izraelit ti dezobei en lenstriksyon kler ki Zeova ti donn zot. (Egzod 20:4-6) Pourtan, zot ti napa lentansyon rezet Zeova konman zot Bondye. Zot ti ofer sakrifis avek sa pti bef annor me zot ti apel sa lokazyon en “lafet pour Zeova.” Dan en fason ou en lot, zot ti fer zot lekor krwar ki Bondye ti pou inyor zot dezobeisans. Sa ti en lensilt pour Zeova e i ti fer li vreman ankoler.—Egzod 32:5, 7-10; Psonm 106:19, 20.

14, 15. (a) Akoz bann Izraelit ti napa okenn lekskiz pour ekoute e apre oubliye? (b) Si nou determinen pour ekoute e pa oubliye, ki nou pou fer an rapor avek bann komannman Zeova?

¹⁴ Byen rar ki ou pou vwar en Temwen Zeova zwenn en fo larelizyon. Me menm ki serten i reste dan kongregasyon, zot kapab rezet lenstriksyon Zeova dan lezot fason. Lepep Izrael ti napa okenn lekskiz pour ekoute e apre oubliye. Zot ti antann sa Dis Komannman e zot ti prezan kan Moiz ti donn zot sa komannman  sorti kot Bondye: “Zot pa devret fer akote mwan bann bondye an larzan, e zot pa devret fer bann bondye annor pour zot menm.” (Egzod 20:18, 19, 22, 23) Pourtan, bann Izraelit ti ador sa bef annor.

¹⁵ Nou osi nou pou napa okenn rezon valab si nou zis ekoute pour oubliye apre. Dan Labib, nou ganny bann lenstriksyon sorti kot Bondye lo diferan laspe nou lavi. Par egzanp, Parol Zeova i klerman kondann sa pratik pour pret larzan e apre pa rann. (Psonm 37:21) Bann zanfan i ganny demande pour obeir zot paran e Zeova i ekspekte bann papa pour elve zot zanfan “dan en ledikasyon ek lenstriksyon Senyer.” (Efezyen 6:1-4) Bann Kretyen selibater i ganny demande pour marye “selon Senyer” e bann serviter Bondye ki’n marye i ganny sa konsey: “Ki maryaz i ganny onore par tou dimoun, e ki bann ki’n marye i reste fidel avek kanmarad. Bondye pou ziz bann ki anmenn en lavi dezordonnen e adilter.” (1 Korentyen 7:39; Ebre 13:4) Si nou determinen pour pa zis ekoute pour oubliye apre, nou pou pran tre oserye e respekte sa bann lenstriksyon ek lezot lenstriksyon ki ganny donnen.

16. Ki konsekans bann ki ti ador sa pti bef annor ti sibir?

¹⁶ Zeova pa ti aksepte ki bann Izraelit i ador li lafason ki zot oule. Okontrer, 3,000 zot ti ganny detrir, petet akoz zot ti zwe en rol enportan pour fer lezot rebele par ador sa pti bef annor. Lezot ki ti partisip ladan ti eksperyans en fleo sorti kot Zeova. (Egzod 32:28, 35) Pa sa i en leson pour bann ki lir Parol Bondye me ki apre swazir pour zot menm sa ki zot anvi obeir!

“Elwanny zot avek bann Pratik imoral”

17. Ki levennman 1 Korentyen 10:8 pe refer avek?

¹⁷ Pol ti fer resorti en domenn kot bann dezir laser i kapab fer nou oubliye spirityelman kan i ti dir: “Fodre pa nou tonm dan limoralite seksyel parey serten ant zot ti fer, desort ki 23,000 ti mor dan en sel zour.” (1 Korentyen 10:8) La Pol pe refer avek en lensidan ki ti arive dan Laplenn Moab alafen sa gran vwayaz ki Izrael ti fer dan dezer ki ti dir pour 40 an. Bann Izraelit ti fek ganny led Bondye pour konkerir serten pei dan les Zourden, me bokou ti oubliye e montre zot engra. Zot ti pros pour antre dan Later Promiz kan zot ti ganny antrennen dan limoralite seksyel e dan ladorasyon enpir  Baal Peor. Apepre 24,000 ti ganny detrir e 1,000 ladan ti sa bann ki ti antrenn lezot pour fer sa bann keksoz mal.—Nonm 25:9.

18. Ki kalite kondwit ki kapab fer en Kretyen komet imoralite seksyel?

¹⁸ Pep Zeova i ganny rekonnet pour zot standar moral tre eleve. Me kan serten Kretyen i ganny tante pour angaz dan imoralite seksyel zot pa mazin Bondye ek son bann prensip. Zot in vin bann ki ekoute pour oubliye apre. Okonmansman, petet sa tantasyon pa enplik fornikasyon li menm. I kapab konmans par en kiryozite pour get pornografi, par en fars oubyen en konportman endesan, oubyen par rod frekantasyon pros avek serten dimoun ki napa en bon moralite. Tou sa bann keksoz i antrenn bann Kretyen dan bann move kondwit.—1 Korentyen 15:33; Zak 4:4.

