Rezwir Akoz Ou Annan Konnesans Lo Zeova
Rezwir Akoz Ou Annan Konnesans Lo Zeova
“Ere . . . dimoun ki ekoute e obei parol Bondye.”—LIK 11:28.
1. Kan ki Zeova ti konmans kominik avek bann imen?
ZEOVA i kontan bann imen e i senserman enterese avek zot byennet. Alor i pa sirprenan ki i kominik avek zot. Sa kominikasyon ti konmans dan zarden Edenn. Dapre Zenez 3:8, en fwa “apepre sa moman dan lazournen kot labriz i soufle,” Adan ek Ev “ti tann lavwa Zeova Bondye.” I annan serten ki sizere ki sa i en lendikasyon ki Zeova ti annan labitid kominik avek Adan petet toulezour dan sa ler. Menm si i leka ou non, Labib i fer kler ki Bondye pa ti pran letan pour senpleman donn lenstriksyon sa premye zonm me osi pour ansenny li sa ki i ti bezwen konnen pour li desarz son bann responsabilite.—Zenez 1:28-30.
2. Ki mannyer sa premye koup ti elwanny zot avek gidans Zeova, e ki rezilta sa ti anmennen?
2 Zeova ti donn Adan ek Ev lavi, dominasyon lo bann zannimo, ek lotorite lo later antye. Ti annan en sel keksoz ki i ti defann zot fer—pour manz fri dan sa pye konnesans bon ek move. Enfliyanse par Satan, Adan ek Ev ti dezobei komannman Bondye. (Zenez 2:16, 17; 3:1-6) Zot ti swazir pour viv endepandan, e zot ti desid pour zot menm sa ki byen ek sa ki mal. An fezan sa, zot ti an realite elwanny zot avek gidans zot Kreater ki ti kontan zot. Bann konsekans ki zot ti sibir ek zot fitir desandans ti en katastrof. Avek letan, Adan ek Ev ti vin vye e finalman zot ti mor san okenn lespwar pour ganny resisite. Zot desandans ti erit pese ensi ki son konsekans, lanmor.—Romen 5:12.
3. Akoz Bondye ti kominik avek Kaen, e ki mannyer Kaen ti reazir?
3 Zeova ti kontinyen kominik avek son kreasyon, zonm, malgre sa rebelyon ki ti arive an Edenn. Kaen, premye garson Adan ek Ev, ti dan danze pour les li ganny dominen par pese. Zeova ti averti li ki i ti pe azir dan en fason ki ti kapab anmenn maler e i ti konsey li pour “byen azir.” Kaen ti rezet sa bon konsey e i ti touy son frer. (Zenez 4:3-8) Alor, sa trwa premye imen ti refiz gidans byen presi ki ti ganny donnen par sa enn ki ti’n donn zot lavi, sa Bondye ki donn son pep lenstriksyon pour zot prop benefis. (Izai 48:17) Sa ti’n bezwen dezapwent Zeova en kantite!
Zeova i fer bann Zonm fidel konn li
4. Ki konfyans Zeova ti annan an rapor avek desandans Adan, e avek sa antet ki mesaz lespwar i ti anonse?
4 Kantmenm Zeova ti annan tou drwa pour aret kominik avek bann imen, i pa ti fer li. I ti annan konfyans ki serten desandans Adan ti pou swiv Son lenstriksyon avek sazes. Par egzanp kan i ti pas zizman lo Adan ek Ev, Zeova ti predir ki en “semans” ti pou vini e ki i ti pou reziste sa Serpan, Satan Dyab. Avek letan, Satan ti pou ganny en blesir fatal dan son latet. (Zenez 3:15) Pour bann ki “ekoute e obei parol Bondye,” sa profesi ti en mesaz ki ti anmenn lespwar pour zot.—Lik 11:28.
5, 6. Dan ki fason Zeova ti kominik avek son pep avan premye syek N.L., e ki mannyer sa ti benefisye zot?
5 Zeova ti fer bann ansyen patriars konn son lavolonte, bann fidel parey Noe, Abraam, Izaak, Zakob, ek Zob. (Zenez 6:13; Egzod 33:1; Zob 38:1-3) Plitar, i ti donn Moiz en kod lalwa pour nasyon Izrael. Lalwa Mozaik ti benefisye zot dan plizyer fason. An obzervan sa Lalwa, Izrael ti separe avek tou lezot nasyon konman en pep spesyal pour Bondye. Bondye ti asir bann Izraelit ki si zot ti obeir son Lalwa, i ti pou beni zot pa selman lo plan materyel me osi lo plan spirityel par fer zot vin en rwayonm pret, en nasyon sen. Lalwa ti menm fourni bann lareg lo nouritir ek lizyenn ki ti promot en bon lasante. Parkont, Zeova ti osi averti bann konsekans trazik ki ti pou arive si zot ti dezobei Lalwa.—Egzod 19:5, 6; Deterononm 28:1-68.
6 Avek letan, lezot liv enspire ti ganny azoute avek lalis ofisyel bann lezot lekritir ki ti pou form Labib. Bann resi istorik ti koz lo lafason ki Zeova ti azir avek bann nasyon ek pep. Bann liv poetik ti dekrir son bann kalite dan en fason merveye . Bann liv profetik ti predir konman ki lavolonte Bondye ti pou realize dan lavenir. Bann zonm fidel dan letan ansyen ti etidye e aplik sa bann lekritir enspire. Enn sa bann zonm ti ekrir: “Ou parol i en lalanp pour mon lipye, e en lalimyer pour mon semen.” (Psonm 119:105) Pour bann ki ti pare pour ekoute, Zeova ti donn zot ledikasyon ek leklersisman.
Lalimyer i vin pli kler
7. Kantmenm Zezi ti fer bann mirak, konman ki lezot ti konn li prensipalman, e akoz?
7 Dan premye syek, bann group relizye Zwif ti’n deza azout bann tradisyon zonm avek Lalwa. Lalwa pa ti pe ganny aplike konman fodre, e olye vin en sours leklersisman sa bann tradisyon ti fer li vin en fardo. (Matye 23:2-4) Toudmenm, lannen 29 N.L., Zezi ti aparet konman Mesi. Son misyon pa ti senpleman pour donn son lavi pour limanite me osi pour “servi temwen pour laverite.” Kantmenm Zezi ti fer bann mirak, dimoun ti prensipalman konn li konman “Ansennyan.” Son lansennyman ti parey en lalimyer ki ti penetre dan sa fernwanr spirityel ki ti pe avegle lespri bann dimoun. Zezi li menm ti byen dir: “Mwanmenm lalimyer lemonn.”—Zan 8:12; 11:28, NW; 18:37.
8. Ki bann liv enspire ki ti ganny ekrir dan premye syek N.L., e konman ki zot ti benefisye bann premye Kretyen?
8 Plitar kat resi lo lavi Zezi, apele Levanzil, ti ganny azoute e osi liv Akt, en resi ki koz lo konman ki vre larelizyon Kretyen ti propaze apre lanmor Zezi. Ti annan osi bann let enspire ki bann disip Zezi ti ekrir, ensi ki liv profetik, Revelasyon. Sa bann lekritir ansanm avek Lekritir Ebre ti fer en lalis konplet bann liv Labib. Avek led sa bibliotek enspire, bann Kretyen ti pou kapab “konpran larzer, longer, oter e profonder” laverite. (Efezyen 3:14-18) Zot ti pou kapab annan “Lespri Kris.” (1 Korentyen 2:16) Kantmenm sa, bann premye Kretyen pa ti konpran antyerman tou laspe bann plan Zeova. Zapot Pol ti ekrir son bann konpanyon Kretyen: “La sa ki nou war aprezan i en zimaz sonm ki reflekte dan en laglas sonm.” (1 Korentyen 13:12) En laglas an metal ti pou reflekte en zimaz sonm me pa tou detay. En pli bon konpreansyon lo Parol Bondye ti ankor pe vini.
9. Ki leklersisman ki’n vini pandan “bann dernyen zour”?
9 Ozordi, nou pe viv dan en lepok ki ganny apele “bann dernyen zour,” en lepok marke par “letan difisil.” (2 Timote 3:1) Profet Danyel ti predir ki pandan sa letan ki “vre konnesans [ti] pou vin an abondans.” (Danyel 12:4) Se pour sa ki Zeova, Gran Kominikater, in ed bann dimoun senser pour konpran son Parol. En kantite dimoun i aprezan konnen ki Zezi Kri ti ganny kouronnen dan lesyel envizib an 1914. Zot konnen osi ki byento i pou met en lafen avek tou mesanste lo later e i pou transform later konman en paradi. Sa laspe enportan sa bon nouvel lo Rwayonm pe aktyelman ganny prese partou lo later.—Matye 24:14.