19. Ki konsey Biblik ki ed nou pour ‘elwanny nou avek bann pratik imoral’?

¹⁹ Si nou ganny tante pour fer en keksoz imoral, nou pa devret aret mazin Zeova. Okontrer, nou bezwen swiv son bann rapel ki trouve dan son Parol. (Psonm 119:1, 2) Konman Kretyen, laplipar nou, nou fer nou mye pour reste prop moralman me pour fer sa ki byen dan lizye Bondye i demann en zefor kontinyel. (1 Korentyen 9:27) Pol ti ekrir bann Kretyen an Ronm: “Tou dimoun i konn zot lobeisans pour Senyer. Mon kontan lo zot size, me mon a kontan war zot vin byen malen konsernan sa ki byen, me gard zot pir konsernan sa ki mal.” (Romen 16:19) Zis parey sa 24,000 Izraelit ti ganny detrir akoz zot ti fer pese, bann ki pe komet fornikasyon ek lezot keksoz mal pou byento ganny en zizman kondannasyon par Zeova. (Efezyen 5:3-6) Alor, olye ekoute pour oubliye apre, nou bezwen kontinyen ‘elwanny nou avek bann pratik imoral.’—1 Korentyen 6:18.

Touzour apresye sa ki Zeova i donn nou

20. Ki mannyer bann Izraelit ti teste Zeova, e ki rezilta sa ti anmennen?

²⁰ Lamazorite Kretyen pa zanmen les zot ganny antrennen par limoralite seksyel. Toudmenm, nou bezwen fer byen atansyon ki nou pa les nou tonm dan en labitid pour plennyen akoz sa i kapab fer nou pa ganny laprouvasyon divin. Pol ti averti nou: “Fodre pa ki nou tant Senyer, parey serten ant zot ti fer e ti ganny detri par serpan; ni plennyen parey serten antre zot ti fer e zot ti ganny eksterminen.” (1 Korentyen 10:9, 10) Bann Izraelit ti plenny kont Moiz ek Aaron—menm kont Bondye li menm—zot ti konplent sa lamann, ki zot ti gannyen dan en fason mirakile. (Nonm 16:41; 21:5) Eski Zeova ti mwen ofanse par zot konplent ki par zot fornikasyon? Resi Labib i montre ki bokou parmi bann ki ti plennyen ti ganny touye par bann serpan. (Nonm 21:6) Pli boner dan en lot lokazyon, plis ki 14,700 ti ganny detrir akoz sa latitid plennyen ki ti fer zot rebele. (Nonm 16:49) Alor, annou pa teste pasyans Zeova par mank respe pour sa ki i fourni nou.

21. (a) Ki konsey ki Pol ti ganny enspire pour ekrir? (b) Dapre Zak 1:25, ki mannyer nou kapab vreman vin ere?

²¹ Dan son let ki i ti ekrir son bann konpanyon Kretyen, Pol ti konklir son lalis lavertisman par sa konsey: “Tousala ti ariv zot pour servi konman legzanp pour lezot, me in ganny ekri konman en lavertisman pour nou, ki’n ariv dan letan lafen. Alor, sa ki krwar i pe debout, fer atansyon ki i pa tonbe.” (1 Korentyen 10:11, 12) Parey  bann Izraelit, nou osi nou’n ganny bokou benediksyon avek Zeova. Me kontrerman avek zot, annou pa zanmen oubliye e mank lapresyasyon pour bann bon keksoz ki Bondye pe fer pour nou. Kan nou ganny akable avek traka, annou mazin bann zoli promes dan son Parol. Fotespere ki nou mazin nou relasyon presye ki nou annan avek Zeova e ki nou kontinyen nou travay predikasyon ki i’n konfye nou. (Matye 24:14; 28:19, 20) Si nou fer sa, sirman nou pou trouv vre boner, parski Lekritir i promet: “Sa ki egzamin byen lalwa parfe, lalwa laliberte e ki persevere, e ki pa zis ekoute pour oubliye apre, me ki met an pratik, Bondye pou beni li dan tou son aktivite.”—Zak 1:25.

Konman ou pou reponn?

• Kwa ki kapab fer nou ekoute pour oubliye apre?

• Akoz lobeisans total anver Bondye i esansyel?

• Ki mannyer nou kapab ‘elwanny nou avek pratik imoral’?

• Ki latitid nou devret annan anver sa ki Bondye i donn nou?

[Not anba lo paz]

[Portre lo paz 11]

Bann Izraelit ti oubliy sa bann gran keksoz ki Zeova ti fer pour zot

[Portre lo paz 12]

Pep Zeova i determinen pour gard en standar moral tre eleve