10. Pandan bann syek, ki mannyer bann dimoun in reazir avek konsey Zeova?
10 Wi, diran listwar, Zeova in fer dimoun lo later konn son lavolonte ek son plan. Labib i dekrir plizyer ki ti ekout e aplik lasazes divin, e zot ti ganny beni pour sa. I koz lo lezot ki ti rezet bon konsey Bondye e swiv sa semen destriksyon ki Adan ek Ev ti pran. Zezi ti ilistre sa sitiasyon kan i ti koz lo de semen senbolik. Enn i anmenn anver destriksyon. Vi ki i larz e fasil, bokou ki rezet Parol Bondye i swiv li. Lot semen i anmenn anver lavi eternel. Menm si i etrwat, i sa santye kot sa pti gin pe marse, sa bann ki aksepte Labib pour sa ki i ete, Parol Bondye, e ki pe viv an armoni avek li.—Matye 7:13, 14.
Rekonesan pour sa ki nou annan
11. Ki nou konnesans ek nou krwayans dan Labib i prouve?
11 Eski ou parmi sa bann ki’n swazir semen lavi? Si i leka, san dout ou anvi reste lo la. Ki mannyer ou kapab fer sa? Medit regilyerman e avek rekonesans lo bann byenfe ki ou’n gannyen apre ki ou’n konn laverite Biblik. Senpleman lefe ki ou’n byen resevwar sa bon nouvel i prouve ki Bondye in beni ou. Zezi ti endik sa kan i ti priy avek son Papa: “Mon remersi ou Papa, Senyer lesyel ek later, akoz ou’n kasyet avek bann dimoun malen e entelizan tou sa bann keksoz , me ou’n revel li avek bann zanfan.” (Matye 11:25) Bann peser ek bann kolekter taks ti konpran lansennyman Zezi tandis ki bann sef relizye ki ti byen edike pa ti kapab konpran. Anplis Zezi ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Si ou’n konn Labib, ou krwar ladan e ou pe swiv son bann lansennyman, sa i prouve ki Zeova in atir ou. I en rezon pour rezwir.
12. Dan ki fason Labib i eklersi nou?
12 Parol Bondye i kontyen bann laverite ki liber nou e eklersi nou. Bann dimoun ki viv an akor avek konnesans Labib i ganny libere avek bann siperstisyon, bann fo lansennyman, ek linyorans ki domin lavi plizyer milyon dimoun. Par egzanp, konn laverite konsernan nanm i fer nou nepli per ki en dimoun mor i a fer nou ditor oubyen per ki nou bann defen ki nou ti kontan pe soufer. (Ezekyel 18:4) Konn laverite lo bann lanz mesan i ed nou evit danze tou bann pratik ki annan pour fer avek zot. Lansennyman konsernan rezireksyon i rekonfort bann ki’n perdi en dimoun pros dan lanmor. (Zan 11:25) Bann profesi Labib i montre nou kote nou ete lo deroulman letan e i fer nou annan konfyans dan bann promes Bondye pour lavenir. Zot osi afermi nou lespwar pour viv pour touzour.
13. Konman ki obzerv Parol Bondye in ed nou pour benefisye fizikman?
13 Bann prensip Bondye ki trouve dan Labib i ed nou pour viv en fason ki anmenn bann byenfe fizik. Par egzanp, nou aprann abandonn bann pratik ki sali nou lekor, tel konman abiz bann drog parey taba ek lezot. Nou pa servi lalkol an ekse. (2 Korentyen 7:1) Obzerv bann lalwa Bondye lo moralite i servi konman en proteksyon pour nou kont bann maladi ki ganny transmet par sèks. (1 Korentyen 6:18) Kan nou swiv konsey Bondye pour evite kontan larzan, nou pa detrir nou lape lespri parey bokou dimoun in fer ler zot in tay deryer larises. (1 Timote 6:10) Konman ki ou ou’n benefisye fizikman apre ki ou’n aplik Parol Bondye dan ou lavi?
14. Ki lenfliyans lespri sen i annan dan nou lavi?
14 Si nou viv an akor avek Parol Bondye, nou pou resevwar son lespri sen. Nou kiltiv en personnalite parey pour Kris, avek bann kalite tel konman mizerikord ek konpasyon. (Efezyen 4:24, 32) Lespri Bondye i osi prodwi son fri dan nou—lanmour, lazwa, lape, pasyans, labonte, fidelite, ladouser, kontrol lo nou prop lekor. (Galat 5:22, 23) Sa bann kalite i promot en bon relasyon ki satisfezan avek lezot, enkli manm nou fanmiy. Nou ganny en lafors anndan nou ki ed nou pour fer fas avek bann difikilte avek kouraz. Eski ou’n remarke konman ki lespri sen in enfliyans ou lavi pour le meyer?
15. Konman ki nou’n benefisye ofiramezir ki nou’n fer nou lavi vin an armoni avek lavolonte Bondye?
15 Nou fortifye nou relasyon avek Zeova ofiramezir ki nou fer nou lavi vin an armoni avek son lavolonte. Deplizanpli nou konvenki ki i konpran nou e kontan nou. Nou aprann atraver leksperyans ki i soutenir nou dan bann moman difisil. (Psonm 18:18) Nou remarke ki i vreman ekout nou lapriyer. (Psonm 65:2) Nou depan lo son gidans, akoz nou annan konfyans ki i pou benefisye nou. E nou annan sa lespwar merveye ki dan son letan apropriye Bondye pou fer tou sa ki’n fidel avek li vin parfe e i pou akord zot son kado, lavi eternel. (Romen 6:23) “Apros avek Bondye, e i ava apros avek zot,” disip Zak ti ekrir. (Zak 4:8) Eski ou santi ki ou relasyon avek Zeova in vin pli solid anmezir ki ou’n apros avek li?
En Trezor ki pa kapab ganny konpare
16. Ki bann sanzman ki serten Kretyen premye syek ti fer?
16 Pol ti rapel bann Kretyen ki’n ganny swazir par lespri ki en letan serten parmi zot ti bann fornikater, bann adilter, bann omoseksyel, bann voler, bann anvye, bann soular, bann ki fer kalonmni e bann ki akapar byen zot prosen. (1 Korentyen 6:9-11) Laverite Biblik in fer zot fer bann gran sanzman; zot in ganny “pirifye.” Esey mazinen ki mannyer ou lavi ti a kapab ete si ou pa ti’n aprann sa laverite dan Labib ki’n liber ou. Vreman laverite i en trezor ki pa kapab ganny konpare avek okenn lezot keksoz. Pa nou kontan ki Zeova i kominik avek nou!
17. Konman ki bann Temwen Zeova in ganny nouri spirityelman dan bann renyon Kretyen?
17 Deplis, mazinen ki kantite byenfe nou gannyen atraver nou lasosyasyon frer ki sorti dan tou ras! ‘Lesklav fidel e pridan’ i fourni nouritir spirityel dan en letan apropriye, ki enkli Labib, magazin, ek lezot piblikasyon dan bokou lezot langaz. (Matye 24:45-47) Dan bann renyon diran lannen 2000, bann Temwen Zeova dan plizyer pei ti egzamin bann pwen enteresan dan wit liv mazer Lekritir Ebre. Zot ti medit lo lavi 40 karakter Biblik ki ti ganny diskite dan Étude perspicace des Écritures. Zot ti etidye apepre en kar sa liv Le plus grand homme de tous les temps e liv Porte attention à la prophétie de Daniel! preski an antye. Apard ki sa 52 lartik letid, zot ti osi revwar 36 lezot lartik dan magazin Latour Veyer. Anplis ki sa, pep Zeova ti ganny nouri avek 12 nimero Nou Minister Rwayonm ek bann diskour piblik lo divers size Biblik. Pa i ti en konnesans spirityel byen ris ki zot ti gannyen!
18. Ki fason ki nou ganny led dan kongregasyon Kretyen?
18 Atraver bann renyon ek lasosyasyon, anviron 91,000 kongregasyon partou dan lemonn pe ofer soutyen ek lankourazman. Nou osi apresye soutyen bann Kretyen mir ki touzour pare pour asiste nou spirityelman. (Efezyen 4:11-13) Wi, nou’n vreman benefisye en kantite kan nou’n ganny sa konnesans laverite. I en lazwa pour nou konn Zeova e servi li. Pa i vre sa ki sa psalmis ti ekrir: “Ere sa pep ki son Bondye i Zeova!”—Psonm 144:15.
Eski ou mazinen?
• Avek ki sennla Zeova ti kominike avan letan Kretyen?
• Ki mannyer lalimyer spirityel in vin pli kler dan premye syek? dan letan modern?
• Ki bann byenfe ki nou gannyen kan nou viv an akor avek konnesans lo Zeova?
• Akoz nou kontan ki nou’n ganny konnesans lo Bondye?
[Kestyon]
[Portre lo paz 22]
Zeova ti fer Moiz, Noe ek Abraam konn son lavolonte
[Portre lo paz 23]
Dan nou letan, Zeova in fer son Parol vin pli kler
[Portre lo paz 24]
Mazinen ki kantite byenfe nou gannyen atraver nou lasosyasyon frer sorti dan tou ras!